Son günlərdə Xəzər dənizinin Qazaxıstan sahillərində 200-dən çox suiti cəsədi aşkarlanıb.

“Trend” xəbər verir ki, suiti cəsədlərinə Pirşağı çimərliyində də rast gəlinib. Belə ki, Qızılqum çimərliyində 4 suiti cəsədi aşkar edilib.

“Davamlı inkişafda mavi texnologiyalar Mərkəzi”nin direktoru, professor Mehman Axundov bildirib ki, bu, mövsümi xarakter daşıyan prosesdir və adətən, payız aylarının sonunda və yaz aylarında müşahidə olunur: “Cəsədlər, adətən, Abşeronun şimal hissəsində aşkarlanır. Bu isə küləklərlə bağlı olur. Abşeron Xəzər dənizinə daxil olduğu üçün şimaldan gələn dəniz axınları bu cəsədləri Abşeronun şimal sahillərinə gətirib çıxarır. Mərdəkan, Novxanı, Pirşağı istiqamətlərində biz bu halları müşahidə edə bilirik”.

O əlavə edib ki, Xəzər suitisi dünyada ən kiçik suiti növüdür: “Onların öz biologiyası var, çoxalma üçün Xəzərin şimalına üz tutur, balalama dövründən sonra oradan cənuba qayıdırlar. Onlar Orta Xəzərdən, Qazaxıstan və Rusiyanın sularından keçirlər. Bu zaman aylarla qidalanmırlar, nəticədə zəifləyirlər. Zəif suitilər yolda tələf olurlar. Təqribi 800-1000 kilometrlik yolda zəifləyən suitilərin tələf olması normaldır. Ovçuların onları öldürməsi ayrı məsələ, amma eyni zamanda, hər bir canlının təbii ölümü var. Qocalıq, zəiflik, aclıq, xəstəlik bioloji ölümə səbəb ola bilir”.

Cəlilabad rayonunun Ağdaş kəndində həmkəndlisini bıçaqlayan şəxs hakim qarşısına çıxarılıb. Hadisənin baş verməsinə səbəb qısqanclıq olub.

Eldəniz həmkəndlisi Fərasəti baltalayıb. Bu zaman onları aralaşdırmağa çalışan Fərasətin arvadı Rəsmiyyə də xəsarət alıb.

Eldəniz xüsusi amansızlıqla qəsdən adam öldürməyə cəhddə ittiham olunaraq həbs edilib.

Hadisənin baş vermə səbəbi qısqanclıqdır. Belə ki, hadisədən bir neçə gün əvvəl Eldənizi arvadı İlhaməxanımı xadimə işlədiyi məktəbə aparıb. Onu gözləyən zaman İlhaməxanım məkəbin həyətində Fərasətlə rastlaşıb. Bu zaman Fərasət İlhaməxanımı qucaqlayaraq onun yanağından öpüb.

Bunu görən Eldəniz qəzəblənib və arvadından bunun səbəbini soruşub. İlhaməxanım deyib ki, Fərasət müəllim məktəbdə işləyən digər xanım əməkdaşlara qarşı da belə edir.

Eldənizlə arvadı arasında soyuqluq yaranıb və İlhaməxanım atası evinə gedib. Bunu özünə təhqir hesab Eldəniz qisas almaq qərarına gəlib. Maska taxaraq Fərasətin evinə gedib. İttihama görə Eldənizin əlində balta olub və evə girən kimi Eldənizə zərbələr endirib. Bu zaman onun xanımı Rəsmiyyə onları aralaşdırmağa çalışıb. Bu zaman o da xəsarət alıb.

Evdə olan digər şəxslərin müdaxiləsi ilə Eldənizin əlindən baltanı alıblar.

Eldəniz ifadəsində deyib ki, Fərasəti öldürmək niyyəti olmayıb. O, Fərasəti qorxutmaq istədiyini, söhbət etmək istədiyini deyib.

Onun sözlərinə görə balta Fərasətin arvadı Rəsmiyyədə olub. Rəsmiyyə onu vurmaq istəyəndə balta təsadüfən Fərasətə dəyib. Eldəniz Rəsmiyyəni itələyərək yıxdığını, bu zaman onun xəsarət aldığını bildirib.

Məhkəmədə zərərçəkmiş Fərasət də ifadə verib. O, İlhaməxanımı qucaqlamadığını, öpmədiyini bildirib. Deyib ki, İlhaməxanımın onkoloji xəstə olduğunu bilərək onun əlindən tutub, yazığı gəldiyi üçün təsəlli verib.

Fərasət məhkəmədəki ifadəsində Eldənizdən şikayətçi olmadığını, xəstə anasının xətrinə onu bağışladığını deyib.

