 |
|
Sabahdan Azərbaycanda Novruz bayramı ilə əlaqədar 9 günlük tətil başlayır.
"Report" xəbər verir ki, qeyri-iş günləri martın 19-da başlayacaq və martın 27-də isə son qeyri-iş günü olacaq.
Belə ki, Nazirlər Kabinetinin “2022-ci il üçün Novruz, Ramazan və Qurban bayramları günlərinin müəyyən edilməsi haqqında” qərarına əsasən, 2022-ci il mart ayının 20, 21, 22, 23, 24-ü Novruz bayramıdır.
Əmək Məcəlləsinin 105-ci maddəsinin 5-ci hissəsinə əsasən həftələrarası istirahət günləri və iş günü hesab olunmayan bayram günləri üst-üstə düşərsə, həmin istirahət günü bilavasitə bayram günündən sonrakı iş gününə keçirilir.
Ölkə.az xəbər verir ki, bununla əlaqədar martın 20-si bazar gününə təsadüf etdiyi üçün 25 mart qeyri-iş günü olacaq.
Beləliklə, 19, 26 və 27 mart tarixləri də şənbə və bazar günlərinə təsadüf etdiyi üçün Novruz bayramı ilə əlaqədar 9 gün ardıcıl (19, 20, 21, 22, 23, 24, 25, 26 və 27 mart) qeyri-iş günləridir.
Növbəti iş günü martın 28-dir.
MÜSAHİBƏNİN ƏVVƏLLİ BURADA
Milli Məclisinin deputatı, professor Eldar Quliyevin müsahibəsi
AİA.Az-ın suallarını Milli Məclisinin deputatı, Azərbaycan Ağsaqqallar Şurasının sədri, Azərbaycan Kooperasiya Universitetinin rektoru, iqtisad elmləri doktoru, professor Eldar Quliyev cavablandırır.
Eldar müəllim, bu gün istər ölkəmizdə, istərsə də beynəlxalq səviyyədə çox müzakirə olunan aktual məsələlərdən biri də Azərbaycanın Avropanın enerji təhlükəsizliyində getdikcə artan rolu ilə bağlıdır. Düşnürəm ki, bu barədə də Sizin fikirlərinizi bilmək oxucularımız üçün maraqlı olardı
Bu məsələ ilə bağlı danışarkən ilk növbədə qeyd etmək lazımdır ki, Azərbaycanın Avropanın enerji təhlükəsizliyində rolunun artması xüsusilə Cənub Qaz Dəhlizinin istifadəyə verilməsindən sonra yeni dinamika aldı. Bilirsiniz ki, dəyəri 33 milyard ABŞ dolları olan Cənub Qaz Dəhlizi XXI əsrin ən böyük layihələrindən biri hesab olunur. Layihə dörd seqmentdən – “Şahdəniz Mərhələ-II”, Cənubi Qafqaz Boru Kəməri, TANAP və TAP qaz boru kəmərlərindən ibarətdir. 2020-ci ilin dekabr ayımın 31-də Azərbaycan Cənub Qaz Dəhlizinin sonuncu hissəsi olan TAP layihəsinin tamamlanması haqqında məlumat verdi. Ölkəmiz artıq uzun illərdir ki, beynəlxalq bazarlarda enerji resurslarının etibarlı təchizatçısı kimi qəbul edilir. Azərbaycan neft ixracatına 2006-cı ildən başlayıb və aradan keçən uzun illər ərzində təchizatda heç bir fasilə olmayıb. Bu, əlbəttə ki, ölkəmizin bir tərəfdaş olaraq yüksək etibarlılığının göstəricisidir. Avropa ölkələrində qaza ehtiyacın getdikcə artması isə yeni bazarlar yaradır və bu tələbatın ödənilməsi üçün ölkəmizin zəngin resurslara sahib olması Azərbaycanın bundan sonra Avropanın enerji təhlükəsizliyində rolunun daha da artacağını deməyə əsas verir. Bu gün qaz alan ölkələrin bazarlarında Azərbaycan qazının payı ilə əlaqədar son məlumatlara görə, bu ölkələrin bəziləri qaz istehlakının 80 faizini, digərləri isə 15-20 faizini Azərbaycandan alırlar və bu göstəricilər getdikcə artır. Buna görə Azərbaycan da hasilatı artırmalıdır və bizim bunun üçün tələb olunan potensialımız var. Məlum olduğu kimi, Prezident İlham Əliyevin təşəbbüsü ilə yaradılan Cənub Qaz Dəhlizi Məşvərət Şurası çərçivəsində nazirlərin toplantısına hər dəfə Azərbaycan ev sahibliyi edir. Əlbəttə ki, bu ənənə ölkəmizin layihədə aparıcı rolunu təsdiqləyən mühüm amillərdən biridir. O cümlədən qurumun VIII toplantısı da fevralın 4-də Bakıda, “Gülüstan” sarayında keçirildi. Həmin toplantıda etdiyi çıxışında Prezident İlham Əliyevi qeyd etdi ki, Azərbaycanın isbat edilmiş qaz ehtiyatı 2,6 trilyon kubmetrdir. Hazırda bu ehtiyatın ən böyük hissəi - bir trilyon kubmetr yalnız “Şahdəniz” yatağına aiddir. Lakin yeni yataqların kəşfi davam edir və yeni texnologiyalar sürətlə inkişaf edir. Buna görə də Azərbaycanın isbat edilmiş qaz ehtiyatlarının daha da çox olacağını demək olar. Həmçinin gözlənilir ki, ən böyük qaz kondensatı yataqlarından biri olan “Abşeron”da tezliklə hasilata başlanılacaq. Beləliklə, Cənub Qaz Dəhlizi layihəsi başa çatsa da, tərəfdaş ölkələrin işi hələ uzun müddət davam edəcək.
