 |
|
Bu, həm avtomobil, həm də dəmir yolu şəbəkəsinə aiddir
Abşeron dairəvi dəmir yolunun avtomobil yolları ilə kəsişməsində 15 keçidin tikintisi planlaşdırılıb. Həmin tunel tipli yolötürücülərinin 7-si artıq istismara verilib.
Ümumiyyətlə, bu cür tunellərin hərəkətin təşkilindəki rolu nədən ibarətdir?
Bununla bağlı dəmir yolu üzrə ekspert Yasin Mustafayev "MediaPost"a verdiyi açıqlamada yeni tikilən tunellərin və yolötürücülərin avtomobil yolunda sıxlığın aradan qaldırılmasını təmin etdiyini deyib.
Onun sözlərinə görə, nəqliyyatın sürətlə və intensiv hərəkət etdiyi bütün yollarda kəsişmələrin müxtəlif səviyyəli olması arzu olunan, bəzi hallarda isə vacibdir: "Bu, həm avtomobil, həm də dəmir yolu şəbəkəsinə aiddir. Amma, bu, hər zaman təmin oluna bilmir. Əsasən də maliyyə baxımından baha başa gəldiyindən kəsişmələrin müxtəlif səviyyəli olması üçün müəyyən zaman və vəsait tələb olunur".
O bildirib ki, son zamanlar qeyd edilən məsələ ilə bağlı yeniliklərə şahid oluruq: "Yol ötürücülərinin və tunel tipli yolötürücülərinin layihələndirilməsi və inşa edilməsi istiqamətində intensiv fəaliyyət həyata keçirilir. Belə müxtəlif səviyyəli keçidlərin əhəmiyyəti təkcə təhlükəsizliyin təminatı deyildir. Eyni zamanda hərəkətin dayanmadan davam etdirilməsində böyük rolu oynayır. Yeni tikilən tunellər və yolötürücüləri avtomobil yolunda sıxlığın aradan qaldırılmasını və dəmir yollarında vaxt baxımından səmərələliyin artırılmasını, bununla da qatarların cədvələ uyğun fasiləsiz və sürətli hərəkətini təmin edir. Hər iki nəqliyyat vasitəsi bir-birinə mane olmadan hərəkətini davam etdirir. Müxtəlif səviyyəli keçidlərin inşası perspektivdə də nəzərdə tutulmalıdır. Digər istiqamətlərdə, əsasən də sürətli yollarda bu prinsipin həyata keçirilməsi vacib məsələ olmalıdır”.
Fevralın 11-də avtomobillərin hərracda satışı təşkil ediləcək.
“Zabrat Maşınqayırma Zavodu” Açıq Səhmdar Cəmiyyətinin iki avtomobili satışa çıxarılacaq.
Qurumun 1996-cı il buraxılışlı “Daewoo Espero” avtomobilinin ilkin qiyməti 1500 manata təklif olunacaq.
Zavodun 2000-ci il buraxılışlı “Daewoo Super Salon” avtomobilinin start qiyməti 2000 manat olacaq.
Azərbaycan Respublikası Prezidenti yanında Ali Attestasiya Komissiyasının balansında olan, 2006-cı il buraxılışlı “Nissan Maxima” avtomobilinin isə ilkin qiyməti 10 min manata təklif ediləcək.
Sifarişlər Əmlak Məsələləri Dövlət Komitəsi Əmlak Xidmətləri Məkanında (Bakı şəhəri, Nizami rayonu, Xəlil Rza Ulutürk küçəsi 20) və yaxud e–emdk.gov.az elektron portalı vasitəsilə hərracın keçirilməsinə ən gec üç bank günü qalanadək qəbul olunacaq.
Azərbaycan Respublikası Prezidenti İlham Əliyev Ağsu rayonunun Ağsu–Ağarx–Rəhimli–Qaradağ avtomobil yolunun tikintisi ilə bağlı tədbirlər haqqında sərəncam imzalayıb.
Sərəncama əsasən, altı min nəfər əhalinin yaşadığı doqquz yaşayış məntəqəsini birləşdirən Ağsu–Ağarx–Rəhimli–Qaradağ avtomobil yolunun tikintisi məqsədilə Azərbaycan Respublikasının 2020-ci il dövlət büdcəsinin dövlət əsaslı vəsait qoyuluşunun (investisiya xərclərinin) bölgüsündə avtomobil yollarının tikintisi və yenidən qurulması üçün nəzərdə tutulmuş vəsaitin 17,4 milyon manatı Azərbaycan Avtomobil Yolları Dövlət Agentliyinə ayrılıb.