Məhkəmənin hökmü ilə Eldənz 11 il 3 ay müddətinə azadlıqdan məhrum edilib.

Bakıda xəstəxanada faciəli hadisə baş verib.

Lent.az məlumatına görə, hadisə Sabunçu Tibb Mərkəzində qeydə alınıb.

Orada müalicə alan Bakı şəhər sakini, 2008-ci il təvəllüdlü Sübhan Əliheydər oğlu Heydərov xəstəxananın 3-cü mərtəbəsinin pəncərəsindən düşüb.

S.Heydərovun vəziyyəti orta-ağırdır.

Hadisənin motivi məlum deyil.

Faktla bağlı araşdırma aparılır.

Mayın 23-də vətəndaşların bank kartlarından kiber üsullarla 1200, 1000, 600, 500, 400, 300, 250, 200, 200, 80, 78, 75, 56, 20 manat oğurlanıb.

Bu barədə DİN-in Mətbuat xidməti məlumat yayıb.

Nazirlik növbəti dəfə vətəndaşları ehtiyatlı olmağa, şübhəli zənglərdən gələn cəlbedici qazanc, sığorta, viza işləri, bank hesablarının möhkəmləndirilməsi, mədaxil üzrə ödənişlərlə əlaqəli təkliflərə diqqətlə yanaşmağa çağırıb.

AZAL-a məxsus təyyarənin Aktauda qəzaya uğraması ilə bağlı istintaq toplanmış materialların təhlili mərhələsinə keçib.

APA xəbər verir ki, bu barədə Qazaxıstanın nəqliyyat naziri Marat Karabayev bildirib.

Onun sözlərinə görə, məlumatların toplanması başa çatıb və hazırda mütəxəssislər onu öyrənirlər.

Karabayev qeyd edib ki, təhqiqat zamanı qazaxıstanlı və beynəlxalq ekspertlər Bakı, Qroznı və Rostov-na-Donu daxil olmaqla Azərbaycan və Rusiyanın hava limanlarında olublar.

DİN-in Nəqliyyatı İntellektual İdarəetmə Mərkəzi mayın 21-də paytaxtın Xəzər rayonunda baş vermiş yol qəzasının görüntülərini yayıb.

“Qafqazinfo” xəbər verir ki, Qala-Pirallahı yolunda 2 gün əvvəl baş verən hadisə zamanı yolun hərəkət hissəsindən keçən piyada qəzadan son anda xilas olub.

Qurumdan bildirilib ki, piyadanın xilas olduğu hadisə sürücülərdən birinin xəsarət alması, minik avtomobillərinə, yol infrastrukturuna zərər vurulması və yolda nəqliyyat sıxlığının yaranması ilə nəticələnib:

“Yollarda sürücü və piyadalar diqqətli olmalı, qəza şəraiti yaratmamalıdırlar.

“Yol hərəkəti haqqında” qanunun tələblərinə əsasən, piyada səki ilə, piyada zolağı ilə, yol çiyinləri ilə, bunlar olmadıqda isə velosipedçilərin hərəkətini çətinləşdirməmək şərti ilə velosiped yolu ilə hərəkət etməli və ya ayırıcı zolağı olan yollarda hərəkət hissəsinin xarici kənarı ilə getməlidir. Piyada görünmə zonasında keçid və ya yolayrıcı olmadıqda, ayırıcı zolaq olmayan və sədd çəkilməyən, hər iki tərəfdən yaxşı görünən sahələrdə hərəkət hissəsinin kənarına nisbətən yolu düzbucaq altında keçməlidir.

Sürücülər isə yol hərəkəti şəraitini nəzərə almaqla, nəqliyyat vasitəsini müəyyən edilmiş məhdudiyyətdən artıq olmayan sürətlə idarə etməlidirlər. Sürücü sürətdən və hərəkət şəraitindən asılı olaraq elə ara məsafəsi seçməlidir ki, qabaqda gedən nəqliyyat vasitəsi sürəti kəskin azaltdıqda və ya gözlənilmədən dayandıqda, onunla toqquşmanın qarşısını almaq mümkün olsun”.

Mayın 22-də ayrı-ayrı vətəndaşların müxtəlif kiber üsulla 1500, 392, 380, 240, 100, 61, 40 manat pul vəsaitləri bank kartlarından oğurlanıb.

Bu barədə Daxili İşlər Nazirliyi (DİN) məlumat yayıb.