Amma bu gün Azərbaycanın özünün də enerji resurslarına olan tələbatı getdikcə artır. Fikrinizcə bu artan tələbat ölkəmizin məsələn, qaz ixracatçısı kimi imkanlarını müəyyən qədər məhdudlaşdıra bilərmi?
Tamamilə düz qeyd etdiniz ki, bu gün ölkəmizdə istər təbii qaza, istərsə də digər enerji resurslarına tələbat getdikcə artır. Həm də bu artıma səbəb olan amillər olduqca müsbətdir. Bu amillərdən biri Azərbaycanda demoqrafik vəziyyətin müsbət olmasıdır. Yəni əhalinin sayı getdikcə artır və bu da enerji tələbatını artırır. Həmçinin sənayenin inkişafı enerji tələbatının artmasını şərtləndirir. Dövlət başçımızn da qeyd etdiyi kimi, ötən il Azərbaycanda məhz qeyri-enerji sektorunda rekord göstərici, 20 faiz artım qeydə alınıb. Əlbəttə ki, 2020-ci ildə Vətən Müharibəsi nəticəsində işğaldan azad edilmiş ərazilərin qazlaşdırması üçün də əlavə həcmdə qaza ehtiyac var. Bu ərazi 10 min kvadrat kilometrdən çox sahəni əhatə edir və cari ildən etibarən keçmiş qaçqınların öz doğma torpaqlarına qayıdışına başlanması ilə əlaqədar əlavə qaza ehtiyac bir qədər də artacaq. Bütün bunlar əlbəttə ki, bərpaolunan enerji növlərinin istehsalı məsələsini daha da aktual edir. Çünki məhz bərpaolunan enerji mənbələrinin çoxluği ixrac üçün daha çox qaza qənaət etməyə imkan verəcək. Buna görə də bu məqsədlər böyük həcmdə vəsait yatırılır, yeni elektrik stansiyaları tikilir. O cümlədən bir müddət əvvəl enerji bazarında tanınmış, Səudiyyə Ərəbistanının “ACWA Power” şirkəti tərəfindən maliyyələşdiriləcək ilk böyük bərpaolunan enerji mənbəyi layihəsinin - 240 meqavat gücündə külək elektrik stansiyasının təməlqoyma mərasimi keçirilmişdir və bu tədbirdə Ölkə Prezidenti cənab İlham Əliyev şəxsən iştirak etmişdir. Qeyd etmək lazımdır ki, Azərbaycan dünyanın xam neft, təbii qaz, neft-kimya məhsulları, neft məhsulları və elektrik enerjisi ixrac edən az sayda ölkələrindən biridir.
Məlumdur ki, ölkənin elektrik enerjisi potensialı əsasən daxili istehlaka hesablanıb. Bununla belə Azərbaycanın elektrik enerjisinə regional bazarda da ehtiyac var...
Əlbəttə, bu gün Azərbaycandan dörd qonşu ölkəyə - Türkiyə, Rusiya, Gürcüstan və İrana elektrik enerjisi ixrac edilir və buna olan tələbat da getdikcə artır. Bu da bərpa olunan enerji növlərinin istehsalına marağı artıran bir amildir. Bu baxımdan ölkənin Energetika Nazirliyinin aparıcı beynəlxalq şirkətlərlə birlikdə Qarabağ və Şərqi Zəngəzurda “yaşıl enerji” zonası üçün hazırladıqları konseptual proqnoz xüsusi önəm kəsab edir. Artıq həmin ərazilərdə bərpaolunan mənbələrin potensialının beynəlxalq qiymətləndirməsi aparılıb və ilkin olaraq külək enerjisində potensial təxminən 7200 meqavat, günəş enerjisində potensial isə 2000 meqavatdan çox müəyyən edilib. Həmçinin Xəzər dənizinin xüsusi proqram üzrə qiymətləndirilməyə görə texniki potensialı 150 min meqavatdan çoxdur və artıq Azərbaycan bu potensialın inkişafı ilə bağlı aparıcı beynəlxalq enerji şirkətlərindən müəyyən ilkin təkliflər də alıb. Beləliklə, bütün bu tədbirlər bir daha onu göstərir ki, Azərbaycan Avropa ölkələrinin enerji təhlükəsizliyi məsələsində öz rolunu getdikcə daha da artıracaq və bu tendensiya ölkəmizin beynəlxalq mövqeylərinin daha da güclənməsinə xidmət edəcək.
ardı var...
“Sovet imperiyası dövründə üzərinə “dini bayram” damğası vurulub qeyd olunmasına sərt qadağa qoyulmuş Novruz - bu əsrarəngiz bahar bayramı uzun illərin fasiləsindən sonra, 1969-cu ildən respublikamızda təntənə ilə qeyd olunmağa başlandı. Hələ 1994-cü ildə, Novruz şənliklərində iştirak edən ümummilli lider Heydər Əliyev xalqa müraciət edərək demişdi: “Novruz bayramı xalqın milli birlik, sarsılmaz dostluq və qardaşlıq bayramıdır. Ürəklərdən kin-küdurəti silib yerində sevgi, məhəbbət və sədaqət kimi saf duyğular cücərdən, bölümləri bütövlüklə, kədəri sevinclə əvəz edən, cəmiyyətdə xoş münasibətlərin meydanını genişləndirən bir bayramdır. Novruz uzaq minilliklərin o tayından çağdaş dövrümüzə qədər ağır təzyiqlərə sinə gərə-gərə, keçilməz maneələri yara-yara müstəqillik qazanıb. Bizim də qələbə yolumuz xalqın birliyindən keçir””.
