 |
|
ABŞ prezidenti Co Bayden Ağ Evdə demokrat qubernatorlarla qapalı görüşdə keçmiş Amerika lideri Donald Trampla teledebatda uğursuz çıxışından sonra tibbi müayinədən keçib.
Bu barədə “Politico” yazıb.
Nəşrin yazdığına görə, Bayden keçən həftə tibbi müayinədən keçib və özünü yaxşı hiss edir.
Dövlət başçısının iş qrafiki ilə tanış olan mənbə qeyd edib ki, Bayden çox güman soyuqdəymə əlamətləri ilə bağlı adi tibbi müayinəsindən keçib.
Onun sözlərinə görə, buraya ciddi yoxlamalar daxil olmayıb.
Belarus Ukrayna ilə sərhəddə nüvə başlıqlı raketləri daşıya bilən “İsgəndər” operativ-taktiki raket komplekslərini yerləşdirib.
Bunu Belarus lideri Aleksandr Lukaşenko özü bəyan edib.
Lukaşenko bu addımını Ukrayna hərbçilərinin Belarus sərhədlərinə yaxın ərazidə fəallığının artması ilə izah edib.
"Bu səbəbdən də “Polonez” və “İsgəndər” raket sistemləri Ukrayna ilə sərhədə göndərilib. Onların hansı döyüş sursatı olduğunu siz də bilirsiniz”, - Lukaşenko deyib.
O eyni zamanda əlavə edib ki, bundan əlavə olaraq Belarus və Rusiyanın Hərbi-Hava Qüvvələri və Hava Hücumundan Müdafiə qüvvələri yüksək döyüş hazırlığı vəziyyətindədir.
Lukaşenko Ukraynanı sərhəddə qarşıdurma törətmək cəhdləri ilə bağlı xəbərdarlıq edib. “Hər hansı “qırmızı xətt” yoxdur. Əvvəlcədən müəyyən edilmiş hədəflərə bütün növ silahlarla zərbələr endiriləcək. Biz bunu edəcəyik”, - Lukaşenko vurğulayıb.
Lukaşenko onu da bildirib ki, belə bir hadisə baş verərsə, bu, ukraynalılar üçün çətin olacaq. "Ona görə də ukraynalılardan xahiş edərdim ki, odla oynamasınlar. Bu, çox təhlükəlidir”, - Lukaşenko qeyd edib.
İsrail son 30 ildə Fələstinin İordan çayının qərb sahilindəki 1270 hektarlıq ərazini öz dövlət ərazisi elan edib.
Kommersant" xəbər verir ki, bu ərazilərin İsrailin tərkibinə keçməsi rəsmi Təl-Əvivin iyunun 25-də imzaladığı və iyulun 3-də dərc olunan bəyannaməsində qeyd olunub.
Bununla bağlı Şalom Axşav hüquq müdafiə təşkilatı sənədə istinadən bildirib ki, bu, İsrailin son 30 ildə ilhaq etdiyi və öz ərazisnə qatdığı ən böyük Fələstin ərazisidir.
Hüquq müdafiəçiləri qeyd ediblər ki, 1270 hektar əraziyə daxil olan ərazinin əhəmiyyətli hissəsi əvvəllər beynəlxalq ictimaiyyət tərəfindən qoruq və hərbi təyinatlı yanğın zonası kimi müəyyən edilib. Elan edilmiş dövlət torpaqları artıq fələstinlilərin şəxsi mülkiyyəti hesab edilmir və onlar ondan istifadə imkanından məhrumdurlar. İsrail bu torpaqları ancaq israillilərə icarəyə verir.
Qeyd edək ki, İordan çayının qərb sahilinin böyük hissəsi Fələstin Muxtariyyətinin nəzarəti altındadır.
"Bütün dünya əmindir ki, Fransanın hazırkı Prezidenti Emmanuel Makron sonda bəlkə də kiminsə düşündüyündən tamamilə fərqli nəticələrə gətirib çıxaran tələsik addımlar atır".
Bu barədə "Caliber" "Youtube" kanalının süjetində deyilir.
"Bu cür uğursuz təşəbbüslərin bütün nümunələrini bir araya toplamaq və saymaq çətindir. Makronun Fransa dövlətinin başında olduğu müddətdə, xüsusən də Azərbaycanla Ermənistan arasında 44 günlük müharibədən sonra nə qədər qarışıqlıq yaratdığı barədə az yazılmayıb.
Bəzən elə təsəvvür yaranır ki, bu ölkənin prezidenti artistik şəkildə rola girərək, "Bəxtsiz" filmində möhtəşəm rol oynayan istedadlı həmyerlisi Pyer Rişarın uğurlarına görə əzab çəkir", - deyə süjetdə qeyd olunub.
