 |
|
UEFA Çempionlar Liqasının III təsnifat mərhələsinin Macarıstandakı cavab oyununda “Ferentsvaroş” klubuna 3:1 hesabı ilə qalib gələn “Qarabağ” Bakıya qayıdıb.
“Report” məlumatına görə, Heydər Əliyev Beynəlxalq Aeroportunda “köhlən atlar”ı azarkeşlər qarşılayıblar.
Qeyd edək ki, “Qarabağ” (Ağdam) komandası UEFA Çempionlar Liqasının üçüncü təsnifat mərhələsində cavab oyununa çıxıb. “Qarabağ”ın rəqibi Macarıstan çempionu “Ferentsvaroş” klubu olub. Budapeştdəki “Groupama Arena”da oynanılan matç Azərbaycan çempionunun 3:1 hesablı qələbəsi ilə yekunlaşıb.
Beləliklə, üçüncü təsnifat mərhələsinin ilk qarşılaşmasında Bakıda Macarıstanın çempionu ilə 1:1 hesablı heç-heçə edən Qurban Qurbanovun yetirmələri Budapeştdə rəqibə qalib gəlib və iki oyunun nəticəsinə görə növbəti mərhələyə yüksəlib.
Azərbaycan təmsilçisinin növbəti - pley-off mərhələsindəki rəqibi Moldovanın “Şerif” komandasından 2:1 hesabı ilə üstün olan Çexiyanın “Viktoriya” komandası olacaq. Bu cütün qalibi isə Çempionlar Liqasının qrup mərhələsində oynayacaq. Pley-off mərhələsinin ilk matçları avqustun 16-17-də, cavab görüşləri isə avqustun 23-24-də təşkil olunacaq.
Xəbər verdiyimiz kimi, bu gün “Qarabağ” UEFA Çempionlar Liqasının 3-cü təsnifat mərhələsində cavab oyununa çıxacaq.
Komandamız Macarıstanda “Ferentsvaroş” klubu ilə qarşılaşacaq. Qarşılaşmanı FIFA referisi Karlos del Serro idarə edəcək.
Mərhələni keçən komanda UEFA Avropa Liqasının qrup mərhələsinə vəsiqəni təmin edəcək.
UEFA Çempionlar Liqası
III təsnifat mərhələsi, cavab oyunu
9 avqust
22:00. “Ferentsvaroş” (Macarıstan) – “Qarabağ” (Azərbaycan)
Hakimlər: Karlos del Serro, Xose Naranxo, Qonsalo Qonsales, Migel Anxel Ortis Arias (hamısı İspaniya)
VAR hakimləri: Xavyer Estrada Fernandes, İqnasio İqlesias Vilyanueva
Budapeşt, “Groupama Arena”.
"Səfərə çox böyük inamla və çəkinmədən gedirik".
Bunu "Qarabağ"ın baş məşqçisi Qurban Qurbanov "Ferentsvaroş"a qarşı keçirəcəkləri UEFA Çempionlar Liqasının III təsnifat mərhələsinin cavab oyunu üçün Macarıstana yollanmamışdan əvvəl Heydər Əliyev Beynəlxalq Aeroportunda jurnalistlərə açıqlamasında deyib.
50 yaşlı mütəxəssis son dəqiqəyədək yaxşı oyun üçün mabarizə aparmağa çalışacaqlarını bildirib: "Oyunla bağlı çox düşünüləsi bir şey yoxdur. Bilirik ki, hər şey səfərdə həll olunmalıdır. Vaxtımız az olsa da, matça hazırlığımız pis getməyib. Futbolçularıma inanıram. Çox yaxşı oyun göstərmək niyyətindəyik".
Qurbanov rəqibin həm hücum, həm də müdafiə potensialının yaxşı olduğunu vurğulayıb: "Hər mövqedə bacarıqlı oyunçuları var. Onları daha yaxından tanıdığımız üçün rahatıq. Bu bizə bir az rahatlıq verə bilər. Amma matçın gedişində gərgin oyun alına bilər. Biz Bakıdakı görüşdə də bir-birimizə oynamaq üçün imkan vermirdik. Düşünürəm ki, Macarıstanda çox hərəkətli qarşılaşma baş tutacaq".