İndi bizim şəhərətrafı dəmir yolu nəqliyyatı yeni mərhələyə qədəm qoyur. Bu il artıq dairəvi hərəkət marşrutu da işə düşəcək.
Bu sözləri Prezident İlham Əliyev Anar Quliyevi Dövlət Şəhərsalma və Arxitektura Komitəsinin sədri vəzifəsinə təyin olunması ilə əlaqədar qəbul edərkən deyib.
Dövlətimizin başçısı bildirib: “Nəqliyyat infrastrukturuna xüsusi diqqət verilməlidir. Son illər ərzində köçürülmələr aparılan bir çox yerlərdə müasir nəqliyyat qovşaqları yaradılır, küçələr genişləndirilir. Yenə də keçmişdə “Sovetski” adlandırılan əraziyə qayıdıram, orada küçələrin eni iki metrdən çox deyildi. İndi geniş xiyabanlar salmışıq. İndi yol hərəkəti nə qədər yüngülləşib. Nəqliyyat infrastrukturu təkcə avtomobil yollarından ibarət deyil. İndi bizim şəhərətrafı dəmir yolu nəqliyyatı yeni mərhələyə qədəm qoyur. Bu il artıq dairəvi hərəkət marşrutu da işə düşəcək. Bu da, əlbəttə, avtomobil yollarına düşən yükü azaldacaq. Ona görə şəhərsalma qaydaları, nəqliyyat infrastrukturu, digər kommunikasiyalar, memarlıq prinsipləri, Bakı şəhərinə uyğun memarlıq üslubunun qorunması, ekoloji vəziyyətin yaxşılaşdırılması və digər amillər daim diqqət mərkəzində olmalıdır”.
Digər amillər daim diqqət mərkəzində olmalıdır
"Nəqliyyat infrastrukturuna xüsusi diqqət verilməlidir. Son illər ərzində köçürülmələr aparılan bir çox yerlərdə müasir nəqliyyat qovşaqları yaradılır, küçələr genişləndirilir".
“Report” xəbər verir ki, bunu Prezident İlham Əliyev Dövlət Şəhərsalma və Arxitektura Komitəsinin sədri vəzifəsinə təyin etdiyi Anar Quliyevi qəbul edərkən deyib.
Prezidentin sözlərinə görə, yenə də keçmişdə “Sovetski” adlandırılan əraziyə qayıdıram, orada küçələrin eni iki metrdən çox deyildi: “İndi geniş xiyabanlar salmışıq. İndi yol hərəkəti nə qədər yüngülləşib. Nəqliyyat infrastrukturu təkcə avtomobil yollarından ibarət deyil. İndi bizim şəhərətrafı dəmir yolu nəqliyyatı yeni mərhələyə qədəm qoyur. Bu il artıq dairəvi hərəkət marşrutu da işə düşəcək. Bu da, əlbəttə, avtomobil yollarına düşən yükü azaldacaq. Ona görə şəhərsalma qaydaları, nəqliyyat infrastrukturu, digər kommunikasiyalar, memarlıq prinsipləri, Bakı şəhərinə uyğun memarlıq üslubunun qorunması, ekoloji vəziyyətin yaxşılaşdırılması və digər amillər daim diqqət mərkəzində olmalıdır”.
Texniki baxışdan keçirilməsinə görə dövlət rüsumu 30 manat oldu
Azərbaycanda nəqliyyat vasitələri üçün texniki baxışın qiyməti rəsmi olaraq qalxdıb. Yol-xeber.az xəbər verir ki, bu barədə Milli Məclisin qəbul etdiyi dəyişiklik yanvar ayının 1-dən qüvvəyə minib. Belə ki, artıq bütün nəqliyyat vasitələri üçün texniki baxışın qiyməti 30 manat təşkil edir.
Qeyd edək ki, Milli Məclisin 30 sentyabr tarixində keçirilən plenar iclasında nəqliyyat vasitələrinin texniki baxışdan keçirilməsi üçün ödənilən dövlət rüsumunun artırılmasını nəzərdə tutan dəyişiklik layihəsi müzakirəyə çıxarılıb. İclasda rüsumun artırılması üçün "Dövlət rüsumu haqqında" qanuna dəyişiklik edilib.
