 |
|
“Avtomobillərdə olması zəruri hesab edilən tibbi qutunun adı dəyişdirilib və indi o, "dərman qutusu" yox, "ilk tibbi yardım qutusu" adlanır”.
“Report” xəbər verir ki, bunu yol hərəkəti üzrə ekspert, hüquqşünas Ərşad Hüseynov bildirib.
Onun sözlərinə görə, bununla bağlı 19 iyun 2020-ci il tarixdə həm "Yol hərəkəti haqqında" qanuna, həm də İnzibati Xətalar Məcəlləsinə dəyişiklik edilib: “Səbəb odur ki, bu qutunun içərisində dərman vasitələri yox, sadəcə həkiməqədərki yardımda istifadə edilə biləcək tibbi ləvazimatlar (qanaxmanı dayandırmaq, yaranı sarımaq üçün və s.) olmalıdır.
Hazırda həmin qutunun tərkibi Nazirlər Kabinetinin 2019-cu il 9 sentyabr tarixli 399 nömrəli qərarı ilə təsdiq olunub, lakin "Yol hərəkəti haqqında" qanuna yuxarıda qeyd etdiyim dəyişikliyin qüvvəyə minməsi ilə əlaqədar hökumətə tapşırıq verilib ki, uyğun düzəlişlər edilsin.
Yəqin ki, Nazirlər Kabineti 2019-cu il 9 sentyabr tarixli 399 nömrəli qərarına dəyişiklik edəcək və sadəcə bu qutunun adını dəyişməklə kifayətlənməyərək, hazırda onun içərisində olması nəzərdə tutulan dərman vasitələrini sıyahıdan çıxaracaq.
Məsələ burasındadır , həkimlərin fikrinə əsasən, avtomobilin bəzən 50 dərəcəyədək qızan salonunda saxlanan həmin dərmanlar (Analgin, Aspirin, Nitroqliserin həbləri və s.) ciddi dəyişikliyə məruz qalaraq istifadə edildikdə çox ciddi problem yarada bilər”.
Vətəndaş Müjgan Quliyeva yol polisindən şikayətçidir. Avtosfer.az-a müraciət edən vətəndaş deyir ki, avqustun 29-da idarə etdiyi 99 MG 868 dövlət nömrə nişanlı, "Mercedes" markalı avtomobil ilə Mərdəkan yolunda hərəkətdə olarkən Bakı şəhər Dövlət Yol Polisi İdarəsinin inspektoru, Yusif Babayev tərəfindən saxlanılıb. İnspektor ona sveteforun qırmızı işığında keçdiyini bildirərək barəsində protokol tərtib edib. Sübut olaraq isə başqa bir avtomobilin sürücüsünün bunu dediyini qeyd edib. Vətəndaş inspektora qayda pozmadığını bildirib. Lakin protokol tərtib olunub. Sürücü bu barədə rəsmi olaraq Yol Polisi rəhbərliyinə şikayət də ünvanlayıb.
Vətəndaş məsələnin araşdırılmasını və ədalətli qərar çıxarılırmasını xahiş edir.
Polis, sosial şəbəkədə yayımlanan qalmaqallı videonun qəhrəmanına çevrilən velosipedçi qadının şəxsiyyətini müəyyənləşdirib. Yol-xeber.az xəbər verir ki, görüntülər Rusiyanın Kemerov şəhərində qeydə alınıb.
Kadrlarda, nəqliyyatın intensiv olduğu yolda, bir azyaşlı qızın velosiped sürən qadının boynuna sarılaraq təhlükəli səfər etdikləri görülür.
Bir avtomobilin təhlükəsizlik kamerasına düşən video sürücü tərəfindən sosial şəbəkədə paylaşılıb.
Yerli KİV-in məlumatına görə, görüntüləri izləyən hüquq-mühafizə orqanları, özünü və qızının həyatını təhlükəyə atan ananın şəxsiyyətini müəyyənləşdirib və onu inzibati qaydada 800 rubl (19 manat) cərimələyib.
Daxili İşlər Nazirliyi Bakıya giriş-çıxışa sərbəst icazə verildikdən sonra kütləvi sərnişindaşımaya necə nəzarət olunması ilə bağlı məsələyə aydınlıq gətirib.
