 |
|
Azərbaycanın telekommunikasiya bazarında lider mobil operator olan Azercell Telekom abunəçiləri yüksək keyfiyyətli rabitə xidmətləri ilə təmin etmək və rəqəmsal dünyanın ən son yeniliklərinin ölkədə tətbiqinə hazır olmaq üçün şəbəkənin gücləndirilməsi, əhatə dairəsinin genişləndirilməsi və təqdim olunan internet xidmətinin sürətinin daha da artırılması istiqamətində bir sıra mühüm addımlar atıb.
Axar.az xəbər verir ki, 14-15 dekabr tarixlərində Abunəçi Məlumatlarının Mərkəzləşdirilməsi layihəsi (UDC) uğurla tamamlandı. Bir neçə mürəkkəb mərhələni özündə biləşdirən UDC layihəsi "Azercell" şirkətinin texnoloji cəhətdən davamlı inkişafının göstəricilərindən biridir. Qeyd edilən tarixlərdə, həmçinin məlumat strukturumuzun gücləndirilməsi zəminində HLR Miqrasiyası prosesi müvəffəqiyyətlə yerinə yetirildi. Paralel şəkildə internet ötürücülüyünün artırılması məqsədilə Paket-kommutasiya şəbəkəsinin genişləndirilməsi işləri də uğurla icra olundu.
Azercell Telekom MMC-nin prezidenti Vahid Mürsəliyev sözügedən proseslərlə bağlı bildirdi ki, şirkət abunəçiləri təqdim edə biləcəyi ən güclü və dayanıqlı şəbəkə ilə təmin etmək üçün böyük layihələr həyata keçirir və mövcud resurslardan maksimal şəkildə istifadə edir. “Ümumiyyətlə, bu tip nəhəng layihələrin yerinə yetirilməsi çox ciddi riskləri özündə birləşdirir. Bir çox ölkələrdə bu layihələr zamanı ümumi şəbəkə kəsintisi kimi ciddi fəsadlar yaşanıb. Lakin, Azercell UDC layihə qrupu Ericsson mütəxəssisləri ilə birlikdə qarşıya çıxa biləcək bütün risk və problemləri öncədən nəzərə alaraq, texniki nasazlıqları minimum həddə endirə bilmişlər” deyə Vahid Mürsəliyev bildirdi. O, bütün diqqətin "Azercell" şəbəkəsinin 5G və digər yeni nəsil texnologiyaların tətbiqinə hazırlanmasına, müştəri təcrübəsinin mükəmməlləşdirilməsinə yönəldəyini vurğuladı. Vahid Mürsəliyev onu da qeyd etdi ki, şirkət bundan sonra da təqdim etdiyi keyfiyyətli və rahat xidməti ilə abunəçilərin gündəlik, eləcə də işgüzar həyatını asanlaşdırmaq üçün çalışmağa davam edəcəkdir.
Qeyd etmək lazımdır ki, UDC (User Data Consolidation)– Abunə istiqamətli telekommunikasiya şəbəkələrinin verilənlər bazasının daha çevik, daha sürətli və daha keyfiyyətli istifadəsinə imkan verir. UDC –çoxməqsədli sistemdir və telekommunikasiya sahəsində fəaliyyət göstərən digər bütün növ sistemlərlə uyğunlaşa bilir..
Telekommunikasiya şəbəkəsində hər bir aktiv mobil cihazın məlumatlarını özündə cəmləyən HLR-yerləşmə qeydiyyatı bazası mövcuddur. HLR-ın məqsədi bu məlumatların toplanmasında funskionallığı təmin etmək və istifadəçinin müəyyən edilməsi (təsdiqlənməsi) kimi istəkləri emal etməkdir. Qeyd edək ki, məlumat bazası hər zaman yenilənir. Tutum qabiliyyəti tükənmək üzrə olarkən və ya şəbəkədə təkmilləşmə işləri görülərkən, hər bir istifadəçi üçün məlumat strukturu gücləndirilməli olur. Bu halda, istifadəçi məlumatlarının itirilməsinin qarşısının alınması üçün data köhnə HLR-dan (mənbə HLR) yeni HLR-a (hədəf HLR) köçürülür. Bu proses HLR miqrasiyası adlanır ki, şirkətimiz tərəfindən uğurla tamamlanmışdır.
