 |
|
Düşünürəm ki, yoluxma sayında davam edən hazırki müsbət dinamika, eləcə də insanların virusla mübarizədə daha məlumatlı və ehtiyatlı davranması müəyyən qaydalar çərçivəsində toy və nişan mərasimlərinin keçirilməsi məsələsini gündəmə gətirə bilər.
Bunu Trend-ə Milli Məclisin deputatı Rəşad Mahmudov deyib.
Deputat bildirib ki, əlbəttə ki, mərasimlər yeni qaydalar çərçivəsində nəzarət mexanizmlərinin qurulması şərti ilə olmalıdır:
“Təbii ki, bu barədə son qərar operativ qərargah tərəfindən ümumi gedişat analiz edildikdən sonra veriləcək.
Ümumiyyətlə hesab edirəm ki, payız aylarından sonra COVID-19 virusunun insanlarda yaratdığı qorxu getdikcə azalacaq. Çünki təcrübə göstərdi ki, dünyada tətbiq edilən karantin rejimləri tibbi baxımdan müsbət nəticə verməklə yanaşı, sosial, iqtisadi və psixoloji çətinlikləri ön plana çəkdi. Amma biz vətəndaş olaraq ehtiyatlı davranmağa davam etməli, tez-tez əllərimizi yumalı, maska taxmalı və sosial məsafə saxlamağı unutmamalıyıq”.
Ötən gecə Novxanı yolunda Dövlət Yol Polisininin (DYP) əməkdaşı Milli Məclisin deputatı Razi Nurullayevi saxlayıb.
Redaktor.az xəbər verir ki, bu barədə R.Nurullayev "Facebook" səhifəsindəki paylaşımında bildirib.
Belə ki, deputat paylaşımında DYP əməkdaşının onu qanunsuz şəkildə saxladığını bildirib.
Məsələ ilə bağlı saytımıza açıqlama verən Baş Dövlət Yol Polisi İdarəsinin İctimaiyyətlə əlaqələr şöbəsinin müdiri, polis polkovniki Kamran Əliyev millət vəkilinin şikayətinin araşdırıldığını bildirib:
“Hazırda həmin məsələ ilə bağlı araşdırma aparılır. Araşdırmadan sonra ətraflı məlumat veriləcək”.
Zaman-zaman insanlar qəbir yerlərinin və daşlarının qiymətlərindən narazılıqlarını ifadə ediblər.
Baku TV əməkdaşları məsələni yerində araşdırmaq qərarına gəliblər.
Yerləşdiyi ərazidən asılı olaraq qəbiristanlıqdakı yerlərin qiyməti 300-7000 manat arası dəyişir. Bu qiymətlər stabil olaraq qalmır, ildən-ilə şərtlərə uyğun dəyişir.
Son mənzil dediyimiz qəbiristanlıqlardakı vəziyyət sözün əsl mənasında vəziyyətin sonudur.
Budəfəki xüsusi reportajında qəbiristanlıqdakı ümumi mənzərə, özbaşınalıq, mollaların birbiriləri ilə yola getməməsi ön plana çəkilib. Baku TV əməkdaşları mollalara yaxınlaşıb sual vermək istəsə də, hər biri kameradan qaçmağı üstün tutub. Əməkdaşların rastlaşdığı xanım isə oradakı özbaşınalıqlardan söz açıb.
Onun dediyinə görə qəbiristanlıqda qəbirlərə sahiblik edən mollalar var və həmin molla adlanan şəxsdən başqa kimsə qəbirə yaxınlaşa, orada təmizlik işləri apara, eyni zamanda yasin oxuya bilməz. Elə bu səbəbdəndir ki, mollalar arasında tez-tez qarşıdurma baş verir. Xanım onu da qeyd edib ki, qəbiristanlıqda oğurluqların ardı-arası kəsilmir və daha çox ora gətirilən güllər oğurlanaraq satılır.
Suallardan qaçan məsul şəxslər isə yalnız “bizə əmr belə verilib, kiməsə məlumat verə bilmərik” deməsi ilə söhbətə nöqtə qoyub.
Ətraflı reportajı təqdim edirik:
Yusif Qədiməliyev "Sədərək” Ticarət Mərkəzinin rəhbəri vəzifəsindən çıxarılıb.
Bu barədə bazarda çalışan şəxslər məlumat veriblər.
Məlumatda deyilir ki, ötən həftənin cümə günü yeni rəhbərlik təhvil-təslim edib və yeni qaydalarını açıqlayıb. Belə ki, həmin gündən etibarən bazarda yalnız topdan satışla məşğul olanlar onlayn satışla məşğul ola bilərlər. Əks təqdirdə, bu qaydaları pozanlar isə 2500 manat cərimə olunacaqlar.
