 |
|
Böyük Qafqaz sıra dağlarının cənub ətəyində üç il əvvəl itkin düşən hindistanlı turistin qalıqları tapılıb.
APA məlumatına görə, fevralın 9-u Zaqatala RPŞ-nin əməkdaşları tərəfindən keçirilmiş əməliyyat-axtarış tədbirləri nəticəsində 12.05.2022-ci il tarixdə Zaqatala rayonu ərazisində itkin düşmüş 28.08.1993-cü il təvəllüdlü Hindistan vətəndaşı Kondaveti Maniqanta məxsus olması ehtimal edilən meyitin qalıqları, ona məxsus əl çantası, bank kartları, mobil telefon və digər şəxsi əşyalar Böyük Qafqaz dağlarının Zaqatala rayonu Car kəndi yaxınlığında “Şamilovka” meşə massivində aşkar edilib.
Meyitin qalıqları və digər əşyalar yüksəklik ərazidən götürülərək müvafiq ekspertizaların keçirilməsi üçün aidiyyəti üzrə Zaqatala Rayon Prokurorluğuna təqdim olunub.
Faktla bağlı Zaqatala Rayon Prokurorluğunda araşdırma aparılır.
Bakı şəhəri Səbail rayon məhkəməsində Azərbaycan Respublikasının vətəndaşı Bağırov Azər Akif oğlu barəsində seçilmiş qətimkan tədbiri ilə bağlı məhkəmə prosesi keçirilib.
Xarici xüsusi xidmət orqanının nümayəndələrinə kömək etməklə casusluq formasında dövlətə xəyanət etməkdə ittiham olunan Azər Bağırov Azərbaycan Respublikası Dövlət Təhlükəsizliyi Xidməti tərəfindən keçirilmiş tədbirlər nəticəsində İordaniya Haşimilər Krallığı ərazisində tutularaq Azərbaycan Respublikasına gətirilib.
İş materiallarından məlum olur ki, xarici ölkənin xüsusi xidmət orqanı 3-cü ölkələrdə hazırladığı təxribat hadisələrində iştirakını büruzə verməmək üçün Azərbaycan vətəndaşı kimi Azər Bağırovu cəlb edib. Azər Bağırov isə öz Azərbaycan Respublikasının vətəndaşı statusundan xarici xüsusi xidmət orqanının xeyrinə və Azərbaycan Respublikasının dövlət təhlükəsizliyi zərərinə istifadə etməklə xaricdə dövlətimizin maraqlarına qəsdən ziyan vurub, casusluq fəaliyyəti ilə məşğul olub.
Məhkəmə Bağırov Azər Akif oğlu barəsində Cinayət Məcəlləsinin 274-cü (dövlətə xəyanət) maddəsi ilə həbs qətimkan tədbiri seçib.
Son dövrlərdə onlayn dələduzluq halları artıb. İnsanlar internetdə alış-veriş edərkən, bank əməliyyatları apararkən və ya sosial şəbəkələrdən istifadə edərkən fırıldaqçıların hədəfinə çevrilə bilirlər. Kibertəhlükəsizlik mütəxəssislərinin fikrincə, insanların bu tələlərdən qorunması üçün daha diqqətli olması və müəyyən qaydalara əməl etməsi vacibdir.
Mövzu ilə bağlı Ölkə.az-a danışan informasiya təhlükəsizliyi üzrə mütəxəssis Asif Rzayev bildirib ki, dələduzlar müxtəlif üsullarla insanları aldadaraq şəxsi, maliyyə məlumatlarını və ya hesablarını ələ keçirirlər:
"Onlar banklar, e-ticarət saytları və ya sosial media platformaları kimi etibarlı qurumları təqlid edərək saxta e-poçtlar, mesajlar və ya saytlar yaradırlar. Bu mesajlarda insanlardan fərdi və ya şəxsi məlumatlarını (məsələn, parol, bank kartı məlumatları) təqdim etmələri tələb olunur. Vətəndaşlar gözlənilməz e-poçtlar və mesajlara inanmasınlar. Linklərə klikləməzdən əvvəl göndərənin ünvanını yoxlasınlar. Rəsmi saytlara birbaşa brauzerdən daxil olsunlar və e-poçt linklərindən istifadə etməsinlər. İki mərhələli identifikasiya (2FA) tətbiq etmələri məsləhət görülür".
