 |
|
Pandemiya dövründə metroya daxil olanda tibbi maska taxmaq tələb olunacaq.
APA məlumatına görə, bu barədə Azərbaycan Respublikasının baş dövlət sanitariya həkiminin təsdiqlədiyi ictimai nəqliyyatda koronavirus infeksiyasının (COVİD-19) profilaktikasına dair metodiki göstərişlərində məlumat verilib.
Qeyd edilib ki, bilet kassalarının, ödəməterminallarının qarşısında, nəqliyyat vasitəsini gözləyərkən və yola düşdükdə - metro stansiyalarına daxil olduqda tibbi maska taxmaları tələb olunmalıdır. Eyni zamanda məsafə saxlamaları üçün nəqliyyat vasitələrinin gözləmə məntəqələrində - yerdə/platformalarda və s. müvafiq işarələnmə aparılmalıdır.
Pandemiya dövründə kitab, qəzet və dəftərxana mallarının satışı qaydaları müəyyənləşib.
"Koronavirusinfo.az" saytı məlumatına görə, bu barədə Azərbaycan Respublikasının baş dövlət sanitariya həkiminin təsdiqlədiyi müxtəlif ticarət və xidmət sahələrində, ofislərdə koronavirus infeksiyasının (COVİD-19) profilaktikasına dair metodiki vəsaitdə xidmət sahələri üzrə fərdi xüsusiyyəti olan sahələrə dair məlumatda bildirilib.
Qaydalarda deyilir:
• Onlayn satışlara üstünlük verilməlidir;
• Kitabxana və bu tipli müəssisələrin oxu zalları istifadəyə verilməməlidir;
• Bu tip müəssisələrdə kontaminasiyanın qarşısının alınması məqsədi ilə əhalinin özünə xidməti məhdudlaşdırılmalıdır;
• Əhaliyə xidmət göstərən personal fərdi qoruyucu vasitələr ilətəmin olunmalıdır;
• Müəssisəyə fərdi qoruyucu vasitələri ilə daxil olunmalıdır;
• Çıxışlarda əlcək və maskaların utilizasiyası üçün xüsusi konteynerlər yerləşdirilməlidir;
• İşlənmiş fərdi qoruyucu vasitələrin atılması tibbi tullantıların utilizasiyası qaydasına uyğun icra edilməlidir.
Nazirlər Kabinetinin qərarına əsasən, yeni növ koronavirus (COVID-19) infeksiyası ilə bağlı Azərbaycandakı mövcud sanitar-epidemioloji vəziyyət, digər dövlətlərdə tətbiq olunan preventiv tədbirlər, eləcə də Ümumdünya Səhiyyə Təşkilatının tövsiyələri təhlil edilərək xüsusi karantin rejiminin müddəti 31 may 2020-ci il saat 00:00-dək uzadılıb.
"Yol-xeber.az"“Azərbaycan Dəmir Yolları” Qapalı Səhmdar Cəmiyyətinə istinadən xəbər verir ki, Bakı, Sumqayıt, Gəncə, Lənkəran şəhərləri və Abşeron rayonu istisna olmaqla respublikanın digər rayon və şəhərlərində və Naxçıvan Muxtar Respublikasında rayonlar və şəhərlərarası gediş-gəliş bərpa olunsa da, ictimai nəqliyyatla sərnişindaşıma xidmətinə icazə verilmir.
Odur ki, Bakı-Tbilisi- Bakı (Böyük Kəsiyə kimi), Bakı-Böyük Kəsik-Bakı, Bakı-Köçərli-Balakən-Bakı, Bakı-Astara-Horadiz-Bakı və Bakı-Gəncə-Bakı sərnişin qatarları həmin tarixədək hərəkətdə olmayacaq.
Ölkədaxili və beynəlxalq istiqamətlərdə sərnişin daşımalarına qoyulan məhdudiyyət xüsusi göstərişədək tətbiq ediləcək.
Xatırladaq ki, elektrik qatarlarının Abşeron dairəvi dəmir yolu xətti üzrə hazırkı qrafiklə hərəkəti davam edəcək. Məqsəd karantin müddətində fəaliyyəti zəruri olan müəssisələrin əməkdaşlarının gediş-gəlişinin daha səmərəli təşkilidir.
Tibbi Ərazi Bölmələrini İdarəetmə Birliyi (TƏBİB) Azərbaycanda koronavirusla bağlı mayın 1-nə olan statistik göstəriciləri açıqlayıb.
Məlumatda bu gün ərzində Azərbaycanda koronavirusla bağlı 3 551 test edildiyi bildirilib.
Qeyd olunub ki, ölkə ərazisində indiyə qədər 146 630 test aparılıb.
Xatırladaq ki, bu gün Azərbaycanda daha 50 nəfər koronavirusa yoluxub, 40 nəfər müalicə olunaraq sağalıb, daha bir nəfər isə vəfat edib. Ölkədə indiyədək ümumilikdə koronavirusa 1 854 yoluxma aşkarlanıb. Onlardan 1 365-i sağalıb, 25-i ölüb. Hazırda aktiv xəstə sayı 464-dür.
