 |
|
Koronavirus (COVİD-19) pandemiyasından zərər çəkmiş sahibkarlara dövlət maliyyə dəstəyinin göstərilməsi davam etdirilir.
Azərbaycan Respublikası Prezidentinin 2020-ci il 19 mart tarixli Sərəncamının 10.2-ci bəndinin icrası ilə bağlı Nazirlər Kabineti tərəfindən təsdiq edilmiş Tədbirlər Planına əsasən, 04 may tarixinə İqtisadiyyat Nazirliyinə muzdlu işçilərin əməkhaqqının müəyyən hissəsinin ödənilməsi üçün koronavirus (COVİD-19) pandemiyasından zərər çəkmiş 25.633 vergi ödəyicisi və maliyyə dəstəyi almaq üçün 92.553 fərdi (mikro) sahibkar, cəmi 118.186 vergi ödəyicisi müraciət edib.
Muzdlu işçilərin əməkhaqqının müəyyən hissəsinin ödənilməsi çərçivəsində 191.306 işçini əhatə edən 21.472 sahibkarın müraciəti araşdırılaraq təsdiqlənib və ayrılacaq maliyyə vəsaitinin bank hesablarına köçürülməsi üçün Maliyyə Nazirliyinə təqdim edilib. Digər vergi ödəyiciləri üzrə araşdırmalar davam edir.
İndiyədək təsdiq edilmiş müraciətlər üzrə maliyyə dəstəyinin həcmi 86.36 mln. manat, o cümlədən 1-ci mərhələ üzrə ödənilməsi nəzərdə tutulan vəsaitin həcmi 43,18 mln. manat təşkil edir. Mayın 4-nə Maliyyə Nazirliyinin Dövlət Xəzinədarlıq Agentliyi tərəfindən 20.596 vergi ödəyicisinə 186.883 nəfər muzdlu işçinin əməkhaqqı üzrə 42,4 mln. manat vəsaitin köçürülməsi təmin edilib.
Fərdi (mikro) sahibkarlara maliyyə dəstəyinin göstərilməsi proqramı çərçivəsində 92.553 vergi ödəyicisindən müraciət daxil olub, 83.870 müraciət araşdırılaraq təsdiqlənib və maliyyə dəstəyinin bank hesablarına köçürülməsi üçün Maliyyə Nazirliyinə təqdim edilib. Təsdiq edilmiş müraciətlər üzrə maliyyə dəstəyinin həcmi 51,57 mln. manat təşkil edir. Mayın 4-nə Maliyyə Nazirliyinin Dövlət Xəzinədarlıq Agentliyi tərəfindən artıq 49,2 mln. manat vəsaitin 78.643 fərdi (mikro) sahibkarın bank hesablarına köçürülməsi təmin edilib.
Qeyd edək ki, maliyyə dəstəyi proqramı çərçivəsində müraciətlərin nəticəsi və vəsaitin bank hesabına köçürülməsi barədə bildiriş vergi ödəyicilərinin İnternet Vergi İdarəsindəki (www.e-taxes.gov.az) elektron kabinetlərinə və SMS şəklində mobil telefonlarına göndərilir. Yaranan suallarla bağlı vergi ödəyiciləri Dövlət Vergi Xidmətinin “195” Çağrı Mərkəzinə və uçotda olduqları yerli vergi orqanlarına müraciət edə bilərlər.
Pandemiyadan zərər çəkmiş sahələrdə fəaliyyət göstərən sahibkarlara və iqtisadi artıma dövlət dəstəyi barədə məlumatlarla aşağıdakı linklərdən istifadə etməklə tanış ola bilərsiniz.
Baş Dövlət Yol Polisi İdarəsi (BDYPİ) ölkə ərazisində tətbiq edilmiş xüsusi karantin rejimi ilə əlaqədar ötən gün DYP əməkdaşları tərəfindən görülmüş işlər barədə məlumat yayıb.