Dəyişikliyə əsasən, avtonəqliyyat vasitələrinin qanunla müəyyən edilmiş hallarda texniki baxışdan keçirilməsinə görə dövlət rüsumu 30 manat müəyyən edilib. Müzakirələrdən sonra dəyişiklik layihəsi səsverməyə çıxarılaraq I oxunuşda qəbul edilib.
Azərbaycan Respublikası Prezidenti İlham Əliyev Ağcabədi rayonunda əkin sahələrinin və əhalinin içməli suya olan tələbatının ödənilməsi üçün subartezian quyularının layihələndirilməsi və qazılması ilə bağlı tədbirlər haqqında sərəncam imzalayıb.
Sərəncama əsasən, Ağcabədi rayonunun əhalisi 83682 nəfər olan 20 yaşayış məntəqəsində əkin sahələrinin və əkin üçün istifadə olunan həyətyanı torpaq sahələrinin suvarma suyu ilə təminatının yaxşılaşdırılması, habelə əhalinin içməli suya olan tələbatının ödənilməsi üçün 30 ədəd subartezian quyusunun layihələndirilməsi və qazılması məqsədilə Azərbaycan Respublikasının 2020-ci il dövlət büdcəsinin dövlət əsaslı vəsait qoyuluşunun (investisiya xərclərinin) bölgüsündə Azərbaycanın rayonlarında su təchizatının yaxşılaşdırılması məqsədilə subartezian quyularının qazılması üçün nəzərdə tutulmuş vəsaitin 2,1 milyon manatı Azərbaycan Meliorasiya və Su Təsərrüfatı Açıq Səhmdar Cəmiyyətinə ayrılıb.
Biletləri avtovağzala gəlmədən avtovagzal.az saytı və ya mobil tətbiq vasitəsilə də əldə edə bilərsiniz
Bayram ərəfəsində və bayram günlərində ümumilikdə 100 mindən çox sərnişin şəhərlərarası və beynəlxalq istiqamətlərə Bakı Beynəlxalq Avtovağzal Kompleksindən yola salındı. Bunu Bakı Beynəlxaq Avtovağzal Kompleksinin rəsmisi Pərvin Məmmədova deyib. O bildirib ki, sərnişin axını ən çox 30 dekabr və 2 yanvar tarixlərində müşahidə olunub. "Qeyd olunan tarixlərdə bir gün ərzində 17 mindən çox sərnişin biletlə təmin olunub. Ən sevindirici hal isə istər "Məlumat Mərkəzi"nə, istərsə də Facebook ünvanımıza daxil olan müraciətlər arasında şikayət qeydə alınmaması oldu. Yarana biləcək hər hansı neqativ halla bağlı hər gün saat 07:00-dan 23:30-a qədər (012) 406-01-58/59 nömrəli "Məlumat Mərkəzi"nə zəng edə bilərsiniz. Eyni zamanda facebook və info@avtovagzal.az email ünvanı üzərindən də yazıb göndərə bilərsiniz. Vacib bir məqamı da xatırlatmaq istəyirəm ki, xüsusən bayram günlərində biletləri reysin yola düşməsinə bir neçə saat qalmış almağınızı tövsiyyə edirik. Biletləri avtovağzala gəlmədən avtovagzal.az saytı və ya mobil tətbiq vasitəsilə də əldə edə bilərsiniz."
Vüqar Bayramov: “Bu, dövlət büdcəsinə daha çox vəsaitin cəlb edilməsinə imkan yaradır”
2019-cu ildə ölkəmizin nəqliyyat infrastrukturunda ciddi yeniliklərin baş verdiyi, bir sıra nəqliyyat mübadilə mərkəzinin istifadəyə verildiyi, kart sisteminə keçidin genişləndirildiyi, avtobus parkının əsaslı dərəcədə yeniləndiyi və s. hər kəsə bəlli olan faktlar sırasındadır. Bəs mütəxəssislər baş verənləri iqtisadi aspektdən necə dəyərləndirir? Nəqliyyat sektorunda həyata keçirilən dəyişikiklər, Bakı Nəqliyyat Agentliyinin gerçəkləşdirdiyi layihələr ölkə iqtisadiyyatına konkret olaraq nə qazandırır?
