 |
|
Prezident İlham Əliyev bir müddət əvvəl Əmək və Əhalinin Sosial Müdafiəsi naziri Sahil Babayev və İqtisadiyyat naziri Mikayıl Cabbarrovla keçirdiyi videokonfrans zamanı may ayı üçün nəzərdə tutulan 190 manat birdəfəlik ödəmənin vətəndaşlara nağdsız, rahat və şəffaf şəkildə verilməsi üçün ödənişin bank xidmətləri vasitəsilə həyata keçirilməsi tapşırığını vermişdi.
Hətta insanların rahatlığını təmin etmək üçün adlarına heç bir bank kartı olmayanlara pulsuz hesab açıldı. Dövlət vəsaitlərindən sui-istifadə hallarının qarşısını almaq üçün atılan bu addım yüksək qiymətləndirildi. Artıq vətəndaşların bəzilərinə müvafiq bank şöbələrinə yaxınlaşaraq kartlarını götürmələri ilə bağlı mesaj da gəlib.
Ancaq bankların qarşısındakı mənzərə yenə ürəkaçan deyil. Sıxlıq, uzun növbələr, sosial məsafənin saxlanılmaması – bir sözlə karantin tələblərinə uyğun olmayan görüntülər... Vətəndaşlar bildirir ki, verilən üç saat onlara bəs etmir. Demək olar ki, həmin zaman növbədə keçir.
Əmək və Əhalinin Sosial Müdafiəsi Nazirliyinin məlumatına görə, işsiz və aztəminatlılar üçün nəzərdə tutulan birdəfəlik ödəmə proqramına bu vaxta qədər müraciət etmiş 320 min vətəndaşın aktiv əmək müqaviləsi olduğu müəyyən olunub. Bu səbəbdən həmin şəxslərə ödəmənin verilməsindən imtina edilib və onlara göndərilən SMS-də imtinanın səbəbi göstərilib.
İkinci ay üçün ödənişin təyin olunması ilə bağlı mesaj gəlməyən şəxslərə də yaxın vaxtlarda bildiriş gələcək. oxu.az
Aprelin 27-dən karantin rejimin yumşaldılmasından sonra çölə çıxan insanların sayı çoxalıb. Təəssüf ki, çölə çıxan insanların bir çoxu maska və əlcəkdən istifadə etməməklə yanaşı sosial məsafəni qorumurlar.
İnsanların bu addımı koronavirusun ikinci dalğasının gəlməsinə səbəb ola bilərmi?
Bununla bağlı Sonxeber.az-a danışan Milli Məclisin Əmək və sosial siyasət komitəsinin sədri Musa Quliyev bildirib ki, karantin rejiminin yumşaldılması göstərdi ki, insanlarımızın çoxusu məsələnin nə qədər ciddi olduğunu başa düşmür:
"Ümumi intizam və mədəniyyət qaydalarına riayət etmir. Ola bilər ki, buna görə də Operativ Qərargah karantin rejimini uzada bilər. Yaxud da ikinci dalğa gəlsə, uzunmüddətli karantin rejimə keçə bilərik. Ona görə də insanlara müraciət edirik, sosial izolyasiya və qoruyucu vasitələrdən istifadə qaydalarına tam əməl etsinlər.
Bu çox ciddi məsələdir. Havalar isinir. Karantin rejiminin ciddi aparıldığı dövrdə yaxşı nəticələr əldə etdilər. Görünür, bu insanlarımızı arxayınlaşdırıb. Düşünürəm ki, buna ehtiyac yoxdur. Son günlərdə artıq koronavirusa yoluxanların artığını görürük. Bu bizi narahat edib, düşündürməlidir.
Koronavirus təhlükəsi hələ bitməyib. Ola bilsin ki, bu virus bir neçə müddət davam etsin. Dünyada koronavirusa son qoyulan zaman biz arxayın ola bilərik. Ona görə də vətəndaşlarımız bir qədər ehtiyatlı və diqqətli olmalıdırlar.
Qoruyucu vasitələrdən istifadə etməlidirlər. Lazım olmayan vaxtlardan insanlar çölə çıxmalı deyillər. Vətəndaşlarımız zəruri olmadığı hallarda insanların çox toplaşdığı yerlərdə olmasınlar.
