 |
|
“Global Media Group” və “Baku TV" ötən il dekabrın 25-də Bakı-Qroznı reysini həyata keçirərkən Qazaxıstanın Aktau şəhəri yaxınlığında qəzaya uğrayan AZAL-a məxsus sərnişin təyyarəsi haqqında sənədli film hazırlayıb.
“J2-8243: Son uçuş” adlı sənədli film ümumilikdə dörd hissədən ibarətdir.
Filmdə qəza nəticəsində həlak olanların, sağ qalanların və onlara yardım edənlərin həyat hekayəsindən bəhs olunur.
Ekran işinin “Biri var idi, biri yox” adlı ilk hissəsində təyyarə qəzası zamanı yüksək peşəkarlıq nümayiş etdirərək qəhrəmancasına həlak olan baş pilot İqor Kşnyakin, köməkçi pilot Aleksandr Kalyaninov və bələdçi Hökumə Əliyevanın ailə üzvləri onlar barəsində xatirələrini bölüşüblər.
Ekipaj üzvlərinin ailəsi Milli qəhrəmanların yüksək peşəkarlıqları və işlərinə olan sevgiləri barədə fikirlərini ifadə ediblər.
“Hər şey yaxşı olacaq” adlanan növbəti hissədə isə ekipaj üzvlərinin yüksək peşəkarlığı sayəsində sağ qalan sərnişinlərin bir qismi və ekipaj üzvləri Zülfüqar Əsədov danışıb.
Sənədli filmin üçüncü hissəsi olan “Aktau”da isə qəzadan dərhal sonra hadisə yerinə gələn Qazaxıstandan olan köməkçi qrup üzvləri, jurnalistlər və qəza şahidləri fikirlərini bölüşüblər.
“Necə oldu?” adlı dördüncü hissədə qəzanın baş verməsindən sonra olan hadisələrin ümumi təfərrüatı və Prezident İlham Əliyevin Rusiya səfərini yarımçıq saxlayaraq ölkəyə qayıtması, dərhal müşavirə keçirməsi və digər detallar barədə məlumat verilib. Bu hissədə ekspert və politoloqlar, eləcə də AZAL-ın əməkdaşları qəza barəsində danışıblar.
Ekran işində həmçinin qəzadan sonra həlak olan və sağ qalan ekipaj üzvlərinin Prezident İlham Əliyevin Sərəncamı ilə yüksək səviyyədə təltif edilməsi, sağ qalan sərnişinlərə peşəkar tibbi xidmətin göstərilməsi və dövlət qayğısı xüsusilə qeyd olunub.
Müsahiblər buna görə Prezident İlham Əliyevə və Azərbaycan dövlətinə minnətdarlıq ifadə ediblər.
Sənədli filmin sonunda qəzanın dəqiq səbəbləri ilə bağlı araşdırmanın davam etdiyi və rəsmi açıqlamanın hələlik verilmədiyi vurğulanıb.
Qeyd edək ki, sənədli filmin rəhbəri İman Məcidov, müəllifi və rejissoru Kübra Uygun Sertdağ, quruluşçu operatoru Bəhruz Abbasov, baş prodüseri isə Arzu Səfərovadır.
Novruz və Ramazan bayramları günlərində 501 yanğına çıxış olub, 11 nəfərin meyiti tapılıb.
Bu barədə Fövqəladə Hallar Nazirliyindən məlumat verilib.
Bildirilib ki, “112” qaynar telefon xəttinə daxil olmuş zənglər əsasında Nazirliyin aidiyyəti qurumları tərəfindən bayramlarla əlaqədar qeyri-iş günləri ərzində ümumilikdə 501 yanğına çıxış, 40 köməksiz vəziyyətdə qalma və 2 avtonəqliyyat qəzası faktı üzrə qəza-xilasetmə əməliyyatları həyata keçirilib. Görülmüş təcili və təxirəsalınmaz tədbirlər nəticəsində yanğınların operativ söndürülməsi, insanların həyatının xilas olunması təmin edilib.
Ümumilikdə, FHN-in qüvvələri tərəfindən bayram günləri ərzində 9-u azyaşlı olmaqla 53 nəfər xilas edilib, 28 nəfər təxliyə olunub, 6 nəfər xəsarət alıb, 11 nəfərin meyiti aidiyyəti üzrə təhvil verilib.
