 |
|
Ümummilli Lider Heydər Əliyevin vəfatının 21-ci ildönümü ilə əlaqədar Azərbaycan Avtomobil Yolları Dövlət Agentliyinin rəhbərliyi Fəxri xiyabanda Ulu Öndərin məzarını ziyarət edib, dahi şəxsiyyətin əziz xatirəsinə dərin ehtiramlarını bildirərək məzarı önünə əklil və gül dəstələri qoyublar.
Yol-xeber.az" xəbər verir ki, Görkəmli oftalmoloq-alim, akademik Zərifə xanım Əliyevanın da xatirəsi yad olunub, məzarı üzərinə gül dəstələri düzülüb.
Azərbaycan xalqının ümummilli lideri, müasir müstəqil dövlətimizin memarı və qurucusu Heydər Əliyevin vəfatından 21 il ötür.
Yol-xeber.az" xəbər verir ki, Azərbaycan Avtomobil Yolları Dövlət Agentliyində ulu öndər Heydər Əliyevin vəfatının 21-ci ildönümü ilə əlaqədar anım mərasimi keçirilib.
Azərbaycan xalqı və dövləti qarşısında misilsiz tarixi xidmətləri olan Ümummilli Liderimizin unudulmaz xatirəsi bir dəqiqəlik sükutla yad edilib.
Mərasim iştirakçıları ulu öndər Heydər Əliyevin cəmiyyətin inzibati binasındakı büstü önünə gül dəstələri qoyuraq, ümummilli lideri qürur hissi, dərin hörmət, sonsuz sevgi ilə anıblar.
Bütün həyatını ölkəmizin tərəqqisi, xalqımızın işıqlı gələcəyi və xoşbəxtliyinə həsr edən Ümummilli lider Heydər Əliyevin xatirəsi milyonların qəlbində daim yaşayacaq!
Azərbaycan Respublikasının daxili təhlükəsizliyi, ictimai asayişin qorunması və yol hərəkətinin təhlükəsizliyinin təmin edilməsi sahəsində böyük uğurlar əldə edilmişdir. Bu uğurların əsasında Prezident İlham Əliyevin uzaqgörən siyasəti və daxili işlər naziri, general-polkovnik Vilayət Eyvazovun səmərəli rəhbərliyi dayanır. Ölkədəki sabitlik, yüksək səviyyəli təhlükəsizlik tədbirləri və yol hərəkətinin tənzimlənməsi sahəsindəki nailiyyətlər, Prezident İlham Əliyevin rəhbərliyi ilə həyata keçirilən strateji tədbirlərin birbaşa nəticəsidir.
İctimai Asayişin Qorunmasında Uğurlar
Prezident İlham Əliyevin siyasi iradəsi ilə Azərbaycanın daxili təhlükəsizliyini təmin edən qurumlar, o cümlədən Daxili İşlər Nazirliyi (DİN), yüksək səviyyədə modernləşdirilmişdir. Vilayət Eyvazovun rəhbərliyi altında DİN, həm hüquqi çərçivədə, həm də texnoloji baxımdan innovativ həllər tətbiq edərək, cinayətkarlıqla mübarizədə mühüm uğurlar qazanmışdır.
DİN əməkdaşları asayişin qorunması, ictimai təhlükəsizliyin təmin edilməsi və vətəndaşların hüquq və azadlıqlarının müdafiəsində misilsiz xidmət göstərirlər. Nazirlik, bölgələrdə və şəhərlərdə əhalinin təhlükəsizliyinin təmin edilməsi üçün müasir texnologiyalarla təchiz olunmuşdur. Video müşahidə sistemləri, sürətli reaksiya qrupları və rəqəmsal idarəetmə vasitələri ictimai təhlükəsizlik səviyyəsini daha da yüksəltmişdir.
Yol Hərəkətinin Təhlükəsizliyi: Daha Geniş Baxış
Yol hərəkətinin təhlükəsizliyinin təmin edilməsi sahəsində də ciddi addımlar atılmışdır. Prezident İlham Əliyevin ölkənin yol infrastrukturunun təkmilləşdirilməsinə dair tapşırıqları və Vilayət Eyvazovun rəhbərliyi ilə görülən tədbirlər nəticəsində Azərbaycanın yollarında təhlükəsizlik standartları əhəmiyyətli dərəcədə yaxşılaşmışdır.
Müasir Yol İnfrastrukturunun İnkişafı
Prezident İlham Əliyevin təşəbbüsü ilə ölkədə geniş miqyaslı yol infrastrukturunun yenidən qurulması layihələri həyata keçirilmişdir. Bu layihələr çərçivəsində yol nişanlarının quraşdırılması, piyadalar üçün keçidlərin yaradılması və işıqlandırma sistemlərinin tətbiqi kimi bir çox innovativ addımlar atılmışdır. Bu islahatlar, yol hərəkətinin təhlükəsizliyini artırmaq və yol qəzalarının sayını azaltmaq məqsədinə xidmət edir.