BDYPİ-dən verilən məlumata görə, koronavirus (COVİD-19) infeksiyasının yayılmasının qarşısının alınması məqsədilə tətbiq edilən xüsusi karantin rejiminin pozulmasına görə 05.05.2020-ci il saat 00:00-dan 06.05.2020-ci il 00:00-dək olan müddət ərzində respublikanın avtomobil yollarında nəqliyyat vasitələri ilə hərəkətdə olan 423 nəfər Azərbaycan Respublikası İnzibati Xətalar Məcəlləsinin 211-ci maddəsi ilə inzibati məsuliyyətə cəlb edilib.
Ümumilikdə 01.04.2020-ci il tarixindən bu günədək respublikanın, o cümlədən paytaxtın avtomobil yollarında xüsusi karantin rejiminin pozulmasına görə 48 386 hərəkət iştirakçısı inzibati məsuliyyətə cəlb edilib.
Mart ayından etibarən təhsil müəssisələrinin, koronavirus səbəbindən bağlanmasının nəticəsində yüzlərlə tələbə ali təhsil müəssisəsindən diplomunu ala bilməyib.
Bu vəziyyətdə düşündürən suallardan biri də oğlan tələbələrin hərbi hissəyə təqdim edə bilmələri üçün diplomlarının gecikməsidir.
Əgər onlar vaxtında diplomlarını hərbi hissələrə təqdim etməsələr o zaman 1il 6 ay xidmət edəcəklər.
Metbuat.az xəbər verir ki, hazırda əsgər valideynlərinin ciddi narahatlığına səbəb olan bu məsələ barədə təhsil eksperti Elçin Əfəndi açıqlama verərək bildirdi ki, bu məsələ artıq həllini tapıb.
"May ayının beşində Təhsil Naziri Ceyhun Bayramovun verdiyi əmrə əsasən, təhsillə bağlı müəssisələrdə işçi heyətinin bir qismi işə cəlb olunur. Burada iki gün əvvəl dediyimiz məsələ də öz həllini tapmış olacaq. Yəni ali təhsilli həqiqi hərbi xidmət keçən qulluqçulardan diplomlarını almayanlar üçün şərait yaradılır. Bundan sonra diplomlarını əldə edib xidmət etdikləri hərbi hissəyə təqdim edə biləcəklər. Beləliklə hərbi xidmətin uzadılması ilə bağlı yaranmış olan əngəl aradan qalxacaq.''
Qeyd edək ki, artıq bir sıra ali təhsil müəssisəsində tələbələrin diplomlarının vaxtında verilməsi üçün işlərə başlanılıb.
Mart ayının 14-dən etibarən pandemiya səbəbi ilə ölkədə bütün kütləvi tədbirlər, o cümlədən toy-nişan mərasimləri təxirə salınıb. İki aydır ki, kiminsə evindən “Vağzalı” səsi eşidilmir. Mövcud durumdan isə ən çox zərər çəkən heç şübhəsiz ki, şadlıq saraylarıdır.
Maraqlıdır, indi şadlıq sarayları yay ayları üçün sifariş qəbul edirmi? İnsanlar necə, yaya toy planlaşdırırmı?
Bu suallarla Bakıda yerləşən şadlıq saraylarına müraciəti modern.az edib.
“İmperial” şadlıq sarayından deyiblər ki, artıq iyun ayı üçün boş gün qalmayıb:
“Aprel-may ayının toyları təxirə salındığı üçün bütün mərasimləri növbəti aya keçirmişik. İyun ayının 1-dən 30-dək bütün günlər bron edilib. Aprel ayında 22 toy təxirə salındı. İyul ayı üçün də sifarişlər çoxdur, həmin ay üçün cəmi 7 gün boş qalıb”.
“Yeganə” şadlıq sarayından bildiriblər ki, camaata yalandan söz verməyin mənası yoxdur:
“Toy-nişan mərasimləri üçün müraciət daxil olur, amma biz qəbul etmirik. Çünki kiməsə yalandan söz verə bilmərik ki, iyun-iyul ayında mütləq toy mərasiminizi təşkil edəcəyik. İndi vəziyyət elədir ki, qərarsız qalmışıq”.