Ermənistan 28 illik bir dövrdə beynəlxalq hüququn fundamental prinsipləri ilə razılaşmaq istəmədi. Onlar bütün humanitar qanunları pozdular, BMT Təhlükəsizlik Şurasının erməni qoşunlarının Azərbaycanın işğal olunmuş torpaqlarından dərhal və qeyd-şərtsiz çıxarılmasını tələb edən müvafiq qətnamələrinə məhəl qoymadılar. Heç kim onlara zərrə qədər də irad tutmurdu.
Bunu Azərbaycan Respublikasının Prezidenti İlham Əliyev iyulun 1-də Kanadanın ölkəmizdə yeni təyin olunmuş fövqəladə və səlahiyyətli səfiri Kevin Hamiltonun etimadnaməsini qəbulu edərkən deyib.
Dövlət başçısı bildirib ki, münaqişə barədə danışan bir çox ölkələr Azərbaycanın ərazi bütövlüyünə sadiqlik bəyan etmirdilər.
Prezident İlham Əliyev vurğulayıb ki, indi - biz Ermənistanın işğalçı ordusuna döyüş meydanında qalib gəldikdən və onları torpaqlarımızdan qovduqdan sonra bizim ərazi bütövlüyümüzə dəstəklə bağlı bəyanatlar eşidirik: “Amma biz bunu artıq özümüz təmin etmişik. Kiminsə bizim ərazi bütövlüyümüzü tanıyıb-tanımaması mahiyyət kəsb etmir”.
Azərbaycan Prezidenti qeyd edib ki, bu, torpaqlarımız işğal altında olan bir dövrdə önəmli idi: “Bəli, bir sıra Qərb ölkələrində ermənipərəst sentimentlərin mövcudluğu, erməni diasporunun rol oynaması məlumdur. Amma beynəlxalq hüquqa gəldikdə bu emosiyalar kənara qoyulmalıdır. Lakin bunu anlamaq önəmlidir ki, 28 illik bir dövrdə razılaşdırıla bilməyən məsələlərinin 1-2 ilə həll edilməsi çətindir. Həm də Azərbaycan ilə Ermənistan arasında substantiv danışıqlara demək olar ki, dekabr ayında başlanılıb. Çünki ondan əvvəl Ermənistan sülh müqaviləsinə dırnaqarası “Dağlıq Qarabağ” məsələsini salmaq istəyirdi və bu, qəbuledilməz idi”.
Prezident İlham Əliyev vurğulayıb ki, çünki bu, bizim daxili məsələmizdir: “Beləliklə, separatçı rejim ləğv edildikdən sonra dekabr ayından başlayaraq danışıqlar cəmi 6 aydır gedir”. Dövlətimizin başçısı bildirib ki, buna zaman lazımdır və əlbəttə, sülh sazişinin başlıca şərti Ermənistanın konstitusiyasının dəyişdirilməsidir: “Çünki onun tərkibində Azərbaycana qarşı ərazi iddiaları var və bu, baş verməyənə qədər sülh sazişi imzalanmayacaq. Bu, məlum məsələdir”.
Politoloq Zeynal Əmrəliyev “Sherg.az”a bildirib ki, cənab Prezidentin çıxışı beynəlxalq hüquqa əsaslanan açıqlamadır:
“Yəni bu ədalət prinsiplərinə əsaslanır. Həqiqətən də BMT Təhlükəsizlik Şurası Ermənistanı bu müddət ərzində heç zaman qınamadı. Baxmayaraq ki, Ermənistan Azərbaycan torpaqlarını 30 ilə yaxın işğal altında saxladı və həmin torpaqları vəhşicəsinə istismar etdi. Eyni zamanda, 1000000-dan çox vətəndaşmızı qaçqın və məcburi köçkün vəziyyətində saxlayıb. Ancaq beynəlxalq birlik sözügedən məsələlərə sakit qalırdı və Azərbaycanı status-kvo ilə razılaşmağa çağırırdı. Azərbaycan isə 44 günlük Vətən müharibəsi ilə yeni reallıq yaratdı. Öz doğma torpaqlarını ədalətli şəkildə azad etdi. İndi isə həmin beynəlxalq birlik vayşüvənlik qopararaq Qarabağdan ermənilərin məcburi çıxarılmasını iddia edir və onların hüquqlarına dair fikirlər səsləndirirlər. Amma həmin ermənilər faktiki olaraq könüllü şəkildə torpaqlardan çıxdılar. Cənab Prezidentin də qeyd etdiyi kimi sülh müqaviləsinin başlıca şərti Ermənistan konstitusiyasında olan maddələrin dəyişdirilməsidir. Çünki Azərbaycan qalıcı sülhün tərafdarıdır. Ermənistanın konstitusiyası isə sonrakı müharibə üçün rəsmi İrəvanda situmul rolunu oynaya bilər”.