Bundan əlavə insanlarımız sosial məsafəni qoruyaraq izolyasiya qaydalarına riayət etsinlər. Koronavirus çox ciddi məsələdir. Vətəndaşların belə tez arxayınlaşması bizi narahat etməlidir".
"Güman edirəm ki, məktəblilərin yay tətilinin ləğv olunması üçün əsas yoxdur".
"Report" xəbər verir ki, bunu Təhsil nazirinin müavini Məhəbbət Vəliyeva deyib.
Nazir müavini qeyd edib ki, şagirdlərin istirahət hüquqları yəqin əllərindən alınmaz:
"İstərdim ki, əvvəlki illərdən fərqli olaraq yay tətilini şagirdlər bu il fərqli qiymətləndirsinlər. Çünki dərs ili başladıqdan sonra boşluqların aradan qaldırılması yalnız müəllim və məktəbin qayğıları olmayacaq. Bunun üçün yay tətitli müddətində şagirdlər də bu boşluqların aradan qaldırılması üçün öz töhfələrini vermək üçün hazırlaşmalıdırlar".
“Vəziyyət tələb edərsə, dərs ili vaxtından əvvəl başlaya bilər”.
Oxu.Az məlumatına görə, bunu Təhsil nazirinin müavini Məhəbbət Vəliyeva “Yeni” TV-nin canlı yayımında bildirib.
Onun sözlərinə görə, bu məsələ Təhsil Nazirliyinin yox, Nazirlər Kabinetinin səlahiyyətindədir:
“Biz yalnız vəziyyəti şərh etmək üçün təkliflərimizi təqdim edə bilərik. Nazirlər Kabinetinin qərarından asılı olaraq, tədris ilinin başlanma vaxtı müəyyənləşdiriləcək”.
“Dərslər ənənəvi olaraq sentyabrın 15-də başlayır. Burada proqramdan geriləmələr var. Hazırda Təhsil Nazirliyi olaraq dərs ilinin sonuna dair məsələləri və yay aylarında görəcəyimiz işləri müzakirə edirik”.
2020-ci ildə turizm sektoru dünyanı bürüyən koronavirus pandemiyası ilə əlaqədər ən çətin dövrünü yaşayır. Bu müddətdə rəqabətin artacağı, səyahətlərin daha qısa olacağı, daha ucuz otellərə üstünlük veriləcəyi gözlənilir. Pandemiya iqtisadiyyatın müxtəlif sahələrinə öz mənfi təsirlərini hiss etdirib. Onun, ən çox ziyan vurduğlarından biri, turizm və restoran sektoru, iaşə obyektləri oldu. Demək olar ki, böhran bu sahələri iflic vəziyyətinə saldı.
Hazırda bütün turizm obyektləri yay mövsümünə hazırlaşır. Lakin pandemiyanın davam etməsi, turizm sahəsində çalışan insanların əl qolunu bağlayıb, onları çaş-baş vəziyyətdə qoyub. Bu böhran davam etməkdə, dərinləşməkdədir. Qarşıdakı mövsümdə turizm sahəsinin ciddi böhran yaşayacağı görünür. Pandemiyanın davam etməsi turizm strategiyasının müəyyənləşməsində də çətinlik yaradır. İndi hamını turizm sektorunun hansı addımlar atacağını, özünü qısa zamanda necə toplayacağı maraqlandırır. Bu zaman qiymətlərdə dəyişiklik müşahidə olunacaqmı?
Bununla bağlı, turizm sahəsinin mütəxəssislərinin mövqeyini öyrənməyə çalışdıq.
Turizm şirkətinin rəhbəri, bu sahə üzrə mütəxəssis Barat Əlizadənin fikrincə, bu dönəmdə ən əsası insanlarda səyahətə maraq yaratmaq üçün alternativ yollardan istifadə olunmalıdır.
“Bu dönəmdə iqtisadiyyata dəyən zərəri qarşılamaq üçün, qiymətlər ucuzlaşmalı ən azından eyni saxlanılmalıdır ki, bir az maraq oyansın. Mənim fikrimcə, bu çətin şəraitdə insanların səyahət etmək qorxusu olduğu halda heç bir sahibkar qiymət qaldırmağa risk etməz. Bu baxımdan hər hansı bir qiymət artımı barədə söz ola bilməz. Lakin bu məsələyə başqa aspektdən baxsaq, iqtisadiyyatın kiçilməsinə, şirkətlərə dəyən böyük zərərlərə görə, qiymət artımı gözləmək də olar. Yenə deyirəm, bu da böyük risk almaq deməkdir.