Bu sözləri Novruz bayramı münasibətilə mətbuata verdiyi açıqlamasında Azərbaycan Respublikası Milli Məclisinin deputatı Kamaləddin Qafarov deyib.
Millət vəkili Novruzun fəlsəfi əsaslarından danışaraq bildirib ki, bu bayram həyatın və yeniliyin ən mükəmməl rəmzidir: “Novruz sözünün mənası yeni gün deməkdir. Qədim dövrlərdən insanlar qarlı-şaxtalı qış fəslinin başa çatmasını, yazın gəlişini müxtəlif mərasim və rituallarla qarşılayıblar. Azərbaycanlılar Novruzdan əvvəl 4 çərşənbənin – su, od, yel və torpaq çərşənbəsini də bayram kimi qeyd edirlər. Bunun səbəbi isə bir sıra qədim inanclara görə kainatın 4 ünsürdən – su, od, torpaq və küləkdən yaranması və təbiətin həmin bu ünsürlər üzrə oyanışının qeyd olunmasıdır. Su çərşənbəsi qışda donmuş çayların baharın ilk nəfəsi ilə əriyib tədricən torpağı nəmləndirməyə başlamasına, od çərşənbəsi – günəşin torpağı isidərək, onu canlandırmasına, yel çərşənbəsi – artıq oyanmış torpağı, tumurcuqlanmağa başlayan gülləri, ağacları yaz ətirli mehlə hərəkətə gətirməsinə, torpaq çərşənbəsi – torpağın əkilib-becərilməyə hazırlığına işarə olaraq qeyd edilir”.
Milli Məclisin deputatı Novruz bayramının 2009-cu ildən UNESCO-nun qeyri-maddi irs siyahısına salınmasını bütün Türk dünyası üçün mühüm əhəmiyyət kəsb edən bir hadisə kimi xarakterizə edərək deyib: “2004-cü ildən başlayaraq Azərbaycanın mədəni irs nümunələrinin UNESCO-nun Ümumdünya İrs, Qeyri-maddi mədəni irsin reprezentativ siyahısına daxil edilməsi, qoruma altına alınması Mehriban xanım Əliyevanın bu işə həssas münasibətinin parlaq ifadəsidir. 23 fevral 2010-cu ildən etibarən isə BMT Baş Assambleyasının 64-cü sessiyasının iclasında hər il martın 21-i “Beynəlxalq Novruz Günü” elan olunub.”
Millət vəkili Prezident İlham Əliyevin yüksək mənəvi dəyərlərimizi, adət və ənənələrimizi yaşadan bu ümumxalq bayramını yüksək dəyərləndirdiyini xüsusi qeyd edib: “Ölkə Prezidenti cənab İlham Əliyev hər il Azərbaycan xalqını Novruz bayramı münasibətilə təbrik edir. Bu təbriklərdən birində dövlətimizin başçısı demişdi: “Azərbaycan torpağında çox qədim kökləri olan, uzaq keçmişlərdən xalqımızın mənəvi həyatının ən dərin qatlarına nüfuz edən və zamanın sınaqlarından günümüzədək uğurla çıxan Novruz bayramı ənənəvi dəyərlər sistemimizin təşəkkülündə müstəsna əhəmiyyətə malikdir. Əcdadlarımızın müqəddəs yadigarı kimi bu bayram təbiətin ilahi nizamına ehtiramın aydın ifadəsidir.”
Artıq ikinci ildir ki, Azərbaycan xalqı Novruz bayramını xüsusiş ruh yüksəkliyi ilə qeyd edir. İki il bundan öncə rəşadətli Azərbaycan Ordusu Müzəffər Ali Baş Komandan cənab İlham Əliyevin rəhbərliyi ilə Vətən müharibəsini tarixi Qələbə ilə başa vuraraq mənfur erməni qəsbkarlarının torpaqlarımızdan qovdu, 30 il işğal altında olan torpaqlarımızı azad etdi. Ulu Öndər Heydər Əliyev hələ uzaq 1998-ci ildə demişdi: “Gün o gün olacaq ki, Novruz bayramını bir dəfə Şuşada, o biri il Laçında, o biri il Kəlbəcərdə, Ağdamda, Füzulidə, Cəbrayılda, Zəngilanda, Qubadlıda keçirəcəyik. Əminəm ki, belə də olacaqdır. Mən buna inanıram və bu inamla yaşayıram, bu inamla işləyirəm və bu inamla da Azərbaycan xalqına rəhbərlik edirəm.” Azərbaycan Respublikasının Prezidenti, Müzəffər Ali Baş Komandan cənab İlham Əliyev Ümummilli Liderin bu vəsiyyətini də yerinə yetirdi və Azərbaycan xalqının arzularını reallaşdırdı. Ali Baş Komandanın rəhbərliyi altında müzəffər Azərbaycan Ordusu doğma torpaqlarımızı işğaldan azad etdi və xalqımız bundan sonra həmin ərazilərdə Novruz bayramını min illiklər boyunca qeyd edəcəkdir!” – deyə Kamaləddin Qafarov fikirlərini tamamlayıb.
Bu günlərdə 44 günlük Vətən müharibəsinin daha iki qazisi - Şixizadə Natiq Əbülfət oğlu və Bağırov Ceyhun Taleh oğlu Əmək və Əhalinin Sosial Müdafiəsi Nazirliyi tabeliyindəki DOST İş Mərkəzinə işə qəbul olunublar.
N.Şixizadə Mərkəzin İnsan resursları departamentində baş mütəxəssis, C.Bağırov isə mütəxəssis vəzifələrində işə başlayıblar.
