 |
|
Rusiya Baş Kəşfiyyat İdarəsinin rəhbəri İqor Serqun Moskva ətrafındakı evində ürək tutmasından yox, Livanda ölüb.
Axar.az xəbər verir ki, bu sözlər ABŞ Prezidenti Donald Trampın keçmiş müşaviri Maykl Flinin Federal Təhqiqatlar Bürosuna verdiyi istintaq ifadəsində yer alıb. FTB-nin hesabatına əsasən, Flin bu iddianı 2017-ci ilin yanvarında səsləndirib.
Qeyd edək ki, İqor Serqun 2016-cı il yanvarın 3-də vəfat edib. Rəsmi məlumatda onun Moskva ətrafındakı evində öldüyü bildirilib. Bundan az sonra “Stratfor” şirkəti məlumat yayaraq, Serqunun Livanda məxfi əməliyyat həyata keçirərəkən öldüyünü vurğulayıb.
Ukrayna KİV-ləri Prezident Pyotr Poroşenko və Xarici İşlər naziri Pavel Klimkinin Rusiyada qohumlarını aşkar edib.
Axar.az xəbər verir ki, “Strana.ua” Poroşenkonun böyük oğlu Alekseyin həyat yoldaşı Yuliyanin əslən Rusiyadan olduğunu və öz soyadını dəyişənə qədər Rusiya vətəndaşlığı daşıdığını yazıb. Digər tərəfdən əslən Sankt-Peterburqdan olan Yuliyanın dayı və xalaları Krımda yaşayırlar və yarımadanın Rusiyaya birləşdirilməsində yaxından iştirak ediblər.
Klimkinə gəlincə isə onun ikinci həyat yoldaşı Marina Mixaylenko ehtiyatda olan sovet general-mayoru Yuri Mixaylenkonun qızıdır. Mixaylenko da hazırda Krımda yaşayır. 2014-cü ildə Mixaylenko “Krımın geri qaytarılması” medalı ilə mükafatlandırılıb.
Ermənistan ordusunun əsgəri başından yaralanıb.
Axar.az xəbər verir ki, bu barədə erməni mətbuatı yazıb.
Mətbuat hadisənin dekabrın 17-də Ermənistan Müdafiə Nazirliyinin hərbi hissələrinin birində baş verdiyini bildirib.
19 yaşlı əsgər Andranik Ovannisyan başından aldığı güllə yarası ilə hospitala çatdırılıb.
Faktla bağlı araşdırma aparılır.
Qeyd edək ki, bu, son 3 gündə Ermənistandakı hospitalı müxtəlif yaralarla yerləşdirilən 5-ci erməni əsgəridir.
Türkiyə Cümhuriyyət Xalq Partiyasından (CHP) olan millət vəkili Özgür Özəl TBMM-də çıxışı zamanı Müdafiə naziri Hulusi Akarı hədəfə alıb.
Axar.az xəbər verir ki, Hulusi Akarın millət vəkilinə cavabı gecikməyib.
H.Akar Özəlin əvvəlcədən hazırladığı çıxışı sərt şəkildə qınayıb.
“Yoldaşlarını ziyarət etməyən alçaqdır. Hasdaldan (Həbsxana – red.) çıxmadım. Yoldaşlarımın həyatını qorumaq üçün hər cür risk etdim”, - deyə Akar bildirib.
Müdafiə naziri millət vəkilinin 15 iyul çevrilişə cəhd gecəsi ilə bağlı ittihamlarına da cavab verib:
“Saat 20:30 radələrində o alçaqlar içəri girdilər və başımıza tapança dayayaraq “bizə rəhbərlik edəcəksən” dedilər və mən də bunu rədd etdim. Aranızda yatağında yatdığı zaman başına tapança dirəndiyi halda “yox” deyə biləcək neçə nəfər var? Yoxlamadan söyləməyin”.
Azərbaycan Prezidenti İlham Əliyev dekabrın 13-də Rusiya Federasiyasının Xarici İşlər naziri Sergey Lavrovla görüşü zamanı Azərbaycanın 2019-cu ilin Dağlıq Qarabağ münaqişəsinin nizamlanma prosesinə yeni impuls verəcəyinə ümid etdiyini bildirib. Bundan sonra bir çox ekspertlər də Ermənistanda son baş verən dəyişikliklər fonunda 2019-cu ilin Dağlıq Qarabağ münaqişəsinin həllində dönüş ili olacağını qeyd edib.
Məsələ ilə bağlı Axar.az-a danışan politoloq Fikrət Sadıqov bildirib ki, 2019-cu ilin Qarabağ münaqişəsinin həllində dönüş ili olması Ermənistanın mövqeyindən asılı olacaq.