DİN Baş Dövlət Yol Polisi İdarəsinin mətbuat katibi, polis polkovniki Kamran Əliyev “Qafqazinfo”ya açıqlamasında bildirib ki, qeydi-qanuni sərnişindaşımaya statsionar postlarda və inzibati ərazilərin daxilində nəzarət olunacaq: “Avtobuslarla qanunsuz sərnişin daşınması məsələsi ilə bağlı bildirirəm ki, bizim rayonlararası yollarda kifayət qədər stasionar postlarımız var. Yəni şərt deyil ki, konkret karantin postunda sərnişindaşımaya nəzarət olunsun. Bildiyiniz kimi, sərnişin nəqliyyatının, yəni avtobus və mikroavtobusların hərəkətinə yalnız avtovağzallardan icazə verilir. Hər bir avtovağzal da hansısa rayon, yaxud şəhərin daxilindədir, onlara da nəzarət bilavasitə daxildə edilməlidir. Amma ola bilsin ki, hansısa sürücünün ətraf qəsəbələrdən, yaxud ayrı-ayrı məhəllələrdən sərnişin götürüb qeyri-qanuni daşıma ilə məşğul olduğu aşkarlanarsa, həmin şəxslər qanunvericiliklə nəzərdə tutulmuş qaydada məsuliyyətə cəlb olunacaqlar. Vətəndaşlar taksilərin fəaliyyətindən istifadə edə bilərlər.
Avtobusların hərəkəti ilə bağlı isə ola bilər ki, yaxın vaxtlarda bu məsələyə yenidən baxılsın və ölkədəki sanitar-epidemioloji vəziyyətdən asılı olaraq Nazirlər Kabineti yanında Operativ Qərargah tərəfindən müvafiq qərar qəbul edilsin. Hər halda hər şey vətəndaşlarımızın pandemiya dövründə infeksiyanın yayılmasının qarşısının alınması üçün tələb edilən qaydalara, yəni tibbi maskaların istifadə, ara məsafəsinin qorunması kimi çətin olmayan, lakin çox vacib prosedurların nə dərəcədə yerinə yetirilməsindən asılıdır. Hər kəs ən azından özünü qoruya bilsə, yoluxmanın sayı azalar və qüvvədə olan digər məhdudiyyətlər də tezliklə götürülər”.
Pensiya təminatı üzrə xidmətlərin keyfiyyətinin artırılması və bu sahədə idarəçiliyin optimal əsaslarla təkmilləşdirilməsi məqsədilə Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondunun (DSMF) strukturunda növbəti dəyişiklik edilib.
Nazirlikdən "Ölkə.Az"a verilən məlumata görə, Qaradağ, Xətai, Binəqədi, Nərimanov, Saatlı, Sabirabad, Şuşa və Zəngilan rayonları üzrə əmək şəraitinə görə güzəştli qaydada pensiya təyin edilən və əmək pensiyasına qulluq stajına görə əlavələr müəyyən olunmaqla pensiya təyin edilən şəxslərin (dövlət qulluqçuları, xüsusi rütbəli şəxslər və b.) pensiya işləri DSMF-in həmin rayonlar üzrə şöbələrindən Fondun Xüsusi Şərtlərlə Təyinat üzrə Mərkəzi Filialına verilib.
Bununla əlaqədar həmin şəxslərə pensiyalar da 2020-ci ilin sentyabr ayından etibarən hər ayın 14-16-sı aralığında ödəniləcək ki, bu da onların pensiyalarının hər ay daha tez ödənilməsi istiqamətində daha bir addımdır.
Eyni zamanda, Qaradağ, Xətai, Binəqədi, Nərimanov, Saatlı, Sabirabad, Şuşa və Zəngilan rayonları üzrə güzəştli və xüsusi şərtlərlə pensiya təyin olunmuş və təyin olunacaq şəxslər hər hansı sualları olduqda DSMF-nin Xüsusi Şərtlərlə Təyinat üzrə Mərkəzi Filialına (012) 563-55-46; (012) 563-55-47; (012) 563-55-34 nömrəli telefonlar vasitəsilə müraciət edə bilərlər.