Əmək və Əhalinin Sosial Müdafiəsi Nazirliyi sistemində işə qəbul prosesində şəhid ailələrinin üzvlərinə, müharibə veteranlarına üstünlük verilir. Ümumilikdə hazırda DOST İş Mərkəzinin Aparatında 7 nəfər Vətən müharibəsi qazisi, 1 nəfər şəhid ailəsi üzvü çalışır.
Ötən gün Azərbaycan Milli Elmlər Akademiyasının (AMEA) sabiq prezidenti Ramiz Mehdiyevin akademiyaya gəlməsi barədə xəbərlər yayılmışdı. Onun AMEA-da gizli şəkildə iclas keçirdiyi bildirilirdi. Lakin məlum olub ki, Ramiz Mehdiyev akademiyaya şəxsi əşyalarını götürmək üçün gəlib.
Bu barədə Modern.az -a AMEA-nın Rəyasət heyətinin mətbuat katibi Azadə Balayeva məlumat verib.
"Ramiz Mehdiyev dünən əşyalarını götürmək üçün akademiyaya gəlib", - deyə AMEA sözçüsü bildirib.
O, həmçinin qeyd edib ki, R. Mehdiyev AMEA-nın həqiqi üzvü və akademikdir. Digər üzvlər kimi o da AMEA-ya gəlib-gedə bilər.
Xatırladaq ki, amademik Ramiz Mehdiyev AMEA-nın Prezidenti vəzifəsindən azad olunması ilə bağlı fevralın 14-də ərizə yazmışdı. Onun ərizəsi AMEA Rəyasət Heyəti tərəfindən qəbul olunub. Bundan əlavə, AMEA prezidentinin səlahiyyətləri birinci vitse-prezident Arif Həşimova həvalə edilib.
Milli Məclisinin deputatı, professor Eldar Quliyevin müsahibəsi
AİA.Az-ın suallarını Milli Məclisinin deputatı, Azərbaycan Ağsaqqallar Şurasının sədri, Azərbaycan Kooperasiya Universitetinin rektoru, iqtisad elmləri doktoru, professor Eldar Quliyev cavablandırır.
Eldar müəllim, ilk növbədə Sizi, eləcə də Sizin timsalınızda rəhbərlik etdiyiniz universitetin professor-müəllim heyətini, bütün kollektivini və tələbələrinizi qarşıdan gələn Novruz bayramı münasibətilə öz adımdan və təmsil etdiyim informasiya agentliyi adından səmimi qəlbdən təbrik edirəm. Əlbəttə ki, söhbətimizin gedişində xalqımızın ən qədim dövrlərdən qeyd etdiyi Novruz barədə də suallar yer alacaq. Lakin bundan öncə bu ilin əvvəlindən ölkəmizdə və dünyada cərəyan edən proseslərə dair oxucularımızı da maraqlandıracaq bəzi sualları cavablandırmağınızı istərdik. Təbii ki, son iki ildə ölkəmizdə baş verən demək olar ki, bütün hadisələr bu və ya digər şəkildə Vətən müharibəsində əldə olunmuş tarixi Qələbəmizin təsiri altında formalaşır. O cümlədən Prezident İlham Əliyev tərəfindən 2022-ci ilin Azərbaycanda Şuşa ili elan olunması da birbaşa bu qədim şəhərimizin işğaldan azad olunması ilə şərtlənən bir qərardır. Elə bilirəm ki, söhbətimizə də məhz bu mövzu ilə başlasaq yaxşı olar. Deyə bilərsinizmi bu qərarın Azərbaycan üçün əhəmiyyəti nədən ibarətdir?
İlk növbədə birmənalı şəkildə qeyd etmək lazımdır ki, Ölkə Prezidenti cənab İlham Əliyev tərəfindən bu ilin yanvar ayının 5-də imzalanmış Azərbaycan Respublikasında 2022-ci ilin “Şuşa İli” elan edilməsi haqqında Sərəncam sözün əsl mənasında tarixi bir sənəddir. Təsadüfi deyil ki, möhtərəm dövlət başçımız verdiyi bu tarixi qərar barədə ilk açıqlamanı da məhz 2021-ci ilin dekabr ayının 31-də, Dünya Azərbaycanlılarının Həmrəyliyi Günü və Yeni il münasibətilə Azərbaycan xalqına etdiyi müraciətində təqdim etdi. Çünki bu qərar təkcə Azərbaycan üçün deyil, eləcə də bütün dünyada yaşayan azərbaycanlılar üçün, hətta bütün Türk dünyası üçün son dərəcə böyük əhəmiyyət kəsb edir. Sərəncamda qeyd olunduğu kimi, Şuşa şəhəri xalqımız üçün son dərəcə əziz, müqəddəs bir məkandır və bu şəhərə olan sevgi, bağlılıq hər bir azərbaycanlının mənəvi varlığının ayrılmaz parçasıdır. Şuşa milli mədəniyyətimizin, incəsənətimizin beşiyidir. Bu şəhərin işğal altında olmağı bütün aspektlərdən baxdıqda xalqımız üçün qara bir ləkə idi. Ermənilər 1992-ci il mayın 8-də işğal etdikləri Şuşanı uzun illər bütün dünyaya erməni şəhəri kimi tanıtmağa çalışsalar da buna nail ola bilmədilər. Təbii ki, eyni siyasət Ermənistan tərəfindən 30 il ərzində Azərbaycanın işğal olunmuş digər şəhər və kəndlərinə qarşı da aparılıb. Lakin bütün bu yalan və uydurmalar son nəticədə erməni ideoloqlarının necə deyərlər, öz başlarında çatladı. Ali Baş Komandan cənab İlham Əliyevin rəhbərliyi altında igid əsgər və zabitlərimiz 2020-ci il noyabrın 8-də Şuşanı işğaldan azad etməklə Vətən müharibəsini tarixi Qələbə ilə başa vurdular və bununla da ermənilərin Azərbaycan ərazilərində ikinci erməni dövləti yaratmaq arzularına birdəfəlik son qoyuldu.