Bildirilib ki, bank kartının üzərindəki CVV/CVC, SMS vasitəsilə göndərilən OTP kodları məxfi məlumatlardır. Bu məlumatlar naməlum şəxslərə verildiyi halda hesabınızda olan pullar, yaxud pul yoxdursa, kredit formasında sizə zərər vuracaqlar:

“Bir daha vətəndaşlara şübhəli zənglərdən gələn cəlbedici qazanc, sığorta, viza işləri, bank hesablarının möhkəmləndirilməsi, mədaxil üzrə ödənişlərlə əlaqəli təkliflərə diqqətlə yanaşmağı tövsiyə edirik. Naməlum zənglərlə, mesajlarla danışıq, yazışma aparılmamalıdır, dərhal bloklanmalıdır”.

Düşmən silahlanmağa davam edir, sülhə yox, savaşa hazırlaşır

İstənilən hərbi münaqişə həm də ona cəlb olunan və silah istehsalçısı olan ölkələr üçün ciddi sınaq sayılır. 44 günlük müharibədə Azərbaycanın qardaş Türkiyə və İsraildən aldığı modern silah və hərbi sistemlərin hamısı özünü doğrultdu, xüsusilə də “Bayraktar” dronları işğalçı erməni qüvvələri üçün kabusa çevrildi.

Təsadüfi deyil ki, qalibiyyətli Vətən savaşından sonra həm Türkiyənin, həm də İsrailin hərbi məhsullarının reytinqi xeyli artdı, onların alıcıları çoxaldı. Paralel olaraq Rusiya silahlarına bazarda tələbat azaldı.

Pakistanla Hindistan arasında az öncəki hərbi qarşıdurma Yeni Dehlinin uğursuzluğu və istifadə etdiyi silahların effektsizliyi ilə bitdi.

Məlum olduğu kimi, Ermənistan Hindistandan 702 milyon (başqa mənbələrə görə, 1.5 milyard) dollar dəyərində silah tədarükü ilə bağlı müqavilə imzalayıb. Artıq onların bir çoxu İrəvana çatdırılıb. Bu silahlar döyüş sınağından çıxa bilməyib. Bəlli olur ki, Hindistan silahlarının şöhrəti, yumşaq desək, şişirdilib.

Bəs bu baş verənlərdən sonra Ermənistan yenə Hindistandan silah və hərbi sistemlər almağa davam edəcəkmi? Azərbaycan bu məsələyə necə baxır? Hindistan silahlarından ehtiyatlanmağa dəyərmi?

Sona Əliyeva

Keçmiş millət vəkili, siyasi təhlilçi Sona Əliyeva “Yeni Müsavat”a bildirdi ki, Ermənistan və Hindistan arasında təxminən 2 milyard dollarlıq ilk böyük müqavilə 2020-ci ildə imzalanıb: “Hindistan yeni nəsil silahların bazarında özünə yer etməyə çalışır. Ancaq silah sənayesi Hindistan dövlətinin yox, dövlət büdcəsini talayan generalların əlindədir. Həmin generalların övladları isə silah istehsalı şirkətlərinə sahibdir. Dövlət büdcəsindən milyardlarla pul mənimsəyən bu generalların istehsal etdiyi silahlar isə ardıcıl sınaqlardan uğurla çıxa bilmir. Nəticə göz önündədir. Pakistanla beş günlük savaşda Hindistan silahları özünü doğrultmadı. Hətta onların silahları sosial şəbəkələrin Ermənistan seqmentində erməni istifadəçilərin lağ, məsxərə obyektinə çevrildi. İndi İrəvan da Hindistan silahlarının alınmasında tərəddüd edir. Hindistan müqavilə imzalayıb və özünə Ermənistan kimi yeni qurban axtarır ki, silahlarını satsın. Bu baxımdan, Ermənistana verilən Hindistan istehsalı olan silahlardan qorxmaq lazım deyil. Çünki Azərbaycanın silah sənayesi,  üstəlik, tərəfdaş olduğumuz ölkələrdən aldığımız modern silahlar daha uğurlu, daha təkmildir. Yayılan son məlumatlara görə, Hindistan iyulda Ermənistana "Akaş" hava hücumundan müdafiə raket sistemlərinin 2-ci partiyasını göndərəcək. Ermənistan Hindistanla təxminən 710 milyon dollar dəyərində 15 “Akaş” raket kompleksinin alınmasına dair müqavilə imzalayıb. İlk sistemlər ötən ilin sonunda göndərilib. Bütün bunlar onu göstərir ki, Ermənistan sülhə yox, savaşa hazırlaşır. Bu silahlar Azərbaycanla yanaşı, Türkiyə və Gürcüstan üçün də təhlükə mənbəyidir. Çünki Ermənistan Türkiyə və Gürcüstan ərazilərinə qondarma iddialar irəli sürür. Ermənistan Azərbaycanla 44 günlük müharibə nəticəsində itirdiyi hərbi-texniki potensialı bərpa etmək cəhdi ilə son illər Fransa və Hindistandan silah almağa başlayıb. İrəvanın savaş hazırlıqları içərisində olduğunu göstərən digər amillər də var. İrəvan ABŞ, Yunanıstan, yunan Kipri və Çinlə də hərbi sahədə əlaqələr qurmaqda davam edir. Ermənistanı Hindistandan aktiv şəkildə silah idxal etməyə sövq edən əsas səbəb Yeni Dehlinin parametrlərinə görə Ermənistan ordusunun təchizat sistemləri ilə uyğun gələn Rusiya silah inkişaflarının modernləşdirilməsidir. Ermənistan 2024-2025-ci illər üçün Hindistandan daha 600 milyon dollar məbləğində silah almağı öhdəsinə götürüb. İrəvan artilleriya sistemlərinə və hava hücumundan müdafiəyə üstünlük verir. Hindistanın “Zen Anti-Drone System” (ZADS) şirkəti tərəfindən hazırlanmış pilotsuz uçuş aparatları əleyhinə sistemlərin Ermənistana tədarükü üçün 41 milyon dollarlıq sifariş gerçəkləşib".

