Futbol üzrə Türkiyə milli komandasının baş məşqçisi Şenol Günəş AÇ-2020-nin qrup mərhələsi çərçivəsində İtaliya yığmasına qarşı keçirdikləri oyunu şərh edib.

“Türkiyəli mütəxəssis 0:3 hesabıyla məğlub olduqları matçdan sonra bunları söyləyib:

“Avropa çempionatının açılış matçında meydan sahiblərinə gücümüzü göstərmək, onlara çətinlik yaşatmaq istəyirdik. Rəqiblə bərabər səviyyədə oynamağı, gözəl futbol sərgiləməyi düşünürdük. Amma bunu bacarmadıq. Rəqib bizdən üstün idi. Texniki cəhətdən bizdən daha üstün olduqlarını göstərdilər. Xüsusilə ilk hissədə rəqibin təzyiqindən qurtula bilmədik. İtaliya yığması topu ələ keçirəndə onu rahatlıqla vermir. Əvəzində bizdən topu daha rahat ala bilirdilər. Birinci hissədə rəqibin təzyiqinə dözə bilsək də, ikinci hissədə xüsusilə qol buraxdıqdan sonra oyuna nəzarəti daha da itirdik. Qarşımızda daha üstün rəqib vardı. Bizdən daha yaxşı olan rəqibə məğlub olduq. Oyunumuzun İtaliya yığmasından çox geri qaldığını gördük. Amma rəqib nə qədər güclü olsa da, biz də öz oyunumuzu sərgiləyə bilmədik. Bəlkə də ilk qolu buraxmasaydıq, daha da dirənə bilərdik. Bu oyunda qazanacağımız bir və ya üç xal bizə böyük fayda verərdi. Olmadı. Buna görə üzgünük. Qarşıda daha iki oyunumuz var. Hər ikisində qalib gəlməyə çalışacağıq. İlk oyun Uelsə qarşı olacaq. Ümid edirəm ki, həmin oyunda düşündüklərimizi meydanda göstərə və istədiyimiz nəticəni qazana biləcəyik”.

Twitter

Bu gün futbol üzrə Avropa çempionatının daha üç oyunu keçiriləcək.

A qrupunda bir, B qrupunda isə iki matç olacaq.

A qrupundakı Uels - İsveçrə görüşü Bakı Olimpiya Stadionunda olacaq. Bu, Azərbaycan paytaxtında gerçəkləşəcək ilk qarşılaşmadır. Fransalı Kleman Turpenin idarə edəcəyi oyun saat 17:00-da start götürəcək.

Matça təxminən 6-7 min bilet satılıb. Komandalar böyük turnirlərin final mərhələlərində ilk dəfə üz-üzə gələcəklər. İndiyədək iki yığma arasında oynanılmış 7 oyunun 5-də İsveçrə, 2-də isə Britaniya təmsilçisi qələbə qazanıb. Komandalar heç vaxt heç-heçəyə razılaşmayıb.

İsveçrə qatıldığı son 3 nüfuzlu turnirdə DÇ-2014, AVRO-2016 və DÇ-2018-də qrupdan çıxmağı bacarıb. Hər üç yarışın 1/8 finalında uduzan komanda əvvəlki uğurunu növbəti dəfə təkrarlamaq istəyir. Uels isə 2016-cı ildə Fransadakı qitə çempionatının yarımfinal mərhələsinə kimi adlayıb.

B qrupunda turnirin iddialı komandalarından, hazırda FIFA reytinqində ilk pillədə qərarlaşan Belçika Rusiya ilə, Danimarka isə Avropa çempionatının debütantı Finlandiya ilə üz-üzə gələcək.

Avropa çempionatı

A qrupu, I tur

17:00. Uels - İsveçrə

Hakimlər: Kleman Türpen, Nikolya Dano, Siril Qrenqor (Fransa)

Dördüncü hakim: Srcan Yovanoviç (Serbiya)

Bakı. Bakı Olimpiya Stadionu

B qrupu

20:00. Danimarka - Finlandiya

23:00. Belçika - Rusiya

Qeyd edək ki, təqvimə əsasən, Bakı Olimpiya Stadionu A qrupunun İsveçrə - Uels matçı ilə yanaşı, Türkiyə - Uels və Türkiyə - İsveçrə qarşılaşmalarına, eləcə də 1/4 final mərhələsinin 1 oyununa ev sahibliyi edəcək.

Twitter

“İstəyimiz o idi ki, AÇ-2020 bölgəmizdə əsl bayram olsun. Amma pandemiya buna imkan vermədi”.

“Bunu AFFA-nın icraçı vitse-prezidenti Elxan Məmmədov AÇ-2020-nin Bakıda keçiriləcək oyunları barədə danışarkən deyib.