Yusif Qədiməliyevin konkret olaraq hansı səbəbdən bazar rəhbərliyindən uzaqlaşdırıldığı məlum deyil. Ehtimallardan biri budur ki, Qədiməliyevin AMEA prezidenti Ramiz Mehdiyevlə yaxın olması və bazarda Prezident Admnistrasiyasının sabiq rəhbərinin paya məxsusluğu Ticarət Mərkəzinin əlindən alınmasına səbəb olub.
Qeyd edək ki, son dönəmlər belə hadisələrdə köhnə məmurların adlarının hallanması daha çox diqqət çəkir. jamaz.info
Bakı Metropoliteninin işləməməsi xüsusən günün pik saatlarında avtobuslarda sıxlığın yaranmasına səbəb olur.
“Qafqazinfo” xəbər verir ki, bununla bağlı jurnalist Gülşən Raufqızı da sosial şəbəkədə paylaşım edib. “İşərişəhər” stansiyasının yaxınlığındakı dayanacaqda çəkdiyi fotoşəkilləri paylaşan jurnalist bildirib ki, metro ilə 15 dəqiqə vaxt alan yol avtobuslarda saatlarla uzanır. Fotolardan görünür ki, əhali marşruta minmək üçün bütün karantin qaydalarını pozmaq məcburiyyətində qalır, sosial məsafə qorunmur.
Bakı Nəqliyyat Agentliyinin mətbuat xidmətinin rəhbəri Mais Ağayev məsələ ilə bağlı bildirib ki, yumşaldılmalar və qadağaların aradan qalxması ilə sərnişin sayında təbii olaraq artım baş verib. Onun sözlərinə görə, sərnişin sıxlığını aradan qaldırmaq üçün bütün avtobuslar xəttə buraxılıb:
“Artıq gündəlik 1 milyon 900 000 sərnişin sayı qeydə alınır. Bütün avtobus deposu qarajlarında nə qədər avtobus varsa, hamısı hər gün xəttə çıxarılır. Bu gün gündəlik xəttə çıxan avtobus sayı 2260-dan artıqdır. Bundan əlavə, yollarda xüsusilə səhər və axşam pik saatlarında nəqliyyat sıxlığı olur. Bunun özü də avtobusların hərəkətinə ciddi maneə yaradır. Gün ərzində H.Əliyev prospekti şəhər istiqamətində, kənar yolda sıxlıq olub. Bu yolda olan sıxlıqda “Koroğlu” stansiyasından şəhər istiqamətinə gedən avtobuslar gecikmə ilə hərəkət edib. Bu mənzərənin yaranması da bu gecikmə ilə bağlıdır”.
M. Ağayev həmçinin əlavə edib ki, bu problemlərin olmaması üçün xüsusi zolaqlar olmalıdır və hazırda bunun üzərində iş aparılır.
Koronavirus infeksiyası haqqında hələ də dəqiq proqnoz söyləmək çətindir. Yoluxma ilə bağlı ölkəmizdə isə hələlik stabillikdir. Buna oxşar infeksiyalarda da yoluxma halları pik nöqtəyə çatdıqdan sonra azalma qeydə alınıb.
Bu fikirləri Azərbaycan Tibb Universiteti Ağciyər xəstəlikləri kafedrasının müdiri, dosent Rafiq Bayramov bildirib.
O, qeyd edib ki, virusun mutasiyaya uğraması əsas şərtlərdəndir: “Virus mutasiyaya uğradığı halda xəstəlik yaratma qabiliyyəti zəifləyir”.
Kafedra müdiri bildirib ki, bütün dünyada olduğu kimi ölkəmizdə də virusa görə karantin qaydalarında yumşalmalar tətbiq edilir: “Çünki yoluxmanın azaldığı təqdirdə qaydalarda yumşalmalar arzuolunandır. Bu yumşalmalardan sonra yoluxma sayının artmaması üçün diqqətli olmaq vacibdir. Çünki virus yox olmayıb. Gigyenik qaydalara ciddi əməl etməliyik”.
Rafiq Bayramov yaxın zamanlarda virusun mutasiya edərək zəifləməsinin gözlənildiyini bildirib: “Virus ya zəifləyib öldürücü qabiliyyətini itirəcək, ya da ona qarşı effektiv vaksin hazırlanacaq. İnandırıcıdır ki, yaxın zamanlarda biz bu halı yaşayacayıq və həyatımız normal məcrasına dönəcək”.
Rafiq Bayramov həmçinin effektli vaksinin hazırlanması ve kütləvi tətbiqi uçün vaxt lazım olduğunu da vurğulayıb: “Yaxın zamanda belə bir effetik vaksinin hazır olacağı ilə bağlı fikir söyləmək çətindir. Bəzən bildirilir ki, dekabr və yanvar ayına qədər vaksin hazır olacaq. Amma hələlik belə bir reallığı gözləmək üçün dəqiq söz söyləmək olmur”.