Azərbaycanda koronavirusa görə tətbiq olunan karantin rejimində mərhələli şəkildə yumşalmalarla bağlı Operativ Qərargah tərəfindən qərarlar verilməkdədir. Sonuncu qərara əsasən sentyabrın 8-dən kafe və restoranlar əvvəlki qaydada fəaliyyət göstərəcəklər. Bundan əlavə şəxsi avtomobillə rayonlara gediş-gəliş bərpa olunub. Növbəti yumşalmada iri ticarət mərkəzləri, “Mallar”ı açıla bilərmi?
Bununla bağlı KONKRET.az-a danışan deputat Ramil Həsən bildirib ki, cənab İlham Əliyevin verdiyi operativ və xüsusi təlimatlar nəticəsində koronavirusla bağlı əldə etdiyi müsbət nəticəyə görə Azərbaycan ilkin yerləri tutmaqdadır:
“Əlbəttə ki, sevindirici haldır ki, həyata keçirilən qabaqlayıcı tədbirlər nəticə etibarı ilə müəyyən təsirləri göstərməkdədir. Bu müsbət nəticələri nəzərə alan Operativ Qərargah karantin rejimində müəyyən hissə-hissə yumşalmalara getməkdədir. Koronavirusun dünyadan silinmədiyi müddət çərçivəsində yavaş-yavaş normal həyatımıza qayıdılması üçün müəyyən addımlar atılmaqdadır. Ən doğru atılan addımlar ondan ibarətdir ki, proseslər tədricən, hissə-hissə baş verməkdədir. Bunda da əsas məqsəd insanlarımızın alışması, ciddi təhlükə ilə üz-üzə qalmamasıdır. Əvvəl 5 nəfərin açıq havada gəzməsinə icazə verilirdisə, artıq bu rəqəm 10-a qaldırılıb. Kafe və restoranlar da əvvəlki qaydada işləyəcəklər. Bütün bu atılan addımlar vətəndaşlarımızın təhlükəsizliyini həyata keçirmək üçündür. Vətəndaşlarımız nə qədər çox məsuliyyətli olarsa, bu iri ticarət mərkəzlərinin, idman salonlarının və digər qapalı yerlərdə fəaliyyət göstərən müəssisələrin tez açılmasına gətirib çıxara bilər. Bu müəssisələrin fəaliyyətə başlaması tək Operativ Qərargahdan asılı deyil. Həm də vətəndaşlarımızın qoyulan qaydalara və verilən tövsiyələrə əməl etməsindən asılıdır”.
Ramil Həsən fikrini belə tamamlayıb:
“Dəyərli vətəndaşlarımıza deputat kimi məsləhətim odur ki, qoyulan qaydalara bundan sonra da əməl etsinlər ki, müsbət tendensiya davam etsin. Ölüm halları ümumiyyətlə olmasın, yoluxanların sayı azalsın, sağalanlar isə çoxalsın. Belə olan halda da iri ticarət mərkəzləri, “Mallar” və digər qapalı məkanlarda fəaliyyət göstərən müəssisələr fəaliyyətə başlaya bilər”.
Azərbaycan Hava Yolları QSC (AZAL) Türkiyəyə səyahət edən sərnişinlərə müraciət edib.
AZAL-dan verilən məlumata görə, müraciətdə deyilir:
“Türkiyə Respublikasına giriş qaydalarına əsasən Azərbaycan vətəndaşlarının (körpələr və uşaqlar da daxil olmaqla) ümumvətəndaş pasportu ölkəyə giriş günündən etibarən ən az 180 gün ərzində etibarlı olmalıdır.
Xüsusi reyslərimiz ilə İstanbul şəhərinə səyahət edərkən pasportunuzun müddətini bir daha yoxlamağı tövsiyə edirik”.
Sabahdan Azərbaycanda növbəti dəfə karantin rejimi yumşaldılacaq.
"Ölkə.Az" xəbər verir ki, bu barədə Nazirlər Kabineti yanında Operativ Qərargahın sanitar-epidemioloji vəziyyətə uyğun olaraq 2020-ci il sentyabrın 8-i saat 00:00-dan yumşalma ilə bağlı qərarında bildirilib.