Paket-kommutasiya şəbəkəsinin genişləndirilməsi layihəsi müştəri təcrübəsinin inkişafına yönəlmiş mühüm proseslərdən biridir. "Azercell" onun köməyilə İnternetdə məlumat ötürücülüyünü artırmağa nail olacaq. Beləliklə də, internet istifadəsinin pik saatlarında mobil operatorun abunəçiləri sürətin nisbətən zəifləməsinin şahidi olmayacaqlar.
Ümumiyyətlə, bütün sadalanan proseslər təkmilləşməyə yönəldiyindən müştərilərin rahatlığını təmin etməkdə yardımçı olur.
Azərbaycana bir sıra texnoloji yeniliklər gətirən "Azercell" bundan sonra da öz missiyasına sadiq qalaraq innovativ həllər, müasir xidmətlər vasitəsilə abunəçilərin həyatını asanlaşdırmaq və rəqəmsallaşdırmaq üçün şəbəkəsinin gücləndirilməsini davam etdirəcək, bu istiqamətdə zəruri olan tədbirləri həyata keçirəcəkdir.
Daha ətraflı məlumat üçün news@mcs.az ünvanına müraciət edə bilərsiniz.
Dünya Azərbaycanlılarının Həmrəyliyi Günü və Yeni il bayramı ilə əlaqədar 2018-ci il dekabrın 29-dan 2019-cu il yanvarın 3-dək respublika daxili işlər orqanlarının şəxsi heyəti gücləndirilmiş iş rejimində işləyəcək.
Daxili İşlər Nazirliyinin (DİN) Mətbuat Xidmətindən Axar.az-a verilən məlumata görə, bununla bağlı daxili işlər naziri, general-polkovnik Ramil Usubov müvafiq əmr imzalayıb.
Əmrə əsasən, 31 Dekabr – Dünya Azərbaycanlılarının Həmrəyliyi Günü və Yeni il bayramı ilə əlaqədar nazirliyin bütün orqan və hissələrinin şəxsi heyəti ictimai asayişin və təhlükəsizliyin daha da nümunəvi və etibarlı qorunmasının təmin edilməsi üçün bayram ərəfəsində və bayram günləri öz xidməti fəaliyyətlərini gücləndirilmiş iş rejimində həyata keçirəcək. Kütləvi tədbirlərin, o cümlədən bayram şənliklərinin təşkil olunduğu, insanların gur toplaşdığı yerlərdə polis naryadlarının sayı artırılacaq. Respublika ərazisində, o cümlədən avtomobil yollarında ictimai qaydanın, hərəkətin təhlükəsizliyinin təmin edilməsi məqsədi ilə bütün qüvvə və imkanlar səfərbər ediləcək. Bayram ərəfəsi və bayram günlərində həyat təminatlı mühüm əhəmiyyətli obyektlərin, o cümlədən xarici ölkələrin diplomatik nümayəndəliklərinin mühafizəsi də ciddi nəzarətdə saxlanacaq.
Bakıda könüllü bir gənc Şaxta baba geyimində küçə təmizliyi ilə məşğul olan xanımlara hədiyyə paylayıb.
Ramal Şəmşədli adlı şəxs bayram münasibətilə yüzdən artıq şəxsə hədiyyə verib.
Təşəbbüsü ilə bağı Axar.az-a danışan R.Şəmşədli bildirib ki, bu, onun öz ideyasıdır və bu ideyanı həyata keçirmək üçün heç kəsdən maddi dəstək istəməyib:
“Özüm könüllü olaraq belə bir addım atdım. Hədiyyələri də özüm almışam. Təxminən 100 hədiyyə payladım bu gün ərzində. Qarşımıza çıxan küçə təmizliyi ilə məşğul olan 100-ə yaxın insana hədiyyə vermişik”.
Avstriyada super-marketlərdə Yeni il bayramı ilə əlaqədar təbii şam ağacları satışa çıxarılıb.
Axar.az xəbər verir ki, bu barədə sosial şəbəkədə telejurnalist Mir Səməd Cəfərli məlumat paylaşıb. Avstriyadan xüsusi reportaj hazırlayan telejurnalist bildirib ki, avstriyalılar Yeni ildə evlərində təbii şam ağacı bəzəməyə daha çox üstünlük verirlər. Səbəb isə təbii şam ağacının özünəməxsus xoş ətri ilə otaqda gözəl atmosfer yaratmasıdır.
Avstriyalıların bu istəyini nəzərə alan super-marketlər bu cür ağacların satışına başlayıb. Bu ağacların qiyməti isə 14.90 avrodan başlayır (təxminən 29 manat 80 qəpik).
