Yeni Günəşli yaşayış sahəsi istiqamətində Babək prospektinin Mikayıl Əliyev küçəsi ilə kəsişməsində (Maşın bazarı) yerləşən avtomobil körpüsünə girişdəki məhdudlaşdırmanın səhər saatlarında aradan qaldırlması nəzərdə tutulmuşdu.

Ancaq bu günlər ərzində havanın yağıntılı keçməsi işləri bir qədər yubatdığı üçün yolu səhər aça bilmədik.

Bu sözləri Axar.az-a Azərbaycan Avtomobil Yolları Dövlət Agentliyinin mətbuat katibi Anar Nəcəfli 3 gündür məhdudiyyət tətbiq edilən sözügedən yolun bu gün səhər saatlarında da bağlı olmasına aydınlıq gətirərkən bildirib.

A.Nəcəfli deyib ki, hazırda sözügedən yolda son tamamlama işləri görülür:

“Yol artıq xətlənir. Bu işlərin tez bitməsi gözlənilirdi. Lakin dediyim kimi, yağıntılı hava buna imkan vermədi. Ancaq indi yolda xətlənmə işləri həyata keçirilir. Bütün işlər bu gün tamamilə yekunlaşacaq”.

A.Nəcəfli bildirib ki, günortaya qədər yolda məhdudiyyət aradan qaldırılacaq:

“Təxminən 1-2 saata işlər yekunlaşacaq. Günorta artıq yol istifadəyə veriləcək”.

Qeyd edək ki, noyabr ayının 23-dən 24-nə keçən gecədən etibarən Yeni Günəşli yaşayış sahəsi istiqamətində Babək prospektinin Mikayıl Əliyev küçəsi ilə kəsişməsində (Maşın bazarı) yerləşən avtomobil körpüsünə giriş məhdudlaşdırılmışdı. Məhdudiyyətin bu gün səhər saatlarından etibarən aradan qaldırılacağı elan edilmişdi. Lakin səhər sözügedən yolun bağlı olması və əvvəlcədən elan edilməməsi böyük tıxac və gərginliyə səbəb olmuşdu.

Twitter