Sözsüz ki, Prezident İlham Əliyev tərəfindən imzalanmış bu Sərəncam bir daha ölkəmizdə milli-mədəni və tarixi irsimizin qorunması və təbliğ olunmasına hər zaman dövlət tərəfindən xüsusi diqqət və qayğı göstərildiyini nümayiş etdirir. Digər tərəfdən isə, bu Sərəncam eyni zamanda istər Şuşada, istərsə də işğaldan azad olunmuş digər ərazilərimizdə aparılan quruculuq işlərinin daha böyük vüsət almasına səbəb olacaq. Bu barədə nə deyə bilərsiz?
Şuşa şəhərinin ötən əsrin 70-ci illərində sürətli inkişafı Ümummilli Liderimiz Heydər Əliyevin adı ilə sıx bağlıdır. Şəhərin inkişafına dair xüsusi qərarlar məhz Ulu Öndərin təşəbbüsü ilə qəbul edilmişdir. Həmin vaxtdan Şuşada quruculuq işləri geniş vüsət almış, mədəniyyət xadimlərimizin xatirəsinin əbədiləşdirilməsi istiqamətində mühüm addımlar atılmışdır. Bilirsiniz ki, Şuşa şəhəri tarixən Azərbaycanın tarixi-mədəni, ictimai-siyasi həyatının mühüm mərkəzlərindən biri olmuşdur. 1977-ci ildə xalqımızın Ümummilli Lideri Heydər Əliyevin təşəbbüsü ilə “Şuşa şəhərinin tarixi hissəsini tarix-memarlıq qoruğu elan etmək haqqında” qərar qəbul edilmişdir. Həmin qərar nəticəsində Şuşada abidələrin qorunması, görkəmli mədəniyyət və incəsənət xadimlərinin xatirələrinin əbədiləşdirilməsi istiqamətində əhəmiyyətli addımlar atılmışdır. Bu gün artıq bütün dünya bilir ki, işğal dövründə ermənilər tərəfindən Şuşada xalqımızın tarixi-mədəni irsinin məhv edilməsi siyasəti həyata keçirilmişdir. Bu qədim mədəniyyət beşiyində erməni vandallarının törətdikləri mədəni genosidin miqyası ölçüyəgəlməzdir. Lakin dediyiniz kimi, Vətən müharibəsinin nəticələri 30 il ərzində dünyaya təqdim olunan bütün saxta reallıqları kökündən dəyişdirdi. Tarixi ədalət bərpa olundu, azərbaycanlılar Şuşaya, Şuşa isə Azərbaycana döndü. Bu gün artıq işğaldan azad edilmiş Şuşanın yenidən dirçəlməsi istiqamətində möhtəşəm işlər görülür. Ölkə Prezidenti cənab İlham Əliyevin son bir ildə Şuşa şəhərinə 7 dəfə səfər etməsi də burada bərpa-quruculuq işlərinin həyata keçirilməsinə, eləcə də tarixi-mədəni irsin bərpası və qorunması istiqamətində aparılan işlərə dövlətimiz tərəfindən xüsusi diqqət ayrıldığından xəbər verir. Bir məqamı da diqqətdən qaçırmayaq ki, 2022-ci ilin “Şuşa İli” elan olunması barədə Sərəncamın imzalanması faktiki olaraq ötən ilin may ayında Şuşanın Azərbaycanın mədəniyyət paytaxtı elan edilməsi barədə qəbul olunmuş digər bir tarixi qərarın məntiqi davamı kimi nəzərdən keçirilməlidir. Dövlət başçısının imzaladığı hər iki Sərəncam Şuşa şəhərinin Azərbaycan xalqı üçün müstəsna əhəmiyyət kəsb etdiyini vurğulayan mühüm tarixi sənədlərdir və bu qərarların hər biri bundan sonra həm Şuşamızın, həm də bütünlükdə Azərbaycan mədəniyyətinin inkişafına misilsiz töhfələr verəcək.
Eldar müəllim, yeri gəlmişkən paytaxtın ictimai-mədəni həyatında bu ilin ilk ayında baş vermiş daha bir əhəmiyyətli hadisə də Bakıda məşhur xeyriyyəçi Hacı Zeynalabdin Tağıyevin abidəsinin açılışı oldu. Bu hadisənin tarixi və mədəni baxımdan əhəmiyyətini necə qiymətləndirirsiniz?
