 |
|
Milli komandamızın hücumçusu Musa Qurbanlı icarə əsasında “Qarabağ”a qayıdacağı barədə yayılan xəbərləri təkzib edib.
Futbolxeber.az saytına açıqlamasında 22 yaşlı forvard hazırda çıxış etdiyi İsveçin “Yurqorden” klubundan tezliklə ayrılmaq barədə düşünmədiyini bildirib: “Belə bir məlumatım yoxdur. Hələ ki “Yurqorden”dəyəm və “Qarabağ”a qayıdacağım barədə heç bir qərar verilməyib. Bu haqda danışığımız olmayıb. Mən “Yurqorden”in futbolçusuyam və bu klubun uğurları üçün çalışıram. “Qarabağ”a qayıtmaq barədə hər hansı bir söhbət olmayıb”.
M.Qurbanlı İsveç klubundakı çətinliklərə hazır olduğunu vurğulayıb: “Mən İsveçə gedəndə bilirdim ki, bu, nağıl deyil, birdən-birə hansısa partlayış olmayacaq. Futbolda belə çətinliklər olur. Hazır idim bu çətinliklərə. Təbii ki, oynamayanda nəinki mənim üçün, ümumiyyətlə hər bir futbolçu üçün psixoloji cəhətdən asan olmur”.
O, hazırda öz şansını gözlədiyini söyləyib: “Fasilə müddətində komandaya yeni futbolçular cəlb olundu. Ola bilər ki, baş məşqçi hazırda yeni transferlərə daha çox şans verir. Mənim işim məşqlərimi edib öz şansımı gözləməkdir”.
Qeyd edək ki, dünən ölkə mətbuatında yayda Musa Qurbanlının “Qarabağ”a qayıdacağı və 2024/25 mövsümünü icarə əsasında Ağdam klubunda keçirəcəyi barədə xəbərlər yayılıb.
Əlavə edək ki, onun “Yurqorden”lə müqaviləsi 2026-cı ilin yayına kimidir.
UEFA "Qarabağ" klubunu 45750 avro cərimələyib.
"Report"un xəbərinə görə, qurum Bakıda Portuqaliyanın "Braqa" və Almaniyanın "Bayer 04" komandalarına qarşı Avropa Liqasının oyunlarında yaşananlara hüquqi qiymət verib.
"Köhlən atlar" "Braqa"ya qarşı pley-off mərhələsinin cavab matçında (2:3, əlavə vaxtda) lazer şüalarından istifadəyə görə 8000, təhqir xarakterli təxribatçı mesaj ucbatından 22500, ictimaiyyətə müraciət sistemindən düzgün istifadə edilməməsi səbəbindən 5000, komandanın düzgün olmayan davranışına görə 7500 avro ödəyəcək.
Leverkuzen təmsilçisi ilə 1/8 final mərhələsinin Bakıdakı ilk qarşılaşmasında (2:2) azarkeşlər pirotexniki vasitələrdən istifadə ediblər. "Qarabağ" bu səbəbdən 2750 avro ziyana düşüb.
Azərbaycan millisi Bakıda təşkil olunan “FIFA series - Edition 2024” layihəsində bu gün növbəti oyununu keçirəcək.
"Report"un məlumatına görə, yığma Bolqarıstan kollektivi ilə üz-üzə gələcək.
Tofiq Bəhramov adına Respublika stadionundakı qarşılaşma saat 20:00-da başlanacaq.
Görüşü estoniyalı hakim Kristo Tohver idarə edəcək.
“FIFA series – Edition 2024”
25 mart
20:00. Azərbaycan – Bolqarıstan
Baş hakim: Kristo Tohver (Estoniya)
Bakı, Tofiq Bəhramov adına Respublika stadionu
Qeyd edək ki, komandamız ilk matçında Monqolustana, bolqarlar isə Tanzaniyaya 1:0 hesabı ilə qalib gəlib.
İlk dəfə Bakıda təşkil olunan futbol üzrə “FIFA series - Edition 2024” layihəsi çərçivəsində bu gün ilk oyunlar keçiriləcək.