Həmin şəxslərdən 15 nəfərin vəziyyəti ağır, 29 nəfərin vəziyyəti orta ağır qiymətləndirilir, digərlərinin səhhəti stabildir.
Səhiyyə Naziri Oqtay Şirəliyev Azərbaycan Tibb Universitetinin (ATU) ümumi işlər üzrə sabiq prorektoru Natiq Xəlilova yeni vəzifə verib.
Unikal.org məlumatına görə, O.Şirəliyevin müvafiq əmri ilə, N.Xəlilov yeni yaradılan Xüsusi Təhlükəli İnfeksiyalara Nəzarət Mərkəzinin (kemiş Respublika Taun Əleyhinə Stansiya) direktoru təyin olunub.
Qeyd edək ki, Respublika Taun Əleyhinə Stansiya sabiq direktoru Tahir Vəliyev hazırda Azərbaycan Tibb Universitetinin (ATU) ümumi işlər üzrə prorektorudur.
Mayın 2-də hərəkətin intensivliyinə və sıxlığına uyğun olaraq seçilmiş, şəhər əhəmiyyətli 200-dən artıq əsas küçə və prospektlərdə xüsusi kimyəvi maddələrlə növbəti dəfə gücləndirilmiş dezinfeksiya işləri aparılacaq.
Bu barədə paytaxtın kommunal xidmətindən xəbərdarlıq edilib.
“Bununla əlaqədar maddələrin qəbul olunmuş müəyyən toksikliyini nəzərə alaraq, sakinlərdən ciddi zərurət yaranmadığı təqdirdə qeyd olunan tarixdə küçəyə çıxmamaq xahiş olunur”, - deyə məlumatda qeyd edilib.
Prezident İlham Əliyev bir müddət əvvəl Əmək və Əhalinin Sosial Müdafiəsi naziri Sahil Babayev və İqtisadiyyat naziri Mikayıl Cabbarrovla keçirdiyi videokonfrans zamanı may ayı üçün nəzərdə tutulan 190 manat birdəfəlik ödəmənin vətəndaşlara nağdsız, rahat və şəffaf şəkildə verilməsi üçün ödənişin bank xidmətləri vasitəsilə həyata keçirilməsi tapşırığını vermişdi.
Hətta insanların rahatlığını təmin etmək üçün adlarına heç bir bank kartı olmayanlara pulsuz hesab açıldı. Dövlət vəsaitlərindən sui-istifadə hallarının qarşısını almaq üçün atılan bu addım yüksək qiymətləndirildi. Artıq vətəndaşların bəzilərinə müvafiq bank şöbələrinə yaxınlaşaraq kartlarını götürmələri ilə bağlı mesaj da gəlib.
Ancaq bankların qarşısındakı mənzərə yenə ürəkaçan deyil. Sıxlıq, uzun növbələr, sosial məsafənin saxlanılmaması – bir sözlə karantin tələblərinə uyğun olmayan görüntülər... Vətəndaşlar bildirir ki, verilən üç saat onlara bəs etmir. Demək olar ki, həmin zaman növbədə keçir.
Əmək və Əhalinin Sosial Müdafiəsi Nazirliyinin məlumatına görə, işsiz və aztəminatlılar üçün nəzərdə tutulan birdəfəlik ödəmə proqramına bu vaxta qədər müraciət etmiş 320 min vətəndaşın aktiv əmək müqaviləsi olduğu müəyyən olunub. Bu səbəbdən həmin şəxslərə ödəmənin verilməsindən imtina edilib və onlara göndərilən SMS-də imtinanın səbəbi göstərilib.
İkinci ay üçün ödənişin təyin olunması ilə bağlı mesaj gəlməyən şəxslərə də yaxın vaxtlarda bildiriş gələcək. (Oxu.Az)
Milli Məclis Baş Prokurorun vəzifəyə təyin olunmasını müzakirə edib.
Azərbaycan prezidenti İlham Əliyevin yeni Baş prokurorla bağlı təqdimatını Milli Məclisə Azərbaycan Respublikası Prezidentinin Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev təqdim edib. Ə.Vəliyev bildirib ki, Prezident yeni Baş prokuror postuna Kamran Əliyevi təqdim edib. O deyib ki, K. Əliyevin prokurorluq orqanlarında fəaliyyəti yüksək qiymətləndirərək ona belə bir yüksək etimad göstərilib.
Məsələ ilə bağlı çıxış edən Milli Məclis sədrinin birinci müavini Əli Hüseynli bildirib ki, hələ 2000-ci illərin əvvəllərində prokurorluqda geniş islahatlar həyata keçirilib və gənc hüquqşünaslar işə qəbul edilib.
“Bu müddət ərzində 902 gənc hüquqşünas prokurorluq orqanlarında fəaliyyətə başlayıb. Bu gün prokurorluğun 70 faizi gənc kadrlardan ibarət olsa da, peşəkardırlar. Ümumiyyətlə, prokurorluq uğurlu fəaliyyət göstərir və bu fəaliyyətdə K.Əliyevin də rolu olub. Əminəm ki, K. Əliyev ona göstərilən etimadı doğruldacaq”-Ə.Hüseynli bildirib.
