 |
|
“Qarabağ”ın baş məşqçisi Qurban Qurbanov oyunçusu Elvin Cəfərquliyevin intizamsız davranışlarından danışıb.
“Qafqazinfo” xəbər verir ki, təcrübəli mütəxəssis müdafiəçinin daha doğru davranmalı olduğunu bildirib:
“Futbolçularımın intizamsızlığı, onlar haqda fikirlər bildirilməsi ən xoşlamadığım mövzudur. Mənim üçün xoş deyil. Futbol aqressiv oyundur. Bəzən düşünmədiyin epizodlar, nəticələr olanda, xoşagəlməz hallar baş verir. Futbolçularıma dəfələrlə bildirmişəm və ən çox tələbim də budur ki, nə olursa-olsun, futbolçu özünü intizamlı aparmağı bacarmalıdır. Buna da məcburdurlar.
Çünki futbol kollektiv oyundur. Bir yola çıxmışıqsa, sona qədər birlikdə qalmalıyıq. Bəzən düşünmədiyin, olmayan qırmızı vərəqə göstəriləndə, futbolçu özünü idarə edə bilmir. Bəli, Elvində aqressivlik, cığallıq var. Belə epizodlar, hallar qarşıdakı 3-4 ildə özünü yığışdırmağa kömək olur, faydası görünür. Elvin “Qarabağ”da da, millidə də özünü daha diqqətli aparmalıdır. İstər-istəməz o yaş dövründə, hardasa yolunu azmaq olur. Çalışacağıq ki, bir daha belə hallar olmasın. Nərimana gəldikdə, yazırlar ki, hansısa jurnalistlə diskussiyası düzgün alınmayıb. Nəriman elə uşaqdır ki, ondan kəlbətinlə söz çıxarmaq olur. Əgər o da belə hərəkət edibsə, demək ki, böyük səhv edib.
Detalları bilmirəm, necə olub. Bəzən elə olub ki, baxmışam, amma görməmişəm və ona diqqət ayırmamışam. Sonda belə xəbər gəlib çıxıb ki, "Qurban müəllim diqqət ayırmadı". Belə hallar olur. Amma bu o demək deyil ki, kiməsə diqqətsizlik və hörmətsizlik etmişik. Futbolçuların hamısı səhv edə bilər. Sadəcə təkrarlamamaq lazımdır. Əgər belə səhvlər olubsa, bir daha eləməzlər”.
Futbol üzrə Azərbaycan Premyer Liqasında cari mövsümün çempionu müəyyənləşib.
Buna “Qarabağ” sona 8 tur qalmış nail olub.
Qurban Qurbanovun komandası “Kəpəz” üzərində böyükhesablı (6:1) qələbə qazanaraq xallarının sayını 69-a yüksəldib. Bununla da Ağdam təmsilçisi 26 xallıq fərqlə rəqibləri üçün əlçatmaz olub.
Qeyd edək ki, bu, “Qarabağ”ın 11-ci ölkə çempionluğudur.
“Qarabağ”ın forvardı Juninyo karyerasını Fransada davam etdirə bilər.
“Qafqazinfo” “Transfer Nabzı” X səhifəsinə istinadən xəbər verir ki, “Tuluza” braziliyalı hücumçunun keçidini həll edib.
Bu məsələdə Fransa klubunun rəsmisi Damien Komollinin həlledici rol oynadığı bildirilir.
Mövsümün sonunda Juninyonun “Qarabağ”dan ayrılaraq “Tuluza” ilə rəsmi müqavilə imzalayacağı iddia olunur.
“Qarabağ”a mövsümün əvvəlində keçən 27 yaşlı hücumçu 2026-cı il iyunun 30-na qədər Ağdam klubuna məxsusdur.
"Xəzər Lənkəran"ın böyük futbola dönüşü reallığa çevrilir.
Fanat.Az-ın əldə etdiyi məlumata görə, ötən ay stadionunu təmirə bağlayan cənub təmsilçisi arena üçün texniki işçilərin seçiminə start verib.
Hələlik tikinti işlərinə cəlb olunacaq ixtisaslı texniki işçilər axtarılır. Daha sonra tikinti işləri davam etdikcə, əlavə işçi qüvvəsi cəlb olunacaq.
Qeyd edək ki, "Xəzər Lənkəran" 2016-cı ildə fəaliyyətini dayandırıb.
Yassin Benzia Əlcəzair millisinin heyətində ötən gün Cənubi Afrika yığmasına qarşı yoldaşlıq oyununda 2 qol və 1 assistə imza atmışdı.
"Qarabağ"ın futbolçusunun 3:3 hesabı ilə yekunlaşan oyunda vurduğu akrobatik qolu təqdim etmişdik.
"Lequipe": Benzia!!! "Qarabağ"ın futbolçusu qayçı zərbə ilə Cənubi Afrikaya qol vurdu. Gecənin ən gözəl qoludur, sözsüz ki.
"Foot Mercato": Yassin Benzia Cənubi Afrikaya qarşı xariqüladə qol vurdu.
FIFA Dünya Kuboku: Yassin Benziadan velosiped zərbəsi.
Afrika Futbol Federasiyası: Yassin Benziaya baş əyin. Milli komandaya dönüşü belə elan edərlər...
"Men in Blazers": İlin qolu Yassin Benziadan. Həm ağlasığmaz, həm də möhtəşəm.
