09:13

İsrail hərbçiləri bu gecə Suriyadakı İran silah anbarları və bir neçə hava hücumundan müdafiə batareyalarına qırıcılardan zərbə endiriblər.

Axar.az xəbər verir ki, Təl-Əviv bu zərbənin Qolan təpələrinə Suriyadan endirilən raket hücumuna cavab olduğunu bildirib. Hücum zamanı həmçinin İranın “Qüds” briqadasının hərbi obyektlərinin, İran kəşfiyyat mərkəzi və İran təlim düşərgəsinin hədəf alındığı vurğulanıb:

“İsrail ərazisinə dünən atəş açmaqla İran özünün Suriyadakı hərbi mövcudluğunun əsl hədəfini yenidən nümayiş etdirdi. İran İsrail dövləti və regional stabillik üçün təhdiddir”.

İsrail ordusu bundan sonra İran qoşunlarının İsrailin şimal sərhədlərində mövcudluğuna qarşı qətiyyətlə müqavimət göstərməyə davam edəcəyini bildirib. Rəsmi Təl-Əviv həmçinin Əsəd rejiminin ölkə ərazisində baş verən hər şeyə görə məsuliyyət daşıdığını bəyan edib.

Qeyd edək ki, sonuncu dəfə İsrail Suriyadakı İran qüvvələrinə belə genişmiqyaslı hücumu keçən ilin mayında həyata keçirmişdi.

Ötən gün isə İsrail ordusunun Dəməşqin cənub-şərqində yerləşən Duvali hava limanı istiqamətində hücumunun qarşısının alındığı və 7 raketin zərərsizləşdirildiyi barədə Rusiya MN məlumat yaymışdı.

***

İsrailin Suriyaya hücumu nəticəsində 4 nəfər ölüb, 6 nəfər yaralanıb.

Rusiya Müdafiə İdarəsi Milli Mərkəzi hücum zamanı Suriya hava hücumundan müdafiə qüvvələrinin 30-dan çox qanadlı raket və idarə olunan aviabombanı zərərsizləşdirdiyini bildirib.

Twitter