“Su Sonası” şadlıq sarayından deyiblər ki, həm müraciət edənlər tərəddüdlüdür həm də onlar:
“Müraciətlər olur, amma kiməsə dəqiq cavab verə bilmirik. Mart-aprel ayına toy etmək istəyənlər var idi ki, indi onlar həmin mərasimləri iyun-iyul ayına keçirmək istəyirlər. Amma bizə dəqiq vaxt deyə bilmirlər ki, hansı tarixləri istəyirlər. Çünki hamı narahatdır ki, vaxt təyin edər, toy mərasimi yenidən alınmayar”.
“Al Saray”da karantinin bitməsi ilə bağlı rəsmi qərarı gözləyirlər:
“Nə vaxt rəsmi qərar qəbul ediləcək ki, toy-nişan mərasimi keçirmək olar, onda sifariş qəbul edəcəyik. Düzdür, yay ayları üçün sifariş verənlər olur, biz də bunu qeyd edirik. Amma həmin adamlara da deyirik ki, əgər yay ayları üçün də qadağa tətbiq olunsa, məsələ bizlik deyil. Karantin rejimi iyun-iyul üçün də tətbiq olunsa, müştərilərə zəng edib toy-nişan tarixlərini yenidən təxirə salacağıq”.
“Arena” şadlıq sarayından deyiblər ki, müraciətlər daxil olur və onları qəbul edirlər:
“Daxil olan müraciətlər əsasən toy-nişan mərasimləri ilə bağlıdır. Hələ ki iyun ayı üçün sifarişləri qəbul edirik. Amma yeni qayda tətbiq olunsa ki, iyun ya da iyulda toy olmayacaq, onda mərasimlər təxirə salınacaq”.
“Çıraq Palas” şadlıq sarayında da hazırda durğunluqdur:
“Sifarişlər olur, amma əvvəlki qədər müraciət yoxdur. Demək olar ki, iyun-iyul ayı üçün eyni sayda toy-nişan sifarişi almışıq”.
“Badi-Səba” şadlıq sarayından deyiblər ki, sifarişlər olur, amma gənclər toy mərasimləri təxirə salınar deyə, çox gərgindir:
“Aprel-may ayının toyları təxirə salındığı üçün daha çox müraciət iyun ayınadır. Bütün saraylar kimi biz də sifarişləri qəbul edirik. Əsasən böyük toy mərasimləri üçün müraciətlər olur, amma kiçik toy və nişan mərasimi etmək istəyənlər də var. Bizə müraciət edən gənclərin çoxu gərgindir ki, yenə planları alt-üst olacaq”.
“Venera” şadlıq sarayında aprel ayı üçün nəzərdə tutulan 15 toy mərasimi təxirə salınıb:
“Sifarişləri qəbul edirik, amma bilmirik ki, Nazirlər Kabineti nə qərar verəcək. Toy üçün müraciət edən gənclər var. Ancaq əvəlcədən beh verməyə ehtiyat edirlər. Əgər konkret qərar olsaydı, biz də camaata dəqiq söz deyərdik”.
Azərbaycanda mayın 7-də müşahidə olunacaq hava şəraiti açıqlanıb.
Ekologiya və Təbii Sərvətlər Nazirliyinin Milli Hidrometeorologiya Xidmətindən verilən məlumata görə, Bakıda və Abşeron yarımadasında sabah arabir yağış yağacağı, bəzi yerlərdə intensiv olacağı, şimşək çaxacağı gözlənilir.
Səhər duman olacaq, mülayim şimal küləyi arabir güclənəcək.
Havanın temperaturu Abşeron yarımadasında gecə 13-16, gündüz 18-21, Bakıda gecə 14-16, gündüz 18-20 dərəcə isti olacaq.
Atmosfer təzyiqi normadan aşağı - 750 mm civə sütunundan 755 mm civə sütununa yüksələcək, nisbi rütubət 80-90 faiz təşkil edəcək.