"İnstant Foot": Zlatan İbrahimoviç deyil, Yassin Benziadır.
aia.az xəbər verir ki, martın 22-dən 24-dək Azərbaycanın ilk yeganə FRC komandası Mechack FİRST Robotics Competition San Diego şəhərində keçirilən yarışmada iştirak etmişdir. NASA, Google, Apple, Disney və bir çox digər şirkətlərin sponsorluğu və təşkilatçılığı ilə keçirilən FİRST Robotics Competition dünyanın ən böyük nüfuzlu robototexnika yarışması adını daşıyır.
Azərbaycanda ilk yeganə FRC komandası olan “Team Mechack 9030” ötən il artıq bu yarışmada iştirak edib və Rookie All Star Award Rookie İnspiration və Wild Card kimi bir neçə mükafat qazanıb. Bu il yeni və təkminləşdirilmiş robotları ilə onlar digər 51 robotla uğurla yarışdılar. Məktəblilər arasında keçirilən bu yarışmanın əsas məqsədi şagirdlərin robotlaşdırma sahəsinə maraqlarını artırmaq, qabiliyyətlərini üzə çıxarmaqdan ibarətdir.
Gürcüstanın futbol üzrə milli komandası Avropa çempionatının final mərhələsinə vəsiqə qazanıb.
Bununla tarixi ilkə imza atan Gürcüstan yığması Almaniyada keçiriləcək qitə birinciliyində iştirak edəcək.
Yunanıstanla baş tutan matçın əsas və əlavə vaxtı 0:0 hesabı ilə bitib. Penaltilər seriyasında gürcü futbolçular daha dəqiq olublar - 4:2.
Qeyd edək ki, qarşılaşma Tbilisidə baş tutub.
Gürcüstan millisi Avropa çempionatında F qrupunda mübarizə aparacaq. Komandanın rəqibləri Türkiyə (18 iyun), Çexiya (22 iyun) və Portuqaliya (26 iyun) yığmaları olacaq.
Milli komandamızın hücumçusu Musa Qurbanlı icarə əsasında “Qarabağ”a qayıdacağı barədə yayılan xəbərləri təkzib edib.
Futbolxeber.az saytına açıqlamasında 22 yaşlı forvard hazırda çıxış etdiyi İsveçin “Yurqorden” klubundan tezliklə ayrılmaq barədə düşünmədiyini bildirib: “Belə bir məlumatım yoxdur. Hələ ki “Yurqorden”dəyəm və “Qarabağ”a qayıdacağım barədə heç bir qərar verilməyib. Bu haqda danışığımız olmayıb. Mən “Yurqorden”in futbolçusuyam və bu klubun uğurları üçün çalışıram. “Qarabağ”a qayıtmaq barədə hər hansı bir söhbət olmayıb”.
M.Qurbanlı İsveç klubundakı çətinliklərə hazır olduğunu vurğulayıb: “Mən İsveçə gedəndə bilirdim ki, bu, nağıl deyil, birdən-birə hansısa partlayış olmayacaq. Futbolda belə çətinliklər olur. Hazır idim bu çətinliklərə. Təbii ki, oynamayanda nəinki mənim üçün, ümumiyyətlə hər bir futbolçu üçün psixoloji cəhətdən asan olmur”.
O, hazırda öz şansını gözlədiyini söyləyib: “Fasilə müddətində komandaya yeni futbolçular cəlb olundu. Ola bilər ki, baş məşqçi hazırda yeni transferlərə daha çox şans verir. Mənim işim məşqlərimi edib öz şansımı gözləməkdir”.
Qeyd edək ki, dünən ölkə mətbuatında yayda Musa Qurbanlının “Qarabağ”a qayıdacağı və 2024/25 mövsümünü icarə əsasında Ağdam klubunda keçirəcəyi barədə xəbərlər yayılıb.
Əlavə edək ki, onun “Yurqorden”lə müqaviləsi 2026-cı ilin yayına kimidir.
UEFA "Qarabağ" klubunu 45750 avro cərimələyib.
"Report"un xəbərinə görə, qurum Bakıda Portuqaliyanın "Braqa" və Almaniyanın "Bayer 04" komandalarına qarşı Avropa Liqasının oyunlarında yaşananlara hüquqi qiymət verib.
"Köhlən atlar" "Braqa"ya qarşı pley-off mərhələsinin cavab matçında (2:3, əlavə vaxtda) lazer şüalarından istifadəyə görə 8000, təhqir xarakterli təxribatçı mesaj ucbatından 22500, ictimaiyyətə müraciət sistemindən düzgün istifadə edilməməsi səbəbindən 5000, komandanın düzgün olmayan davranışına görə 7500 avro ödəyəcək.
Leverkuzen təmsilçisi ilə 1/8 final mərhələsinin Bakıdakı ilk qarşılaşmasında (2:2) azarkeşlər pirotexniki vasitələrdən istifadə ediblər. "Qarabağ" bu səbəbdən 2750 avro ziyana düşüb.
Azərbaycan millisi Bakıda təşkil olunan “FIFA series - Edition 2024” layihəsində bu gün növbəti oyununu keçirəcək.
"Report"un məlumatına görə, yığma Bolqarıstan kollektivi ilə üz-üzə gələcək.
Tofiq Bəhramov adına Respublika stadionundakı qarşılaşma saat 20:00-da başlanacaq.
Görüşü estoniyalı hakim Kristo Tohver idarə edəcək.
“FIFA series – Edition 2024”
25 mart
20:00. Azərbaycan – Bolqarıstan
Baş hakim: Kristo Tohver (Estoniya)
Bakı, Tofiq Bəhramov adına Respublika stadionu
Qeyd edək ki, komandamız ilk matçında Monqolustana, bolqarlar isə Tanzaniyaya 1:0 hesabı ilə qalib gəlib.