Su hövzələri üzrə mütəxəssis Dr. Cəvahiri 1998-ci ildə mənə dedi ki, gölün ətrafında bəndlərin tikilməsi davam edəcəyi təqdirdə, göl 2016-ci ilədək quruyacaq.

Axar.az xəbər verir ki, bu sözləri İran Ətraf Mühit Təşkilatının rəisi İsa Kələntəri Urmiya gölü haqda danışarkən deyib. O, tətbiq olunan qədim üsullarda düzəlişə ehtiyac olduğunu diqqətə çatdırıb:

“O zaman bəziləri bu sözə şübhə ilə yanaşaraq dedilər ki, bu həcmdə su mövcud olduğu halda gölün quruyacağından söhbət gedə bilməz. Bizim səlahiyyətli qurumlarımız isə sükut edir. Çoxları yalnız öz şəxsi və ya qurum mənafeyini güdür. Bu vəziyyətdə bir hərbçi və ya bir neçə millət vəkili meydana çıxaraq istədiyi siyasəti tətbiq edir. Bir neçə nəfəri nümunə kimi idarəyə çağıraraq onların ölkədən çıxışına qadağa qoyurlar. Dərnəklərimiz isə hamısı bu hadisələrə seyrçi qalır. Heç bir ölkə yenilənən qaynaqların təbii ehtiyatlarından 40 faizdən çox istifadə etməməlidir, lakin İranda 130 faizi istehlak edilir. Biz qəbul etməliyik ki, iqlim dəyişikliyi var. Suyun həcmi isə azalır və şorlaşır. Artıq qədim üsullarla hazırkı vəziyyəti tənzimləmək mümkün deyil”.

Qeyd edək ki, Urmiya gölünün 95 faizi quruyub. Gölün quruması ilə bölgənin ətraf mühitində baş verən dəyişikliklər 15 milyondan çox insanın həyatını təhdid edir.

Twitter