Azərbaycanda isə ağacların kəsilməsi qanunla qadağan edildiyi üçün təbii şam ağaclarının satışı həyata keçirilmir. Lakin Yeni il ərəfəsində evində təbii şam ağacından ibarət yolka bəzəmək istəyən şəxslər üçün də alternativlər var. Belə ki, paytaxtda təbii güllərin və ağacların satışa çıxarıldığı yerlərdə dibçəklərdə xüsusi yetişdirilmiş müxtəlif ölçülü şam ağacları təklif edilir.
Bu cür ağaclar dibçəkdə böyüdülmək üçün nəzərdə tutulduğundan onları evdə saxlayıb böyütmək, növbəti illərdə də yolka ağacı kimi bəzəmək mümkündür. Bu ağacların qiyməti isə ölçüsünə görə dəyişir. Lap böyük ağaclar 100-150, nisbətən orta ölçülü şam ağacları 50, kiçiklər isə 30 manata təklif edilir.
Bakı şəhəri, Səbail Rayon İcra Hakimiyyətində Hüquq şöbəsinin müdiri Maşallah Ələkbərov vəzifəsindən azad edilib.
Axar.az Report-a istinadən xəbər verir ki, bununla bağlı rayon İcra Hakimiyyətinin başçısı Vüqar Zeynalov əmr imzalayıb.
Xatırladaq ki, Prezident İlham Əliyevin bu ilin oktyabrın 30-da imzaladığı sərəncama əsasən, Vüqar Zeynalov Səbail Rayon İcra Hakimiyyətinin başçısı təyin edilib.
Nəqliyyat, Rabitə və Yüksək Texnologiyalar Nazirliyi Dünya Azərbaycanlılarının Həmrəyliyi Günü və Yeni il bayramı günlərində əhalinin nəqliyyat, telekommunikasiya, o cümlədən internet, mobil rabitə xidmətləri, radio-televiziya yayımı ilə keyfiyyətli, fasiləsiz şəkildə təmin edilməsinə dair strukturuna daxil olan və strukturuna daxil olmayan tabeliyindəki qurumlara, həmçinin digər telekommunikasiya operatorlarına müvafiq tapşırıqlar verib.
Nazirlikdən Axar.az-a bildirilib ki, bayram ərəfəsində və bayram günlərində sabit telefonların fasiləsiz işinin təmin edilməsi məqsədi ilə rabitə xidmətləri borclarına və digər səbəblərə görə telefonların şəbəkədən açılmaması, daxil olan müraciətlərə həssaslıqla yanaşılaraq operativ tədbir görülməsi nəzərdə tutulur.
Nazirlik onu da qeyd edib ki, bayram günlərində məsul növbətçilər təşkil edilməklə nəqliyyat, telekommunikasiya xidmətlərinin, radio-televiziya yayımının fasiləsiz və keyfiyyətli işinin təmin edilməsi, kabel və xətt zədələnmələrinin operativ aradan qaldırılması, poçt şöbələrinin iş rejiminin tənzimləyici qrafik üzrə qurulması, profilaktik, tikinti-quraşdırma işlərinin dayandırılması, rabitə obyektlərinin mühafizəsinin gücləndirilməsi üzrə müvafiq tədbirlər görüləcək.
Bununla yanaşı, şəhərlərarası nəqliyyatın, Bakı Beynəlxalq Avtovağzalının bayram günlərində gücləndirilmiş iş rejimində fəaliyyəti təmin ediləcəyi, sərnişin sıxlığı yaranarsa, lazımi sayda əlavə avtobus xəttə buraxılacağı bildirilib.
Nazirlik vətəndaşlardan rastlaşdıqları istənilən problemlə bağlı “1655” saylı “Qaynar xətt”lə əlaqə saxlamalarını xahiş edib.
Azərbaycan Müdafiə Nazirliyi Ermənistan mətbuatının guya Azərbaycan Ordusunun ön xətt mövqelərində atışma baş verməsi barədə yaydığı xəbərə münasibət bildirib.
Nazirliyin Mətbuat xidmətindən Axar.az-a verilən məlumata görə, Ermənistan tərəfinin öz ordusundakı baş verən xaos, intizamsızlıq və özbaşınalıq hallarını gizlətmək, o cümlədən dekabrın 26-da cəbhənin Ağdam rayonu istiqamətində mülki vətəndaşlarımızı atəşə tutmasından beynəlxalq ictimaiyyətin diqqətini yayındırmağa hesablanmış ucuz təbliğatıdır:
“Bildiririk ki, Azərbaycan Ordusunun mövqelərində heç bir hadisə baş verməyib və bölmələrimiz əməliyyat şəraitinə nəzarət edir”.