Federasiya rəsmisi koronavirus pandemiyası ilə bağlı Azərbaycandakı son durumun digər ölkələr üçün də ümidverici olduğunu söyləyib: “İstəyirik ki, şəhərimizin canlı atmosferi qonşularımıza sirayət etsin, belə bir tədbirə ev sahibliyi etməkdən duyduğumuz qüruru bizimlə bölüşsünlər. 15 aylıq pandemiyadan sonra ən vacib mesaj normallaşmağımızdır. Bu, təkcə bizim yox, digər bütün ölkələr üçün böyük ümid verir. Bu fürsətdən istifadə etməliyik”.

Elxan Məmmədov bir müddət əvvəl qitənin nəhəng klubları tərəfindən yaradılan Avropa Superliqasının uğursuz layihə olduğunu bildirib. O, həmrəylik nümayiş etdirməyin vacibliyini vurğulayıb: “Bu cür fikir dəyərlərimizi məhv edir. UEFA gənclərin və əlil futbolunun inkişafına, qadın oyununun böyüməsinə çox investisiya yatırır. Bütün maraqlı tərəflər futbol oynaya bilməlidirlər. Bazar günü səhər oyanıb strategiyasız və yalnız 4 milyard dollara Superliqa yarada bilmərik”.

AFFA-nın vitse-prezidenti Azərbaycan futbolu barədə də düşüncələrini bölüşüb: “Düşünürəm ki, daha uzun müddətdə Avropa çempionatının seçmə yarışlarında rəqabət apara bilərik. Bizim 2014-cü ildən bəri hər il Avropa Liqasının qrup mərhələsində yer alan və uğurla çıxış edən “Qarabağ” kimi klubumuz var. Klubların ilk “11-liy”ində 6 yerli futbolçu var. Bütün klublarımızda daha çox oyunçu yetişdiririk”.

Qeyd edək ki, AVRO-2020 çərçivəsində Bakıda ilk oyun bu gün Uelslə İsveçrə arasında (17:00) keçiriləcək.

Twitter

Bu gün futbol üzrə Avropa çempionatı start götürəcək.

"Yol-xeber.az"ın məlumatına görə, turnirin açılış oyunu Romadakı "Olimpika" stadionunda İtaliya və Türkiyə yığmaları arasında olacaq. Niderland Futbol İttifaqından Denni Makkelinin idarə edəcəyi qarşılaşma Bakı vaxtı ilə saat 23:00-da başlayacaq.

Koronavirus pandemiyası səbəbindən təxirə salınan qitə çempionatına ilk dəfə ikidən çox ölkə ev sahibliyi edəcək. Oyunlar İtaliyanın Roma, İngiltərənin London, Niderlandın Amsterdam, Danimarkanın Kopenhagen, Rumıniyanın Buxarest, Macarıstanın Budapeşt, Rusiyanın Sankt-Peterburq, Almaniyanın Münhen, İspaniyanın Sevilya, Şotlandiyanın Qlazqo şəhərləri ilə yanaşı, Azərbaycanın paytaxtı Bakıda keçiriləcək.

UEFA-nın 60 illiyi ilə bağlı Avropa çempionatının 12 şəhərdə təşkili nəzərdə tutulsa da, sonradan İrlandiyanın paytaxtı Dublin qitə futbol qurumuna azarkeşlərlə bağlı təminat verə bilmədiyindən say 11-ə endirilib. Bundan başqa, analoji problemlə üzləşən İspaniyanın Bilbao şəhərini Sevilya əvəzləyib.

Mövcud vəziyyətlə əlaqədar Budapeşt istisna olmaqla, digər şəhərlərdəki qarşılaşmalara məhdud sayda azarkeş buraxılacaq. A qrupunun üç və 1/4 final mərhələsinin bir oyununu qəbul edəcək Bakı Olimpiya Stadionunda hər görüş üçün arenanın ümumi tutumunun 50 faizi qədər tərəfdar yer alacaq.

24 yığma hərəsində 4 komanda olmaqla, 6 qrupda mübarizə aparacaq. 31 gün davam edəcək turnirdə ümumilikdə 51 oyun baş tutacaq. Qruplarını ilk 2 sıradan tamamlayan yığmalar, həmçinin dörd ən yaxşı qrup 3-cüsü 1/8 finala vəsiqə qazanacaq. Yarımfinal və final matçları Londondakı "Uembli" stadionunda oynanılacaq.

AVRO-2020-dəki yeniliklərdən biri də komandaların iştirak ərizəsindəki futbolçu sayının artırılmasıdır. Bu dəfəki turnirdə hər kollektiv 26 oyunçu sifariş edib. Onların 3-ü qapıçıdır.

Avropa çempionatına ilk dəfə qadın hakim təyinat alıb. Açılış matçında 4-cü hakim funksiyasını yerinə yetirəcək fransalı FIFA referisi Stefani Frappar turnirin tarixinə düşəcək. Digər yenilik AVRO-2020-də VAR sisteminin tətbiqi ilə bağlıdır.