Vətəndaşlar şəxsiyyət vəsiqəsi, sürücülük vəsiqəsi, ümumvətəndaş pasportunun verilməsi və dəyişdirilməsi kimi Daxili İşlər Nazirliyinə aid ödənişləri bank növbəsi gözləmədən seçim edib həyata keçirə bilərlər.
“Bu barədə DİN-in Mətbuat xidməti məlumat yayıb.
Bildirilib ki, vətəndaş “E-Polis” mobil tətbiqə daxil olub “Ödənişlər” bölməsindən şəxsiyyət vəsiqəsi identifikasiya metodunu seçərək özü və ya başqa bir şəxs üçün ödəniş edə bilər: “Digər şəxs üçün ödəniş edərkən həmin vətəndaşın şəxsiyyət vəsiqəsi məlumatlarını qeyd edib müvafiq sənəd rüsumunun ödənişi üçün uyğun xidmət növünü seçməlisiniz. Kart məlumatlarını tam şəkildə daxil etdikdən sonra ödəniş uğurla həyata keçərsə, balansa aktiv məbləğ əlavə olunur və müraciətiniz üzrə həmin balansdakı məbləğdən istifadə edilir. Sənəd nömrəsi seçimində isə ödəniş etmədən yeni və ya dəyişdirmək istədiyiniz sənədlər üçün xüsusi kod təqdim olunur. Həmin kodu “Sənəd nömrəsi” hissəsinə əlavə edərək dövlət rüsumunu onlayn qaydada ödəyə bilərsiniz.
Şirkətlər isə öz VÖEN nömrələrini daxil edərək xidmətdən yararlana bilərlər”.
Bakıda və Abşeron yarımadasında aprelin 1-də hava şəraitinin dəyişkən buludlu olacağı, əsasən yağmursuz keçəcəyi gözlənilir. Mülayim şimal-qərb küləyi gündüz cənub-şərq küləyi ilə əvəz olunacaq.
Milli Hidrometeorologiya Xidmətindən verilən məlumatına əsasən havanın temperaturu gecə 10-15° isti, gündüz 20-25° isti olacaq.
Atmosfer təzyiqi 758 mm civə sütunundan 764 mm civə sütununa yüksələcək. Nisbi rütubət gecə 60-70 %, gündüz 50-55 % olacaq.
Azərbaycanın rayonlarında havanın əsasən yağmursuz keçəcəyi gözlənilir. Lakin gündüz bəzi dağlıq ərazilərdə qısamüddətli az yağıntılı olacağı, şimşək çaxacağı, dolu düşəcəyi ehtimalı var. Bəzi yerlərdə arabir duman olacaq. Mülayim qərb küləyi əsəcək.
Havanın temperaturu gecə 7-12° isti,gündüz 22-27° isti, dağlarda gecə 3-8° isti, gündüz 13-18° isti olacaq.
“Azərbaycan Dəmir Yolları” QSC (ADY) sərnişin sıxlığının qismən tənzimlənməsi məqsədilə 1 aprel tarixindən Abşeron dairəvi dəmiryol marşrutu üzrə qatarların qrafikini optimallaşdırır. Bu marşrut üzrə həftənin iş, şənbə və bazar günləri ümumilikdə 61 reys əlavə olunur. İş günləri və ya həftəiçi reyslərin sayı 66-dan 92-yə çatdırılır.
“Yol-xeber.az” xəbər verir ki, yeni hərəkət cədvəlinə əsasən, Bakı–Pirşağı–Sumqayıt və Bakı–Xırdalan–Sumqayıt marşrutları üzrə reyslərin sayı artırılır və xüsusən günorta saatlarında qatarlararası interval azaldılır.
Həmçinin qatarların iş günləri, şənbə və bazar günləri üçün ayrı-ayrılıqda üç hərəkət cədvəli tərtib edilib.
İş günlərində Bakı–Xırdalan–Sumqayıt–Bakı marşrutu üzrə reyslərin sayı 24-dən 36-ya, Bakı–Pirşağı–Sumqayıt–Bakı marşrutu üzrə 42-dən 56-ya çatdırılır.
Sərnişinlərin çoxsaylı müraciətləri nəzərə alınaraq Bakı–Xırdalan–Sumqayıt istiqamətində saat 20:20 reysi əlavə olunur (əvvəlki qrafiklə sonuncu qatar 19:35-də idi). Bu, işdən evə qayıdan sərnişinlər üçün daha çox seçim imkanı yaradır, sərnişin sıxlığının azaldılması, səyahət müddətinin qısaldılması və hərəkət intensivliyinin tənzimlənməsini mümkün edir.
