 |
|
Azərbaycan millisinin və İngiltərənin "Vulverhempton" komandasının futbolçusu Renat Dadaşov karyerasını Portuqaliyada davam etdirəcək.
"22 yaşlı hücumçu bu ölkənin "Tondela" klubuna keçib. O, növbəti mövsümü icarə əsasında bu komandada keçirəcək.
Keçidi ilə bağlı yeni klubunun rəsmi saytına danışan gənc forvard meydana çıxmaq üçün səbirsizləndiyini bildirib: "Karyeramdakı bu addımdan razıyam. Ailəm və dostlarımla danışdım. Bu variantın mənim üçün ideal olduğunu başa düşdüm".
Qeyd edək ki, "Vulverhempton"la 2023-cü ilin yayınadək müqaviləsi olan Renat Dadaşov daha əvvəl Portuqaliyada "Eştoril" və "Pakuş de Ferreyra" klublarının da formasını geyinib.
İyul ayının 27-də saat 22:30 –23:30 radələrində paytaxtın Xətai rayonu, Şirvani küçəsində yerləşən idman zalında "EL-1 IDMAN TƏŞKİLATI"-nın təşkilatçılığı ilə idman yarışı keçirilib.
Fanat.Az məlumatına görə, xüsusi karantin və ictimai qayda pozuntusu ilə müşayiət olunan yarışa görə, təşkilatın prezidenti 1984-cü il təvəllüdlü Elçin Çobanzadə və onunla bərabər yarışın döyüşçüləri Fərid Qaya (Ferid Qaya) və Rosh Life təxəllüslü məşhur idmançılar da həbs olunub.
Qeyd edək ki, Xətai Rayon Polis İdarəsinin İstintaq şöbəsində xüsusi karantin və ictimai qayda pozuntusu ilə müşayiət olunan yarışla bağlı Cinayət Məcəlləsinin 139-1-ci (Epidemiya əleyhinə rejimin, sanitariya-gigiyena və ya karantin rejimlərinin pozulması) maddəsinə uyğun olaraq cinayət işi, İnzibati Xətalar Məcəlləsinin 510-cu (Xırda xuliqanlıq) və 211-ci (Epidemiya əleyhinə rejimin, sanitariya-gigiyena və karantin rejimlərinin pozulması) maddələrinə müvafiq olaraq inzibati icraat başlanıb.
Bu gün futbol üzrə Avropa Konfrans Liqasında 2-ci təsnifat mərhələsinin cavab oyunları keçiriləcək.
“Qafqazinfo” xəbər verir ki, Azərbaycanı bu turnirdə təmsil edən klublar da növbəti matçlarına çıxacaqlar.
Əvvəlcə “Keşlə” doğma meydanda Rusiyanın “Soçi”, “Sumqayıt” isə Serbiyanın “Çukariçki” komandası ilə münasibətlərinə aydınlıq gətirəcək. Rusiyadakı ilk oyunda darmadağına üzülən Bakı klubunun mərhələ keçmək şansları çox azdır. Amma Serbiyadan sərfəli nəticə ilə dönən Sumqayıt təmsilçisinə, istənilən hesablı qələbə bəs edəcək.
“Qarabağ” isə İsrail “Aşdod”u ilə səfərdə qarşılaşacaq. Ağdam təmsilçisi də ilk oyunda bu rəqibi ilə qolsuz heç-heçəyə razılaşdığından, bu dəfə mütləq qələbə qazanmalıdır.
Avropa Konfrans Liqası
2-ci təsnifat mərhələsinin cavab oyunları
29 iyul
20:00. Keşlə - Soçi
Baş hakim: Viktor Şimusik (Belarus).
Bakı. “ASK Arena”
İlk oyun – 0:3.
20:00. Sumqayıt - Çukariçki
Baş hakim: Yorgen Burhardt (Danimarka).
Sumqayıt. “Kapital Bank Arena”
İlk oyun – 0:0.
21:00. Aşdod - Qarabağ
Baş hakim: Novak Simoviç (Serbiya).
Aşdod. “Jabotinski” stadionu.
İlk oyun – 0:0.
Tokio-2020 Yay Olimpiya Oyunlarının ilk medalçıları müəyyənləşib.
Oxu.az" xəbər verir ki, bu, güllə atıcılığında olub.
Belə ki, qadınlar arasında 10 metr məsafədən atəşaçmada çinli Yan Çyan 251,8 göstərici ilə Olimpiadanın ilk qızıl medalını qazanıb. Rusiyalı Anastasiya Qalaşina (251,1) gümüş, isveçrəli Nina Kristen (230,6) isə bürünc mükafata layiq görülüb.