“Dövlət başçımız çıxışında bildirdi ki, bu gün Ermənistan-Azərbaycan Dağlıq Qarabağ münaqişəsinin həlli üçün daha əlverişli vəziyyət yaranıb. Onlarda hakimiyyət dəyişikliyi baş verib, yeni, təcrübəsiz hökumət formalaşır, Dağlıq Qarabağ klanı hakimiyyətdən tamamilə uzaqlaşdırılıb. Əvvəlki hökumət faktiki olaraq, 25 il ərzində əllərindən gələni edib ki, bu məsələ həll olunmasın. İndi Ermənistanda hakimiyyətə gələn yeni hökumətdən çox şey asılıdır. Çünki onlar düşdükləri çətin, mürəkkəb vəziyyətdən çıxmaq istəyirlərsə, işğal siyasətinə son qoymalıdır. Onlar keçmiş hökuməti tənqid edirlər. Ermənistanın belə bir vəziyyətə düşməsinin səbəbkarları məhz kriminal Qarabağ klanıdır. Ona görə də yeni gələn hakimiyyət əlindən gələni etməlidir ki, bu vəziyyətdən çıxsın. Çıxış yolu isə odur ki, Azərbaycan torpaqlarının azad olunma prosesi başlansın. Əsas şərt budur. Belə bir yanaşma müşahidə etsək, əlbəttə ki əlimizdən gələni etməliyik ki, bu məsələ həll olunsun”, - F.Sadıqov deyib.
Politoloq qeyd edib ki, 2019-cu ildə müəyyən bir irəliləyişin baş verməsi mümkündür:
“Azərbaycan həm diplomatik səylərini, həm siyasi addımlarını bu məqsədlərə yönəldəcək. Ölkə başçısı İlham Əliyev elə Lavrovla görüşündə bu barədə çox ətraflı danışdı. Prezident vurğuladı ki, burada Azərbaycan-Rusiya strateji partnyorluq formatı öz sözünü deməlidir. Rusiya Minsk Qrupunun həmsədri kimi bu məsələdə Ermənistana müəyyən təzyiq göstərməlidir. Çünki Rusiyadan çox şey asılıdır”.
Məsələyə münasibət bildirən QAFSAM-ın sədr müavini, siyasi elmlər üzrə fəlsəfə doktoru Nazim Cəfərsoy isə bu məsələdə müəyyən ümidlər mövcuddur:
“Əslində burada ən əhəmiyyətli məqamlardan biri Ermənistanda ciddi hakimiyyət dəyişikliyinin baş verməsidir. Yəni köhnə komanda tamamilə hakimiyyətdən uzaqlaşdırılıb. Yeni hakimiyyətdə Qarabağla bağlı fərqli yanaşmalar var. Ən azından Paşinyanın yeniliklər etmək iddiaları var. Paşinyan ciddi uğur qazanmalıdır. Bunun yollarından birincisi Ermənistan üçün maliyyəsi çox olan müharibə prosesini dayandırmaq və ya onu sülh prosesi ilə yekunlaşdırmaq, ikincisi isə qonşuları ilə əməkdaşlığı önə çəkməkdir. Çünki bunlar olmadan Ermənistanın sosial, iqtisadi problemlərini həll etmək mümkün olmayacaq. Bu konteksdə də Paşinyan ya Türkiyə ilə münasibətləri yaxınlaşdıracaq, ya da Azərbaycanla. Ola bilsin ki, o hər iki ölkə ilə münasibətləri yaxşılaşdırmaq üçün addımlar atsın. Bugünkü mənzərəyə baxdığımız zaman soyqırım məsələsi ilə bağlı Paşinyanın çox geri getmək imkanı yoxdur. Çünki Türkiyə tərəfinin sərhədlərin açılması ilə bağlı Paşinyanın çağırışlarına verdiyi rəsmi cavablar bundan ibarətdir ki, Azərbaycan torpaqlarının işğalı məsələsi Azərbaycanın ərazi bütövlüyü çərçivəsində həll olunmadan sərhədlərin açılması mövzusu gündəmə gəlməyəcək. Bu konteksdə Paşinyanın önündəki alternativlər 2019-cu ilin Qarabağ münaqişəsinin həllində müəyyən ümidlər yaranacağını göstərir”.
