Bu barədə Azərbaycan Prezidenti İlham Əliyev iranlı həmkarı ilə birgə mətbuata bəyanatla çıxışında deyib.

“Yol-xeber.az” xəbər verir ki, Dövlət başçısı qeyd edib ki, Araz dəhlizi layihəsi böyük diqqət cəlb edir. Bu, yeni bir nəqliyyat, bağlantı layihəsidir və Azərbaycanın əsas hissəsini Naxçıvan Muxtar Respublikası ilə İran ərazisindən birləşdirən bir layihədir:

"Burada, eyni zamanda, böyük tranzit imkanları yaranacaq. Bu, sadəcə olaraq, bu bölgənin layihəsi deyil. Biz hesab edirik ki, bu, Asiyadan Avropaya uzanan nəqliyyat dəhlizinin bir qolu olmalıdır. Bir tərəfi Aralıq dənizinə, bir tərəfi Fars körfəzinə uzanan yeni nəqliyyat bağlantı dəhlizi olmalıdır və bir çox ölkələr bundan fayda götürəcək".

Prezident İlham Əliyev bildirib ki, Araz çayı üzərində Azərbaycan tərəfinə düşən körpünün inşası, demək olar, hazırdır:

"O ki qaldı, dəmir yolu körpüsünə, bu məsələ də müzakirə mövzusudur. Biz dəmir yolumuzu artıq gələn il İran sərhədinə, Zəngilan-Ağbənd istiqamətinə çatdıra bilərik və təbii olaraq İran ərazisində dəmir yolu inşası da nəzərdə tutularsa, o zaman bu da beynəlxalq nəqliyyat dəhlizi olacaq".