Yol Polis Xidmətinin Modernləşdirilməsi
Vilayət Eyvazovun rəhbərliyi altında Yol Polisi Xidməti müasir texnologiyalarla təchiz edilmişdir. Yollarda sürət ölçən kameralar, avtomobil axınını tənzimləyən sistemlər və elektron protokol sistemi ilə təchizat, yol hərəkəti qaydalarının pozulmasının qarşısını effektiv şəkildə alır. Bu tədbirlər sayəsində yol hərəkətində intizam artmış və vətəndaşların təhlükəsizliyi daha da möhkəmləndirilmişdir.
Prezident İlham Əliyevin Təhlükəsizliyə Ayırdığı Diqqət
Cənab Prezident İlham Əliyevin rəhbərliyi altında həyata keçirilən tədbirlər, Azərbaycanın sabit və təhlükəsiz ölkə kimi mövqeyini möhkəmləndirir. Dövlət başçısı, təhlükəsizliyin təmin olunmasını yalnız hüquq-mühafizə orqanlarının deyil, ümumilikdə dövlət siyasətinin əsas prioriteti hesab edir. Onun təşəbbüsü ilə bu sahədə qəbul edilən qanunlar və islahatlar, həm daxili sabitliyi təmin edir, həm də vətəndaşların təhlükəsiz həyat şəraitini qoruyur.
Gələcək Planlar
Azərbaycanın təhlükəsizlik və yol hərəkəti sahəsindəki uğurları gələcəkdə də davam edəcəkdir. Dövlətin bu istiqamətdə gördüyü işlər, beynəlxalq standartlara uyğun şəkildə genişləndirilir. DİN-in texniki və kadr potensialının artırılması, yol hərəkətində təhlükəsizliyin daha da yaxşılaşdırılması istiqamətində yeni layihələrin həyata keçirilməsi planlaşdırılır.
Nəticə
Prezident İlham Əliyevin uzaqgörən siyasəti və Vilayət Eyvazovun peşəkar idarəetməsi nəticəsində, Azərbaycanın daxili təhlükəsizliyi və yol hərəkətinin tənzimlənməsi sahəsində böyük uğurlar əldə edilmişdir. Bu, ölkədə sabitliyin qorunması və hər bir vətəndaşın hüquqlarının müdafiəsinin təmin edilməsində mühüm rol oynayır. Azərbaycanın gələcəyi, bu sahədə görülən tədbirlər sayəsində daha təhlükəsiz və sabit olacaqdır.
Azərbaycan Respublikasının Prezidenti cənab İlham Əliyevin tapşırığına və bölgələrdə vətəndaşların qəbulu cədvəlinə uyğun olaraq daxili işlər naziri general-polkovnik Vilayət Eyvazov dekabr ayının 3-də və 4-də Balakən Rayon Polis Şöbəsində növbəti vətəndaş qəbulu keçirib.
Yol-xeber.az" xəbər verir ki, Nazir əvvəlcə Balakən rayonundakı ümummilli lider Heydər Əliyevin abidəsini ziyarət edərək əziz xatirəsini böyük hörmət və ehtiramla yad edib.
Sonra Balakən Rayon Polis Şöbəsinin inzibati binasında Balakən, Zaqatala, Qax, Şəki, Oğuz, Qəbələ şəhər və rayonlarından qəbula gələn 194 vətəndaşın müraciətini dinləyən nazir onların problemlərinin həlli üçün Nazirliyin aidiyyəti baş idarə və idarə rəislərinə tapşırıqlar verib. Müraciətlərin əksəriyyətinin yerində həlli ilə bağlı tədbirlər görülüb.
Daxili işlər naziri general-polkovnik V.Eyvazov qeyd olunan rayonların polis rəislərinə ictimai asayişin qorunmasında, cinayətkarlığa qarşı mübarizədə daha səmərəli tədbirlərin tətbiqi, vətəndaşların müraciətlərinə operativ və obyektiv baxılmasına dair tapşırıqlarını verib.
Səfər çərçivəsində general-polkovnik V.Eyvazov DİN Daxili Qoşunlarının Zaqatalada yerləşən hərbi hissəsinə gedib, hərbi qulluqçuların xidmət və sosial-məişət şəraiti ilə maraqlanıb.
Nazir orada ölkəmizin suverenliyi və ərazi bütövlüyü uğrunda şəhid olmuş hərbi qulluqçuların xatirəsinə ucaldılmış abidəni ziyarət edib.
Sonda general-polkovnik Vilayət Eyvazov polis orqanlarında xidmət etmək arzusunda olan gənclərin sıra baxışını keçirib.
Vətən müharibəsinin 34 iştirakçısının da qatıldığı sıra baxışında xidmətə qəbulun şərtlərinə uyğun gələn 198 nəfər seçim turunun növbəti mərhələsinə buraxılıb.