“Kapitan Rəcəbov” adına gəmi növbəti dəfə 25 faiz endirimlə satışa çıxarılıb.
Axar.az xəbər verir ki, ləğv edilən Xəzər İxtisaslaşmış Hövzə Qəza-Xilasetmə ASC-yə məxsus gəminin satılması üçün 22 yanvar tarixində açıq hərrac keçiriləcək.
1976-cı ildən istismarda olan buzqıran gəmi üçün ilkin start qiyməti 382. 500 manat müəyyən edilib.
Qeyd edək ki, gəmi 4-cü dəfə hərraca çıxarıldığı üçün qiymətində endirim edilib. Bundan öncə gəmi 459 min manata təklif edilmişdi.
Cinayət Məcəlləsində qızlarını təhsildən yayındıran valideynlərin hətta valideynlik hüququndan, azadlıqdan məhrum edilməsi nəzərdə tutulsa da, aidiyyəti qurumlar bu məsələdə susur.
Bu sözləri Axar.az-a Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyevin Qafqaz Müsəlmanları İdarəsinin sədri, Şeyxülislam Hacı Allahşükür Paşazadəyə və Azərbaycan Respublikası Dini Qurumlarla İş üzrə Dövlət Komitəsinin sədri Mübariz Qurbanlıya açıq məktubuna münasibət bildirən təhsil eksperti Kamran Əsədov deyib.
O bildirib ki, təkcə paytaxtda deyil, respublikanın ən ucqar dağ rayonlarında müasir standartlara cavab verən məktəblər fəaliyyət göstərir:
“Həmin məktəblərdə yüksək səviyyədə təhsil almaq üçün hər cür şərait yaradılıb, müasir avadanlıqla təmin edilib. Təəssüf ki, bütün bunlara baxmayaraq, hələ də orta məktəblərimizdə bir sıra çatışmazlıqlar davam etməkdədir. Bunlardan biri də region məktəblərində qızların təhsildən yayındırılmasıdır. Artıq bu problem kütləvi hal almaqdadır. Bu problemi yenidən gündəmə gətirdiyinə görə Qüdrət Həsənquliyevə təşəkkür edirəm və onun bu təşəbbüsünü dəstəkləyirəm. Məlumat üçün qeyd edim ki, xüsusən kənd rayonlarında qızların təhsilə davamiyyəti olduqca aşağı səviyyədədir.
Kənd yerlərində qızların təhsildən yayınması bir sıra səbəblərlə bağlıdır. Bir çox hallarda yuxarı sinif şagirdlərinin məktəbə gəlməsi problemə çevrilir ki, bu da qızların erkən yaşda nikaha daxil olması ilə əlaqədardır. Kənd yerlərində qızlar adətən 8-ci sinifdə oxuyarkən nişanlanır. Ona görə də onların təhsil alması arxa plana keçir. Belə hallar respublikanın şimal və cənub rayonlarında daha geniş yayılıb”.
Ekspert vurğulayıb ki, qızların təhsildən yayınmasının digər səbəbi valideynlərin laqeydliyidir:
“Digər bir səbəb məktəb yaşlı qızların ailə təsərrüfatında işə cəlb edilməsidir ki, belə hallar daha çox aran rayonlarında genişlənib. Kiçik yaşlı qız uşaqları fermer təsərrüfatlarında pambıq, üzüm yığır, yaxud tarla işlərində çalışırlar. Məhz bu səbəbdən regionlarda qızların ali təhsil alması müşkül məsələyə çevrilib. DİM-in məlumatına görə, regionlardan ali təhsil almaq üçün sənəd verən qızların sayı oğlanlardan dəfələrlə azdır. Hətta Lerik və Yardımlı kimi dağ rayonlarından olduqca az sayda qız ali təhsil almaq üçün sənəd verir.
Hər il DİM-in cari tədris illəri üçün ali və orta ixtisas məktəblərinə tələbə qəbulunun elmi-statistik təhlillərinə baxanda biz bu mənzərəni açıq şəkildə görürük. Belə ki, məktəblərdə 9-cu sinifdə qızların sayı normal olsa da, 11-ci sinifdə kəskin azalır.