Hacı Zeynalabdin Tağıyevin abidəsinin açılışı təkcə paytaxt Bakının deyil, eyni zamanda bütün ölkənin ictimai-mədəni həyatında xüsusi əhəmiyyət kəsb edən bir hadisədir. Ölkə Prezidenti cənab İlham Əliyevin yanvar ayının 18-də abidənin açılışında şəxsən iştirak etməsi də bu hadisənin əhəmiyyətini bir daha vurğulamış oldu. Məlum olduğu kimi Zeynalabdin Tağıyev tarixdə, Azərbaycan xalqının yaddaşında ilk növbədə böyük xeyriyyəçi kimi qalmışdır. Məhz onun təşəbbüsü ilə Azərbaycanda bir çox önəmli layihələr həyata keçirilmişdir ki, onların da arasında Bakıya təmiz içməli suyun gətirilməsi xüsusilə qeyd olunmalıdır. Şollar su kəməri bu günə qədər fəaliyyətdədir və indinin özündə də Bakı və Sumqayıt şəhərlərinin bir hissəsini təmiz içməli su ilə təmin edir. Həmçinin Tağıyevin təhsil sahəsində göstərdiyi xeyriyyəçilik fəaliyyəti böyük əhəmiyyət kəsb edir. Bircə bunu demək kifayətdir ki, müsəlman dünyasında ilk qızlar məktəbinin açılması o dövr üçün son dərəcə mütərəqqi bir hadisə idi. Abidənin açılışında etdiyi çıxışında Prezident İlham Əliyevin də qeyd etdiyi kimi, bu gün Bakıya əlavə gözəllik verən, Bakının memarlığına töhfə verən bir çox gözəl binaların tikilməsinin də təşəbbüskarı məhz Tağıyev olmuşdur. Bakının gözəlliyini təmin etmək üçün xaricdən memarlar dəvət etməsi onun mütərəqqi fikirdə olmasından xəbər verir. Həmçinin Bakıda tramvay xətlərinin açılması da Tağıyevin adı ilə bağlıdır. Son dərəcə qürurverici haldır ki, bu gün Azərbaycanda Zeynalabdin Tağıyevin əsasını qoyduğu xeyriyyəçilik ənənələri uğurla davam etdirilir və bu ənənələrin ən böyük daşıyıcısı Heydər Əliyev Fondudur. Heydər Əliyev Fondu təkcə Azərbaycanda deyil, bütün Cənubi Qafqazda ən böyük xeyriyyəçi qurum olaraq, artıq 20 ilə yaxın bir müddətdir ki, bütün dünyada Azərbaycan mədəniyyətini təbliğ etməkdə, təhsil, səhiyyə, mədəniyyət, incəsənət, elm sahələrinin inkişafına misilsiz töhfələr verməkdədir. Azərbaycanın multikultural dövlət kimi, müasir dövlət kimi dünyada tanıdılmasında Heydər Əliyev Fondunun müstəsna xidmətləri vardır. Məhz Fondun fəaliyyəti nəticəsində Azərbaycan bu gün daha çox tanınır və məhz bu amil ölkəmizə İkinci Qarabağ müharibəsi dövründə böyük köməklik göstərdi. Həmçinin bu gün Heydər Əliyev Fondu işğaldan azad edilmiş torpaqlarda geniş fəaliyyətə başlamışdır. Fondun təşəbbüsü ilə azad edilmiş torpaqlarda hazırda dini abidələrimizin əsaslı təmiri, bərpa edilməsi və inşası prosesinə start verilib. Şuşa şəhərində Yuxarı Gövhərağa, Aşağı Gövhərağa, Saatlı məscidləri, Ağdam şəhər məscidi, Zəngilan şəhər məscidi Heydər Əliyev Fondu tərəfindən əsaslı bərpa edilir. Eyni zamanda, Daşaltıda, Hadrutda və Şuşa şəhərində yeni məscidlərin tikintisi də məhz Heydər Əliyev Fondunun təşəbbüsü ilə həyata keçirilir. Məlum olduğu kimi, Vətən müharibəsindən dərhal sonra Prezident İlham Əliyevin təşəbbüsü ilə Qarabağ Dirçəliş Fondu, “YAŞAT” Fondu yaradılmışdır. Azərbaycan vətəndaşları, eyni zamanda, şirkətlər könüllü olaraq həm Qarabağ Dirçəliş Fonduna, həm “YAŞAT” Fonduna vəsaitlər köçürürlər və bu vəsait hesabına bu gün yüzlərlə qazi həm Azərbaycanda, həm xüsusilə xaricdə müalicə alır, həyata qayıdır, öz sağlamlığını bərpa edir. Bu, bir daha onu göstərir ki, xeyriyyəçilik hər zaman Azərbaycan xalqının xarakterik cəhətlərindən biri olub və bu ənənə ölkəmizdə hər zaman yaşayacaq.
Eldar müəllim, az öncə də qeyd olunduğu kimi, bu gün Azərbaycan bir qalib dövlət olaraq işğaldan azad olunmuş ərazilərində irimiqyaslı bərpa-quruculuq işləri ilə məşğuldur. Eyni zamanda regional sülhün möhkəm və davamlı olmasında ən çox səy göstərən ölkə də məhz Azərbaycandır. Lakin cərəyan edən hadisələr belə deməyə əsas verir ki, bu gün Ermənistanda hələ də revanşizm xülyalarını bəsləyən, erməni faşizmini dirçəltməyə çalışan qüvvələr mövcuddur. Sizcə Azərbaycan belə tendensiyaların mümkün fəsadlarının qarşısını ala bilmək üçün kifayət qədər imkanlara sahibdirmi?
