 |
|
Sürücü sağa manevr etməsəydi ölümlə nəticələnən qəza baş verecəkdi
Bakı-Sumqayıt yolunda özünü ölümə aparan sürücünün görüntüsü Avtosfer.az-ın kamerasına düşüb. Belə ki, yanvarın 13-ü səhər saat 09:05 radələrində Bakı-Sumqayıt yolunda hərəkət edən 10 VB 212 qeydiyyat nişanlı "Opel" markalı avtomobilin sürücüsü əks istiqamətə çıxaraq axına qarşı hərəkət edib. O, digər qayda pozan sürücülərdən fərqli olaraq yolun üzü Bakı istiaqamətinə olan hissəsinin sürətli zolağında yüksək sürətlə hərəkət edərək qarşısından gələn avtomobillərin üzərinə sürüb. Hadisəni qeydə alan əməkdaşımız bildirir ki, təhlükəni görən anda avtomobili sağa manevr etməsəydi ölümlə nəticələnən qəza baş verecəkdi.
Ümid edirik ki, Baş Dövlət Yol Polisi İdarəsinin əməkdaşları həmin sürücü barədə araşdırma apararaq barəsində ciddi tədbir görəcək.
Bu cür hərəkətlərlə digər sürücülərə təhlükə yaradır
Yol hərəkəti qaydasını saymayaraq təhlükəli şəkildə avtomobil idarə edən sürücü barədə redaksiyamıza şikayət daxil olub. Avtosfer.az xəbər verir ki, 90-DN-104 qeydiyyat nişanlı "Vaz 2107" markalı avtomobilin sürücüsü yanvarın 12-i Sumqayıt şəhəri Sülh küçəsində yüksək sürətlə hərəkət edib. O, həmin vaxt avtomobillərin hərəkəti üçün nəzərdə tutulmayan təhlükəsizlik adacığında hərəkət edərək digər sürücülərə təhlükəli vəziyyət yaradıb. Sürücü yolayrıcında 4.1.4 düzünə və sağa məcburedici nişanı olan yerdən sola dönərək hərəkətinə davam edib.
Dekabrın 27-də həmin sürücü qeyd etdiyimiz avtomobillə hərəkət etdiyi küçədə ziqzaqvari hərəkətlər edərək avto şou göstərib. Görüntülər sosial şəbəkədə yayılıb.
Qeyd edək ki, sürücü avtomobilin konstruksiyasına da əlavələr edərək qabağını qaldırıb, arxasını isə aşağı salaraq normativ tələbləri pozub.
Yaralı ağır vəziyyətdə xəstəxanaya yerləşdirilib
Abşeron rayonunda piyadanın ölümü ilə nəticələnən yol qəzası baş verib.
Hadisə Əliçıraq yaşayış massivində qeydə alınıb.
Belə ki, minik avtomobili yolu keçmək istəyən 1986-cı il təvəllüdlü Rüstəmov Murad Ələmşah oğlunu vurub.
Yaralı ağır vəziyyətdə xəstəxanaya yerləşdirilib. Lakin həkimlərin səylərinə baxmayaraq, onun həyatını xilas etmək mümkün olmayıb.
Faktla bağlı araşdırma aparılır.
Xəstəxandan bildirilib ki, sürücünün ayağı sınıb
Göygöldə yol-nəqliyyat hadisəsi baş verib. APA-nın məlumatına görə, hadisə rayonun Toğana kəndində qeydə alınıb. Gəncə sakini 1994-cü il təvəllüdlü Tağıyev İbrahim Raqif oğlu idarə etdeyi “VAZ 2106” 10-KH-997 nömrəli dövlət qeydiyyat nömrəli minik maşını ilə Gəncə istiqamətdə hərəkətdə olarkən idarə etməni itirib. Qəza zamanı avtomobil yolun kənarındakı qayaya çırpılıb. Sürücü xəsarət alaraq xətəxanaya yerləşdirilib.
Xəstəxandan bildirilib ki, sürücünün ayağı sınıb. Onun vəziyyətinin kafi olduğu bildilir.
Faktla bağlı araşdırma aparılır.
Sürücü idarəetməni itirib və qarşıdan gələn digər avtomobilə toqquşub
Şəmkir rayonunda xəsarətlə nəticələnən yol-nəqliyyat hadisəsi olub. "Report"un məlumatına görə, hadisə Bakı-Qazax avtomobil yolunun rayon ərazisindən keçən hissəsində qeydə alınıb. İlkin məlumata görə, qəza nəticəsində bir neçə nəfər xəsarət alıb. Yaralılar xəstəxanaya aparılıb. Qeyd edilir ki, onların arasında vəziyyəti ağır olan var.