Mütəxəssis onu da qeyd edib ki, dələduzlar ucuz qiymətlər və ya endirimlər təqdim edən saxta onlayn mağazalar yaradaraq insanları aldadırlar:
"Alıcılar sifariş verdikdən sonra ya məhsul almırlar, ya da oğurlanmış bank kartı məlumatları ilə qarşılaşırlar. Bundan qorunmaq üçün isə etibarlı və tanınmış onlayn mağazalardan alış-veriş etmək lazımdır. Mağazanın rəylərini və şikayətlərini araşdırmaq, eyni zamanda ödəniş zamanı təhlükəsiz ödəniş sistemlərindən (məsələn, PayPal) istifadə etmək məqsədəuyğundur.
Bundan əlavə, belə dələduzlar vətəndaşların fərdi və kart məlumatlarını əldə etmək üçün onların etimadını qazanırlar. Məsələn, saxta sosial media hesabları vasitəsilə dost kimi davranaraq məlumatları əldə edirlər. Buna görə insanlar şəxsi məlumatlarını sosial şəbəkələrdə paylaşmasınlar, tanımadığı insanlardan gələn dostluq və mesaj təkliflərini qəbul etməsinlər.
Dələduzlar, zərərli proqramlar vasitəsilə insanların cihazlarına daxil olaraq şəxsi məlumatlarını da oğurlayırlar. Bu proqramlar, adətən, e-poçt əlavələri, yüklənən fayllar və ya saxta saytlar vasitəsilə yayılır. Bəs bundan necə qorunmaq?
1. Naməlum mənbələrdən fayl yükləməsinlər.
2. Antivirus proqramlarından istifadə etsinlər və onları müntəzəm yeniləsinlər.
3. Şübhəli linklərə klikləməsinlər".
Bir müddət əvvəl həbs edilən tanınmış hərbi ekspert Ədalət Verdiyevin cinayət işi məhkəməyə göndərilib.
Hərbi ekspertə qarşı irəli sürülmüş Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə) ilə elan olunan ittiham xitam olunub.
Onun işi yalnız Cinayət Məcəlləsinin 284.1-ci maddəsi ilə (dövlət sirrini yayma) məhkəməyə göndərilib.
Bu barədə məlumatı ekspertin vəkili Bəhruz Bayramov da təsdiqləyib.
Xatırladaq ki, ötən ilin noyabrın 22-də təşkil olunmuş mediaturda hərbi-ekspert qismində iştirak etmiş Ədalət Verdiyevin Azərbaycan Silahlı Qüvvələrinin döyüş məntəqələrinin yerləşdiyi əraziləri lentə alaraq sosial şəbəkə hesabı vasitəsilə yaymasına və Azərbaycanın qanunla qorunan dövlət təhlükəsizliyini və müdafiə qabiliyyətini təmin edən mənafelərinə ağır nəticələrə səbəb olan mühüm zərər vurmasına əsaslı şübhələr müəyyən edilib. (Gununsesi.info)
Azərbaycanda dostuna zarafat edən şəxs polisə çağırılıb.
Bu barədə sosial şəbəkələrdə məlumat yayılıb.
Belə ki, bir nəfər başqa bir nömrədən səsini dəyişdirərək, dostuna zəng edib və özünü polis əməkdaşı kimi təqdim edib. Zarafat edən şəxs qarşı tərəfə tarix deyərək onun polis bölməsinə çağırıldığını söyləyib.
Aldadılan şəxs isə vəziyyətdən xəbərsiz olduğundan ona zəng edən dostunu Daxili İşlər Nazirliyi zəng mərkəzi 102-yə şikayət edib. Nəticədə hər iki şəxs polis bölməsinə çağırılıb.
Paylaşım edən şəxs zarafat edənin hüquqi baxımdan məsuliyyət daşıyıb-daşımadığını sual edib.
Mövzu ilə bağlı Ölkə.Az-a danışan hüquqşünas Səməd Vəkilov məsələyə aydınlıq gətirib.
