Yol-xeber.az cəmiyyətdə xüsusi nüfuzu olan namizədlərə “Niyə deputat olmaq istəyirsiniz?”, “Deputat necə olmalıdır” sualları ilə müraciət edir.

Bu dəfə isə suallarımızı Azərbaycan Dəmir Yolları QSC-nin Maliyyə rəisinin müavini,  99 saylı Şəmkir kənd seçki dairəsindən namizəd Vəsilə Abulova cavablandırdı.

Vəsilə xanım deyir ki, əsas məqsədi daha çox insanlara kömək etməkdir:

“Ümumiyyətlə, mən harada çalışmışamsa, orada təkcə vəzifəmi icra etməklə qane olmamışam. Hər zaman çalışmışam ki, daha çox insanlara kömək edim. Bilirsiniz, ehtiyacı olan hər kəsə kömək etmək bizim xalqa məxsus dəyərdir. Bu mənada düşünmüşəm ki, insanın vəzifəsi artdıqca daha çox ehtiyacı olanlara kömək edə bilər. Yəni, mənim üçün vəzifə vasitədir. Deputatın da daha çox insanlara kömək etmək imkanları var və mən da qarşımda məqsəd qoydum ki, əgər mənsub olduğum bölgənin insanları mənə etimad göstərib səs verərlərsə, arzumu gerçəkləşdirim”.

O, “Deputat necə olmalıdır?” sualını isə belə cavablandırıb:

“Mənim fikrimcə, deputat hər bir seçicinin problemini öz problemi hesab etməlidir. Deputat hər bir seçiciyə əl çatan olmalıdır, hər bir seçicisini doğma adamı kimi sevməlidir. Mən imza vərəqələrini doldururkən müraciət etdiyim insanlarla təmasda olduqca bu fikirlərin nə qədər doğru olduğunun bir daha şahidi oldum”.

Twitter