Emin Həsənli

“Tərxis Olunmuş Hərbçilərin Gəncləri Maarifləndirmə” İctimai Birliyinin sədri, hərbi icmalçı Emin Həsənli Ermənistanın bir daha özünü təhlükəyə atmaq ərəfəsində olduğunu qeyd etdi: “Ermənilər vaxtilə aldıqları silahlardan çox danışırdılar. Sonluq məlumdur. Hazırda həmin silahlar Qənimətlər Parkındadır. Bir zamanlar "Ohanyan xətti"ndən ağızdolusu danışırdılar. Amma qəhrəman Azərbaycan Ordusu həmin xətti necə keçdi, darmadağın etdi, yaxşı gördülər. Yenə də bir səhv etsələr, bu dəfə Qənimətlər Parkının ərazisi daha da böyüyəcək. Azərbaycan həm Türkiyədən, həm də İsraildən ən müasir silahları alır. Bunu ermənilər də yaxşı bilir. Azərbaycanın aldığı silahlar 44 günlük Vətən müharibəsində çox uğurla sınaqdan keçdi. Amma Ermənistan tərəfin aldığı silahların müharibədə uğurla sınaqdan keçmədiyini yaxşı gördük. Halbuki Rusiyadan aldıqları silahlarla çox öyünürdülər, hərbi təlimlərində, paytaxtlarında keçirdikləri paradlarda nümayiş etdirirdilər. İndi də yenə hərbi və siyasi yöndə səhvlər etməyə davam edirlər. Erməni tərəfin Hindistandan aldığı silahlara gəlincə, bundan narahat olmayaq. Bizim aldığımız silahlar qat-qat güclüdür. Hindistan-Pakistan qarşıdurmasında hind silahlarının gücünü gördük". 

Hərbi ekspert onu da qeyd etdi ki, bu cür hərəkətlərlə Ermənistan həm öz iqtisadiyyatına, həm də yarana biləcək sülh prosesinə zərbə vurur: “Ermənistan çoxdan etimadı itirib. Bu ölkənin nicat yolu Azərbaycan və Türkiyə ilə normal münasibətlər qurmaqdır. Fransanın və başqa ölkələrin tapşırıqlarını yerinə yetirməkdənsə, regionda qonşularla normal münasibətlər qursun”.

“Şəmkir Un-Yem” MMC-nin direktoru Aslan Əliyev həbs edilib.

“Qafqazinfo”nun əldə etdiyi məlumata görə, direktor Baş Prokurorluğun İstintaq İdarəsi tərəfindən cinayət məsuliyyətinə cəlb olunub.

A.Əliyev xüsusilə külli miqdar təşkil edən 2 milyon manatdan çox vəsaitin mənimsənilməsində və torpaq sahələri üzərində mülkiyyət hüququnun pozulmasında, xüsusilə külli miqdarda vergiləri ödəməkdən yayınmaqda və vəzifə saxtakarlığında ittiham olunur. Cinayət işinin ağırlığı nəzərə alınaraq onun barəsində məhkəmənin qərarı ilə həbs qətimkan tədbiri seçilib.

İttihamlar sübuta yetiriləcəyi təqdirdə, eks-dəyirman direktoru 14 ilədək azadlıqdan məhrum edilə bilər.

Qeyd edək ki, “Şəmkir Un-Yem” 2018-ci ildə fəaliyyətə başlayıb. İnvestisiya dəyəri 6 milyon manat olan müəssisədə istehsal olunan məhsullar əsasən Şəmkir, Gəncə, Gədəbəy, Tovuz və Qazax rayonlarında satışa çıxarılır.

Sail Ağasəlim