“Azərbaycan Dəmir Yolları” QSC (ADY) BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində keçirilmiş tədbirlərə fəal şəkildə qoşularaq dayanıqlı nəqliyyat və iqlim siyasətindəki mühüm rolunu bir daha nümayiş etdirib. Müxtəlif müzakirə və dəyirmi masalarda iştirak, keçirilmiş görüşlər və tərəfdaşlarla imzalanmış sazişlər vasitəsilə ADY karbon emissiyasının azaldılması və dayanıqlı nəqliyyat sistemlərinin inkişafı üzrə öhdəliklərini təsdiqləyib.
Yol-xeber.az" xəbər verir ki, COP29 çərçivəsində noyabrın 19-da ADY sədri Rövşən Rüstəmov və İsveçrənin “Stadler Rail Group” şirkətinin icraçı vitse-prezidenti Daniel Baer Təlim və İnkişaf Mərkəzinin yaradılmasına dair müqavilə imzalayıblar. 2027-ci ildə istifadəyə verilməsi nəzərdə tutulan Mərkəz dəmiryol sahəsində ixtisaslı kadrların hazırlanmasında, həmçinin “Stadler” qatarlarını idarə edəcək maşinistlərin təlimində mühüm rol oynayacaq.
ADY-nin fəaliyyəti təkcə yerli səviyyədə deyil, beynəlxalq müstəvidə də diqqət çəkib. 20 noyabrda Dünya Bankının təşkil etdiyi “Dəmiryol əməliyyatlarının sürətləndirilməsi üçün etibarlı həllər” mövzusunda keçirilmiş tədbirdə Azərbaycanın dəmiryol şəbəkəsinin karbon emissiyasının azaldılmasında rolu və infrastrukturun inkişafında dövlət maliyyəsinin əhəmiyyəti vurğulanıb.
Bundan əlavə, 20 noyabr tarixində ADY və Beynəlxalq Dəmir Yolları İttifaqının (UIC) birgə təşkil etdiyi “Nəqliyyat dəhlizləri ilə dayanıqlı gələcəyə doğru: İqlim siyasətində dəmir yolları” adlı tədbir iqlim dəyişikliklərinə qarşı mübarizədə Azərbaycanın əhəmiyyətli rolu və dayanıqlı nəqliyyatın təmin edilməsi, xüsusilə dəmiryol şəbəkəsinin karbon emissiyasının azaldılmasına verdiyi həlledici töhfəyə həsr olunub.
Tədbirdə ADY sədri, Dəmir Yolları Əməkdaşlıq Təşkilatının sədri, Beynəlxalq Dəmir Yolları İttifaqının sədri və Polşa Dəmir Yollarının baş icraçı direktoru, AİB-nin Nəqliyyat Sektoru Qrupunun direktoru, “Masdar” şirkətinin Azərbaycan üzrə direktoru və ADY sədrinin müavini dəmir yollarının ekodost nəqliyyat növü olması, bərpa olunan enerjidən istifadənin artırılması təşəbbüsünün dəstəklənməsi və beynəlxalq maliyyə institutları tərəfindən bu təşəbbüsün maliyyələşdirilməsi kimi məsələlər ətrafında çıxışlar ediblər.
Müzakirələr zamanı ADY-nin son iki ildə əldə etdiyi uğurlar – karbon emissiyasının 9%, enerji istehlakının 5%, təbii qaz istehlakının 16%, su sərfiyyatının isə 23% azaldılması xüsusi vurğulanıb, ADY ilə UIC arasında “Dəmir yollarının iqlim öhdəliyi” sənədi imzalanıb.
ADY nümayəndələri COP29 çərçivəsində keçirilən digər mühüm tədbir və müzakirələrdə də aktiv iştirak ediblər. 20 noyabr tarixində “Qitələri birləşdirən yol: İpək Yolu boyunca davamlı nəqliyyat və logistika – Avropa və Latın Amerikası” mövzusunda müzakirələrdə çıxış edən ADY sədri rəqəmsal həllər sayəsində Orta Dəhlizdə yüklərin dəniz marşrutları ilə müqayisədə üç dəfə daha sürətlə daşındığını diqqətə çatdırıb. Tədbirdə dəmiryol nəqliyyatının karbon emissiyasını sıfıra endirmək məqsədilə beynəlxalq əməkdaşlığın gücləndirilməsinin vacibliyi vurğulanıb.
Eyni zamanda, 20 noyabr tarixində ADY “Dayanıqlı və rəqəmsal Orta Dəhliz və onun hüdudlarından kənarda” mövzusunda keçirilən nazirlərin dəyirmi masasında təmsil olunub. Tədbirdə beynəlxalq nəqliyyat dəhlizləri üzrə yükdaşımalarda sıfır karbon emissiyası hədəfinə çatmaq üçün əməkdaşlığın gücləndirilməsi və əməliyyatların rəqəmsallaşdırılması ilə bağlı məsələlər müzakirə olunub.