Azərbaycan millisi birinci görüşünə çıxacaq.
Arif Əsədovun rəhbərlik etdiyi komanda Monqolustan seçməsini qəbul edəcək. Tofiq Bəhramov adına Respublika stadionunda baş tutacaq qarşılaşma saat 20:00-da start götürəcək.
Qeyd edək ki, digər matçda Bolqarıstanla Tanzaniya üz-üzə gələcəklər. “Liv Bona Dea Arena”da təşkil olunacaq bu oyun saat 17:00-da başlayacaq.
“FIFA series - Edition 2024”
22 mart
20:00. Azərbaycan - Monqolustan
Baş hakim: Zorbay Küçük (Türkiyə)
Bakı, Tofiq Bəhramov adına Respublika stadionu
Türkiyənin "Beşiktaş" klubu Qurban Qurbanovla maraqlanır.
Qaynarinfo xəbər verir ki, bui barədə "Fotospor" portalı məlumat yayıb.
Bildirilir ki, İstanbul klununun futbol direktoru Samet Aybaba Leverkuzendə keçirilən Avropa Liqasının "Bayer" - "Qarabağ" matçını izləyib. O, "Qarabağ"da Abdullah Zubir və Juninyonu bəyənib. Üstəlik baş məşqçi Qurban Qurbanovun oyun stili Samet Aybabanın diqqətini çəkib.
İddia olunur ki, 2008-ci ildən "Qarabağ"ı çalışdıran Qurban Qurbanov 16 il sonra komandadan ayrılmağı və karyerasını Super Liqada davam etdirməyi planlayır.
O da qeyd edilir ki, hazırkı çalışdırıcı Fernandu Santuşdan sonra "Beşiktaş"ın baş məşqçisi postuna ən layiqli namizəd Qurban Qurbanov hesab olunur.
Türkiyənin "Eyüpspor" klubunun baş məşqçisi Arda Turan "Qarabağ"ın oyunu ilə bağlı paylaşım edib.
Offsideplus.az xəbər verir ki, 37 yaşlı mütəxəssis "instaqram"ın hekayə bölməsində Ağdam klubunun oyunundan şəkil qoyaraq "Möhtəşəm mübarizəyə görə təşəkkürlər. Təbriklər” yazıb.
Qarabağ" UEFA Avropa Liqasının 1/8 final mərhələsinin cavab oyununda "Bayer 04"ə son dəqiqələrdə buraxdığı qolla 2:3 hesabı ilə məğlub olub.
Offsideplus.az xəbər verir ki, məşhur idman saytları təmsilçimizin oyunu barədə paylaşımlar edib.
Daily Sports: "Qarabağ" nağıl kimi uğurun bir addımlığında idi. "Bayer"dən möhtəşəm geridönüş
BR Football: 10 nəfərlə oynayan "Qarabağ" 2:0 hesabı ilə "Bayer"ə qalib gəlməyə çox yaxındır ("Qarabağ"ın 2:0 hesablı üstünlüyü zamanı)
BBC Sport: "Bayer"in məğlubedilməzlik seriyası davam edir. Xabi Alonsonun komandası 70-ci dəqiqəyə qədər Azərbaycan klubuna 0:2 uduzurdu
Socrates: "Bayer"in məğlubiyyətsizlik seriyasını bitirməyə ən çox onlar yaxınlaşdı - Qarabağ FK
TRT Sports: Qurban Qurbanovun "Qarabağ"ı Avropaya damğa vurdu, amma olmadı
BBC.com: "Bayer Leverkuzen" "Qarabağ"ı dramatik şəkildə məğlub edərək Avropa Liqasının 1/4 finalına yüksəldi
Relevent Sports: "Bayer" "Qarabağ" tərəfindən mübarizədən kənarlaşdırılmağa çox yaxın idi. Son dəqiqələrdə vurulan 2 qol Xabi Alonsonun komandasını xilas etdi
Beinsports.com: "Bayer" Leverkuzen əsas vaxtda iki qol vuraraq “Qarabağ”ı məğlub edib və məğlubiyyətsiz qaldı
Vavel.com: "Bayer toparlanmağı bacardı və bəxti gətirdi ki, hakim vaxtı 10-cu dəqiqəyə qədər uzatdı
Flashscore.com: Patrik Şikin qəhrəmanlığı "Bayer"ə "Qarabağ" üzərində qələbə qazandırdı
Goal.com: Xabi Alonso ölümsüzdür! "Bayer Leverkusen" inanılmaz 37 oyunluq məğlubiyyətsizlik seriyasını qorudu
Espndeportes.com: Frimponq və Şikin qolları Almaniya təmsilçisinə yüksək xəyallar qurmağa imkan verdi.