Mayın 7-də Azərbaycanın rayonlarında arabir yağış yağacağı, bəzi yerlərdə leysan xarakterli intensiv olacağı, ayrı-ayrı yerlərdə şimşək çaxacağı, dolu düşəcəyi, yüksək dağlıq ərazilərdə isə qar yağacağı gözlənilir. Gecə və səhər duman olacaq, qərb küləyi ayrı-ayrı yerlərdə arabir güclənəcək.
Havanın temperaturu gecə 11-16, gündüz 20-25, dağlarda gecə 3-7, gündüz 10-15 dərəcə isti olacaq.
Tibbi-meteoroloji proqnoza gəlincə, mayın 7-8-də Abşeron yarımadasında mülayim xəzri küləyinin üstünlüyü və rütubətli hava şəraiti gözlənilir ki, bu da əksər meteohəssas insanlarda narahatlıq hissi yarada bilər.
Əgər 1 ay sonra cərimələr ödənilməzsə...
Ölkə ərazisində tətbiq edilmiş xüsusi karantin rejimi ilə əlaqədar Dövlət Yol Polisi İdarəsi hər gün yeni məlumatlar açıqlayır. Son məlumata görə, ümumilikdə 1 aprel 2020-ci ildən bu günədək respublikanın, o cümlədən paytaxtın avtomobil yollarında xüsusi karantin rejiminin pozulmasına görə 48386 hərəkət iştirakçısı inzibati məsuliyyətə cəlb edilib. Maraqlıdır, vətəndaşlar cərimələri könüllü şəkildə ödəyirmi, yaxud ödəməkdən imtina edənlər varmı? Bu zaman onları nə gözləyir?
Məsələ ilə bağlı Baş Dövlət Yol Polisi İdarəsinin (BDYPİ) İctimaiyyətlə əlaqələr şöbəsinin rəisi, polis polkovniki Kamran Əliyev Modern.az-a bildirib ki, cərimələrin ödənilməsi məcburidir: “Karantin rejiminin pozulmasına görə cərimələnənlərə ödənişlər üçün 1 ay vaxt verilib. Əgər 1 ay sonra cərimələr ödənilməzsə, inzibati materiallar məcburi icraya yönəldilir. Amma qeyd edim ki, kifayət qədər şəxs cəriməsini ödəyir”.
Qeyd edək ki, koronavirus (COVİD-19) infeksiyasının yayılmasının qarşısının alınması məqsədilə tətbiq edilən xüsusi karantin rejiminin pozulmasına görə, Azərbaycan Respublikası İnzibati Xətalar Məcəlləsinin 211-ci maddəsilə (Epidemiya əleyhinə rejimin, sanitariya-gigiyena və karantin rejimlərinin pozulması) məsuliyyətə cəlb etmə nəzərdə tutulub.
Epidemiya əleyhinə rejimin, sanitariya-gigiyena və karantin rejimlərinin pozulmasına görə -
- fiziki şəxslər 100 manatdan 200 manatadək məbləğdə, vəzifəli şəxslər 1500 manatdan 2000 manatadək məbləğdə cərimə edilir, yaxud işin hallarına görə, xətanı törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, hüquqi şəxslər iki min manatdan beş min manatadək məbləğdə cərimə edilir.
“Koronavirusa yoluxanlarla bağlı statistikanın belə sürətlə yayılmasını ikinci dalğa adlandırmaq olar”.
Bunu cebhe.info-ya tibb elmləri dosenti, professor Adil Qeybulla koronavirusa yoluxanların yenidən sürətlə artması məsələsindən danışarkən deyib.
Onun sözlərinə görə, fakt odur ki, artan xətt müşahidə edilir:
“Artan xəttin də səbəbi ondan ibarətdir ki, insanlar qaydaları gözləmirlər. Sanki heç nə olmamış kimi özlərini aparırlar. Karantin şərtləri ciddi şəkildə pozulur. Hazırda xəstələri müəyyən etməkdə davam edirik. Bizə də müraciət edənlər arasında problemli xəstələr olur və görürük ki, doğurdan da proses vüsət almağa başlayır. Bu nəyə bağlıdır? İnsanların bu virusu “iqnor” etməsinə… Nə qədər ki, vətəndaşlarımızın xəstəliyi saya salmamaq, məsələyə tam məsuliyyətsiz və boş baxmaları, sosial izolyasiya, gigiyena qaydalarını gözləməmələri, tibbi maska taxmamaları davam edəcək, o qədər də ciddi təhlükələrlə üz-üzə qalacağıq. İnsanlar bunun fərqində olmalıdır”.