Qeyd edək ki, kişilərin güllə atıcılığında Azərbaycanı Ruslan Lunyov təmsil edirdi. Lakin o, Tokio-2020 Yay Olimpiya Oyunlarında finala vəsiqə qazana bilməyib.
10 metr məsafəyə kiçikçaplı tapançadan atəşaçma yarışında mübarizəyə təsnifat mərhələsindən başlayan Ruslan Lunyov yekunda 547 xal toplayaraq 20-ci yeri tutub. Bu nəticə isə onun həlledici mərhələyə çıxması üçün yetərli olmayıb.
Daha əvvəl Azərbaycan cüdoçularından Kəramət Hüseynov (60 kq) və Aişə Qurbanlı (48 kq) olimpiada ilə vidalaşıb.
Qvineya milli komandası Tokio-2020 Yay Olimpiya Oyunlarında iştirakdan imtina edib.
“Yol-xeber.az” xəbər verir ki, buna səbəb Yaponiyada koronavirusa yoluxanların sayının artmasıdır.
Bu barədə Qvineya idman naziri Sanussio Sou məlumat verib. O bildirib ki, komanda Tokioda heç bir yarışa qatılmayacaq.
“Qarabağ” bu gün Avropa Konfrans Liqasında ilk oyununa çıxacaq. Azərbaycan təmsilçisi 2-ci təsnifat mərhələsi çərçivəsində İsrailin “Aşdod” komandası ilə üz-üzə gələcək.
Ağdam klubu bu rəqiblə ilk oyununu doğma meydanda keçirəcək. Tofiq Bəhramov adına Respublika stadionunda baş tutacaq matçda “Qarabağ” daha şanslı hesab olunur.
Bu komandalar arasındakı cavab oyunu iyulun 29-da İsraildə keçiriləcək.
Avropa Konfrans Liqası
2-ci təsnifat mərhələsi
22 iyul
20:00. Qarabağ - Aşdod
Baş hakim: Sergey Boyko (Ukrayna).
Bakı. Tofiq Bəhramov adına Respublika stadionu.
UEFA Çempionlar Liqasının II təsnifat mərhələsinin ilk oyunlarından sonra statistik göstəricilər açıqlanıb.
"Report"un məlumatına görə, Polşa "Legiya"sında çıxış edən Azərbaycan millisinin futbolçusu Mahir Emreli 3 oyundan sonra qapıya ən çox dəqiq zərbə endirən futbolçular sırasına düşüb.
5 dəfə çərçivəni dəqiq nişan alan 24 yaşlı hücumçu bu nominasiyada ikinci sırada qərarlaşıb. Forvardın zərbələrinin 2-si qolla nəticələnib. Emreli yalnız bir dəfə hədəfdən yayınıb.
"3-lük"də "Neftçi"nin futbolçusu Sabir Buqrin də yer alıb. 25 yaşlı yarımmüdafiəçinin zərbələrindən 4-ü dəqiq alınıb. O, 4 dəfə isə çərçivəyə düşə bilməyib.
İlk sırada Monteneqronun "Buduçnost" komandasının yarımmüdafiəçisi Miloş Raiçkoviç yer alıb. Onun hesabında 6 dəqiq zərbə var.
Qeyd edək ki, "Neftçi" Çempionlar Liqasının II təsnifar mərhələsinin ilk oyununda Yunanıstanda "Olimpiakos"a 0:1 hesabı ilə uduzub. Cavab qarşılaşması bir həftə sonra Bakıda olacaq.
"Ölkə.Az" xəbər verir ki, əlavə vaxtda da tarazlıq pozulmadığından penaltilər seriyasında qalib müəyyənləşib. İtaliya millisi 3-2 hesabı ilə qələbə qazanaraq Avropa çempionu tituluna yiyələnib.
***
AVRO-2020-də İngiltərə və İtaliya yığmaları arasındakı final oyunu start götürüb. Qarşılaşma Londondakı "Uembli" stadionunda keçirilir.
İlk qol 3-cü dəqiqədə vurulub. İngiltərə millisində Lük Şou əks-hücumda fərqlənib.
Görüşü niderlandlı referi Byorn Kuypers idarə edir.
***
Bu gün Avropa çempionatının final oyununda üz-üzə gələcək İtaliya və İngiltərə yığmalarının start heyətləri açıqlanıb.