Belə ki, müvafiq karantin qaydalarına riayət olunmaqla və Azərbaycan Respublikası Nazirlər Kabinetinin “Koronavirus (COVID-19) pandemiyası dövründə ictimai iaşə müəssisələrinə müştəri qəbulu ilə bağlı bəzi məsələlərin tənzimlənməsi barədə” 2020-ci il 6 iyul tarixli 237 nömrəli qərarına uyğun olaraq saat 00:00-a qədər ictimai iaşə obyektlərinin daxilində xidmət göstərilməsinə icazə veriləcək.
Qarşıdan payız mövsümü gəlir. İnsanların qrip və ona bənzər xəstəliklərə yoluxma ehtimalı da artır. TƏBİB-dən verilən məlumata görə, payızda ölkəmizə qrip əleyhinə vaksinlərin gətirilməsi və tətbiq edilməsi planlaşdırılır. Mütəxəssislər risk qrupunda olanların vaksinasiyaya cəlb edilməsini tövsiyə edirlər.
Xəzər TV xəbər verir ki, payız mövsümü yaxınlaşdıqca qripə qarşı vaksinlər yenidən gündəmə gəlib. Tibbi Ərazi Bölmələrinin İdarəetmə Birliyindən verilən məlumata görə, payızda qrip əleyhinə vaksinlərin tətbiq edilməsi planlaşdırılır.
Qurumun İnfeksion İşçi Qrupunun üzvü Süleyman Kamilov deyir ki, bu vaksinlər insanlarda qrip xəstəliyinə qarşı immunitet formalaşdırır və təhlükəsizdir. Hətta hamilə qadınlara belə tövsiyə olunur. Vaksinasiya könüllü xarakter daşıyacaq.
Müşahidələr isə onu göstərir ki, insanların vaksinasiya prosesinə münasibəti birmənalı deyil.
Süleyman Kamilov bildirib ki, qrip vaksini koronavirusa qarşı birbaşa müdafiə rolu oynamır. Amma immunitetin zəifləməsinin qarşısını alır. Bununla da orqanizmin COVID-19-a qarşı mübarizəsinə təkan verə bilər.
Süleyman Kamilov onu da qeyd edib ki, altı aydan etibarən hər kəsin qrip vaksinindən istifadəsi məsləhətdir. Ağır infeksion xəstəlik keçirən, kəskin alergik reaksiyası olan və altı aydan aşağı uşaqlara peyvəndin vurulması məsləhət deyil. Vaksinlərin hansı ölkələrdən gətiriləcəyi, qiyməti, eləcə də ödənişsiz olub-olmayacağı hələ ki məlum deyil.
İnsan Hüquqları üzrə Müvəkkil (Ombudsman) Səbinə Əliyeva bir qrup abituriyent tərəfindən Ombudsmana edilmiş müraciət əsasında Dövlət İmtahan Mərkəzinə (DİM-ə) məktub ünvanlayıb.
“Qafqazinfo”ya daxil olan məlumata görə, müraciətdə koronavirus pandemiyası ilə əlaqədar olaraq məktəblərin bağlanması, həmçinin qrup halında məşğələlərin məhdudlaşdırılması ilə bağlı abituriyentlər üçün yaranmış çətinliklər, internetə fasiləsiz çıxışın olmaması səbəbindən bəzi abituriyentlərin onlayn dərslərə qoşulmasında ortaya çıxan problemlər, imtahan vaxtlarının dəyişdirilməsi məsələsi və bütün bunların nəticədə həmin abituriyentlərin imtahanlarda yüksək bal toplamasına mane olduğu qeyd olunub.
Abituriyentlərin Müvəkkilə müraciətini və bütün dünyada olduğu kimi ölkəmizdə də koronavirus epidemiyasının daha geniş yayılmasının qarşısını almaq üçün görülən tədbirlərin normal həyat şərtlərini dəyişməsi, eyni zamanda cari ilin məzunlarının əvvəlki illərin abituriyentləri ilə müqayisədə daha gərgin psixoloji vəziyyətdə olmasını nəzərə alaraq, Ombudsman Səbinə Əliyeva müsabiqə şərtlərinin yumşaldılması və yaranmış vəziyyətlə bağlı müvafiq köməklik göstərilməsi ilə bağlı DİM rəhbərliyinə müraciət edib.