Birinci dəfə 1960-cı ildə Fransada Avropa Millətlər Kuboku adı altında keçirilmiş turnirin ilk qalibi SSRİ yığması olub. Avropa çempionatının ən uğurlu kollektivi isə Almaniya millisidir. Altı dəfə final oynayan Bundestim bunların 3-də (1972, 1980, 1996) qalib olub. Almanlarla yanaşı, İspaniya yığması da 3 dəfə (1964, 2008, 2012) Avropa çempionluğunu qazanıb. Pireneylilər bir dəfə isə (1984) finalda uduzublar. Almaniya və İspaniyanı 2 çempionluğu olan Fransa millisi izləyir. Turnirin son qalibi isə Portuqaliya seçməsidir.

Avropa çempionatı

A qrupu, I tur

23:00. İtaliya - Türkiyə

Hakimlər: Denni Makkeli, Hessel Stiqstra, Yan de Vris (Niderland)

Dördüncü hakim: Stefani Frappar (Fransa)

Roma, "Olimpiko" stadionu.

Qeyd edək ki, Təqvimə əsasən, Bakı Olimpiya Stadionu A qrupunun İsveçrə - Uels, Türkiyə - Uels və Türkiyə - İsveçrə qarşılaşmalarına, eləcə də 1/4 final mərhələsinin 1 oyununa ev sahibliyi edəcək.

Twitter

Portuqaliyanın futbol üzrə yığmasının hücumçusu Kriştianu Ronaldu İsrail milli komandasına qarşı yoldaşlıq matçının gedişində fərqlənib.

“ 35 yaşlı hücumçu Brunu Fernandeşin ötürməsini qola çevirib. O, bunula matçda ikinci qolu öz hesabına yazıb. Rəqbi qapılarına bu cür yol tapma "Qızıl top"un beşqat sahibi üçün 104-cü fərqlənmə olub.

Bununla da Ronaldunun İran yığmasının keçmiş hücumçusu Əli Daei tərəfindən əldə olunmuş dünya rekorduna çatmasına beş qol qalıb.

Qeyd edək ki, Kriştianu Portuqaliya yığmasının son 42 matçında 43 dəfə fərqlənib.

Twitter

İdman jurnalisti və şərhçi Nobel Arustamyan Bakıdakı Avro-2020 qarşılaşmalarına gəlməyəcək.

"Bu barədə “Caliber” “Telegram” kanalı öz mənbələrinə istinadən yazıb.

N.Arustamyan UEFA-dan Avro-2020 oyunları üçün akkreditasiya ala bilməyib, çünki Azərbaycan şərhçinin Bakıya gəlməsinə qarşı çıxıb. Arustamyan dəfələrlə Azərbaycanın bir vaxtlar işğal altındakı ərazilərinə səfər edib və Xankəndidə separatçılıq siyasətinə təbliğ edən tədbirlər keçirib və bununla əlaqədar Azərbaycan Xarici İşlər Nazirliyinin “qara siyahısına” daxil edilib.

Bununla belə, rəsmi Bakı Arustamyanın Avro-2020-ə akkreditasiyasına qarşı çıxmayıb, söhbət yalnız şərhçinin Bakıdakı oyunlara buraxılmamasından gedib. Lakin UEFA-nın reqlamentinə əsasən əgər Avro-2020-nin təşkilatçı ölkələrindən biri akkreditasiyaya icazə vermirsə, o zaman jurnalist ümumiyyətlə turnirə buraxılmır.

Arustamyanın UEFA ilə problemini çözməsi və Avro-2020 üçün akkreditasiya alması belə onun Bakıya gələ biləcəyi anlamını ifadə etmir.

“Arustamyan Bakıdakı oyunlar üçün akkreditasiya almayıb. O, Azərbaycana gələ bilməyəcək. Digər məkanlara gəldikdə isə başqa şəhərlərdə akkreditasiya ilə bağlı məhdudiyyətlər Bakının tələbi ilə deyil, UEFA-nın daxili reqlamenti əsasında olub”, - deyə “Caliber” qeyd edib.

Twitter

Ukraynanın Odessa şəhərində Qarışıq İdman Növləri üzrə Dünya Çempionatı keçirilib. Yol-xeber.az xəbər verir ki, çempionatda iştirak edən Nicat Yusifov və Cəlal Cəlallı qalib gələrək dünya çempionu adını qazanıblar. Nicat Yusifov finalda erməni əsilli rəqibi Qriqoryan Artura qalib gələrək 70 kiloqram çəki dərəcəsində dünya çempionu olub.

Qeyd edək ki, idmançılardan biri  - Bakı Nəqliyyat Agentliyinin əməkdaşı Cəlal Cəlallı ukraynalı rəqibinə qalib gələrək 80 kiloqram çəki dərəcəsində çempionatın baş mükafatına layiq görülüb.

Çempionat iyunun 3-dən 6-a kimi davam edib.

Qeyd edək ki, yarışda dünyanın 16 ölkəsindən 800 idmançı iştirak edib. Çempion adını qazanan hər iki idmançıya gələcək fəaliyyətlərində uğurlar arzu edirik.

Twitter