09:40

İqtisadçı alim Qubad İbadoğlunun təklifləri olduqca maraqlı və cəlbedicidir.

Baxmayaraq ki, ölkədə bu sahədə işlər görülür. Amma real vəziyyət o qədər də ürəkaçan deyil.

Bu sözləri Axar.az-a təhsil eksperti Kamran Əsədov iqtisadçı alim Qubad İbadoğlunun Təhsil Nazirliyinə təqdim etdiyi 3 təklifi şərh edərkən deyib. K.Əsədov bildirib ki, ekspertin təkliflərinin bir çoxunu nazirlik həyata keçirir, ancaq əlbəttə ki, müəyyən işlərə yenə də ehtiyac var:

“Təhsil haqqında qanuna edilmiş dəyişikliyə görə, respublika fənn olimpiadalarının qalibləri qalib gəldikləri ixtisaslar üzrə müsabiqədən kənar ali məktəblərə qəbul edilirlər. Bundan başqa, fənn olimpiadası haqqında əsasnaməyə görə, fənn olimpiadasının qalibləri Təhil Nazirliyi və Təhsil İşçiləri Azad Həmkarlar İttifaqı Respublika Komitəsi tərəfindən müəyyən olunmuş qaydada təltif edilirlər. Olimpiada qaliblərinə pul mükafatı və (və ya) hədiyyələr təqdim oluna bilər. Olimpiadada fərqlənmiş tələbələrə ali təhsil müəssisələrinin, digər nazirlik və təşkilatların mükafatları və hədiyyələri də verilə bilər. Bu hədiyyələrin içərisində hər il bahalı kompüter və digər qiymətli əşyalar olur. Qeyd edim ki, fənn olimpiadaları ölkəmizdə istedadlı uşaqların aşkarlanması, onların qabiyyətlərinin inkişafı istiqamətində mühüm işdir.

İkinci təklif vay-fay quraşdırılmasıdır ki, bu, əlbəttə ki, yaxşı olardı. Amma orta məktəblərin hamısı dövlət tərəfindən internetlə təmin olunub. Ayrıca olaraq sərbəst internetə giriş problem yarada bilər. 4472 orta məktəbin hər biri internetlə təmin olunub və məktəblərdəki kompüterlərin hamısının internetə çıxışı var. Amma problem bütün məktəblərə kompüterlərin yaxşı vəziyyətdə və internetin sürətindədir. Əgər bütün məktəblərə azad internet quraşdırılsa, bütün şagirdlərin başı burda vaxt keçirməyə qarışar”.

Ekspert bildirib ki, hazırda ev tapşırıqlarının onlayn bazası demək olar ki, fərqli formada mövcuddur:

“Belə ki, e-derslik, e-test portalları və digər portallar bu funksiyanı yerinə yetirsə də, bundan 1.6 milyon şagirdimizin cəmi 100 mini istifadə edir”.

K.Əsədov bildirib ki, bu gün bizim nəinki şagirdlərimiz, hətta informatika fənnini tədris edən müəllimlərimiz arasında kompüter proqramlaşdırmasını və bununla bağlı sahələri bilməyən müəllimlər var:

“Ona görə də bahalı, müasir avadanlıqları verəndə ondan istifadə edən olmayacaq. Qalib gələnlər isə o məktəbdə daimi olmayacaq. Təkliflər maraqlıdır, amma bu o demək deyil ki, təklif edilən məsələlər orta məktəblərdə yoxdur. Var, sadəcə olaraq, çox zəifdir”.

Qeyd edək ki, iqtisdçı ekspert Qubad İbadoğlu Təhsil Nazirliyinə 3 təklif təqdim edib:

1) 100 istedadlı şagird üçün qruplar təşkil edib onları yüksək göstəricilərə cavab verən texnika ilə təmin etmək;

2) Məktəblərin vay-fayla təmin edilməsi, dərslərin onlayn bazasının yaradılması;

3) Reytinqə görə ilk 100-lükdə olan bakalavr, magistr, doktorluq proqramı tələbələrinə ödənişlərinin, xərclərinin qarşılanması üçün təqaüdlərin verilməsi.

Twitter