Təcrübəli baş məşqçi hələlik yarımmüdafiə xəttində kimin oynayacağına tam qərar vermədiyini söyləyib: "Oyunçuların sabahkı durumlarına da baxacağıq. Bu gün axşam orada yüngül məşqimiz olacaq. Oyunadək qərar verəcəyik. Futbolçuların hazırlığına sabah da diqqət yetirəcəyik".
Mütəxəssis penaltilərə xüsusi vaxt ayırmadıqlarını diqqətə çatdırıb: "Amma il boyu bunun üçün hazırlıq gedir. Futbolçular bəzi məşqlərdən sonra penaltilər vururlar. İstəyirik ki, hər şey 90 dəqiqədə həll olunsun".
Qurbanov hər mövqedə etibarlı çıxış etmək istədiklərini deyib: "Hər bir komandanın müdafiəsində açıq zonalar olur. Biz daim buna diqqət yetiririk və boşluqları aradan qaldırmağa çalışırıq. Sabah mütləq yaxşı mübarizə aparmalıyıq. Son saniyələrədək bunu bacarmalıyıq. Rəqib azarkeşlərinin önündə oynadığı üçün bir az üstünlüyə malik ola bilər".
Qeyd edək ki, avqustun 9-da oynanılacaq "Ferentsvaroş" – "Qarabağ" görüşü Bakı vaxtı ilə saat 22:00-da başlayacaq. Bakıdakı ilk oyunda qalib müəyyənləşməyib – 1:1.
UEFA Çempionlar Liqasının 3-cü təsnifat mərhələsinin ilk oyunlarından sonra 2022/23 mövsümündə turnirdə ən çox qol vuran komandaların siyahısını açıqlayıb.
“Ən yaxşılar arasında Azərbaycan təmsilçisi “Qarabağ”da var. Ağdam klubu yeni mövsümdə çıxdığı 5 matçda ümumilikdə 11 qol vurub. “Qarabağ”ın 3-cü mərhələdəki rəqibi “Ferentsvaroş” da 11 qola imza atıb. Ona görə də “Qarabağ” Macarıstan təmsilçisi ilə birlikdə sıralamada 3-cüdür.
1-ci yerdə Norveç “Bodo Qlimt”idir - 17 qol. “Vikinqur” (İslandiya) isə 2-ci pillədə yer alıb - 12 qol.
“Qarabağ” künc zərbələrinin sayına görə liderdir. Onlar 5 matçda 38 dəfə künc zərbəsi yerinə yetiriblər.
Bunu da qeyd etmək lazımdır ki, Azərbaycan təmsilçisi ən çox kobudluğa məruz qalan və ən çox faul edən komandadır. 71 dəfə qayda pozan “Qarabağ”a qarşı 74 dəfə də qayda pozulub.
“Qarabağ” bu gün UEFA Çempionlar Liqasında növbəti oyununu keçirəcək.
Köhlən atlar” III təsnifat mərhələsinin ilk matçında Macarıstanın “Ferentsvaroş” klubunu qəbul edəcək. Tofiq Bəhramov adına Respublika stadionunda oynanılacaq qarşılaşma saat 20:00-da başlayacaq. Görüşün baş hakimi isveçli Andreas Ekberq olacaq.
Ağdam təmsilçisi oyuna ciddi itkilərlə çıxacaq. Kevin Medina zədəli, Kadi Borges və Riçard Almeyda isə cəzalı olduqları üçün Macarıstan çempionuna qarşı ilk matçı buraxacaqlar. Qonaqlardan isə Henri Vinqo zədə səbəbindən meydana çıxa bilməyəcək.
Komandalar arasında cavab oyunu avqustun 9-da Budapeştdə keçiriləcək.