Son illərin rəqəmlərinə baxanda görürük ki, ölkənin Aran, Muğan və Cənub zonalarında qadınların təhsildən yayınması faktları mövcuddur. Xüsusilə Saatlı, Sabirabad, İmişli, Beyləqan, Astara, Lerik, Yardımlı rayonlarında demək olar ki, qızlar təhsildən uzaqlaşıb. Eyni problem Bakı kəndlərində də hökm sürməkdədir”.
Ekspertin sözlərinə görə, rəqəmlər vəziyyətin ürəkaçan olmadığını göstərir:
“Halbuki, qanunvericilikdə, Cinayət Məcəlləsində konkret olaraq buna görə ciddi məsuliyyət, cəza nəzərdə tutulsa da, hələ indiyə qədər bu maddələr istifadə edilməyib. Bu valideynlər ilk növbədə vətəndaşın konstitusion hüququnu pozur. Belə ki, Konstitusiyanın 42-ci maddəsinə görə, hər bir vətəndaşın təhsil almaq hüququ vardır. Onlar qızlarının bu hüququnu əlindən alır”.
Qeyd edək ki, Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev Qafqaz Müsəlmanları İdarəsinin sədri, Şeyxülislam Hacı Allahşükür Paşazadəyə və Azərbaycan Respublikası Dini Qurumlarla İş üzrə Dövlət Komitəsinin sədri Mübariz Qurbanlıya açıq məktub yazıb. Deputat qız uşaqlarının təhsildən yayındırılması haqda son məlumatlardan təəssüf hissi keçirdiyini qeyd edərək bu qurumların qaldırdığı problemlə bağlı addımlar atacağına ümid etdiyini ifadə edib.
Həmkarım Qüdrət Həsənquliyevin bəzi rayonlarda, o cümlədən Bakının bir sıra kəndlərində qız uşaqlarının təhsil almaları ilə bağlı problemlərin aradan qaldırılmasına dair çağırışını birmənalı olaraq dəstəkləyirəm.
Bu sözləri Axar.az-a BAXCP sədri, millət vəkili Qüdrət Həsənquliyevin Qafqaz Müsəlmanları İdarəsinin rəisi, Şeyxülislam Hacı Allahşükür Paşazadəyə və Dini Qurumlarla İş üzrə Dövlət Komitəsinin sədri Mübariz Qurbanlıya açıq məktubundakı fikirlərinə münasibət bildirən millət vəkili Fazil Mustafa deyib. Deputat bildirib ki, Azərbaycanda qız uşaqlarının təhsildən kənarda qalması bu gün gündəmdə olan ən vacib problemlər sırasındadır:
“Həqiqətən də sözügedən problemin həlli ilə bağlı tapşırıqların verilməsi və bu istiqamətdə addımların atılması olduqca mühümdür. Çünki hüzr yerlərinə gedən insanlara modern dünyanın tərəflərini çatdırmaq şərtdir. Burada insanların çoxu keçmiş rəvayətləri xatırlamaqla baş vermiş hadisələrdən heç də ibrət götürmürlər. İnsanlar üçün əsas olan bu gün onların düzgün istiqamətləndirilməsi və cəmiyyətə mütərəqqi fikirlərin ötürülməsidir. Hesab edirəm ki, həmkarım da həmin məsələni məhz bu kontekstdə qaldırıb”.
Deputat qızların təhsil almaları istiqamətində atılmalı olan addımları da müsbət qiymətləndirib:
“Hesab edirəm ki, din xadimləri məclislərdə rəvayətlər danışmaq əvəzinə qızların təhsil almalarını və qadın hüquqlarını təşviq etməlidir. Bu addımların atılması qısa zamanda müsbət nəticələr verə bilər”.
Qeyd edək ki, Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev Qafqaz Müsəlmanları İdarəsinin rəisi, Şeyxülislam Hacı Allahşükür Paşazadəyə və Azərbaycan Respublikası Dini Qurumlarla İş üzrə Dövlət Komitəsinin sədri Mübariz Qurbanlıya açıq məktub yazıb. Məktubda deputat Bakıda keçirilən “Azərbaycanda İnsan Kapitalı üzrə Forum”un panellərində müzakirələr zamanı İsveçrənin Cənubi Qafqaz üzrə Əməkdaşlıq Ofisinin regional direktor müavini Simona Haberlinin “Lənkəran, Lerik və Astaranın əksər məktəblərinin siniflərində bir nəfər də olsun qız yoxdur” fikirlərinin onu dərindən sarsıtdığını bildirib.