Eyni zamanda, Bakı–Xırdalan–Sumqayıt istiqamətində səhər reysləri də optimallaşdırılır. Belə ki, bu vaxtadək saat 07:20-dən Sumqayıtdan çıxan qatar Bakıya 08:01-də çatırdı. Yeni qrafiklə saat 06:15-də çıxan qatar Bakıya 06:56-da çatacaq. Bundan başqa, Xırdalandan Bakıya birbaşa hərəkət edəcək yeni FLIRT qatarı Bakıya 07:15-də çatacaq. Bu da iş vaxtı saat 8-də başlayanlar üçün əlavə imkanlar yaradacaq. Həmçinin bu istiqamətdə səhər saatlarında hərəkət edən ekspres tipli qatara Biləcəri və Xırdalan stansiyalarında dayanacaq veriləcək.
Şəhərətrafı istiqamət olan Bakı–Xırdalan–Bakı istiqaməti üzrə ilk dəfə olaraq birmərtəbəli FLIRT qatarı xəttə buraxılır. Bununla əlaqədar olaraq Xırdalan stansiyasında mövcud platforma 550 mm-lik ölçüyə uyğunlaşdırılıb. Bundan başqa, Biləcəri stansiyasında 1 kassa və 1 yeni turniket zalı tikilib, Xırdalan stansiyasında turniket zalı genişləndirilib, Məmmədli stansiyasında isə turniket sayı 3-dən 10-dək artırılıb.
Şənbə günlərində Bakı–Xırdalan–Sumqayıt–Bakı marşrutu üzrə reyslərin sayı 10-dan 16-ya, Bakı–Pirşağı–Sumqayıt–Bakı xətti üzrə reyslərin sayı isə 20-dən 36-ya çatdırılır.
Optimallaşdırma çərçivəsində həftənin bazar günləri üçün də xüsusi qrafik tərtib olunub. Belə ki, yeni cədvələ əsasən, bazar günləri Bakı–Xırdalan–Sumqayıt–Bakı marşrutu üzrə reyslərin sayı 10-dan 15-ə, Bakı–Pirşağı–Sumqayıt–Bakı xətti üzrə reyslərin sayı isə 20-dən 28-ə çatdırılır.
Sərnişin daşımalarında etibarlı daşıyıcı olan ADY davamlı olaraq dəmiryol infrastrukturunu sağlamlaşdırır və hərəkətin təhlükəsizliyinə ciddi önəm verir. Yeni reyslərin optimallaşdırılması xüsusilə pik saatlarda sərnişinlərin rahat və vaxtında mənzil başına çatmasını təmin etmək məqsədi daşıyır.
ADY Abşeron dairəvi dəmiryol xəttində infrastrukturun sağlamlaşdırılması və hərəkətin təhlükəsizliyinin davamlı təmin edilməsi məqsədilə ötən ilin aprel ayından Sumqayıt–Pirşağı sahəsində təmir işləri həyata keçirir. Xidmət sahələrində davamlı olaraq aparılan yenidənqurma və təmir işləri sərnişinlərin mənzil başına təhlükəsiz və rahat çatdırılmasına xidmət edir.
Həyata keçirilən bütün bu dəyişikliklər Abşeron dairəvi dəmiryol marşrutunda günlük sərnişindaşıma sayını hazırkı 37-38 min nəfərdən 48-50 min nəfərə qədər artırmağa imkan verəcək.
Aprelin 1-də təhsil müəssisələrində həftənin 5-ci gününə aid dərslər tədris olunacaq.
“Baş nazir Əli Əsədovun Qərarına əsasən, 2025-ci il 27 və 28 mart iş günləri ilə müvafiq olaraq 10 mart və 1 aprel istirahət günlərinin yerləri dəyişdirilib.
Bu səbəbdən aprelin 1-i təhsil müəssisələrində həftənin 5-ci gününə aid dərslər tədris ediləcək.
Ramazan ayının başa çatması ilə əlaqədar məscidlərdə bayram namazı qılınır.
Əjdərbəy məscidində bayram namazı saat 08:00-da qılınıb.
Təzəpir məscidində isə bayram namazı 09:00-da qılınacaq.
Azərbaycanda martın 30 və 31-i Ramazan bayramı qeyd olunur.
Müqəddəs Ramazan bayramı müsəlmanlar tərəfindən hicri təqviminin ikinci (622-ci il) ilindən qeyd olunmağa başlayıb.