***
Bakı-Qazax avtomobil yolunda baş verən qəza nəticəsində xəsarət alanların şəxsiyyəti məlum olub. Magistral yolun Göygöl rayon ərazisindən keçən hissəsində (Şəmkir rayonuna yaxın ərazidə-red) baş vermiş avtomobil qəzasında xəsarət alanlar 1992-ci il təvəllüdlü Ruslan İsfəndiyarlı, onun qardaşı və daha bir nəfər xəsarət alıb. Onlardan R.İsfəndiyarlının vəziyyətinin ağır olduğu bildirilir. İlkin məlumata görə, qəzaya yolda olan itin cəsədi səbəb olub. Belə ki, sürücü idarəetməni itirib və qarşıdan gələn digər avtomobilə toqquşub.
Faktla bağlı Baş Dövlət Yol Polisi İdarəsinin əməkdaşları tərəfindən araşdırma aparılır.
Yaralı 1 saylı şəhər xəstəxanasına yerləşdirilib
Qaradağ rayonunda avtobusdan enmək istəyən sərnişin ağır xəsarət alıb.
Hadisə Buta qəsəbəsində baş verib.
1980-ci il təvəllüdlü İsmayılov Elnur Cavad oğlu 126 saylı xətt üzrə hərəkət edən sərnişin avtobusundan düşmək istəyib. Bu zaman o, hərəkət etməyə başlayan avtobusdan yerə yıxılıb.
Yaralı 1 saylı şəhər xəstəxanasına yerləşdirilib. Ona açıq kəllə-beyin travması diaqnozu qoyulub. E.İsmayılovun vəziyyəti ağır qiymətləndirilir.
Faktla bağlı Qaradağ Rayon Polis İdarəsində araşdırma aparılır.
Hadisəni törədən sürücü ərazidən yayınıb
Bakıda baş vermiş yol-nəqliyyat hadisələri zamanı 2 piyada xəsarət alıb.
Suraxanı rayonunun Qaraçuxur qəsəbəsində baş vermiş qəzada yolu keçən 1989-cu il təvəllüdlü Sadıqova Esmira Təmraz qızı xəsarət alıb.
Hadisəni törədən sürücü ərazidən yayınıb.
Yaralı 3 saylı şəhər xəstəxanasına yerləşdirilib. Ona çanaq oynağının əzilmiş yarası diaqnozu qoyulub.
Digər hadisə Nəsimi rayonunda qeydə alınıb.
Göy Məscidin yaxınlığında baş verən qəzada 1997-ci il təvəllüdlü Əliyev Elvin Mübariz oğlu yaralanıb.
Gənc 1 saylı Şəhər Klinik Xəstəxanasına yerləşdirilib. Ona sağ bud sümüyünün çıxığı, üz sümüklərinin sınığı və açıq kəllə beyin travması diaqnozu qoyulub.
Hər iki faktla bağlı rayon polis idarələrində araşdırma aparılır.
Piyada keçidləri onların lazım olduğu sürətli yollarda deyil, şəhərin mərkəzində tikilir
Bakıda dəfələrlə piyada zolaqlarına vurulan rəngin müəyyən müddət sonra pozulduğunun və yoxa çıxdığının şahidi oluruq. Əksər yerlərdə piyada keçidləri heç bir nişan və işıq olmadan yalnız ağ rəngli zolaqlardan ibarətdir. Gecələr isə təəssüf ki, həmin əlverişsiz keçidlərdə piyada vurulma və ölüm halları baş verir. Bəs görək əslində piyada keçidləri hansı standartlarda olmalıdır?
Şəhər nəqliyyat eksperti Hüseyn Abdullayev məsələ barədə Lent.az -a danışıb. Ekspert piyada zolaqları ilə bağlı Bakıda bir çox ciddi problemlərin olduğunu qeyd edib: “Piyada keçidləri ilə bağlı problem ondan ibarətdir ki, onlar ya lazım olan yerlərdə qurulmur ya da qurulması düzgün təqlid edilmir. Əslində nizamlanması lazım olan yerlərdə çox vaxt nizamlanmayan piyada keçidləri qoyurlar. Məsələn, geniş yollarda nizamlanmayan piyada keçidləri qoyurlar ki, bu da çox təhlükəlidir. Avropa standartlarına görə, əgər yolda hərəkət zolağının sayı 1-dən çoxdursa orada işıqforla nizamlanan piyada keçidi olmalıdır. Nizamlanmayan keçidlərdə rəng pozulur, işıq olmur. Ən azından kontrast işıq olmalıdır ki, sürücülər kənardan piyadanı görsünlər. Nizamlanmayan piyada keçidləri heç olmasa hər tərəfə bir hərəkətli olan yollarda olmalıdır. Bu baxımdan Bakıda çox böyük problemlər var. Problemin digər tərəfi isə artıq 1970-ci illərdə qalan yeraltı və yerüstü piyada keçidlərinin hələ də tikilməsidir. Təəssüf ki, əksər hallarda yeraltı piyada keçidlərinin lazım olduğu sürətli yollarda onlara az rast gəlinir. Əvəzində isə nizamlanmayan keçidlər qoyulur ki, bu da çox təhlükəlidir. Təəssüf ki, yerüstü və yeraltı piyada keçidləri onların lazım olduğu sürətli yollarda deyil, şəhərin mərkəzində tikilir. Bu da böyük bir paradoksdur”.