"Həmin şəxsin əməllərində Azərbaycan Respublikası Cinayət Məcəlləsinin (CM) 310-cu maddəsinin yəni vəzifəli şəxsin səlahiyyətlərini mənimsəmə cinayətinin tərkib əlamətləri vardır. Maddəyə əsasən, özbaşına özünün vəzifəli şəxs kimi təqdim edilməsi və ya vəzifəli şəxsin səlahiyyətlərinin mənimsənilməsi ilə əlaqədar fiziki və ya hüquqi şəxslərin hüquqlarının və qanuni mənafelərinin əhəmiyyətli dərəcədə pozulmasına səbəb olan hərəkətlər törətmə nəzərdə tutulur. Bu cinayətə görə şəxslər 1500(min beş yüz) 3000(üç min) manatadək miqdarda cərimə və ya 240(iki yüz qırx) saatdan 400 (dörd yüz) saatadək müddətə ictimai işlər və ya 2 (iki) ilədək müddətə islah işləri, eləcə də 3(üç) ilədək müddətə azadlıqdan məhrum etmə ilə cəzalandırılır. Lakin CM-in 14.2.-ci maddəsinə əsasən, cinayət qanununda nəzərdə tutulmuş hər hansı əməlin (hərəkət və ya hərəkətsizliyin) əlamətləri formal cəhətdən mövcud olsa da, az əhəmiyyətli olduğuna görə, ictimai təhlükəli sayılmayan, yəni şəxsiyyətə, cəmiyyətə və yaxud dövlətə zərər yetirməyən və ya zərər yetirmək təhlükəsi yaratmayan əməl (hərəkət və ya hərəkətsizlik) cinayət hesab edilmir. Bu maddənin tələblərini nəzərə alsaq, həmin şəxs polis xəbərdarlığı ilə cinayət məsuliyyətindən azad oluna bilər", - deyə o əlavə edib.
Keçən il ərzində yerli büdcə vəsaitlərinin səmərəli istifadə olunması, bələdiyyə əmlakının (o cümlədən torpaqların) idarə edilməsi sahəsində qanunçuluğun və şəffaflığın təmin edilməsi, korrupsiyaya və digər hüquqpozmalara şərait yaradan halların qarşısının alınması üzrə inzibati nəzarət qaydasında tədbirlər görülüb.
Bu, Milli Məclisin Regional məsələlər komitəsinin bu gün keçirilən iclasında müzakirəyə çıxarılan “Bələdiyyələrin fəaliyyətinə inzibati nəzarəti həyata keçirən orqanın illik məruzəsi”ndə (2024-cü il üzrə) əksini tapıb.
Aparılmış araşdırmalar zamanı 51 halda ciddi qanun pozuntuları aşkar edilərək toplanmış sənədlər hüquqi qiymət verilməsi üçün aidiyyəti üzrə istintaq orqanlarına göndərilib. Həmin materiallardan 21-i üzrə cinayət işi başlanıb. O cümlədən:
- Daşkəsən rayonu Çanaqçı bələdiyyəsinin sabiq vəzifəli şəxsləri tərəfindən kollegiallıq prinsiplərinə əməl edilmədən bələdiyyə mülkiyyətinə aid torpaq sahələrinin ayrılması barədə saxta qərarlar tərtib edilməsi faktı üzrə Baş Prokuror yanında Korrupsiyaya qarşı Mübarizə Baş İdarəsində Cinayət Məcəlləsinin 308.1-ci (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi başlanıb;
- Daşkəsən rayonu Çovdar bələdiyyəsinin sədri tərəfindən yerli büdcə vəsaitlərinin mənimsənilməsi və bələdiyyə əmlaklarının israf edilməsi faktı üzrə Baş Prokurorluqda Cinayət Məcəlləsinin 179.2.3-cü, 179.2.4-cü (mənimsəmə və ya israf etmə) və 313- cü (vəzifə saxtakarlığı) maddələri ilə cinayət işi başlanıb;
- Neftçala rayonu Xolqarabucaq bələdiyyəsinin sədri Q.Qəfərovun qanunsuz hərəkətləri faktı üzrə Neftçala rayon prokurorluğunda Cinayət Məcəlləsinin 314.1-ci (səhlənkarlıq) maddəsi ilə cinayət işi başlanıb;