Ramazan ayı insanlara Allahı sevməyi öyrədir, onlara öz iradəsini, dözümünü yoxlamaq imkanı verir, insanları gözüaçıq, təmiz vicdanlı olmağa istiqamətləndirir və bunlar orucla ifadə olunur.
Orucluq öz tarixinə Məhəmməd Peyğəmbər (s.ə.s) tərəfindən Mədinədə bu məqsədlə Ramazan ayı keçiriləndən başlayır. Məhz Ramazan ayının sonuncu 10 gecəsinin birində "Qurani Kərim" nazil edilib.
Azərbaycanda Ramazan bayramı 1993-cü ildən dövlət səviyyəsində qeyd olunur.
Xatırladaq ki, bu il Azərbaycanda Ramazan ayı martın 1-də başlayıb. Nazirlər Kabinetinin müvafiq qərarına əsasən, martın 30-u və 31-i Azərbaycanda Ramazan bayramı qeyd edilir.
Daxili İşlər Nazirliyinin Baş Dövlət Yol Polisi İdarəsi (BDYPİ) səfərdən dönən yol hərəkəti iştirakçılarına müraciət edib.
Yol-xeber.az-ın məlumatına görə, müraciətdə qeyd olunub ki, bayram tətilində ayrı-ayrı bölgələrə səfər etmiş əhalinin daimi yaşayış yerlərinə qayıtması ilə əlaqədar magistral yollarda hərəkət intensivliyinin artması müşahidə olunur.
BDYPİ yol hərəkəti iştirakçılarına müraciət edərək bildirir ki, təhlükəsizlik qaydalarına əməl etməli, sürücülər yorğun, yuxusuz halda sükan arxasına əyləşməməli, sərnişinlər isə belə hallara qarşı biganə qalmamalıdır:
"Xüsusilə sürücüləri yola çıxmazdan əvvəl nəqliyyat vasitələrinin texniki sazlığına diqqət yetirməyə, yol və hava şəraitini düzgün qiymətləndirməyə, yolboyu ötmə və manevretmə qaydalarına, sürət rejiminə ciddi əməl etməyə çağırırıq. Uzaq məsafə qət edən sürücü və sərnişinlər qısa müddətli istirahət üçün DYP-nin respublika əhəmiyyətli avtomobil yollarında yerləşən stasionar postlarında yaradılmış şəraitdən istifadə edə bilərlər".
Əvvəllər sosial şəbəkələrdə Çində çəkildiyi bildirilən bir şəkil istifadəçilər tərəfindən tez-tez paylaşılır, xüsusi mükiyyətin toxunulmazlığına dair nümunə kimi təqdim edilirdi.Şəkil beləydi: çoxzolaqlı avtobandır, gediş-gəliş yolları xətlənib, ancaq yolun bir hissəsində gediş xətti 20-30 metr sağa meyllənir, qövs cızır, eyni yerdə gəliş yolu da o cür sağa meyllənir, ortada isə bir ev və həyətyanı sahə var.
Belə izah verilirdi ki, bu avtoban çəkiləndə ev-həyət sahibini razı salmaq, köçürmək mümkün olmayıb, ona görə də magistralı layihələndirən yerli hökumət çıxış yolunu yolu hər iki tərəfdən sağa meylləndirməkdə görüblər.
Başqa ölkə olsaydı, hekayətin həqiqiliyinə şübhə etməmək olardı. Ancaq Çində repressiv kommunist rejimi hökm sürdüyündən və bu ölkədə dövlət layihələrinə qarşı çıxmaq sabotaj, dövlət cinayəti sayıldığından böyük ehtimalla bu gerçək görüntü deyil, təbliğat üçün nəzərdə tutulub. Yoxsa Çin kommunistlərinin əlində həmin evi yerlə-yeksan etmək, sahibini də divara söykəyib güllələmək elə də çətin iş deyil.
Hər halda bu şəkil mülkiyyət toxunulmazlığının simvolu kimi illərdir internet resurslarını dolaşır.
Əlbəttə, belə görüntülərə qanunun aliliyi gözlənilən ölkələrdə rast gəlmək olar, amma vəhşi kapitalizmin dişlərinin köpək balığının mişar dişləri kimi şaqqıldadığı ölkələrdə xüsusi mülkiyyət-filan hərləyən yoxdur.
