Son vaxtlar paytaxt küçələrində sahibsiz küçə itlərinin insanlara qorxu yaşatması ilə bağlı xəbərlərə rast gəlirik. Belə şəraitdə heç kim küçə itlərinin hücumundan sığortalanmayıb. Bəs bir itlə qarşılaşan zaman və ya hücuma məruz qalanda necə davranmaq lazımdır?

Axar.az itlərin hücumundan qorunmaqla bağlı tövsiyələri təqdim edir:

1. İlk növbədə təlaşlanmayın. Əgər qışqırsanız, itin sizə hücum etmə ehtimalı arta bilər. Qaçmağa çalışmayın, çünki istənilən halda it sizə çatacaq.

2. Qətiyyən itə arxanızı çevirməyin, onunla qarşılaşsanız və təhlükə hiss etsəniz, asta-asta geriyə gedin.

3. İtə təpik vurmayın, o, bunu təhdid kimi qəbul edəcək.

4. Küçədə it görəndə göz kontaktı qurmayın.

5. Küçə iti sizə hücum edibsə, çantanız və ya başqa əşyanızla diqqətini yayındırın.

6. İmkan varsa, itin sizə çata bilməyəcəyi hündür bir yerə çıxın.

7. Əgər it qolunuzdan və ya hansısa nahiyənizdən yapışsa, həmin üzvünüzü dartıb onun ağzından çıxarmağa çalışmayın. Belədə ətiniz qopa bilər.

8. İt hücum etsə, üzünüzü, sinənizi və boğazınızı qoruyun. Əgər yıxılsanız, üzü üstə uzanın və əllərinizlə qulaqlarınızı örtün. İtə müqavimət göstərmək istəsəniz, boğazına, burnuna vurun. Unutmayın ki, itin baş nahiyəsi olduqca sağlamdır. Onun başına vurmağınız sadəcə iti daha çox qıcıqlandıra bilər.

9. İt dişləməsi zamanı infeksiya riskini nəzərə alaraq, yaranı təmiz bezlə silin və qanaxmanı dayandırın. İlıq su və sabunla yaralı bölgəni yuyun. İlkin yardımdan sonra mütləq həkim müayinəsindən keçin.

10. Lazımi təhlükəsizlik qaydalarını azyaşlılara da öyrədin.

Twitter