İctimai nəqliyyatda sərxoş şəxslərin problem yaratmasına son vaxtlar tez-tez rast gəlirik. Bu da şəhərimiz üçün arzuolunmaz məsələdir.

Bu sözləri Axar.az-a açıqlamasında ötən gün sərxoş şəxsin metroda gənc qızlara qarşı əxlaqsız hərəkətlərə yol verməsinə münasibət bildirən sosioloq Əhməd Qəşəmoğlu deyib. Bu kimi halların ölkənin imicinə zərər vurmaqla yanaşı, həm də şəhər sakinləri, turistlər üçün böyük narahatlıq törətdiyini bildirən sosioloq kompleks tədbirlərin həyata keçirilməsini təklif edib:

“Digər ölkələrin sosioloqları ilə apardığımız müzakirələrə görə, şəhər sakinlərinin davranışı ölkənin mədəni səviyyəsi ilə bağlı çox mühüm göstəricidir. Düzdür, ölkədə belə halların qarşısını almaq üçün işlər həyata keçirilir. Amma bu nəticə vermədiyi üçün kompleks işlər görməliyik. Bu kompleks işlər ondan ibarətdir ki, burada həm də inzibati metodlar, ictimai qınaq, ictimai təzyiq və maarifləndirmə tədbirləri həyata keçirilməlidir. Adətən xaricdə bu kimi tədbirləri QHT-lər təşkil edir. Bizim ictimai və qeyri-hökumət təşkilatlarımız da belə bir hərəkatlar keçirməlidirlər. Yəni könüllülərdən ibarət qrup şəhərdə buna nəzarət etsin. Televiziyalarımız da ictimai nəqliyyatda davranış qaydaları ilə bağlı verilişlər hazırlaya bilərlər. Bu verilişləri ictimai nəqliyyatlara məxsus fond tərəfindən cüzi bir məbləğ ayırmaqla da hazırlamaq olar. Biz həm televiziyaların, QHT-lərin, həm də bu kobudluqlara yol verənlərin inzibati qaydada cəzalandırılması və ya cərimələnməsi vasitəsi ilə belə halların qarşısını ala bilərik”.

Qeyd edək ki, 6 sentyabrda içkili halda olan 1981-ci il təvəllüdlü Seymur Abbasov adlı şəxs metroda gənc qızlara qarşı əxlaqsız hərəkətlər edib. Vaqondakı sərnişinlərin etirazı ilə polis hadisəyə müdaxilə edib və ictimai qaydaları pozan xuliqanı saxlayıb.

S.Abbasov barəsində görülən tədbirlə bağlı rəsmi açıqlama yoxdur.

Twitter