ADY həmçinin COP29 çərçivəsində Qlobal İqlim Fəaliyyəti üzrə Mərakeş Tərəfdaşlığının təşkil etdiyi “Nəqliyyat üçün ambisiyalar: Ədalətli və bərabər 1,5°C gələcəyə doğru irəli” adlı tədbirdə təmsil olunub. Panel müzakirələrində dəmir yollarının elektrikləşdirilməsi və bərpa olunan enerjiyə keçid üzrə Azərbaycanın əldə etdiyi nailiyyətlərdən bəhs edilib, karbon emissiyalarının azaldılmasına dair Milli Səviyyədə Müəyyən Edilmiş Töhfələr çərçivəsində Azərbaycan dəmir yollarının roluna xüsusi diqqət yetirilib. Qeyd edək ki, 2023-cü ildə Azərbaycanın dəmir yolları ilə daşınan sərnişinlərin 100%-i və yüklərin 80%-i elektrik enerjisi vasitəsilə həyata keçirilib.
Bundan başqa, ADY-nin Kommunikasiya departamentinin müdiri “Şəhər mobilliyində yeni imkanlar: Milli Səviyyədə Müəyyən Edilmiş Töhfələrin dayanıqlı nəqliyyat və iqlim dəyişikliyi ilə mübarizə üçün səfərbər edilməsi” və “Dayanıqlı inkişafda korporasiyaların rolu” mövzularında təşkil edilmiş tədbirlərdə iştirak edib.
Bütün bu tədbirlərdə irəli sürülmüş təşəbbüslər və əldə olunan nailiyyətlər Azərbaycanın iqlim siyasətində liderliyinə töhfə verir. ADY-nin dayanıqlı nəqliyyat və ətraf mühitin mühafizəsinə yönəlmiş fəaliyyəti ölkəmizin beynəlxalq səviyyədə nüfuzunun daha da artırılmasını hədəfləyir və COP29 çərçivəsində imzalanmış sənədlər, yeni əməkdaşlıq perspektivləri ekoloji cəhətdən dayanıqlı nəqliyyat sisteminin inkişafına töhfə verir.
25 noyabr tarixində “Azərbaycan Dəmir Yolları” QSC-də (ADY) Çin Xalq Respublikasının Sian Beynəlxalq Limanının nümayəndə heyəti ilə görüş keçirib.
Yol-xeber.az" xəbər verir ki, Görüşdə ADY sədri Rövşən Rüstəmov Azərbaycanla Çin arasında Orta Dəhlizlə yükdaşımalar sahəsində əməkdaşlığın inkişaf etdiyini, bunun bariz nümunəsi kimi ötən gün ilk dəfə olaraq ixrac yüklərinin Bakıdan dəmiryol nəqliyyatı ilə Çinə yola salındığını bildirib.
Qeyd olunub ki, bu tarixi hadisə ilə iki ölkənin iqtisadi və nəqliyyat əlaqələri yeni mərhələyə qədəm qoyub və beləliklə, həm Şərqdən Qərbə, həm də əks istiqamətə yükdaşımaların həyata keçirilməsi Orta Dəhlizin səmərəliliyini daha da artırır. ADY Çinlə əməkdaşlığı Kəmər və Yol Təşəbbüsü və Avrasiya Nəqliyyat Marşrutu çərçivəsində də intensiv inkişaf etdirməkdə maraqlıdır.
Bildirilib ki, ADY Azərbaycanın beynəlxalq nəqliyyat-logistika qovşağına çevrilməsi və ölkə ərazisindən keçən beynəlxalq dəhlizlər üzrə yükdaşımaların artırılması məqsədilə bir sıra önəmli layihələr həyata keçirir. Bakı–Tbilisi–Qars dəmiryol xəttinin genişləndirilməsi və yük ötürücülük qabiliyyətinin ildə 5 milyon tonadək artırılması Şərq-Qərb istiqamətində yük axınının sürətləndirilməsinə imkan verir.
Çinin Sian Beynəlxalq Limanının (“Xi'an International Port”) İdarəetmə Komitəsinin direktoru Sun Yimin və “Xi’an Free Trade Port Construction and Operation Co Ltd”nin baş direktoru Yuan Xiaojun Azərbaycanın nəqliyyat-logistika qurumları, o cümlədən ADY ilə əməkdaşlığın inkişafına xüsusi önəm verdiklərini deyib, Orta Dəhlizin yük həcmlərinin artırılması istiqamətində əməkdaşlığın genişləndirilməsinin vacibliyini vurğulayıblar.
Qeyd edək ki, yola salınmış Bakı–Sian ilk ixrac blok-qatarı 62 ədəd 40 futluq konteynerdən ibarətdir. Bu yük Qazaxıstan üzərindən Çinin ən böyük quru limanlarından biri olan Sian Limanına çatdırılacaq. Layihə çərçivəsində ilkin olaraq bu ilin sonunadək ümumilikdə 15 min ton, yəni 600 konteyner ixrac yükünün qeyd olunan marşrutla Çinə göndərilməsi planlaşdırılır.