ATU-nun dosenti vurğulayıb ki, bu virus yeni olduğu üçün müxtəlif və bir-birini təkzib edən fikirlərin olacağı da normaldır.Teleqraf
Biləsuvar rayonunda əhalinin içməli suya olan tələbatını və əkin sahələrinin suvarılmasını təmin edən yeganə su mənbəyi Cənub Muğan Kanalında suyun səviyyəsinin azalması aidiyyəti qurumları hərəkətə keçirib.
Report bildirir ki, sentyabrın 7-də mövcud vəziyyəti araşdırmaq və müzakirə etmək məqsədilə Biləsuvar Rayon İcra Hakimiyyətinin başçısı yanında bu sahəyə nəzarət edən aidiyyəti təşkilatlarla görüş keçirilib.
Görüşdə rayonun kəndlərində içməli su, həm də əkin sahələrinin suvarılmasında yaranacaq problemlərin həlli üçün qabaqlayıcı tədbirlərin görülməsi müəyyənləşdirilib.
İcra başçısının müavinləri, Suvarma və Sukanal idarələrinin, icra nümayəndələri və bələdiyyələrin iştirakı ilə yaradılmış işçi qrupuna tapşırılıb ki, kəndlərdə əhalinin içməli suya olan tələbatının ödənilməsi məqsədilə müşahidələr aparılsın, problemlər yaranacağı təqdirdə operativ şəkildə aradan qaldırılması istiqamətində tədbirlər görülsün.
Eyni zamanda ehtiyac yarandığı təqdirdə qısa zaman ərzində sudurulducu bulaqlar fəaliyyət göstərən kəndlərdə anbarların təmizlənmiş su ilə doldurulması, digər kəndlərdə isə su maşınları vasitəsilə əhalinin tələbatının ödənilməsi ilə bağlı tapşırıqlar verilib.
Qeyd edək ki, bir neçə aydır davam edən su böhranı rayonun, demək olar ki, bütün ərazisini əhatə edib.
Bu ilin birinci rübündən başlayan su qıtlığı daha çox rayonun Yuxarı Cürəli, Ovçubərə, Təzəkənd, Ağalıkənd, Amankənd, Dərvişli və digər kəndlərində müxtəlif problemlər yaradıb. Belə ki, mövcud vəziyyət on minlərlə sakinin içməli su təminatında problemlərin yaranmasına səbəb olub. Eyni zamanda su qıtlığı kənd təsərrüfatının müxtəlif sahələrinə mənfi təsirlər göstərib. Bu da əkinçilik, heyvandarlıq və pamqıqçılıq sahəsində məhsuldarlığın aşağı düşməsinə səbəb olub. Cənub Muğan kanalı rayon əhalisinin içməli suya olan tələbatını ödəməklə yanaşı, əkinlərin suvarılması üçün yeganə mənbədir.
Xatırladaq ki, Cənub Muğan kanalı 1960-cı ildə istismara verilib. Uzunluğu 65 kilometr olan kanal mənbəyini Araz çayından götürür və Azərbaycanın üç rayonunda - İmişli, Biləsuvar və Cəlilabadda istifadə olunur.
Gəncənin Nizami və Kəpəz rayonları ləğv edilərək idarəçiliyin bir mərkəzdən həyata keçirilməsi təklif olunur.
Gəncə şəhər ərazisinin rayonlara bölünməsi 1980-ci il noyabrın 21-də həyata keçirilib.
Hələ o zamanlar şəhər Kirovabad adlandığından, ümummilli lider Heydər Əliyevin təşəbbüsü ilə rayonlardan biri Kəpəz, digəri isə şəhərin tarixi adını yaşatmaq üçün Gəncə rayonu adlandırılıb. 1989-cu ildə şəhərin tarixi adı bütövlükdə özünə qaytarıldıqdan sonra Gəncə rayonunun adı 1991-ci ildə Nizami rayonuna dəyişdirilib.
İndi Nizami və Kəpəz rayonlarının ləğv edilərək Gəncə şəhərinin tərkibinə qatılması təklifi sakinlərin də ürəyincədir. APA TV
Bu gündən etibarən sərt karantin rejiminin mövcud olduğu şəhər və rayonlarda, eləcə də ölkə üzrə bəzi məhdudiyyətlər aradan qaldırılır.
Bakı, Sumqayıt şəhərləri və Abşeron rayonuna gediş-gəlişlə əlaqədar tətbiq olunmuş məhdudiyyət aradan qaldırılır (şəhərlərarası və rayonlararası sərnişindaşıma istisna olmaqla).
