Yol-Xeber.Az - Təlxəyə çevrilən keşişin uğursuzluğu və ya puç olan ümidlər

Təlxəyə çevrilən keşişin uğursuzluğu və ya puç olan ümidlər - NƏ BAŞ VERİR

14:00 23.05.2024 | Baxış sayı: 567

“Ermənistanda 20 gündən çox davam edən "etiraz hərəkatı" adlı sirk şousu, deyəsən, nəhayət ki, sona çatdı. Bütün bunların arxasında duran “Qarabağ klanı”nın rəhbərlərinin və Ermənistandan kənarda olan qüvvələrin narazıdırlar. Arxiyepiskop Baqrat Qalstanyan onların ümidlərini doğrultmadı, sərf olunan zəhməti, pulu hədər etdi”. Bu sözləri erməni analitik Tevos Arşakyan Ermənistanda Tavuş arxiyepiskopu Baqrat Qalstanyanın Azərbaycanla sərhədlərin delimitasiyasına qarşı başlatdığı etiraz hərəkatının öləziməsi barədə yazdığı məqalədə qeyd edib.

Arşakyanın fikrincə, Qalstanyan heç vaxt “erməni Xomeynisi” ola bilməzdi: “Baxmayaraq ki, “Vətən üçün Tavuş” hərəkatının ilkin mərhələsində cəmiyyətin müəyyən hissəsində belə bir təəssürat yaranmışdı ki, arxiyepiskop İrəvana çatsa, hakimiyyət onun əlinə keçəcək. Amma alınmadı, Baş nazir Nikol Paşinyanın simasında hakimiyyət nəinki ayaqda qaldı, hətta etirazlardan sonra daha da gücləndi.

“Ölkə əhalisinin əksəriyyətinin Qalstanyan haqqında heç bir illüziyası yox idi. Bəli, əvvəlcə belə bir hiss var idi ki, daxili siyasi meydanda Paşinyanı devirə biləcək bir qüvvə meydana çıxıb. Xalqın gözündə özünü tamamilə ləkələyən sabiq birincilər – Robert Köçəryan, Serj Sarkisyan qüvvə deyil. Amma burada bizim cəmiyyətə təsiri böyük olan Erməni Apostol Kilsəsi işə düşdü. 2018-ci il inqilabından sonra indiki katolikosun başçılıq etdiyi kilsə xadimlərinin çirkin işləri üzə çıxdı. Bu amil insanların əksəriyyətinin Kanadada baş vermiş korrupsiya qalmaqallarında izi olan arxiyepiskopu izləməməsində də rol oynadı. Bundan əlavə, Qalstanyanın Köçəryan və onun adamları ilə əlaqələri ciddi şəkildə yoxlanılmamışdı. Onların arxasında isə məlumdur ki, Rusiya dayanır. Burada iqtidaryönlü media hətta heç nə icad etməli deyildi - arxiyepiskop özü həm daxili, həm də xarici qüvvələrdən müstəqilliyinə şübhə etməyə əsas verdi. Xalqın hələ də Moskvanın xəyanətindən özünə gəlmədiyi indiki Ermənistanda Rusiyapərəst qüvvələrin hakimiyyəti ələ keçirmək şansına yalnız dəli arxalana bilər”, - analitik vurğulayıb.

Arşakyan iddia edir ki, etiraz hərəkatına ruhu və vücudu Ermənistana köklənmiş vicdanlı bir insan rəhbərlik etsə belə, onun Moskva ilə əlaqəsinə dair ən kiçik bir şübhə siyasi gələcəyinə son qoyar: “Ermənistanda hakimiyyəti ələ keçirmək istəyən hər kəs bunu yadda saxlamalıdır - bizim əhali arasında Rusiyanın imici o qədər mənfidir ki, rusiyapərəst namizədin arxasınca ancaq çılğın olan xırda qurup gedə bilər. Bundan başqa, Qalstanyan və onun arxasında duran qüvvələrin etiraz aksiyalarının iştirakçılarının sayını daha da artırmaq üçün heç bir resursu yox idi. Bəli, İrəvanda keçirilən ilk mitinqdə 20 mindən çox insan iştirak edib. Lakin insanlar tez bir zamanda əmin oldular ki, arxiyepiskop xalqın ardınca gedəcəyi şəxs deyil. O, çox və tutarsız danışır, gələcək fəaliyyət proqramının konturlarını təqdim etmir, nəinki aydın, yaxşı tərtib olunmuş iş planını. Bununla yanaşı, Qalstanyanın başçısı olduğu hərəkat güclənməyə vaxt tapmamış, hökumətdə gələcək postlar üçün daxildə mübarizə başladı. Yəni öldürülməmiş ayının dərisini əvvəldən bölməyə başladılar. Təbii ki, bununla ictimaiyyət həm Qalstanyanın özündən, həm də hərəkatdan tez məyus oldu”.

“Yeri gəlmişkən, etiraz hərəkatının “lideri” Paşinyana ultimatum irəli sürərkən onu ələ salmışdı, istefa vermək üçün bir saat vaxt vermişdi. Ancaq artıq 10 gün keçir və Qalstanyan hələ də həmin “saatın” bitməsini gözləyir. Arxiyepiskop etiraz kütlələrini hökumət binasını mühasirəyə almağa heç vaxt cəsarət etmədi. Bəxt cəsurlara üstünlük verir. Qorxaqlar adətən uduzurlar. Xüsusilə də siyasətdə. Xüsusən də Qafqazda yalnız cəsurlar öz məqsədlərinə çatırlar”, - Arşakyan əlavə edib.

Analitik qeyd edir ki, Qalstanyan etirazında nə qədər israrlı olsa, bir o qədər kənd toyunda tamada kimi görünür: “Bunu xüsusilə onun mayın 18-də mədəniyyət xadimləri ilə keçirdiyi görüşü göstərir. Bəli, ora 300-ə yaxın adam gəlmişdi, lakin onların əksəriyyəti ümumiyyətlə ictimaiyyətə məlum deyil. Tanınanlar isə Şuşan Petrosyan kimi Köçəryanın və Sarkisyanın artistləri olan şübhəli reputasiyaya malik şəxslər idilər, hansı ki, yaxşı pul qazanıblar, indi onu qorumaq istəyirlər. Bəs Qalstanyanın belə “mədəniyyət xadimləri” ilə görüşünün siyasi məqsədi nə idi?”.

“Arxiyepiskop özü bu döyüşü Paşinyana tamamilə uduzduğunu etiraf etmir. Onunla görüşə getdikcə daha az adam gəlməsinə baxmayaraq, o, Baş nazir postuna keçə biləcəyinə ümid bəsləməkdədir. Belə ki, o, artıq mayın 26-da növbəti mitinqin planlaşdırıldığını açıqlayıb. Ancaq bir şey aydındır ki, sonda Qalstanyan “etirazın” yeganə iştirakçısı olacaq - həm natiq, həm də dinləyici olacaq. Çünki keçmişin və Moskvanın təhriki ilə Ermənistanın sabitliyinə, firavanlığına, müstəqilliyinə qarşı çıxmaq qərarına gələnlərin məntiqi sonu budur”, - deyə siyasi icmalçı yazısını tamamlayıb.

Ayna.az

Təlxəyə çevrilən keşişin uğursuzluğu və ya puç olan ümidlər - NƏ BAŞ VERİR

Bölmənin digər xəbərləri

Xəbər lenti