Marca.com: Xabi yenə sarsılmadı - "Bayer Leverkusen" ilk oyunda olduğu kimi geri dönüş etdi
Fanatik.com.tr: "Bayer Leverkuzen" - "Qarabağ" matçında taleyin dönüşü! Azərbaycan təmsilçisi son anda məğlub oldu
Sportbox.ru: "Bayer" "Qarabağ"ı əsas vaxtda məğlub edərək Avropa Liqasının 1/4 finalına yüksəlib.
Avroliqada "Qarabağ"ı son dəqiqələrdə məğlub etməyi bacaran alman klubu çətinlik çəkdiyini etiraf edib.
"Bayer" Leverkuzenin sosial media hesabı təmsilçimizlə qarşılaşmadan sonra maraqlı paylaşımı ilə diqqət çəkib.
"Komandanıza böyük hörmət! Bizə 4 gözəl oyun hədiyyə etdiniz, amma xahiş edirəm, bunu bir daha təkrar etməyək!", - deyə qeyd edilən postun sonuna gülüş smayliki qoyulub.
Xatırladaq ki, UEFA Avropa Liqasının 1/8 final mərhələsində Almaniyada "Bayer"in qonağı olan "Qarabağ" son dəqiqələrdə buraxdığı qolla məğlub olub - 3:2.
"Qarabağ" klubuna oyunda edilən hakim haqsızlıqları barədə paylaşım edilib.
"Tbunu dünyaca məşhur futbol səhifəsi roll Football" edib.
"Bayer Leverkusen"in köməyə ehtiyacı var və o an hakim".
Futbolçularıma son ana kimi mübarizə apardıqlarına, azarkeşlərimizə isə bizə dəstək olduqlarına görə təşəkkür edirəm.
Bu sözləri "Qarabağ"ın baş məşqçisi Qurban Qurbanov UEFA Avropa Liqasının 1/8 final mərhələsində Almaniyada "Bayer" klubuna 2:3 hesabı ilə məğlub olduqları oyundan sonra mətbuat konfransında deyib.
Mütəxəssis bildirib ki, Elvin Cəfərquliyevin qırmızı kart alaraq meydandan qovulması işlərini daha da çətinləşdirib: "10 nəfərlə meydanda qaldıq. Buna baxmayaraq, komandamız çox yaxşı oyun göstərdi. Rəqib qapımıza gözlənilməz qollar vurdu. Lakin çox çalışdıq. Sübut etdik ki, istənilən rəqiblə mübarizə apara bilərik.
Görüş çox ağır keçdi. Bu gün anladıq ki, öz üzərimizdə daha çox işləməliyik. Yaxşı nəticə üçün çatışmayan cəhətlərimizi aradan qaldırmalıyıq".
Rəqib komandanı təbrik edən və növbəti mərhələdə onlara uğurlar arzulayan çalışdırıcının sözlərinə görə, belə iddialı rəqiblərə qarşı oynamaq üçün təcrübəni daha da artırmaq lazımdır: "Çətin komanda ilə üz-üzə gəldik. Lakin dözümlü olmalı, bu dinamikaya öyrəşməliyik. Belə turnirlərdə iştirak bizim üçün çox vacibdir. Çalışmalıyıq ki, əlimizə düşən fürsətlərdən yaxşı istifadə edək”.
Qeyd edək ki, evdəki ilk matçda "Bayer" ilə 2:2 hesablı heç-heçə edən "Qarabağ" iki görüşün nəticəsinə əsasən Avropa Liqasında mübarizəni dayandırıb.