Artıq Azərbaycanda ağır koronavirus xəstələrinin immun plazma müalicəsinə başlanılıb.
TƏBİB bu məqsədlə COVID-19 xəstəliyindən sağalan vətəndaşlardan qan plazması donoru olaraq, digər xəstələrə yardım etməyə çağırıb.
Donor olmaq istəyənlər aşağıdakı nömrələrlə əlaqə saxlaya bilərlər:
Mərkəzi Qan Bankı
Mirəli Qaşqay küçəsi 87
☎ 907
☎ +99412 440 65 86
☎ +99412 440 78 50
☎ +99412 441 66 52
Milli Televiziya və Radio Şurasının (MTRŞ) Aparat rəhbəri Asəf Hacıyev vəzifəsindən azad olunub.
Report xəbər verir ki, qurumun Aparat rəhbəri vəzifəsi MTRŞ sədrinin köməkçisi Fazil Novruzova tapşırılıb.
Qeyd edək ki, A.Hacıyev 2019-cu ilin yanvar ayından MTRŞ-nin Aparat rəhbəri vəzifəsində çalışırdı.
Xatırladaq ki, Prezident İlham Əliyev aprelin 4-də imzaladığısərəncamla İsmət Rəcəb oğlu Səttarov 6 il müddətinə MTRŞ-nin üzvü təyin edilib. Aprelin 6-da MTRŞ-nin keçirilən iclasında Milli Televiziya və Radio Şurasının üzvü İsmət Rəcəb oğlu Səttarov Milli Televiziya və Radio Şurasının sədri seçilib.
Qeyd edək ki, bu barədə ilk xəbəri unikal.org yayıb.
Xəbər verdiyimiz kimi dünən Azərbaycanda daha 76 nəfər koronavirusa yoluxub, 28 nəfər isə sağalıb. Ölkə ərazisində koronavirusa yoluxanların sayı artarsa mayın 11-dən karantin rejim sərtləşdirilə bilərmi?
Bununla sonxeber.az-a danışan deputat Nəsib Məhəməliyev bildirib ki, etiraf etməliyəm ki, son günlərin statistikası məyus edicidir:
"Vətəndaşlarımız hər gün koronavirusa yoluxanların sayının azalması və karantin rejiminin yüngülləşdirilməsi ilə bağlı xoş xəbərləri gözlədiyi halda, əks məlumatlar alması üzücüdür. Bunun əsas səbəbi aprel ayının 27-də karantin rejimi qismən yumşaldıldıqdan sonra, bir çox insanlarda arxayınlıq yaranması və kütləvi şəkildə küçələrə axışmasıdır. İctimai nəqliyatda, ticarət obyektlərində, bankların qarşısında, dayanacaqlarda, sosial məsafə saxlamadan müəyyən olunmuş qaydalara riayət etmirlər. Nəticə göz qabağındadır. Bir gündə 76 nəfərin virusa yoluxması pis haldır. Əgər, belə davam edərsə, mayın 11- də karantin rejimi nəinki yumşaldılar, əksinə daha da sərtləşdirilməsini proqnozlaşdıra bilərik. Aydındır ki, insanlar normal həyat rejiminə qayıtmaq istəyir. Bunu ilk növbədə hökumət də arzulayır. Ancaq bu ilk növbədə vətəndaşlarımızdan karantin rejiminin qaydalarına ciddi riyaət etmək, məsuliyyətli olmaq tələb olunur. Səbrli olaraq, milli birlik nümayiş etdirməklə koronovirusa qalib gəlməli, lüzumsuz risk edərək özümüzü və yaxınlarımızın həyatını təhlükəyə qoymamalıyıq".