"Biz HƏMAS-ın terrorçu ordusunun məhv edilməsi mərhələsinin sonuna yaxınlaşırıq və onun qalıqlarına qarşı zərbələr davam edəcək".
"Bu barədə İsrailin baş naziri Benyamin Netanyahu məlumat verib.
“Biz bütün məqsədlərimizə nail olacağıq: girovlarımızın qaytarılması, HƏMAS-ın hərbi və inzibati imkanlarının aradan qaldırılması və Qəzza zolağının təhlükəli olmamasının təmin edilməsi. Bizim çox geniş cəbhəmiz var və əminəm ki, biz düşmənlərimizi məğlub edə bilərik”, - Netanyahu vurğulayıb.
Suriyada sülhə xidmət edəcək əlavə addımların atılması mümkündür
Bunu Türkiyə Prezidenti Rəcəb Tayyib Ərdoğan bildirib.
“Qonşu Suriyada 13 ildən artıqdır davam edən və 1 milyon insanın həyatına son qoyan münaqişənin siyasi həllini tapmağa çox çalışdıq. Sülhə və əmin-amanlığa xidmət edəcək əlavə addımların atılması mümkündür”, - Ərdoğan vurğulayıb.
Ermənistanın baş naziri Nikol Paşinyan “Demokratiya uğrunda Ermənistan forumu”nda çıxışı zamanı ölkədə demokratiyanın keyfiyyətindən narazı olduğunu bildirib.Baş nazir qeyd edib ki, xüsusilə, yerli özünüidarəetmə səviyyəsində seçkilər kifayət qədər siyasiləşdirilməyib:
"Söz və mətbuat azadlığı ictimaiyyət tərəfindən sui-istifadə olunmamalıdır. Bizim üçün demokratiya strategiyadır və hökumət bu strateji yolu davam etdirəcək”.
Siyasi və Hüquqi Araşdırmalar Mərkəzinin (SHAM) sədri Xəyal Bəşirov "Sherg.az"a açıqlamasında vurğulayıb ki, Paşinyanın bu açıqlaması onun xarakteri ilə ziddiyət təşkil edir:
"Çünki Nikol Paşinyan 2018-ci ildə Ermənistanda söz və mətbuat azadlığı pozulduğu üçün inqilab edərək hakimiyyətə gəlib. Bu səbədən Paşinyanın söz və mətbuat azadlığı ictimaiyyət tərəfindən sui-istifadə olunmamalıdır açıqlaması özlüyündə ziddiyyət təşkil edir. Hesab edirəm ki, Paşinyan bu açıqlaması ilə Ermənistanda hakimiyyətinə müxalif olan qüvvələri hədəf alıb. Həmin müxalif qüvvə Qarabağ savaşından sonra Azərbaycana qarşı revanşist siyasət yürüdən qüvvələrdir. Qeyd edək ki, Ermənistan baş naziri həm də konstitusiya dəyişikliyi ilə bağlı mövqe ortaya qoyub. Hesab edirəm ki, parlamentli respublikadan, prezidentli respublikaya keçmək istəyir. Çünki bu Ermənistanda Paşinyan hökumətinin ömrünü uzada bilər".
Ekspert əlavə edib ki, Paşinyan hökumətinin demokratik dəyərlərə sadiq hakimiyyətlə heç bir əlaqəsi yoxdur:
"Çünki belə olsaydı onlar İkinci Qarabağ müharibəsinə səbəb olacaq addımlar atmazdı".
İki ölkənin müxtəlif rəsmiləri tərəfindən hansı qarşılıqlı ittihamlar səsləndirilməsindən asılı olmayaraq, Ermənistanla Rusiya arasında iqtisadi əlaqələr dərinləşir.
Axar.az xəbər verir ki, bu sözləri erməni mediasına açıqlamasında iqtisadçı ekspert Suren Parsyan Ermənistan hakimiyyətinin Qərbə meyil etməsi məsələsini şərh edərkən bildirib.
O bildirib ki, bu ilin ilk 4 ayında Ermənistanın xarici ticarətinin 60 faizi Rusiya ilə olub – 2023-cü ildə bu rəqəm cəmi 35-40 faiz təşkil edib:
“Məsələn, Qərbin sanksiyaları fonunda Ermənistan Rusiyaya müxtəlif avadanlıq və mexanizmlərin alınması və onların Rusiya Federasiyasına çatdırılması probleminin həllində kömək edir. Bunun da sayəsində Ermənistandan avadanlıqların reeksportu ilə məşğul olan şirkət bu ilin birinci rübündə 1000 iri vergi ödəyicisi siyahısına başçılıq edib.