Piyadaların yol hərəkətində əsas olduğunu deyən Hüseyn Abdullayev, Bakıda bunun əksinə olduğunu bildirib. Onun sözlərinə görə, infrastrukturun əlverişsizliyi ucbatından piyadalar icazə verilməyən yerlrədən keçməyə məcbur olurlar:
“Əslində yaşayış məntəqələrinin ətrafındakı yollarda 150-300 metrdən bir piyada keçidi olmalıdır. Ancaq bir çox prospekt və küçələrdə buna əməl olunmur. Əksər hallarda görürük ki, insanların instensiv istifadə etdiyi yerlərdə piyada keçidi yoxdur. Buna görə də, onlar icazə verilməyən yerlərdən keçməyə məcbur qalırlar. Nəticədə xoşagəlməz hadisələr baş verir. Amma ki, piyadalar yol hərəkət iştirakçıları arasında əsas hesab olunurlar. Bakıda isə əksinə olaraq, maşınların hərəkətinə daha çox şərait yaradırlar. Bu da öz növbəsində çox böyük problemlərə səbəb olur. Çünki yol-nəqliyyat hadisələri əksər hallarda piyadaların iştirakı ilə baş verir. Hadisə olanda isə qınanılan tərəf piyadalar olur. Ancaq şəhərin infrastrukturu piyadalar üçün əlverişli deyil deyə onlar da qaydaları pozurlar”.
Qeyd edək ki, ötən il respublikanın avtomobil yollarında 719 piyada vurulma halı qeydə alınıb. Onlardan 299-u ölüb, 455-i xəsarət alıb.
E.Şükürov Şirvan Şəhər Mərkəzi Xəstəxanasına yerləşdirilib
Sabirabad rayonunda xəsarətlə nəticələnən yol-nəqliyyat hadisəsi baş verib.
“Report”un Aran bürosu xəbər verir ki, hadisə Hacıqabul-Horadiz magistral yolunun Sabirabad rayonu ərazisindən keçən hissəsində qeydə alınıb.
Belə ki, İmişli rayonunun Göbəktala kənd sakini Eldar Zeynal oğlu Şükürov idarə etdiyi “KaMAZ” markalı yük maşını ilə Sabirabad istiqamətində hərəkətdə olarkən qarşıda gedən Bakı şəhər sakini Yaşar Qafar oğlu Şahbazovun idarə etdiyi minik avtomobilinə çırpılıb.
Hadisə zamanı yük maşını idarəetmədən çıxaraq yolun hərəkət hissəsinə aşıb. Qəza nəticəsində müxtəlif dərəcəli bədən xəsarətləri alan E.Şükürov Şirvan Şəhər Mərkəzi Xəstəxanasına yerləşdirilib.
Avtomobilin yük yerində olan mişar daşları yola töküldüyündən magistral yolda bir müddət hərəkət məhdudlaşıb. Yolda uzun zolaqlı tıxac yaranıb. Texnika vasitəsi ilə yola səpələnmiş mişar daşaları təmizlənərək hərəkət bərpa olunub.
Faktla bağlı araşdırma aparılır.
Qəza zamanı iki nəfər xəsarət alıb
Oğuzda yük maşını ilə minik avtomobili toqquşub.
APA-nın şimal-qərb bürosunun məlumatına görə, hadisə bu gün günorta saatlarında rayonun Qumlaq kəndi ərazisində baş verib. “Ford” markalı xırdatutumlu yük maşını ilə “VAZ 2106” markalı minik avtomobili toqquşub.
Qəza zamanı iki nəfər xəsarət alıb. Yaralılar Oğuz Rayon Mərkəzi Xəstəxanasına çatdırılıb, daha sonra müayinə və müalicələrini davam etdirmək üçün Şəki Rayon Mərkəzi Xəstəxanasına aparılıblar.
Faktla bağlı araşdırma aparılır.