Xatırladaq ki, 2024-cü ilin əvvəlindən Çin Xalq Respublikasından Azərbaycan istiqamətinə 280 konteyner blok-qatarı yola salınıb. Bu ilin sonuna kimi Çindən müvafiq marşrut üzrə 300-dən çox konteyner blok-qatarının Azərbaycana qəbul edilməsi nəzərdə tutulub. 2025-ci il üçün blok-qatar sayının 3 dəfədən çox artırılaraq 1000-ə çatdırılması planlaşdırılır.
BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində 20 noyabr tarixində “Azərbaycan Dəmir Yolları” QSC (ADY) və Beynəlxalq Dəmir Yolları İttifaqının (UIC) birgə təşkilatçılığı ilə “Nəqliyyat dəhlizləri ilə dayanıqlı gələcəyə doğru: İqlim siyasətində dəmir yolları” adlı tədbir keçirilib.
Yol-xeber.az" xəbər verir ki, Tədbir iqlim dəyişikliklərinə qarşı mübarizədə Azərbaycanın lider rolu və dayanıqlı nəqliyyatın təmin edilməsi, xüsusilə dəmiryol şəbəkəsinin karbon emissiyasının azaldılmasına verdiyi həlledici töhfəyə həsr olunub.
Tədbirin əsas müzakirə mövzuları Azərbaycanın tranzit qovşağı olaraq Şərq-Qərb və Şimal-Cənub dəhlizləri üzrə yükdaşımaların artırılmasında aktiv fəaliyyəti, dəmir yolları nümunəsində nəqliyyatda dekarbonizasiya səyləri, ADY-nin Milli Səviyyədə Müəyyən Edilmiş Töhfələr və Paris Sazişindən irəli gələn öhdəliklərin yerinə yetirilməsində artan rolu olub.
ADY sədri Rövşən Rüstəmov tədbirdə “Azərbaycanın regional və qlobal iqlim məqsədlərinə nail olunmasında Azərbaycanın rolu: Ölkənin nəqliyyat strategiyasında dəmir yollarının rolu” mövzusunda çıxış edərək Azərbaycan Dəmir Yollarının qlobal iqlim çağırışlarına uyğun olaraq 2023-cü ildə BMT-nin Qlobal Sazişinə üzv olması, beynəlxalq GRI və SASB standartları əsasında ADY-də müvafiq diaqnostikanın aparılması və bu diaqnostikanın nəticəsi olaraq ilk dəfə “Dayanıqlılıq hesabatı”nın hazırlanaraq ictimaiyyətə təqdim olunması barədə məlumat verib.
Rövşən Rüstəmov qeyd edib ki, son iki ildə ADY karbon emissiyasının azaldılması istiqamətində mühüm nailiyyətlər əldə edib, Azərbaycan dəmiryol şəbəkəsinin 63%-i elektrikləşdirilib və bərpa olunan enerjinin potensialından geniş istifadə edilib. 2023-cü ildən etibarən ADY enerji istehlakını 5%, təbii qaz istehlakını 16%, su sərfiyyatını 23%, karbon emissiyasını isə 9% azaltmağa müvəffəq olub. Ötən il sərnişinlərin 100%-nin, yüklərin isə 80%-nin daşınması elektrik enerjisi hesabına həyata keçirilib.
ADY sədri bildirib ki, COP29-da əsas gözləntilərdən biri dayanıqlılıq təşəbbüslərinin maliyyələşdirilməsidir. Bu məsələ həmçinin Azərbaycan Dəmir Yollarının gündəliyində yer alıb. ADY-nin 2030-cu ilə qədər Strategiyasında yaşıl maliyyələşmə imkanlarından istifadə etməklə dayanıqlılıq layihələrinin icra edilməsi öz əksini tapıb. Ötən ay Asiya İnkişaf Bankı (AİB) ilə dəmir yollarında dekarbonizasiya sahəsində əməkdaşlığa dair missiya sənədinin imzalanması bunun bariz nümunəsidir.
Sonra Dəmir Yolları Əməkdaşlıq Təşkilatının sədri Miroslav Antonoviç, Beynəlxalq Dəmir Yolları İttifaqının sədri və Polşa Dəmir Yollarının baş icraçı direktoru Alan Berud, AİB-nin Nəqliyyat Sektoru Qrupunun direktoru Ceyms Leder, “Masdar” şirkətinin Azərbaycan üzrə direktoru Murad Sadıxov və ADY sədrinin müavini Arif Ağayev dəmir yollarının ekodost nəqliyyat növü olması, bərpa olunan enerjidən istifadənin artırılması təşəbbüsünün dəstəklənməsi və beynəlxalq maliyyə institutları tərəfindən bu təşəbbüsün maliyyələşdirilməsi kimi məsələlər ətrafında çıxışlar ediblər.
Daha sonra sual-cavab formatında panel müzakirələri təşkil olunub, nəqliyyat ekspertləri və media nümayəndələri adıçəkilən qurumların rəhbərlərinə beynəlxalq dəhlizlərin inkişafı, rəqəmsallaşma, yükdaşımalarda aşağı karbon göstəricilərinə nail olunması üçün gələcək hədəflər barədə suallar ünvanlayıb və bu istiqamətlərdə səmərəli müzakirələr aparılıb.