Xatırlayırsınızsa, Ölkə Prezidenti cənab İlham Əliyev yanvarın 30-da Gəncə şəhərinə səfəri çərçivəsində Azərbaycan Dövlət İnformasiya Agentliyinə verdiyi müsahibənin gedişində bu məsələyə toxunaraq xalqımızın heç vaxt erməni vəhşiliyini, erməni faşizminin cinayətlərini unutmayacağını bildirdi. Dövlət başçımız bir daha erməni faşizmini qidalandıran, onları dəstəkləyən qüvvələrə səslənərək qəti şəkildə bildirdi ki, biz qalib dövlətik və Azərbaycan erməni faşizminin bundan sonra heç vaxt baş qaldırmasına yol verməyəcək. Əslində bu bəyanat həm də sizin sualınıza tam və ən dolğun bir cavabdır. Bilirsiniz ki, Vətən müharibəsinin gedişində Müzəffər Ordumuzun qarşısında duruş gətirə bilməyən Ermənistanın cinayətkar ordusu hər zaman olduğu kimi dinc şəhər və qəsəbələrə hücumlar edir, mülki insanlar arasında tələfat törətməklə Azərbaycanı geri addım atmağa məcbur etməyə çalışırdı. Bu məqsədlə erməni faşistləri Mingəçeviri, Bərdəni, Tərtəri, Goranboyu, Ağdam və Füzuli rayonlarını, Naftalan şəhərini bombalayır, raket atəşinə tuturdular. Həmçinin İkinci Qarabağ müharibəsi dövründə Gəncə dəfələrlə cinayətkar Ermənistan ordusu tərəfindən bombalanıb. Şəhərə 13 raket atılıb, onlardan 8-i partlayaraq insanların həyatına son qoyub. Bu dinc şəhərdə 26 mülki vətəndaş namərd atəşi nəticəsində həlak oldu, erməni faşizminin qurbanı oldu. Amma ermənilərin Azərbaycan xalqının gözünü qorxutmaq, Azərbaycan rəhbərliyini torpaqların azad edilməsindən çəkindirmək məqsədi baş tutmadı. Bizi heç kim və heç nə dayandıra bilməzdi və bilmədi də. Azərbaycan Ordusu günahsız insanların, şəhidlərimizin qisasını döyüş meydanında aldı. Ermənistanın törətdiyi əməllər isə hərbi cinayətdir və bunu bütün dünya qəbul etməlidir. Yanvarın 30-da dövlət başçımızın Gəncədə təməini qoyduğu Memorial Kompleks də erməni faşizminin cinayətlərini hər zaman bütün dünyaya xatırladacaq. Bu yaddaş silinməməlidir və heç kim erməni vəhşiliyini unutmamalıdır. Azərbaycan erməni faşizminin ən kiçik təhdidinə dərhal ağır zərbə ilə cavab verməyə hazırdır və hər an bu hüququndan istifadə edə bilər. Dövlət başçımızın dediyi kimi, əgər Ermənistan yenə də Azərbaycan üçün potensial təhdidə çevrilərsə, bu zaman o, yerindəcə məhv ediləcək və bunu hər kəs bilməlidir.
Fevralın 2-də Bakıda Azərbaycan Gəncləri Gününün 25 illiyinə həsr olunan Gənclər Forumu keçirildi. Bu gün ölkəmizdə həyata keçirilən gənclər siyasətinin effektivliyini necə qiymətləndirirsiniz?
Deyə bilərəm ki, Ölkə Prezidenti cənab İlham Əliyev Gənclər Forumunda etdiyi çıxışında ölkə ictimaiyyətini, xüsusən də gəncləri maraqlandıran bir çox vacib məsələlər barədə son dərəcə önəmli açıqlamalar verdi. O cümlədən Ulu Öndər Heydər Əliyev tərəfindən təsis edilmiş Azərbaycan Gəncləri Gününün bu sahədə həyata keçirilən dövlət siyasətinin effektivliyinə zəmin yaratmış əsas amillərdən biri olduğunu vurğulayan dövlət başçımız Azərbaycan gəncliyinin bugünkü fəaliyyətini də yüksək qiymətləndirdi. Bu yanaşma ölkəmizdə gənclər siyasətinin əsasında Heydər Əliyev ideyalarının durduğunu bir daha təsdiq edir. 25 il bundan əvvəl Ulu Öndər Heydər Əliyev tərəfindən Gənclər Gününün təsis edilməsi Ümummilli Liderin növbəti siyasi uzaqgörənliyi idi. Prezident İlham Əliyevin öz çıxışında qeyd etdiyi kimi, həmin dövrdə gənclər problemi bəlkə də hakimiyyət strukturlarında yer almış insanların böyük əksəriyyətini ən az narahat edən, düşündürən məsələlərdən biri idi. Əlbəttə, bunun da öz səbəbləri var idi. Həmin vaxt Azərbaycan çox böyük, ciddi, problemlər qarşısında dayanmışdı. Nizami ordusu olmayan Azərbaycan Birinci Qarabağ müharibəsində xaricdən böyük maliyyə və hərbi dəstək alan Ermənistana məğlub olmuşdu. Bütün digər sahələrdə də vəziyyət çox ağır idi. Dövlət başçımızn da öz çıxışında qeyd etdiyi kimi, Azərbaycan özünü dünya arenasında hələ tam təsdiq etməmişdi. Bütün dünyada ermənipərəst qüvvələr Azərbaycan həqiqətlərini təhrif edir, regionda baş verən prosesləri dünya ictimaiyyətinə öz maraqlarına uyğun şəkildə təqdim edirdilər. İknci bir tərəfdən də ölkə iqtisadiyyatı tənəzzül içərisində, dağıdılmış vəziyyətdə idi. Ölkənin gələcəyi böyük sual altında idi. Yalnız 1994-cü ildə Ulu Öndər Heydər Əliyevin gərgin səyləri nəticəsində “Əsrin kontraktı” imzalandıqdan sonra Azərbaycanın gələcəyə böyük ümidləri yarandı. Bütün bunlara rəğmən Ulu Öndər Heydər Əliyevin ölkə üçün son dərəcə ağır və təcili həllini gözləyən bir çox problemlərin olduğu bir dövrdə məhz gənclər məsələsinə xüsusi diqqət ayırması əlbəttə ki, gələcəyə hesablanmış mühüm strateji addım idi. 1996-cı il fevralın 2-də Ümummilli Liderin təşəbbüsü ilə Azərbaycan Gənclərinin Birinci Forumu keçirildi. Bundan bir il sonra isə Ulu Öndər Heydər Əliyevin Sərəncamı ilə Azərbaycanda Gənclər Günü təsis edildi. Dediyimiz kimi, həmin vaxt bu qərar bir çoxları tərəfindən anlaşılmazlıqla qarşılandı. Lakin tarix özü bir daha kimin haqlı olduğunu göstərdi və bu gün Azərbaycan cəmiyyəti həmin müdrik qərarın möhtəşəm nəticələrinin şahididir. Ulu Öndər Heydər Əliyevin əsasını qoyduğu və 2003-cü ildən bəri Prezident İlham Əliyev tərəfindən daha da təkmilləşdirilərək uğurla həyata keçirilən gənclər siyasəti bu gün öz möhtəşəm nəticələri ilə xalqımızın rifah yüksəlişinə, dövlətimizin güclənməsinə xidmət edir. Bu gün biz əminliklə deyə bilərik ki, Azərbaycan gəncliyi ölkəmizin, cəmiyyətimizin həyatında çox önəmli rol oynayır. Dövlət başçımızın da öz çıxışında qeyd etdiyi kimi, gənclərin təşəbbüsləri, onların əməyi bu gün hər yerdə görünməkdədir və əlbəttə ki, yeni nəslin vətənpərvərlik ruhunda, dövlətə sədaqət əsasında yetişdirilməsi Heydər Əliyevin xidmətləri arasında önəmli yer tutur. Azərbaycan gəncliyi bundan sonra da mütləq vətənpərvərlik əsasında tərbiyə almalıdır. Bu, aktual məsələdir və öz aktuallığını heç zaman itirməyəcək.