Komandalar meydana aşağıdakı "11-lik"lə çıxacaqlar:
İtaliya: 21. Canluici Donnarumma, 2. Covanni Di Lorenso, 3. Corco Kyellini (kap.), 6. Marko Verratti, 8. Jorjinyo, 10. Lorenso İnsinye, 13. Emerson, 14. Federiko Kyeza, 17. Çiro İmmobile, 18. Nikolo Barella, 19. Leonardo Bonuççi
İngiltərə: 1. Cordan Pikford, 2. Kayl Uolker, 3. Lük Şou, 4. Deklan Rays, 5. Con Stounz, 6. Harri Maquayr, 9. Harri Keyn (kap.), 10. Rəhim Sterlinq, 12. Kiran Trippye, 14. Kelvin Fillips, 19. Meyson Maunt
Qeyd edək ki, İngiltərənin paytaxtı Londondakı "Uembli" stadionunda təşkil olunacaq qarşılaşma Bakı vaxtı ilə saat 23:00-da başlanacaq. Görüşü niderlandlı baş hakim Byorn Kuypers idarə edəcək.
“Turnir təbiətcə bənzərsiz idi. Avropanın 11 şəhəri ən uyğun olmayan məqamlardan birində yarışa ev sahibliyi etdi”.
"Bunu AFFA-nın icraçı vitse-prezidenti Elxan Məmmədov deyib.
Assosiasiya rəsmisi AVRO-2020-nin 4 oyununun Bakıda keçirilməsinə münasibət bildirib. Məmmədov bunun müsbət məqamlarından danışıb: “Stadion tutumu və koronavirusla bağlı səyahət məhdudiyyətlərinin Bakıdakı tamaşanı çətinləşdirdiyi həqiqət olsa da, yarışın müsbət tərəflərinə nikbinliklə baxmağa yerimiz var. 2019-cu ildəki Avropa Liqasının final matçından sonra ölkəmiz bir daha Avropa futbolunun diqqət mərkəzinə düşdü. Elit səviyyəli rəqabəti ölkəmizə gətirməyin yerli azarkeşlər və Azərbaycan xalqı üzərində təsirini qeyd etməmək olmaz. Azərbaycanın da futbol masasında yerinin olduğunu göstərdik. Ümid edirik ki, bu, ölkəmizdəki gənc nəslə və idmançılara ilham verəcək”.
Vitse-prezident gələcəkdə ölkəmizin başqa turnirlərə də ev sahibliyi etmək istədiyini vurğulayıb: “UEFA tərəfindən ayrılmaz bir üzv kimi tanındığımız üçün qürur duyuruq. Ümidvarıq ki, yaxın gələcəkdə azarkeşləri Azərbaycana qaytarmaq üçün beynəlxalq idman qurumları ilə işbirliyimizi davam etdirəcəyik”.
Qurum nümayəndəsi AVRO-2020 matçları üçün Bakıya gələn komandalar və onların azarkeşləri üçün unudulmaz anlar yaşandığını düşünür: “AFFA ölkəmizdə Danimarka, Çexiya, Türkiyə, İsveçrə və Uelsi qəbul etməkdən, müxtəlif ölkələrdən komandaları bir araya gətirən təşkilatçılıqdan məmnundur. Komandalarını dəstəkləmək üçün Bakı küçələrini gəzən beş ölkənin azarkeşləri üçün turnir boyu əla futbol festivalı oldu. Əsasən yüksək səviyyəli idman yarışlarını qəbul etmişik. Danimarkanın 1/4 finaldakı aqressiv hücum futbolu kimi böyük anlar buradakı azarkeşlərin yaddaşlarında uzun müddət qalacaq. Ölkəmizin futbol sevgisini canlandıran bu anlar futbol proyektimizin 2025-ci ilədək irəliləməsində əhəmiyyətli rol oynayacaq”.
Qeyd edək ki, AVRO-2020 çərçivəsində A qrupunun Uels – İsveçrə (1:1), Türkiyə - Uels (0:2), İsveçrə - Türkiyə (3:1), eyni zamanda 1/4 final mərhələsinin Çexiya – Danimarka (1:2) matçı Bakı Olimpiya Stadionunda keçirilib.
Tokio-2020 Yay Olimpiya Oyunları bütün yarış meydanlarında azarkeşsiz keçiriləcək.
"Yol-xeber.az"ın məlumatına görə, bu barədə olimpiadanın təşkilinə məsul olan yaponiyalı nazir Tamayo Marukava açıqlama verib.
O bildirib ki, Oyunlar paytaxt ərazisində yerli azarkeşlərin iştirakı olmadan təşkil ediləcək. Tamaşaçıların digər prefekturalardakı yarışlara buraxılması isə hazırda təşkilatçılar və yerli hökumət nümayəndələri ilə razılaşdırılır.
Qeyd edək ki, Tokio-2020 23 iyul - 8 avqustda keçirilməlidir.