Politoloq vurğulayıb ki, problemin həll olunmamasının əsas səbəblərindən biri Ermənistanın məsələyə təcavüzkar, Azərbaycanın ərazi bütövlüyünü tanımayan, beynəlxalq hüquq prinsiplərinə uymayan aspektdən yanaşmasıdır:
“Paşinyanın bundan nə dərəcədə vaz keçəcəyi sual altındadır. İkincisi bölgənin ən əhəmiyyətli aktoru Rusiyanın məsələyə yanaşması olacaq. Burada söhbət Paşinyanın Azərbaycanla danışıqlara başlamasına Rusiyanın necə reaksiya göstərməsindən gedir. Açıqcası Paşinyanın indiyə qədər açıqlamalarında radikal mövqe tutduğu görünür. Qarabağ məsələsində də əvvəlkilərdən elə fərqli mövqe sərgiləmir. Amma təbii ki, 2019-cu ildə Paşinyan həm hökuməti yenidən formalaşdıracaq, həm də özünün mövqelərini dəqiqləşdirəcək. Dəqiləşdirmədən sonra konkret atacağı addımlarla bağlı proqnoz vermək olar. İndiki şəraitdə mütləq şəkildə 2019-cu ilin Qarabağ probleminin həllində dönüş yaradacağını demək çətindir”.
Çin bundan sonra da sosializmi öz dəyərlərinə uyğun inkişaf etdirəcək.
Axar.az xəbər verir ki, bunu Pekində Xalq Məclisi Evində çıxışı zamanı Çin sədri Si Szinpin deyib. O, Çinin 5 min yaşının olduğunu bildirib və heç bir ölkənin ona diktə etmək haqqının olmadığını deyib.
Szinpin Çinin digər ölkələr üçün təhdid olmadığını söyləyib.
Millət vəkil Fəzail İbrahimli özünü psixoloq kimi təqdim edən Nərmin Şahmarzadə adlı gənc qızın Mübariz İbrahimov haqqında işlətdiyi fikirlərə sərt reaksiya göstərib.
Axar.az xəbər verir ki, deputat Milli Məclisin bu gün keçirilən iclasında bu cür halların Azərbaycanın dəyərlərinə hücum olduğunu bildirib.
Spiker Oqtay Əsədov isə həmkarına irad tutaraq bu cür məsələləri Milli Məclisin gündəliyinə çıxarmağın yanlış olduğunu deyib:
“Mən bu məsələni izləmişəm. Xalqın Milli Qəhrəmana olan hücuma göstərdiyi hiddəti görmüşəm. Belə cılız məsələni Milli Məclisə çıxarmaq, onu bir qədər də tanıtmağın əleyhinəyəm. Həmin şəxs universitetdə oxuyur. Hələ heç psixoloq da deyil. Psixoloq olması üçün də illər lazımdır. O xanımın cavabını sosial şəbəkələrdə xalqımız, insanlar verdi”.
2018-ci ildə dünyada öldürülən jurnalistlərin sayı 80 nəfər olub.
Axar.az xəbər verir ki, bu məlumat Sərhədsiz Reрortyorlar Birliyinin hesabatında yer alıb. Hesabata əsasən, cari ildə qeydə alınan göstərici keçən ildəkindən 15 nəfər çox olub.
Jurnalistlərin 61%-i, yəni 49 nəfəri bilərəkdən və ya sifarişlə öldürülüb. 39% jurnalist (31 nəfər) isə öz peşə fəaliyyəti zamanı, reportaj hazırlayarkən qətlə yetirilib.
Öldürülən jurnalistlərin 96%-ni, yəni 77 nəfərini kişilər təşkil edib.
Təşkilat ən qalmaqallı ölüm halı kimi səudiyyəli jurnalist Camal Qaşıqçı və fevral ayında sifarişlə qətlə yetirilən slovakiyalı jurnalist Yan Kuçiyak insidetlərini göstərib. Bundan başqa hesabatda Azərbaycan əsilli Rusiya jurnalisti Orxan Camal, onun həmkarları Aleksandr Rastorquyev, Kiril Radçenkonun da öldürülməsi məsələsinə diqqət yetirilib.
Bu ilki hesabatda ən çox jurnalistin Əfqanıstanda (15 nəfər) öldürüldüyü bildirilib. Ondan sonrakı yerdə Suriya (11 nəfər) və Meksika (9 nəfər) yer alıb. Siyahıya həmçinin Yəmən (8), Hindistan (6) , ABŞ-ın da (6) adı daxil edilib. ABŞ-ın adının daxil edilməsinə səbəb cari ilin iyununda ABŞ-ın “Capital Gazette” qəzetinin redaksiyasına hücum və beş jurnalistin öldürülməsi olub.
Təşkilat bu il 348 KİV nümayəndəsinin öz peşə vəzifəsini yerinə yetirən zaman həbs edildiyini bildirib. Bu göstəricidə də artım müşahidə edilib. Belə ki, keçən il bu göstərici 326 nəfər təşkil edib.
Həbsdə olan jurnalistlərin böyük hissəsi 5 ölkənin - Çin, Misir (38), Türkiyə (33), İran (28) və Səudiyyə Ərəbistanının (28) payına düşür. Çində həbsdə olan jurnalistlərin sayı 60 nəfər təşkil edib ki, onların da dörddə üçü qeyri-peşəkar jurnalistdir.