İndiyədək o qədər kimsəsiz, əli heç yerə çatmayan sadə adamların evini başına uçurublar, toz-torpaq içində boğaraq, evini dəyər-dəyməzinə satmağa məcbur ediblər ki...
Çox höcətlik edən, evini deyilən qiymətə satmaq istəməyənlərin mülkünün gecəylə yanması halları da olub.
“Tikinti mafiyası” deyilən ifadə ortalığa durduq yerə çıxmayıb. Əlində yüz milyonlarla pul olan, arxalı, dayaqlı, əlaqəli, yüksək vəzifəli qohumları tərəfindən himayə olunan şirkət rəhbərləri ilə döşə-döşə gəlmək hər adamın, hətta heç kəsin dişinin batacağı xörək deyil.
Bəhsə durmuş kimi, bir hektar ərazidə iç-içə, eyvan-eyvana durmuş 7 çoxmərtəbəli bina ucaldan və kvadratmetrini ən baha qiymətlə satan adamlar nə şəhərsalma qaydalarına, nə xüsusi müıkiyyətin toxunulmazlığına riayət edən deyillər. Onların məqsədi var: bu bina burada tikilməlidir – nəyin bahasına olursa, olsun.
Alatavada, içində sakinlər yaşayan, xüsusi mülkiyyət sənədi də olan evin günün günorta çağı uçurulması hadisəsinə bu kontekstdən yanaşmaq lazımdır. Bina tikənlər üçün fərqi yoxdur, o ev xüsusi mülkiyyətdir, ya yox, heç evin real dəyərinin onların təklif etdiyindən qat-qat baha olması da veclərinə deyil. Plan budur ki, adamlar evi boşaltmalı, verilən pulu götürüb getməlidirlər.
Həmin pula onlar başqa yerdə ehtiyacları olan böyükdə mənzil tapacaqlar, tapmayacaqlar, bu da inşaat aparan şirkəti maraqlandırmır. “Onların canı cəhənnəmə, əsas bizim biznesimizdir” – düşüncə budur.
İndi xəbər var ki, evin zədələnməsinə dair göstəriş verən iş icraçısını və maskalı ekskavatorçunu saxlayıblar. Şirkət rəhbərliyi deyir, evdağıtma hadisəsi səhvən olub. Sanasan, masa üstündə bir stəkan su varmış, adamın əli dəyib, aşıb.
Əlbəttə, şirkət sahibləri tutulanları içəridə qoymayacaqlar. Heç özləri də bu əmələ görə o qədər də ciddi cəza almayacaqlar. Hamı işin içindən sıyrılacaq. Yəqin ki, bu qalmaqaldan sonra zərərçəkmiş ailə də yetərli qədər təzminat alacaq.
Ancaq sosial şəbəkədə hadisəyə dair şərh yazanların içində iş icraçısına və ekskavatorçuya ürəyi yananlar da var. Guya ki, onlar əmr quludurlar, deyiləni ediblər. Elə deyil. Onlar “killer”dirlər, sifariş əsasında adam öldürməklə sifariş alaraq ev uçurmağın arasında elə bir fərq yoxdur. İkisi də cinayətdir. Ekskavatorun çalovuşu, kəpçəsi evin qapı-pəncərəsini, divarını zədələdiyi vaxt yaxınlıqda adam olsaydı, aldığı zərbədən iki saniyənin içində öləcəkdi.
Məhz belə adamlar qanunsuz, cinayət xarakterli əmrləri icra edərək insanlara zülm edirlər.
Paytaxtı dəmir-beton cəngəlliyə çevirənlərin, şəhərin evini yıxanların gözü doyan deyil. Bu gedişlə onlar bir uşaq meydançası, yaşıllıq zolağı, məhəllə arası qoymayacaqlar, hamısını düzləyib, bina qaldıracaq, onsuz da yaşamağın, hərəkətin gündən-günə çətinləşdiyi Bakını Kəlküttəyə, Mumbaya, Şanxaya döndərəcəklər.
Bu özbaşınalığın və vəhşiliyin qarşısını almaq üçün tədbirlər görülməlidir. Nümunə götürülməli presedent var. Bir çox şəhərlərdə yeni yaşayış massivlərini yalnız şəhərkənarı ərazilərdə salmağa izn verirlər və şəhərin mərkəzi toxunulmaz saxlanılır.
P.S. Qoogledə axtarış apararkən Çində xüsusi mülkiyyətinin toxunulmazlığının simvolu olan daha bir neçə şəkil çıxdı.