- Ağsu rayonu İlxıçı bələdiyyəsinin 2020-2023-cü illər üzrə fəaliyyətinin yoxlanılması nəticəsində bələdiyyənin vergi müfəttişinin bələdiyyə mülkiyyətinə aid torpaq sahələrinin icarə haqlarını nağd qaydada yığaraq yerli büdcəyə ödəməməsi faktı üzrə Ağsu rayon prokurorluğunda Cinayət Məcəlləsinin 179.3-cü (mənimsəmə və ya israf etmə) maddəsi ilə cinayət işi başlanıb;
- Göygöl rayonu Toğanalı bələdiyyəsinin sədri tərəfindən bələdiyyənin adından iclas protokolları tərtib edilərək yerli (bələdiyyə) büdcə vəsaitlərinin xərclənməsinə və torpaq sahələrinin ayrılmasına dair təkbaşına qərarlar verilməsi faktı üzrə Göygöl rayon prokurorluğunda Cinayət Məcəlləsinin 308.1-ci (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi başlanıb;
- Cəlilabad rayonu Ağdaş bələdiyyəsinin 2018-2023-cü illər və 2024-cü ilin 5 ayı üzrə fəaliyyətinin yoxlanılması nəticəsində bələdiyyə əmlakının israf edilməsi faktı üzrə Cəlilabad rayon prokurorluğunda Cinayət Məcəlləsinin 308.1-ci (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi başlanıb;
- Saatlı rayonu Mircəlal bələdiyyəsinin 2020-2023-cü illər üzrə fəaliyyətinin yoxlanılması nəticəsində yerli büdcə vəsaitlərinin mənimsənilməsi və bələdiyyə əmlakının israf edilməsi faktı üzrə Baş Prokurorluqda Cinayət Məcəlləsinin 179.2.3-cü, 179.2.4-cü (mənimsəmə və ya israf etmə), 308.1-ci (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə cinayət işi başlanıb;
- Astara rayonu Şahağacı bələdiyyəsinin 2018-2023-cü illər və 2024-cü ilin 6 ayı üzrə fəaliyyətinin yoxlanılması nəticəsində bələdiyyə iclasında qərar qəbul edilmədən hərrac və ya müsabiqədən kənar qaydada bələdiyyə mülkiyyətinə aid tor- paq sahəsinin real dəyərindən aşağı qiymətə icarəyə ayrılması faktı üzrə Astara rayon prokurorluğunda Cinayət Məcəlləsinin 178.2.1- ci, 178.2.2-ci, 178.2.3-cü (dələduzluq) və 309.1-ci (vəzifə səlahiyyətlərini aşma) maddələri ilə cinayət işi başlanıb.
Həmçinin Saatlı rayonu Nabatkənd, Göygöl rayonu Çaykənd, Cəlilabad rayonu Cəlilabad, Şəmkir rayonu Qılıncbəyli, Ağcabədi rayonu Ağcabədi, İsmayıllı rayonu Qalagah və s. bələdiyyələrin vəzifəli şəxslərinin fəaliyyəti barəsində toplanmış sənədlər hüquqi qiymət verilməsi üçün aidiyyəti üzrə istintaq orqanlarına göndərilib.
Şamaxıda qumarxana aşkarlanıb.
“Qafqazinfo” xəbər verir ki, Şamaxı Rayon Polis Şöbəsinə rayonun Sabir qəsəbəsində yerləşən kafelərin birində qanunsuz pul uduşlu qumar oyunlarının təşkil edilməsi barədə əməliyyat məlumatı daxil olub.
Görülən tədbirlərlə həmin obyektdə qumar oyunları oynayan E.Allahverdiyev, Z.Nəsibov, T.Pənahov və Ə.Quliyev, eləcə də obyektin sahibi N.Məlikov saxlanılıblar.
Həmin şəxslər barəsində toplanmış materiallar baxılması üçün rayon məhkəməsinə göndərilib.
İmişli rayonunda naməlum əsgərlərin məzarlığında naməlum şəhid kimi dəfn edilmiş Birinci Qarabağ müharibəsində itkin düşmüş hesab olunan Elşad Qubad oğlu Tağıyevlə Salyan rayonu Seyidsadıqlı kəndində keçirilən vida mərasimi keçirilib.