Həbs edilən jurnalistlərin 179 nəfərini peşəkar, 150 nəfərini qeyri-peşəkar jurnalistlər təşkil edib. 19 nəfər isə mediaya bağlı digər işçilər olublar. Qeyri-peşəkar jurnalistlərin həbsində cari ildə 40% artım qeydə alınıb.
2018-ci ildə əsir saxlanılan jurnalistlərin sayı 10% artaraq 60 nəfər təşkil edib. Keçən il bu göstərici 54 nəfər olub. Əsir jurnalistlərin 59-u Suriya, İraq və Yəmən ərazilərində gizlədilir. 1 jurnalist isə qondarma Donetsk respublikasının əsirliyindədir və casusluqda ittiham olunur. Əsir götürülən jurnalistlərdən 6-sı əcnəbidir.
Bu il həmçinin 3 jurnalist itkin düşüb. Bu faktlardan ikisi Latın Amerikasında, biri isə Rusiyada qeydə alınıb.
Ermənistanın keçmiş baş naziri Karen Karapetyan Respublikaçılar Partiyasının sıralarından ayrılıb.
Axar.az xəbər verir ki, bu barədə “Qraparak” nəşri yazıb.
Məlumata görə, Karapetyan artıq çoxdandır ki, partiya üzvləri ilə ünsiyyət saxlamır. Onun bu addımına səbəb isə partiya üzvlərinin Serj Sərkisyanla birlikdə onun əleyhinə çalışması və pis rəftarı olub.
Karapetyanla birlikdə ona görə 2017-ci il seçkisi ərəfəsində Sərkisyanın partiyasına qoşulmuş 7 min nəfər də partiya sıralarından ayrılacaq.
Respublikaçılar Partiyası Karen Karapetyanın partiya sıralarından ayrılmaq üçün ərizə ilə müraciət etdiyini təsdiqləyib.
Rusiya XİN rəhbəri Sergey Lavrov Rusiya və Amerika qeyri-hökumət təşkilatlarının Ermənistandakı kəmiyyət nisbəti haqda danışıb.
Axar.az-ın məlumatına görə, o, “Komsomolskoy pravda”ya müsahibəsində jurnalistin “Niyə Ermənistanda ABŞ QHT-ləri bu qədər çox, Rusiyaya məxsus olanlar isə azdır” sualına belə cavab verib:
“Rusiya bu sayala bağlı suala cavab verə bilməz. Biz marionet təşkilatlar qura bilmərik, çünki hər şeyi öz adı ilə çağırsaq, bu gün çoxlu provokasion çağırışlar var”.
Bununla bərabər, rus nazir Rusiyanın Ermənistandakı bütün siyasi tərəflərlə işləmədiyi haqda iddiaları əsassız adlandırıb:
“Mən o fikirlə razıyam ki, biz bütün siyasi güclərlə mütləq işləməliyik, ancaq bunu etmədiyimizi demək düz deyil. Biz hər kəslə nəinki Zaqafqaziyada, bütün post-sovet məkanında işləyirik. Bütün müxalif tərəflərlə çalışırıq. Sistemdənkənar, gizli siyasi iş aparan adamlarla işləmirik. Düşünürəm ki, doğru olan da budur. Parlamentin fərqli strukturları ilə çalışırıq. Serj Sərkisyan hakimiyyəti vaxtı belə əlaqələri Paşinyanın partiyasının parlamentdəki 9 deputatı ilə də saxlayırdıq. O ayrı məsələdir ki, görünür, biz itirdik, doğrudur, görünür biz inqilablara qarşı immunitet qazanmışıq, ona görə ki, Qərb keçmiş postsovet məkanında inqilablar hazırlayır. Bəlkə də bu bizim bədbəxtliyimizdir. Bu dəqiqdir ki, bunlar bizim günahımız deyil. Biz özümüz çoxsaylı insan həyatı, şəhər və kəndlərin dağılması bahasına başa gələn heç də bir inqilab yaşamamışıq: ona görə bunu başqalarına da arzulamırıq, özümüz də istəmirik”.
“Cəmiyyətlə, vətəndaşlarla işləmək lazımdır, insanlara maraqlı olan layihələr aparmalıyıq. Bu, mədəniyyətdir, dildir, idmandır, təhsildir, sadəcə insan münasibətidir. Hesab edirəm ki, burda biz müəyyən pozitiv nəticələrdən danışa bilərik. Dayanmaq olmaz. Bu tip tədbirlər çox deyil, ancaq hazırda praktik olaraq bütün KTMT ölkələrində beynəlxalq forumlar keçirilir, mədəniyyət günləri və s. var. Bu, təhsil mübadiləsidir. Rusiya ali məktəblərinin filialları yaradılır və bu, işimizin ən populyar formasıdır”, - nazir bildirib.