ardı var...
Bakı şəhərində velosiped yollarının salınması layihəsi çərçivəsində bu gün axşam saat 22:00-dan sabah səhər saat 06:00-dək Səbail rayonu Üzeyir Hacıbəyli küçəsinin Puşkin, Rəşid Behbudov küçələri Azadlıq prospekti ilə kəsişmələrində müvafiq nişanlanma xətlərinin çəkilişi işləri aparılacaq.
Qeyd olunan vaxt kəsiyində sözügedən kəsişmələrdə hərəkət xətlənmə işlərinin aparılacağı zolaqlar üzrə hissə-hissə qismən məhdudlaşdırılacaq.
Sürücülərdən qeyd olunan vaxt müddətində işlərin aparıldığı ərazilərdə hərəkətdə olarkən diqqətli olmaları və yol hərəkəti qaydalarına riayət etmələri xahiş olunur.
YOLUNUZ AÇIQ OLSUN...
Fevralın 27-də Ukraynadan Moldovaya keçmək istəyən zaman qətlə yetirilən azərbaycanlıların nəşləri Gəncənin Gülüstan qəsəbəsinə gətirilib.
APA xəbərinə görə, onlar səhər Göygöldə dəfn olunacaqlar.
Xatırladaq ki, 27 fevral tarixində qohumluq əlaqələri olan 40 nəfərdən artıq həmyerlimiz 8 avtomobildə Odessa vilayətindən Moldova istiqamətində şəxsi təşəbbüsləri ilə təxliyəyə çalışan zaman Kuçurqan sərhəd-keçid məntəqəsində naməlum şəxslərin silahlı hücumuna məruz qalıb. İsmayılov Rəhim Əli oğlu, onun qardaşları Nemət İsmayılov və Azər İsmayılov hadisə yerində həlak olublar, 25 yaşlı Camal Salmanov isə xəstəxanada dünyasını dəyişib. Həmin şəxslər əslən Kəlbəcər rayonundandırlar və Gəncə şəhərində məskunlaşıblar.
Fövqəladə Hallar Nazirliyi (FHN) Novruz bayramında təhlükəsizlik qaydalarına riayət edilməsi ilə bağlı əhaliyə müraciət edib.
"Müraciətdə deyilir:
"Xalqımızın milli-mənəvi dəyərlərini özündə yaşadan Novruz bayramı zamanı hər birimizin arzusudur ki, bayram şənlikləri ən xoş duyğularla yaddaşlarımıza həkk olunsun. Bunun üçün isə Novruz bayramı ilə əlaqədar keçirilən müxtəlif mərasimlərdə müvafiq təhlükəsizlik qaydalarına ciddi əməl edilməlidir.
Belə ki, bu il də Novruz bayramı koronavirus (COVID-19) pandemiyası dövrünə təsadüf etdiyindən bayram tədbirlərində ölkədə tətbiq olunan xüsusi karantin rejiminin tələblərinə riayət olunmalıdır.
Həmçinin, müxtəlif bayram mərasimləri ilə əlaqədar aşağıdakı yanğın təhlükəsizliyi qaydalarına əməl olunmalıdır:
- bayram tonqalının ətrafına yığışan azyaşlılar mütləq böyüklərin nəzarətində olmalı;
- tonqal ev, avtomobil, elektrik naqili, ağac və digər yanar materiallardan kənarda yandırılmalı;
- tonqal tam sönənədək nəzarətdə saxlanılmalı;
- tonqal üzərindən atılarkən ehtiyatlı olmalı;
- yandırılan şamlar nəzarətsiz qalmamalıdır.
Unutmayın: Qaydalara biganəlik - həyatımıza təhlükədir!
Təhlükə zamanı 112-yə zəng edin!"
Ağcabədi Rayon İcra Hakimiyyətinin başçısının birinci müavini Rövşən Əhmədov işdən çıxarılıb.
“Unikal” verdiyi məlumata görə, bununla bağlı icra başçısı Rafil Hüseynov müvafiq əmr imzalayıb.
Hələlik birinci müavin vəzifəsinə təyinat yoxdur.