UEFA Çempionlar Liqası
III təsnifat mərhələsi, ilk oyun
3 avqust
20:00. “Qarabağ” (Azərbaycan) – “Ferentsvaroş” (Macarıstan)
Hakimlər: Andreas Ekberq, Mehmet Çulum, Niklas Nyuberq, Adam Ladebek (hamısı İsveç)
VAR hakimləri: Yohem Kamfus, Rob Diperink (hər ikisi Niderland)
Tofiq Bəhramov adına Respublika stadionu
Qeyd edək ki, bu cütün qalibi pley-off mərhələsində “Şerif” (Moldova) – “Viktoriya” (Plzen, Çexiya) cütünün güclüsü ilə üz-üzə gələcək. Bu komandalar arasında Moldovanın paytaxtı Kişineuda baş tutan ilk oyunda qonaqlar 2:1 hesablı qələbə qazanıblar. “Qarabağ” – “Ferentsvaroş” cütündə uduzan komanda isə UEFA Avropa Liqasının pley-offunda “Şemrok Rovers” (İrlandiya) – “Şkupi” (Şimali Makedoniya) cütünün məğlubu ilə görüşəcək.
Peşəkar Futbol Liqası (PFL) qurumun prezidenti Ramin Musayevin istefası ilə bağlı məlumat yayıb.
PFL-in rəsmi saytı xəbər verir ki, funksioner səhhəti ilə əlaqədar postunu tərk edib.
14 ildir PFL prezidenti olan Ramin Namaz oğlu Musayev 2004-cü ildən futbol fəaliyyəti ilə məşğul olur. 2004-cü ilin aprelində “Neftçi” PFK-nin icraçı direktoru, həmin ilin noyabr ayından isə vitse-prezidenti təyin olunub. “Ağ-qaralar”da işlədiyi müddətdə komanda ilə Azərbaycan çempionu adına yiyələnib, avrokuboklarda mərhələlər keçib, 2006-cı ildə Birlik Kubokunun ilk qalibi olub.
2008-ci il iyulun 2-də AFFA-da keçirilən səsvermənin nəticəsinə əsasən, yeni yaradılan Peşəkar Futbol Liqasının ilk prezidenti seçilib və vəzifəsini 4 il icra edib. Yeni vəzifəyə seçildikdən sonra o, “Neftçi” klubundakı vitse-prezident postunu tərk edib.
2012-ci il iyulun 3-də AFFA-nın inzibati binasında AFFA prezidenti Rövnəq Abdullayev və klub rəhbərlərinin iştirakı ilə keçirilən növbəti seçkidə yekdilliklə ikinci müddətə Peşəkar Futbol Liqasının prezidenti seçilib. Ramin Musayev PFL-in 5 iyul 2016-cı il və 14 sentyabr 2020-ci il tarixli seçkilərinin də qalibi olub.
***
Ramin Musayev Peşəkar Futbol Liqasının prezidenti vəzifəsindən istefa verib.
Qol.az verdiyi xəbərə görə, o, yaxın ətrafına səhhəti ilə əlaqədar vəzifəsini tərk etdiyini açıqlayıb.
Bununla əlaqədar, o, bu gün Premyer Liqada yarışan klub nümayəndələri ilə görüşür.
Yaxın saatlarda bununla bağlı rəsmi açıqlama veriləcəyi gözlənilir.
Qeyd edək ki, 2008-ci ildən PFL-in prezidenti vəzifəsində çalışırdı.
"Qarabağ"ın Macarıstan "Ferentsvaroş"una qarşı keçirəcəyi UEFA Çempionlar Liqasının III təsnifat mərhələsinin ilk oyununun vaxtı açıqlanıb.
"Köhlən atlar"ın rəsmi feysbuk səhifəsi xəbər verir ki, avqustun 3-də Tofiq Bəhramov adına Respbulika stadionundakı qarşılaşma saat 20:00-da başlayacaq.
Cavab görüşü avqustun 9-da Budapeştdə olacaq.
Çempionlar Liqasının pley-off mərhələsinin potensial cütlükləri müəyyənləşib.