Moderator.az-a açıqlama verən iqtisadçı alim Vüqar Bayramov ötən il bu sahədə görülən işlərin mühüm əhəmiyyətə malik olduğunu vurğuladı: “İctimai nəqliyyat sektorunda infrastrukturun genişləndirilməsi, avtobus parkının yeniləşməsi vacib idi. Etiraf etməliyik ki, son illər biz həm nəqliyyat infrastrukturunun inkişafını, həm də yeni avtobus və xidmət standartlarının tətbiqini müşahidə edirik. Əvvəlki illərdə ictimai nəqliyyatla bağlı əsas problemlərdən biri həm avtobusların köhnə olması, həm nəqliyyatda xidmət səviyyəsinin aşağı olması, həm də ictimai nəqliyyatda yalnız nağd ödənişlərdən istifadə ilə bağlı idi. Son illər praktiki olaraq bu sahəyə daha çox sərmayənin yönəldilməsi həm infrastrukturun təkmiləşməsinə imkan yaratdı, həm də yeni avtobusların alınması, onlardan istifadə ictimai nəqliyyatda xidmət səviyəsinin artırılmasına səbəb oldu.
İctimai nəqliyyatda inkişaf ümumdaxili məhsul artımı baxımından da vacibdir. İnkişaf etmiş ölkələrdə həm tıxacların azaldılmasının iqtisadiyyata təsiri, həm də ictimai nəqliyyatda xidmət səviyyəsinin təkmilləşməsi və genişlənməsinin, nağdsız ödənişlərdən istifadənin genişlənməsinin büdcə gəlirlərinin formalaşmasına birbaşa təsiri var.
Bakıda da nağdsız hesablaşmalardan istifadə genişlənməkdədir. Nağdsız hesablaşmalardan istifadənin genişlənməsi dövriyyənin leqallaşmasına imkan yaradır. Bu isə büdcəyə daha çox vəsaitin cəlb edilməsinə zəmin formalaşdırır. Bu, imkan verir ki, dövlət büdcəsinə ictimai nəqliyyatın dövriyyəsindən daha çox vəsait cəlb edilsin. İnfrastruktutun inkişafının ümumdaxili məhsula, yəni bütövlükdə iqtisadiyyata təsiri var.
Avtobus parkının yenilənməsi, yeni xidmətlərdən istifadə xüsusilə Bakı şəhəri üçün mühüm əhəminiyyətə malikdir və bu, büdcə gəlirlərinin artmasına birbaşa təsir göstərir”.
Əraziyə bir neçə şirkətin briqadası cəlb olunub
Bakı-Sumqayıt yolunun Xırdalan dairəsi kimi tanından hissəsində yolun genişləndirilməsi işləri fasiləsiz davam etdirilir…
Ekologiya postundan başlayaraq Xırdalan dairəsi istiqamətində yolun hər iki hissəsində yolun genişləndirilməsi ilə bağlı işlər aparılır. Azərbaycan Avtomobil Yolları Dövlət Agentliyindən verilən məlumata görə ərazidə mövcud olan tunelin genişləndirilməsi, eləcə də genişlənən yolun kənarında istinad divarlarının tikintisi aparılır.
Körpünün altı da genişləndirilib və hazırda yolun kənar divarlarının hörgüsü işləri aparılır. Əraziyə bir neçə şirkətin briqadası cəlb olunub.
İşçilərin dediyinə görə, yolun genişləndirilməsi qrafikə uyğun aparılır və artıq kənarda olan kommunikasiya xətləri ilə yanaşı ağaclar da çıxarılaraq başqa əraziyə köçürülüb.
Qeyd edək ki, Bakı-Sumqayıt şossesi iş günlərində ən çox tıxacların yaşandığı yol olaraq tanınır. Bəzən sürücülər saatlarla yolda gözləməli olurlar. Məhz bu halların qarşısını almaq və vətəndaşların rahatlığını təmin etmək üçün həmin yolun Xırdalan dairəsi yaxınlığında genişləndirilməsinə qərar verilib. Genişləndirmə işlərindən sonra yolda fasiləsiz nəqliyyat axınının təmin edilməsi hədəflənir.