Məsələn, hər hansı bir ölkədə devalvasiya olduqda, bütün sahələrdə artım müşahidə olunur. O zaman, hər bir şeyin qiyməti artır, çünki bu proses zəncirvari qaydada bir–biri ilə bağlıdır. Qida məhsullarının qiymətində artım olursa, mütləq şəkildə bu turizm sahəsində də özünü büruzə verir. Lakin pandemiya ərəfəsində bu məsələnin digər alternativ yolları da düşünülməlidir. Bir mütəxəssis kimi deyə bilərəm ki, turizmə maraq yaratmaq üçün, qiymətlərdə nəinki artım olmamalıdır, hətta müəyyən endirimlər belə olmalıdır”, - deyə, o, bildirib.
B. Əlizadə dünyada turizm sezonunun nə zaman açılması barədə də proqnoz verib.
“Xarici dövlətlərə nəzər salsaq, qardaş ölkə Türkiyədə turizm sezonunun açılışı avqust ayında planlaşdırılır. Ancaq hazırda dünyadakı pandemiya böhranına görə, bunu tam dəqiq proqnozlaşdırmaq olmur. Vəziyyətə görə, bu 6 aydan 1 ilə qədər uzadıla bilər. Çünki insanlarda səyahət etmək qorxusu var. Mənim fikrimcə, buna görə də səyahətlər 6 aydan tez başlamayacaq”.
B.Əlizadə ölkədaxili səyahətlərin başlanacağı vaxtan da danışıb.
“Düşünürəm ki, 3 aydan sonra - iyul, avqust aylarında insanlar ölkədaxili səyahət etməyə başlayacaqlar. Artıq bəzi şirkətlər kənd, eko turizm üçün xüsusi səyahət turları hazırlayıblar. Ancaq hələ ki, burada da qiymətlər açıqlanmayıb. Pandemiyaya görə dünyadakı vəziyyət dəqiq proqnozlaşdırıla bilinmədiyi üçün xüsusi qiymət strateqiyası da açıqlana bilməz. Bu da, birbaşa turizm sektoruna mənfi təsirini göstərir”, - deyə, B. Əlizadə vurğulayıb.
Hazırladı: Vüsalə Balayeva
İşsiz və xüsusi karantin rejiminə görə işini itirən qeyri-formal məşğul şəxslərdən ibarət aztəminatlılar üçün nəzərdə tutulan birdəfəlik ödəməni (190 manat) almaq məqsədilə müraciət edənlərdən 20 min şəxsin adında iki və daha çox daşınmaz əmlakı olduğu müəyyən edilib.
İqtisadiyyat Nazirliyi yanında Əmlak Məsələləri Dövlət Xidmətinin informasiya bazasından əldə edilmiş məlumatlar əsasında iki və daha çox daşınmaz əmlakı olduğu aşkar edilən həmin vətəndaşlara birdəfəlik ödəmə verilməsindən imtina olunub.
Bu barədə onlara SMS göndərilib. Həmin vətəndaşların sırasında 5, 10, hətta 40-dan çox əmlakı olan şəxslər də var.
Birdəfəlik ödəmə almaq üçün edilən müraciətlər müxtəlif dövlət qurumlarına məxsus olan ümumilikdə 25-dək elektron informasiya sistemlərindən əldə edilmiş məlumatlar əsasında emal olunaraq təhlil edilir və nəticəsinə uyğun obyektiv qərar verilir. Aztəminatlılıq meyarlarına uyğun gəlməyən şəxslərə birdəfəlik ödəmə təyin edilmir.
Xatırladaq ki, aprelin 27-nə olan məlumata görə, 400 min şəxsə birdəfəlik ödəmə təyin edilərək ödənişi aparılıb.