Bundan əlavə, son 5 ay ərzində Rusiya Ermənistan vasitəsilə təxminən 4,5 milyard dollar dəyərində qızıl sata bilib”.
Parsyan Ermənistanın hazırda açıq-aşkar rusiyayönlü siyasət yürütməməsini normal hesab edir, əks halda Qərbin respublikaya qarşı sanksiyaları gələrdi:
“Nəticədə biz Rusiya ilə ixrac, idxal və transfer imkanlarını itirərdik. Ermənistan hökuməti qərbyönümlü siyasət nümayiş etdirir, amma praktikada Rusiya ilə sıx maliyyə-iqtisadi əlaqələri var”.
Parsyan Ermənistan hakimiyyətinin qərbyönümlü bəyanatlarına cavab olaraq enerji daşıyıcılarının qiymətinin artması və ixracla bağlı problemlər barədə Rusiyadan xəbərdarlıqların səslənməsini təbii hesab edir:
“Unutmayaq ki, Ermənistan enerji resurslarının 80%-ni Rusiyadan idxal edir. Ermənistanın şimalında fəlakət baş verəndə Rusiyanın Cənubi Qafqaz Dəmir Yolu çox qısa müddətdə, təxminən iki həftə ərzində dəmir yolunun fəaliyyətini bərpa etdi – halbuki bu, 2-3 ay çəkməliydi. Ermənistana enerji resurslarının idxalı eyni sürətlə davam etdi, Cənubi Qafqaz Dəmir Yolu bunu gecikdirə bilərdi, amma etmədi.
Eyni şey müxtəlif səbəblərdən vaxtaşırı bağlanan Yuxarı Lars keçid məntəqəsinə də aiddir”.
“Ölkəmizin Avropa İttifaqına üzvlüyünə dair referendumun keçirilməsi məqsədəuyğun deyil”.Bunu Ermənistanın Baş naziri Nikol Paşinyan deyib.
Bununla belə, o bildirib ki, erməni xalqı avropameyillidir.
Mövzu ilə bağlı “Sherg.az”a danışan politoloq Natiq Miri bildirib ki, Paşinyan indiki vəziyyətdə Avropa İttifaqında Ermənistanı heç kəsin gözləmədiyini anlayır:
“Çünki bununla bağlı konkret təcrübə mövcuddur. 50 ildən çoxdur ki, Türkiyə Avropa Birliyinin qapısı arxasında saxlanılır. Eyni zamanda, xristian dövləti olmalarına rəğmən Ukrayna, Moldova və Gürcüstan kimi ölkələrin də Avropa Birliyinə inteqrasiya təcrübəsi var. Bu gün Ukrayna və Moldovanın Avropa İttifaqına üzvlüklə bağlı məsələnin müzakirəsinə başlanıldığı deyilir. Amma bu tam hüquqlu üzv olacaqları anlamına gəlmir. Çünki konkret standartlar var və həmin qaydalara uyğun gəlmək üçün islahatlar aparmaq lazımdır. Ermənistan isə indiki halda Avropa İttifaqına üzv ola bilməyəcəyinə görə sözügedən məsələdə tələsmək istəmir. Çünki tələskən şəkildə belə referendum qərarının verilməsi rəsmi olaraq Ermənistanın üzv olduğu digər güc mərkəzləri ittifaqlarından çıxması anlamına gələcək. Yəni qeyd olunan referendumun keçirilməsinin Rusiyanın qəzəbinə səbəb olacağını Paşinyan gözəl başa düşür. Son günlər Ermənistanın müxtəlif səviyyələrdə hədələnməsi də təsadüf deyil. Sadəcə olaraq Paşinyan hakimiyyətə yaxın və müttəfiqi sayılan siyasi partiyalar vasitəsilə daxili auditoriyanın, Rusiyanın və bu mövzuda maraqlı olan güc mərkəzlərinin fikirlərini öyrənmək üçün Avropa Birliyinə üzvlüklə bağlı referendum keçirilməsi məsələsini ortaya atdı. Paşinyan müəyyən reaksiyaları gördükdən sonra anladı ki, Ermənistan hələ hazır deyil. Əgər Ermənistan Qərbə inteqrasiyanı gücləndirib, özünün bütün sahələr üzrə təhlükəsizliyi təmin edərsə, sözügedən məsələyə yenidən baxıla bilər”.