Sonda ADY ilə UIC arasında “Dəmir yollarının iqlim öhdəliyi” sənədi imzalanıb.
“Azərbaycan Dəmir Yolları” QSC-nin (ADY) sədri Rövşən Rüstəmov BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində Dünya Bankının təşkilatçılığı ilə “Dəmiryol əməliyyatlarının sürətləndirilməsi üçün etibarlı həllər” mövzusunda keçirilən tədbirdə iştirak edib.
Yol-xeber.az" xəbər verir ki, Tədbirdə əsas müzakirə istiqamətləri dəmiryol nəqliyyatının karbon emissiyasının azaldılması və şəhər mobilliyinə töhfəsi, dəmiryol infrastrukturunun daha da inkişaf etdirilməsinin vacibliyi olub.
Panel müzakirələrində çıxış edən ADY sədri Rövşən Rüstəmov bildirib ki, Azərbaycanda dəmiryol sahəsində iri infrastruktur layihələri əsasən dövlət vəsaiti hesabına həyata keçirilir. Belə layihələr “Azərbaycan 2030: sosial-iqtisadi inkişafa dair Milli Prioritetlər”də də öz əksini tapıb. Bununla yanaşı, dəmiryol infrastrukturunun inkişafı məqsədilə beynəlxalq maliyyə institutlarından kreditlər cəlb edilir. Bunun üçün şirkətin maliyyə dayanıqlılığı, şəffaf fəaliyyəti, hesabatlığının olması və dövlət zəmanəti zəruridir.
Rövşən Rüstəmov qeyd edib ki, ADY Dünya Bankı və Asiya İnkişaf Bankı ilə səmərəli əməkdaşlıq edir. Son illərdə Azərbaycan Dəmir Yollarında aparılmış struktur islahatları, iri kapital qoyuluşlu layihələrin həyata keçirilməsi üçün icra və monitorinq mexanizmlərinin mövcudluğu, eləcə də beynəlxalq konsaltinq şirkətlərinin müsbət rəyi beynəlxalq maliyyə qurumlarının ADY ilə əməkdaşlığa maraq göstərməsinə zəmin yaradıb.
Tədbirdə çıxış edən Braziliya Nəqliyyat Nazirliyinin dayanıqlılıq üzrə katibi Kloves Benevides, Beynəlxalq Dəmir Yolları İttifaqının dayanıqlılıq üzrə direktoru Lusi Anderton və Dünya Bankının nəqliyyat sahəsi üzrə qlobal direktoru Nikolas Peltier bildiriblər ki, dəmiryol infrastrukturunun inkişafı üçün davamlı olaraq investisiya cəlb olunmalıdır, xüsusilə iqlim maliyyələşməsi kimi aktual məsələlərdə dəmiryol sahəsi kənarda qalmamalıdır. Qeyd edilib ki, dəmiryol sektorunun ətraf mühitə mənfi təsirlərin azaldılmasına töhfəsini genişləndirmək üçün daha çox innovativ həllər tətbiq olunmalıdır.
Sonda Dünya Bankı və Çoxtərəfli İnvestisiyalar üzrə Zəmanət Agentliyin (MIGA) hesabatları təqdim olunub. Hesabatlarda dəmir yollarına iqlim maliyyələşməsinin vacibliyi və tərəfdaş ölkələrdə bu kimi layihələrin müsbət nəticələri öz əksini tapıb.
“Azərbaycan Dəmir Yolları” (ADY) QSC-nin sədri Rövşən Rüstəmov Beynəlxalq Dəmir Yolları İttifaqının (UIC) sədri, Polşa Dəmir Yolları (PKP) Korporasiyasının İdarə Heyətinin prezidenti Alan Berud və Korporasiyanın Belçikadakı nümayəndəliyinin direktoru Tomaş Laxoviçlə görüşüb.
Yol-xeber.az" xəbər verir ki, Görüşdə Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində iqlim böhranı ilə bağlı qlobal çağırışların əhəmiyyətinə və birgə fəaliyyətin səmərəliliyinə diqqət çəkilib.
Görüş zamanı tərəflər ADY ilə UIC və PKP arasında əməkdaşlığın əsas istiqamətləri, 1995-ci ildən UIC-nin üzvü olan ADY-nin təşkilatın fəaliyyətindəki rolu və beynəlxalq layihələrdəki iştirakı müzakirə olunub. Azərbaycanla Avropa İttifaqı arasında potensial dəmiryol əlaqəsinin təkmilləşdirilməsi, eləcə də tranzit vaxtının optimallaşdırılması barədə məqamlara toxunulub, beynəlxalq yük daşımalarındakı yeniliklər, rəqəmsallaşma və dayanıqlılıqla bağlı ən yaxşı təcrübələrdən söz açılıb.