Məsələ səsə qoyularaq qəbul edilib.
Bu gündən sənaye balıq ovuna qadağa tətbiq olunur.
Dövlət Ekoloji Təhlükəsizlik Xidməti verdiyi məlumata görə, qadağanı pozanlar ən sərt qaydalarla cəzalandırılacaqlar.
Hər vətəndaş 5 kiloqrama qədər balıq tuta bilər. Amma tövsiyə edilir ki, kürüləmə dövründə balıq ovu azaldılsın.
Qadağalar kütləvi şəkildə olan balıq ovuna aiddir. Bir vətəndaş il ərzində 2 kiloqramdan bir az artıq balıq istifadə edir.
Xüsusi olaraq indi elə müəssisə yoxdur ki, sırf balığı yetişdirib dənizə buraxsın. Balıqların yetişdirilməsi işi ilə Ekologiya Nazirliyinin müvafiq strukturu məşğul olur. 600 akvakultura müəssisəsi qeydə alınıb
Ekologiyanın mühafizəsində dövlət və vətəndaş həmrəyliyi vacibdir
Hesab edirəm ki, insanlar koronavirusla bağlı tətbiq edilən karantin rejiminin ləğv edilməsinə sevinmək əvəzəinə, özü-öz həkimi olmaq haqqında daha ciddi düşünməlidir. Aydındır ki, karantin rejimi mayın 4-də bitməyəcək, ola bilsin ki, karantinin şərtləri bir qədər yumşalacaq. Ammma inanmıram ki, mayın 4-dən, məktəb, universitet və ya restoran kimi kütləvi insanların olduğu obyektlər açılacaq. Bunlar mərhələli formada açılacaq və bu mayın 4-5-də olmayacaq. Hazırda kiçik mağazalar açılıb, amma insanların daha çox müraciət etdiyi mollar bağlıdır. Hesab edirəm ki, bunlar düzgün addımdır. Mayın 4-dən sonra karantinin şərtləri yumşalacaq. Normal həyata dönüş isə aparılan testin nəticələri və statistik göstəricilərdən asılıdır.
Pravda.az xəbərinə görə, bu fikirləri psixololoq Azad İsazadə mayın 4-dən sonra ləğv olunacaq karantin rejimi və Covid-19 pandemiyasının təhlükəsi mövzusunda danışarkən deyib. Mütəxəssis bildirib ki, hazırda virusla bağlı Azərbaycanda təhlükəli statistika yoxdur: "Amma hər şey ola bilər. Biz gördük ki, aprelin 27-də küçələrə çıxmaq müddəti 1 saat uzadıldı. Hələ karantin rejimi tam başa çatmayıb, amma küçələrə insanlar çoxdur. Bir az yumşalma buna dərhal təsir etdi. Məncə, yoluxma sayında azalma müşahidə olunduqca karantin rejiminin şərtlərində yumşalma olacaq. Ancaq mayın əvvəlində həyatın tam bərpa olunacağı, insanların kütləvi şəkildə bir araya gəlməsi kimi hallar olmayacaq. Belə düşünüb sevinən insanlar varsa, fikirlərini dərhal dəyişməli və hətta hər şeyiin normal axarında getməsi halında özünü qorumaq haqda düşünməlidir”. Psixoloq əlavə edib ki, Azərbaycan Covid-19-un ilk dağasının təhlükəsini keçirə bilib: "Hökumət müəyyən qabaqlayıcı tədbirlər həyata keçirdi, karantin rejimi tətbiq edildi və s. Nəticədə biz birinci dalğanın təhlükəsindən xilas ola bildik. Amma bu o demək deyil ki, ikinci dalğa ola bilməz. Əgər mayın 4-dən sonra hamı küçəyə çıxacaqsa, insanlar kütləvi şəkildə bir yerlərə toplaşacaqlarsa, deməli pandemiyanın ikinci dalğası baş verəcək. Bunu insanlarımız bilməli və indiyə qədər yoluxmama üçün verilən məsləhətlərə bundan sonra da əməl etməlidir. Biz ikinci dalğaya hazır olmalıyıq. Bunun üçün mayın 4-dən sona da bir sıra ənənəvi vərdişlərimizdən birdəfəlik imtina etməliyik. Məsələn, yaxın 2-3 ayda əllə görüşməyi minimum azaltmalıyıq. Küçədə göüşüb-öpüşmək birmənalı aradan qalxmalıdır. İctimai nəqliyyatda və mağazalarda qoruyucu maskada gəzmək məsləhət görürəm. Həmçinin əl-üzümüzü daima yumaq prosedunu da davam etdirməliyik. Bir sözlə, may gəldi, təhlükə sovuşdu məsələsi yoxdur. İndiyə qədər diqqətli olduğumuz kimi bundan sonra da olmaqda davam etməliyik. Mən insanları işi olmadıqca şəhərə gəzməyə, küçələrə çıxmamağa da dəvət edirəm”.