Birdəfəlik ödəmə almaq üçün edilmiş müraciətlərə baxılması prosesi davam edir. Daha 200 min şəxsə də ödəniş ediləcək. /oxu.az
“Bu gün koronavirus pandemiyası təhlükəsiz tam ötüşməyib və onun yenidən geri qayıtma ehtimalı var. İnsanlarımızın maskasız gəzməsi, pandemiya ilə bağlı tətbiq edilən qaydalara ciddi riayət etməməsi ciddi narahatçılıq yaradır”.
Bunu açıqlamasında millət vəkili Fazil Mustafa deyib.
Onun sözlərinə görə, insanlar qaydalara riayət etməzlərsə proses yenidən geri qayıda bilər. “Bu da ağır nəticələrə səbəb ola bilər. İnsanlarımızın çoxunda hələ də bu təhlükənin ciddiliyi hiss olunmur. Son günlərdə müşahidələrimiz bunu deməyə əsas verir. Bu çox ciddi narahatçılıq yaradan məsələdir”- deputat bildirib.
O bildirib ki, bu istiqamətdə maarifləndirmə işlərini gücləndirmək lazımdır. “Hesab edirəm ki, bununla paralel olaraq qaydalara riayət emtəyən, maska gəzdirməyənlər məsuliyyətə cəlb olunmalıdır. Çünki maskasız gəzmək ciddi fəsadlara gətirib çıxara bilər. Maska gəzdirməklə insan təkcə özünü deyil, digərini qorumalıdır. Epidemiyanın təkrar qayıtmaması üçün cəzalar sərtləşdirilməli, buna ciddi əməl olunmalıdır. Qaydalara riayət etməyənlər məsuliyyətə cəlb olunmalıdır”- F. Mustafa bildirib.
Azərbaycanda koronavirusa görə tətbiq edilən xüsusi karantin rejimi mayın 4-də başa çatacaq. Bəs, bölgələrdən Bakıya gələnlərə yenə də qadağalar tətbiq ediləcəkmi?
"ARB xəbər" mövzu ilə bağlı maraqlı süjet hazırlayıb.
Daha ətraflı videodan izləyin. Qeyd edək ki, Azərbaycanda koronavirusla əlaqədar olaraq karantin rejimi may ayının 4-dək uzadılıb.
Azərbaycanda ilk koronavirusa yoluxma halı 28 fevralda qeydə alınıb.
Karantin rejiminin hökm sürdüyü bir vaxtda ləğv olunan toy və el şənlikləri restoran və şadlıq saraylarına ciddi ziyan vurub. Mütəxəssislərin fikrincə, pandemiyadan sonra toy etmək istəyənlərin sayında müşahidə olunan artım olacaq. Bu da restoran sahiblərini hərəkətə gətirib. Onlar yeni toy mövsümünə xüsusi hazırlaşır. İndi hamını maraqlandıran bir sual var. Şadlıq saraylarında qiymət artımı olacaqmı?
İstədik öyrənək görək, şadlıq saraylarının toy qiymətlərində hansı dəyişikliklər var? Hazırda restoranların qarşısında daha çox müştəri cəlb etmək, toy bazarını dirçəltmək məqsədi durur. Bu səbəbdən bir çox restoran sahibləri qiymətlərin dəyişmədiyini bildirib.
“Şahənşah” sarayının administratoru karantindən əvvəlki qiymətlərin qüvvədə qalacağını və toy üçün müraciətlərin sayının çoxluğuna görə artımın gözlənilmədiyini deyib. O, 500-550 nəfərlik tutumu olan zallarda 200 nəfərlik toy qəbul etmədiklərini də qeyd edib. Ancaq burada da bəzi istisnalar olduğunu qeyd edib. Bundan başqa restoranda xüsusi endirimlər də mövcuddur. Menyunun qiyməti isə 40-60 manat arasında təşkil edir.
“Ay işığı” şadlıq sarayında isə fərqli mənzərə hakimdir. Burada qiymətlər 80 manatdan başlayaraq 100 manata kimi yüksəlir. VİP müştərilər üçün nəzərdə tutulan menyu isə 150 manatdır. Onu da qeyd edək ki, restoranın qiymətlərinə bir neçə xidmət də daxildir.
“Gilavar” restoranında qiymətlər isə 40 manatdan başlayır. Ən yüksək menyu 60 manatdır. Restoranın adminstratoru məkana gəlib yerində danışıqlar aparıldığı zaman xüsusi endirim etdiklərini də qeyd edib.