Rövşən Rüstəmov son illərdə ADY-nin beynəlxalq dəhlizlər üzrə yükdaşımaların artırılması istiqamətində aktiv fəaliyyət göstərdiyini, Orta Dəhlizin əsas halqalarından olan Bakı–Tbilisi–Qars dəmir yolunun bu ilin mayından tam gücü ilə işlədiyini və bununla da dəmiryol xəttinin buraxılış gücünün illik 5 milyon tonadək artdığını qeyd edib.
Rəqəmsal transformasiya və dayanıqlı ətraf mühit istiqamətində görüləcək işlərdə birgə fəaliyyətin zəruriliyinə diqqət çəkən ADY sədri Rövşən Rüstəmov hər iki istiqamətdə qarşılıqlı təcrübə mübadiləsinin bütün tərəflər üçün faydalı olacağını bildirib.
UIC-nin sədri Alan Berud dəmiryol sahəsində regional və qlobal əməkdaşlığın dayanıqlı gələcəyə töhfə verəcəyinə əmin olduğunu deyib.
ADY ilə Polşa Dəmir Yolları Korporasiyası arasında beynəlxalq yük daşımalarında restrukturizasiya imkanlarının olduğunu qeyd edən PKP-nin nümayəndəsi Tomaş Laxoviç ümumi multimodal yükdaşıma mərkəzi və vaqon parkının xidmət keyfiyyətini yaxşılaşdıracağına inandığını deyib.
19 noyabrda “Azərbaycan Dəmir Yolları” QSC-nin (ADY) sədri Rövşən Rüstəmov və İsveçrənin “Stadler Rail Group” şirkətinin icraçı vitse-prezidenti Daniel Baer Bakı şəhərində Təlim və İnkişaf Mərkəzinin yaradılmasına dair müqavilə imzalayıblar.
Yol-xeber.az" xəbər verir ki, Müqaviləyə əsasən, Təlim və İnkişaf Mərkəzinin 2027-ci ildə istifadəyə verilməsi nəzərdə tutulur. Mərkəz Azərbaycanda dəmiryol sahəsində gənc və peşəkar kadrların yetişdirilməsi və strateji kadr potensialının inkişafı baxımından mühüm əhəmiyyət daşıyır. Eyni zamanda, Təlim və İnkişaf Mərkəzinin yaradılması yeni nəsil hərəkət vasitələrinə texniki qulluğun göstərilməsi və istismarı üçün kadr hazırlığına əhəmiyyətli töhfə verəcək. Mərkəzdə regionda “Stadler” qatarlarını idarə edəcək maşinistlərin təlimləndirilməsi də planlaşdırılır.
“Stadler Rail Group” şirkəti Mərkəzin layihələndirilməsi və tikintisinə, texniki avadanlıqlarla, o cümlədən praktiki məşğələlər üçün müasir simulyatorlarla təchizatına dəstək verəcək.
“Stadler Rail Group” şirkəti Mərkəzin layihələndirilməsi, tikintisi, texniki təminatı, o cümlədən praktiki məşğələlər üçün simulyatorların alınmasını maliyyələşdirəcək. Yeni nəsil simulyatorlar maşinist və maşinist köməkçilərinin hazırlanması və texniki biliklərinin təkmilləşdirilməsinə geniş imkan yaradacaq. Mərkəzin fəaliyyəti təkcə texniki biliklərin tədrisi ilə məhdudlaşmayacaq, gələcəkdə idarəetmə sahəsində də təlim proqramları həyata keçiriləcək. Burada əməkdaşlar müasir tədris vasitələri ilə təchiz olunmuş mühitdə, real iş şəraitinə uyğun təlimlər keçəcəklər. Dünyada sənaye sahəsi sürətlə inkişaf etdiyindən peşə bacarıqlarının keyfiyyətlə və qısa müddətdə öyrədilməsi zərurəti belə təlim mərkəzlərinə ehtiyacı artırır.
Hazırda ADY-də texniki sahədə çalışan əməkdaşların 50 faizinin daha innovativ və yeni texniki trendlərə uyğun ixtisaslaşdırılmasına ehtiyac var. Yeni Təlim və İnkişaf Mərkəzi mütəxəssis çatışmazlığı riskini əhəmiyyətli dərəcədə aradan qaldıracaq.
Mərkəzin binası 4 mərtəbədən, təlim otaqları, simulyator otaqları, ofislər, kompüter laboratoriyaları və yeməkxanadan ibarət olacaq, həmçinin təlimlərə regionlardan qatılan ADY əməkdaşlarının burada qalması üçün otaqlar ayrılacaq. Layihə çərçivəsində Təlim və İnkişaf Mərkəzi günəş panelləri ilə təchiz olunacaq. Bu təşəbbüslə ADY ESG (Ətraf mühit, Sosial və İdarəetmə) prinsiplərinə uyğun şəkildə bərpa olunan enerji istifadəsinə doğru daha bir strateji addım atır. Günəş enerjisinin tətbiqinin genişləndirilməsi isə müəssisəyə karbon izini azaltmağa və ekoloji davamlılığa töhfə verməyə şərait yaradır.