“Report” məlumatına görə, şəhidin nəşi Seyidsadıqlı kənd qəbiristanlığında dəfn olunub.
Dəfn mərasimində şəhidin doğmaları, Salyan Rayon İcra Hakimiyyətinin vəzifəli şəxsləri, rayon hüquq-mühafizə orqanlarının əməkdaşları, hərbçilər və ictimaiyyət nümayəndələri iştirak ediblər.
Rəqəmsal İnkişaf və Nəqliyyat Nazirliyi yanında Dövlət Dəniz və Liman Agentliyinin Gəmi Hərəkətinin İdarəedilməsi Mərkəzi küləkli hava şəraiti ilə bağlı gəmilərə xəbərdarlıq edib.
Bu barədə Agentliyin İctimaiyyətlə əlaqələr xidmətinin mətbuat katibi Pərvanə İmanova məlumat verib.
Xəbərdarlığa əsasən, fevralın 7-dən Xəzər Dəniz Akvatoriyasında müşahidə olunacaq şimal-qərb küləyi fevralın 9-u səhər saatlarına kimi davam edəcək.
Belə ki, həmin günlər ərzində küləyin sürətinin 18-23 m/s, arabir 25-28 m/s, açıq dənizdə isə 30 m/s-dək güclənəcəyi gözlənilir.
Dalğanın hündürlüyünün isə 2.0-3.0 m. sonrakı inkişafda 4.5-6.5 m. çatacağı proqnozlaşdırılır.
"Azərbaycan Xəzər Dəniz Gəmiçiliyi" QSC-dən (ASCO) verilən məlumata görə isə, hava şəraiti ilə əlaqədar qurumun gəmilərinin fevralın 10-u günün birinci yarısından etibarən fəaliyyətlərini yenidən bərpa etmələri gözlənilir.
Hərbi Prokurorluq orqanları ilə Müdafiə Nazirliyi, Dövlət Sərhəd Xidməti, Daxili Qoşunlar və digər hərbi qurumlar arasında səmərəli fəaliyyət nəticəsində 2025-ci ilin yanvar ayında Azərbaycan Respublikası Silahlı Qüvvələrində əmri icra etməmə (Azərbaycan Respublikası Cinayət Məcəlləsinin 328-ci maddəsi), fərarilik (Azərbaycan Respublikası Cinayət Məcəlləsinin 334-cü maddəsi), silahla və ətrafdakılar üçün yüksək təhlükə törədən əşyalarla davranış qaydalarını pozma (Azərbaycan Respublikası Cinayət Məcəlləsinin 350-ci maddəsi), maşınları idarəetmə və istismar qaydalarını pozma (Azərbaycan Respublikası Cinayət Məcəlləsinin 351-ci maddəsi), qəsdən sağlamlığa ağır zərər vurma (Azərbaycan Respublikası Cinayət Məcəlləsinin 126-cı maddəsi) və qəsdən adam öldürmə (Azərbaycan Respublikası Cinayət Məcəlləsinin 120-ci maddəsi) cinayətləri qeydə alınmayıb.
Bunu Azərbaycan Respublikası Hərbi prokurorunun böyük köməkçisi - Hərbi Prokurorluğun mətbuat xidmətinin rəhbəri, baş ədliyyə müşaviri Firad Əliyev deyib.
F.Əliyev bildirib ki, görülmüş qabaqlayıcı tədbirlər nəticəsində Azərbaycan Respublikasının Silahlı Qüvvələrində 2024-cü ilin eyni ayı ilə müqayisədə 2025-ci ilin yanvar ayında qeydə alınmış vəzifə səlahiyyətlərindən sui-istifadə və ya vəzifə səlahiyyətlərini aşma cinayətləri (Azərbaycan Respublikası Cinayət Məcəlləsinin 341-ci maddəsi) 77,8 faiz, rüşvət alma və rüşvət vermə cinayətləri (Azərbaycan Respublikası Cinayət Məcəlləsinin 311-ci və 312-ci maddələri) 31,6 faiz azalıb.
Baş ədliyyə müşaviri, həmçinin 2025-ci ilin yanvar ayında Hərbi Prokurorluqda qeydə alınmış cinayətlərin üstünün 100 faiz açıldığını da vurğulayıb.