“Xan sarayı” isə menyunu müştərilərinə 45 manatdan başlayan qiymətlərlə təklif edir. Hətta burada qonaq sayına uyğun xüsusi endirimlər də mövcuddur. Restoranın administratoru qonaq sayının 200-250 nəfər olduğu təqdirdə, menyunun endirimli qiymətinin dəyişilməz olaraq 45 manat olacağını da qeyd edib.
Digər restoranlarda da vəziyyət eynidir. Karantindən sonra qiymətlərdə artımın olmayacağını deyən növbəti restoran “Meridian saray” oldu. Burada menyunun qiyməti 80- 120 manat arasında dəyişir. Restoran yay aylarında baş tutan toy məclislərinə isə xüsusi endirimlər təklif edir.
“Mega palace” restoranında menyunun stabil qiyməti 30 manatdır. Məkanın administrator qiymətlərin 30-35 manat arasında dəyişdiyini bildirib. Burada qiymətlərə musiqi ansamblı, video çəkiliş də daxildir.
“Cıdır düzü” restoranında isə qiymətlər 45 manatdan başlayaraq, 80 manata qədər yüksəlir. Burada da müştərilərə xüsusi olaraq VİP menyu da təklif olunur. Bu menyunun qiyməti 120 manatdır.
Bank rəhbərləri Mərkəzi Bankın tövsiyyələri əsasında krediti olan vətəndaşlara edilən güzəştlərin tətbiqi mexanizmini müzakirə ediblər. Müzakirə edilən əsas məsələlərdən biri fiziki şəxslər tərəfindən alınan istehlak kreditlərində yarana biləcək gecikmələr olub.
Kreditini ödəyə bilməyən vətəndaşlar mütləq banklara müraciət etməlidirlər. Əgər vətəndaş koronavirus pandemiyasından zərər çəkibsə, onun kredit müqaviləsi bank tərəfindən yumuşaldılacaq və ona kreditin ödənilməsi üçün sentyabr ayının 30-a qədər müəyyən möhlət veriləcək.
Bunu Azərbaycan Banklar Assosiasiyasının icraçı direktoru Yunus Abdulov deyib. O bildirib ki, Assosiasiyasının Rəyasət Heyətinin iclasında Mərkəzi Bankın qəbul etdiyi qərarın və banklara verdiyi tövsiyyələrin tətbiqi mexanizmi müzakirə edilib.
Əsas müzakirə obyekti fiziki şəxslər tərəfindən alınan istehlak kreditlərində yarana biləcək gecikmələr olub. Yunus Abdulov qeyd etdi ki, bank və bank olmayan kredit təşkilatları bu məsələdə müştərilərə həssas yanaşacaq və mərkəzi bankın tövsiyyələrini əsas götürəcək. Martın 1-ə qədər keyfiyyəti qənaətbəxş olan və pandemiya ilə əlaqədar kredit borcunu gecikdirən fiziki şəxslərə güzəştlər ediləcək.
Banklara müraciət edən və kreditini ödəməkdə çətinlik çəkənlərin kredit tarixçəsi də korlanmayacaq. Banklar belə müştəriləri kredit bürolarına xüsusi qeydlərlə təqdime dəcək.
İclasda həmçinin fiziki şəxslərə ipoteka və kredit zəmanəti fondunun vəsaiti hesabına verilən kreditlər də müzakirə edilib.Bu təyinatlı kreditlərə güzəşt edən bank və kredit təşkilatlarının requlyativ yükü mərkəzi bank tərəfindən azaldılacaq.
Yunus Abdulov deyir ki, kredit borcu olan sahibkarlara kredit ödənişinin gecikməsi zamanımüəyyən güzəştlər ediləcək. Mart ayının 1-ə qədər kredini normal ödəyən sahibkarlar restrukturizasiya ilə bağlı banklara müraciət edə bilərlər.
Bu arada mərkəzi bank, bank və bank olmayan kredit təşkilatlarının tibii ləvazimat və avadanlıq istehsalçılarına verdikləri kreditlərin risq səviyyəsini azaldıb.Bununla da,banklar və kredit təşkilatları bu sahəyə kredit verməkdə daha çox maraqlı olacaq və müştərilərə cəlbedici təkliflər verəcək.