İmzalanma mərasimində iştirak edən “Stadler Rail Group” şirkətinin icraçı vitse-prezidenti Daniel Baer yeni Təlim və İnkişaf Mərkəzinin yaradılmasını ADY ilə əməkdaşlığın daha bir uğurlu nəticəsi kimi qiymətləndirib:
“ADY ilə strateji tərəfdaşlıq çərçivəsində müasir Təlim və İnkişaf Mərkəzinin yaradılması haqqında müqaviləni imzalamaqdan çox məmnunuq. Bu Mərkəzin uğurla fəaliyyət göstərəcəyinə və bütün gözləntiləri qarşılayacağına əminik. İnanırıq ki, Təlim və İnkişaf Mərkəzi nəinki Azərbaycanda, regionda da “Stadler” və ADY brendlərinin təşviqinə öz töhfəsini verəcək”.
ADY-də müasir standartlara cavab verəcək yeni Təlim və İnkişaf Mərkəzinin yaradılması məqsədilə bir il ərzində Almaniya, Türkiyə və İspaniya kimi ölkələrin müvafiq təcrübələri yerində öyrənilib, təhlil edilib, ən yaxşı nümunələr üzərində müzakirələr aparılıb. Yekun olaraq Mərkəzin konsepsiyasının Almaniya Dəmir Yolları Akademiyası (“Deutsche Bahn Rail Academy”) ilə əməkdaşlıq çərçivəsində hazırlanması barədə qərar qəbul edilib.
Yeni Mərkəz vasitəsilə dəmiryol sektorunda nəzəri və praktiki təlimlərin genişləndirilməsi, peşə və ali təhsil müəssisələri ilə əməkdaşlığın möhkəmləndirilməsi və beynəlxalq təcrübələrin ölkəmizə inteqrasiyası təmin ediləcək. Bununla yanaşı, Mərkəzdə hazırlanacaq peşəkar mütəxəssislər Azərbaycan ərazisindən keçən beynəlxalq nəqliyyat dəhlizlərinin, o cümlədən Orta Dəhlizin potensialının daha da artırılmasına töhfə verəcəklər. Beləliklə, rəqəmsal həllərin davamlı tətbiqi və təhlükəsiz daşımalar sahəsində qabaqcıl mövqe qazanaraq ADY-nin beynəlxalq dəhlizlərdəki strateji mövqeyi daha da güclənəcək.
Xatırladaq ki, ötən ilin oktyabr ayında ADY və “Stadler Rail Group” şirkəti arasında dəmiryol nəqliyyatı vasitələrinin təmiri, texniki qulluq və konsultasiya üzrə xidmətlərin göstərilməsinə dair müqavilə imzalanıb. Anlaşmaya əsasən, Böyükşor ərazisində tikiləcək Regional Servis Mərkəzi Azərbaycan daxil olmaqla qonşu ölkələrdə də geniş istismar edilən “Stadler” hərəkət tərkiblərinin irihəcmli təmirinin həyata keçirilməsinə imkan yaradacaq.
Yeni Təlim və İnkişaf Mərkəzi Regional Servis Mərkəzi üçün də peşəkar texniki mütəxəssislərin hazırlanmasına töhfə verəcək.
Qeyd edək ki, ADY əməkdaşlarının bilik və bacarıqlarının artırılması məqsədilə davamlı olaraq müxtəlif sahələrdə təlimlər təşkil edir. İşçilərin təlim ehtiyaclarını qarşılamaq üçün 2024-cü il üzrə 1 milyon manat vəsait ayrılıb. Bu ilin 10 ayında 5 minə yaxın əməkdaşa 225 adda təlim keçirilib.
ADY-nin regionlardakı əməkdaşlarının təlim ehtiyaclarının çevik şəkildə qarşılanması məqsədilə bir sıra layihələr uğurla tamamlanıb. Bu layihələrdən biri olan “AnzerA” onlayn təlim platforması işçilərə istənilən yerdən, istənilən vaxt öz biliklərini artırmaq üçün təlim materiallarına çıxış imkanı verir. Əməkdaşlar burada müxtəlif peşəkar mövzularda təlimlərə qoşula biləcək, həmçinin tədris materiallarını asanlıqla əldə edirlər.
Bundan başqa, “Təlim qatarı” layihəsi üzərində işlər tamamlanmaq üzrədir. Bu layihə çərçivəsində bölgələrdə fəaliyyət göstərən ADY əməkdaşlarının təlim ehtiyacları yerindəcə təmin ediləcək.
Eyni zamanda, ADY gənclərin xaricdə dəmiryol ixtisası üzrə təhsilinə xüsusi diqqət ayırır. Bu yaxınlarda bir qrup tələbə ADY-nin təqaüd proqramını qazanıb və təhsilini Rusiya Nəqliyyat Universitetində davam etdirir. Hazırda Çin və Rusiyanın nəqliyyat sahəsi üzrə digər qabaqcıl ali təhsil müəssisələri ilə əməkdaşlıq imkanları öyrənilir.