Oxu.az xəbər verir ki, 1, 2 və 3-cü mərhələdə “səpələnmişlər” sırasında olan Azərbaycan çempionu “Qarabağ” bu dəfə “səpələnməmişlər” səbətində yer alacaq. “Qarabağ” - “Ferensvaroş” (Macarıstan) cütünün qalibinin rəqibi pley-offda aşağıda qeyd edilən bu komandalardan biri olacaq:
“Ludoqorets” (Bolqarıstan) - “Dinamo” (Zaqreb, Xorvatiya) cütünün qalibi
“Kopenhagen” (Danimarka)
“Şerif” (Moldova) - “Viktoriya” (Çexiya) cütünün qalibi
“Səpələnmişlər” səbətində yer alan “Srvena Zvezda” (Serbiya) - “Pünik” (Ermənistan) cütünün qalibi isə Azərbaycan çempionuna potensial rəqib ola bilməyəcək.
Pley-off mərhələsinin püşkatması avqustun 2-də keçiriləcək.
Qeyd edək ki, “səpələnməmişlər” səbətində “Qarabağ” - “Ferensvaroş” cütlüyü ilə yanaşı bu klublar da yer alıb:
“Bude-Qlimt” (Norveç) - “Jalqris” (Litva) cütü
“Makkabi” (Hayfa, İsrail) - “Apollon” (Kipr) cütü
“Trabzonspor” (Türkiyə)
“Bir az bəxtimiz gətirsəydi, qalib gələ bilərdik”.
“Report”məlumat verir ki, bunu “Sürix”in baş məşqçisi Franko Foda İsveçrədə “Qarabağ”la əlavə vaxtda 2:2 hesablı heç-heçə etdikləri UEFA Çempionlar Liqasının II təsnifat mərhələsinin cavab oyunu barədə danışarkən deyib.
56 yaşlı mütəxəssis buraxdıqları ilk qolda pis müdafiə olunduqlarını bildirib:
“Futbolçulara belə vəziyyətlərdə diqqətli olmalarını söyləmişdik. Bu qədər asanlıqla qol buraxmamalısan. Biz daha yaxşısını etməliydik. Matçın əsas vaxtından sonra hər şey xeyrimizə idi. Lakin sevinc çox çəkmədi. Sadə top itkisinə yol verdik və rəqib bizi əks-hücumda yaxaladı”.
Foda nəticəyə görə məyus olduğunu söyləyib:
“Hesab 1:1 olarkən mübarizə apardıq. Əlavə vaxtın ilk hissəsində qol buraxmaq isə ayıbdır”.
Qeyd edək ki, Bakıda “Sürix”i 3:2 hesabı ilə məğlub edən “Qarabağ” səfərdəki matçın əsas vaxtında rəqibinə 1:2 hesabı ilə uduzub. Qurban Qurbanovun baş məşqçisi olduğu komanda əlavə vaxtda vurduğu qol sayəsində növbəti raunda yüksəlib - 2:2. “Köhlən atlar” Çempionlar Liqasının III təsnifat mərhələsində Macarıstanın “Ferentsvaroş” klubu ilə üz-üzə gələcək. İlk qarşılaşmalar 2-3 avqustda, cavab matçları isə 9 avqustda olacaq.
"Zirə"nin baş məşqçisi Rəşad Sadıqov "Qarabağ"ın Çempionlar Liqasının 3-cü təsnifat mərhələsinə yüksəlməsinə münasibət bildirib.
Ağdam klubunun sabiq kapitanı "köhlən atların"ın İsveçrə təmsilçisi "Sürix"i mübarizədən kənarlaşdırdığı oyundan sonra rəsmi instaqram səhifəsində komandanın baş məşqçisi Qurban Qurbanovla fotosunu paylaşıb.
Qeyd edək ki, "Qarabağ" Bakıdakı ilk matçda "Sürix"ə 3:2 hesabı ilə qalib gəlmişdi. Cavab oyununda da Ağdam təmsilçisi İsveçrə çempionunu məğlub edərək növbəti mərhələyə adlayıb.