Bu gün arıçılıq məhsullarının sərgi-satış yarmarkası açılıb.

Bu sözləri Axar.az-a açıqlamasında Kənd Təsərrüfatı Nazirliyinin mətbuat katibi Anar Hüseynov deyib. O bildirib ki, yarmarkada dünən sınaq satışı həyata keçirilib:

“Əsas məqsədimiz yarmarkada təqdim olunan arıçılıq məhsullarının satışını təmin etməkdir. Havanın temperaturunun kəskin dəyişməsi ilə əlaqədar yarmarka bir-iki gün yubandı. Buna görə də zərurət yaranarsa və arıçılar satışın bir neçə gün də davam etməsini istəyərlərsə, sərgi-satış yarmarkası üçün göstərilən vaxt uzadıla bilər”.

Nazirliyin rəsmisi onu da bildirib ki, yarmarkanın təxirə salınması arıçılıq məhsullarının saxlanılmasında heç bir problem yaratmayıb:

“Dövlət Aqrar İnkişaf Mərkəzlərimizə müraciət etdik ki, 5-28 oktyabr tarixlərində bal yarmarkası keçiriləcək və yarmarkada iştirak etmək istəyən şəxslər öz adlarını iqtisadi zonalarına, vaxtlarına uyğun olaraq, təqdim edə bilərlər. Təqdim edilən siyahı əsasında da sentyabrın 30-na kimi Tofiq Bəhramov adına Respublika Stadionunda xüsusi anbara məhsulların təhvili prosesi həyata keçirilib. Məhsulun hansı regionun və kimə məxsus olmasını aydınlaşdırmaq üçün anbarda rəqəmlərlə kodlaşdırma aparılıb. Qida Təhlükəsizliyi Agentliyi tərəfindən 3974 bal nümunəsi ekspertizadan keçirilib və təqribən 900 nümunənin keyfiyyətsiz olduğu aşkar edilib. Nəticədə 30 tona yaxın keyfiyyətsiz hesab edilən bal məhsulları xüsusi anbara yığılaraq satışdan çıxarılıb. Yarmarkanın təxirə salınması isə anbardakı balların keyfiyyətinə mənfi təsir etməyib”.

Qeyd edək ki, arıçılıq məhsullarının sərgi-satış yarmarkası Bakı şəhəri, Nərimanov rayonu, Fətəli xan Xoyski prospekti, 10 ünvanında (Tofiq Bəhramov adına Respublika Stadionunun ərazisi) keçirilir.

Twitter