Sanitar-epidemioloji vəziyyətə uyğun olaraq bu gündən müvafiq karantin qaydalarına riayət olunmaqla və Azərbaycan Respublikası Nazirlər Kabinetinin “Koronavirus (COVID-19) pandemiyası dövründə ictimai iaşə müəssisələrinə müştəri qəbulu ilə bağlı bəzi məsələlərin tənzimlənməsi barədə” qərara uyğun olaraq, ictimai iaşə obyektlərinin daxilində saat 00.00-dək xidmət göstərilməsinə icazə verilir.
Belə ki, ictimai iaşə obyektləri daxilində aşağıdakı hallara nəzərə alınmaqla xidmət göstəriləcək:
- Koronovirus (COVID-19) pandemiyası dövründə insanların sıx toplaşmasının xəstəliyin yayılma intensivliyinə birbaşa təsirini nəzərə alaraq, ictimai iaşə müəssisələrinə müştəri qəbulu qüvvədə olan norma və qaydalardan iki dəfə az olmalı və müvafiq olaraq hər adambaşına müəyyən edilən sahə ikiqat artırılmalıdır;
- İctimai iaşə müəssisələrinin qida qəbulu zallarında, otaqlarında, habelə onların açıq hava sahələrində oturacaqların ara məsafəsi eyni masa arxasında bir metrdən, masalararası məsafələr isə iki metrdən az olmamalıdır;
- Hər bir ictimai iaşə müəssisəsinin qarşısındakı lövhədə həmin müəssisənin qida qəbulu yerlərinin (zallar, otaqlar və s.) ümumi sahəsi, oturacaq yerlərinin sayı, masalararası məsafə, adambaşına müəyyən edilən sıxlıq normaları göstərilməlidir;
- İctimai iaşə obyekti dedikdə, yeyinti məhsullarının istehsalı, emalı, satışı və istehlakının təşkili ilə əlaqədar xidmət fəaliyyətini həyata keçirmək məqsədilə istifadə edilən əmlak kompleksi (restoran, kafe, yeməkxana, qəlyanaltı, bufet, köşk tipli məkanlar, çay evləri və bu kimi digər obyektlər) nəzərdə tutulur;
- İctimai iaşə obyektinin açıq hava sahəsi dedikdə, ən azı üç tərəfdən bütövlükdə hava axınına tam açıq (bir metrdən hündür hər hansı tikili və digər konstruktiv maneəsiz) sahə və ya üzəri tam açıq (açıq səma altında) sahə nəzərdə tutulur;
- İctimai iaşə obyektlərinin giriş-çıxışlarında, kassalarda dezinfeksiya məhlulundan istifadə imkanı, o cümlədən dezinfeksiya məhlulundan istifadə üçün müvafiq qurğuların (dispenserlərin) yerləşdirilməsi və həmin qurğuların işlək vəziyyətdə olması təmin edilməlidir.
Sabah Bakıda və Abşeron yarımadasında havanın dəyişkən buludlu olacağı, əsasən yağmursuz keçəcəyi, lakin səhər saatlarında bəzi yerlərdə qısamüddətli az yağış yağacağı, duman olacağı gözlənilir.
Milli Hidrometeorologiya Xidmətindən verilən məlumata görə, mülayim şimal-qərb küləyi əsəcək, gündüz şimal-şərq küləyi ilə əvəz olunacaq. Havanın temperaturu Abşeron yarımadasında gecə 21-23, gündüz 26-29, Bakıda gecə 21-23, gündüz 26-28 dərəcə isti olacaq. Atmosfer təzyiqi 760 mm civə sütunundan 763 mm civə sütununa yüksələcək, nisbi rütubət gecə 60-70, gündüz 35-40 faiz təşkil edəcək.
Abşeron çimərliklərində mülayim şimal-qərb küləyi əsəcək, gündüz şimal-şərq küləyi ilə əvəz olunacaq. Dəniz suyunun temperaturu Sumqayıt, Novxanı, Pirşağı, Nardaran, Bilgəh, Zuğulbada 23-24, Türkan, Hövsan, Sahil, Şıxda isə 24-25 dərəcə isti olacaq.
Sentyabrın 8-də Azərbaycanın rayonlarında şimşək çaxacağı, arabir yağış yağacağı, ayrı-ayrı yerlərdə intensiv olacağı, dolu düşəcəyi gözlənilir. Şərq küləyi əsəcək, ayrı-ayrı yerlərdə arabir güclənəcək. Havanın temperaturu gecə 17-22, gündüz 27-32, dağlarda gecə 10-15, gündüz 18-22 dərəcə isti olacaq.
Sabah həmçinin, Abşeron yarımadasında meteoroloji amillərin mülayim tərəddüdü gözlənilir ki, bu da meteohəssas insanlar üçün əsasən əlverişlidir.