Ölkə.az-ın sorğusuna cavab olaraq TƏBİB-dən bildirilib ki, 1972-ci il təvəllüdlü şəxs (kişi) oktyabrın 18-də saat 13:40 radələrində Yeni Klinikanın Reanimasiya şöbəsinə yerləşdirilib.

Məlumata görə, hazırda onun müalicəsi davam etdirilir.

“Vəziyyəti kritik ağır qiymətləndirilir”, - TƏBİB-dən qeyd olunub. 

Yaxınları Ölkə.az-a bildirib ki, Milli Qəhrəman mədə xəstəliyindən əziyyət çəkir. Ötən gün onun mədəsində qan axma olub. Bu səbəbdən vəziyyəti daha da ağırlaşıb.

Qeyd edək ki, Ehtiram Əliyev 1972-ci ildə Ucar rayonunda anadan olub. Bakı Maşınqayırma Texikumunu və "Təfəkkür” Universitetini bitirib.

1992-ci ilin iyunundan 1996-cı ilin avqustuna qədər hərbi xidmət keçib. Cəbhənin Ağdam, Naxçıvan istiqamətlərində döyüşüb. 1995-ci ildə vətən qarşısında borcunu yerinə yetirərkən göstərdiyi igidliyə və şücaətə görə ona “Azərbaycanın Milli Qəhrəmanı” adı verilib.

E.Əliyev 1996-cı ildə ordudan tərxis edilib. 1997-1998-ci illərdə Bakının Sabunçu rayon Polis İdarəsində işləyib. Daha sonra Bakı Beynəlxalq və Şəhərlərarası Avtovağzalında rəis müavini vəzifəsində çalışıb.

Ailəlidir. Bir qızı, iki oğlu var.