 |
|
ABŞ prezidenti Co Bayden administrasiyasında ölkədə yüksək benzinin qiymətlərinin aşağı düşməsinə səbəb olacaq kifayət qədər ciddi təkliflər yoxdur.
Trend bildirir ki, bu barədə "The Washington Post" qəzeti yazır.
Qeyd olunur ki, problemin həllini qeyri-adi yollarla tapmaq cəhdləri administrasiyanın çətinlik çəkdiyini və yaranmış problemin miqyasını əks etdirir.
Nəşrin məlumatına görə, Ağ Ev "ümidsizcə göstərməyə çalışır ki, administrasiya seçicilərin yanacağın qiymətlərinin artması ilə bağlı narazılığını nəzərə alır". Baydenin köməkçiləri amerikalılara yanacaq xərclərinin bir hissəsini ödəyəcək xüsusi kartların verilməsini nəzərdən keçirirlər.
Lakin çiplərin olmaması bu cür kartların kifayət qədər istehsalını çətinləşdirəcək. Prezidentin komandası həm də qorxur ki, amerikalılar bu kartrdan təkcə benzin almaq üçün deyil, həm də başqa alışlar etmək üçün istifadə edəcəklər.
Ukrayna Ali Radası ictimai yerlərdə və kütləvi informasiya vasitələrində rus musiqisinin yayımını qadağan edən qanun layihəsini dəstəkləyib. Ali Rada, həmçinin Rusiyadan kitab idxalını və yayılmasını qadağan edib.
Bu barədə Ali Radanın deputatı Yaroslav Jeleznyak Telegram-da məlumat yayıb.
Ukrayna mediasında və ictimai məkanda rus musiqisinin qadağan edilməsini 303 deputat dəstəkləyib.
"Həmçinin Parlament Rusiya Federasiyasından, onun müvəqqəti işğal etdiyi Ukrayna ərazilərindən və Belarusdan kitab və digər nəşriyyat məhsullarının idxalı və yayılmasını qadağan edib", - Jeleznyak yazıb.
Rus ədəbiyyatının idxalına qadağa 306 deputat tərəfindən dəstəklənib.
Türkiyənin xüsusi xidmət orqanları İraqda PKK-nın xüsusi təhlükəli terrorçusunu məhv edib.
Terrorçu Türkiyə Milli Kəşfiyyat Təşkilatının (MİT) İraqın Süleymaniyyə vilayətində keçirdiyi xüsusi əməliyyat nəticəsində zərərsizləşdirilib.
O, Suriyanın Hələb şəhərində, eləcə də İraqın şimalındakı Qara və Qəndil bölgələrində terror fəaliyyətləri həyata keçirib.
Rusiya ilə Ukrayna arasındakı savaş təkcə döyüş meydanında getmir. Tərəflər həm də silah-sursat tədarükü sahəsində də üz-üzə gəlirlər. Ancaq hətta bu sahədə də ədalətsizlik hökm sürür, özü də Ermənistan kimi beynəlxalq ictimaiyyətə qarşı böyük riyakarlıq nümayiş etdirən dövlətlərin əli ilə...
Oxu.az xəbər verir ki, ABŞ-ın “The Wall Street Journal” nəşri Ermənistanın qarışdığı daha bir beynəlxalq qalmaqalın, rüsvayçılığın üstünü açıb.
Belə ki, bu ilin may ayında Ukrayna üçün işləyən Çexiya və Polşa brokerləri (satıcı ilə alıcı arasında vasitəçilik xidməti yerinə yetirən hüquqi və ya fiziki şəxs - red.) Bolqarıstandakı tədarükçüdən zirehli texnika və artilleriya mərmiləri almaq üçün razılığa gəlməyə çox yaxın olsa da, Rusiyanın müdaxiləsi - erməni əlaltıların araya girməsi buna əngəl olub. Danışıqların yekununa az qalmış bir qrup erməni alıcı 1,5 dəfə çox pul təklif edərək müqaviləni qazanıb.
Nəşrə danışan Ukrayna Ali Radasının adı açıqlanmayan deputatı əmindir ki, əldə edilən bu silahlar Ermənistana getməyəcək:
“Çox güman ki, silahlar Rusiyaya göndəriləcək”.
Brokerlər qeyd edirlər ki, Rusiya silah bazarında təkcə qiymətləri öldürməklə deyil, həmçinin hərbi arsenalında Rusiya sistemlərindən istifadə edən ölkələrin həmin silahların hissə və xidmətlərilə təminatını dayandırmaqla hədələyir.
Qeyd edək ki, Ermənistanın müharibədə Rusiyaya açıq dəstək verməsi, yardım göndərməsi, hətta döyüş təyyarələrini belə, Moskvanın ixtiyarına verməsi kimi faktları bu günə qədər beynəlxalq ictimaiyyətdən sərt reaksiya ilə qarşılaşmayıb. Belə olan halda isə ikiüzlü siyasət yürüdən ermənilər özlərinin əlaltı kimliklərini nümayiş etdirməkdən çəkinmirlər. Ortaya çıxan faktlar bir daha Ermənistanın dövlət olaraq beynəlxalq hüququn prinsiplərini kobud şəkildə pozmaqdan çəkinmədiyini göstərir.
Qazaxıstan qondarma Donetsk (DXR) və Luqansk (LXR) “xalq respublikaları”nı tanımayacaq.
Bunu Qazaxıstan Prezidenti Qasım-Jomart Tokayev Sankt-Peterburq Beynəlxalq İqtisadi Forumunda çıxışında deyib.
"Aşağıdakıları qeyd etmək istərdim: müasir beynəlxalq hüquq BMT Nizamnaməsidir. Nizamnamədə təsbit olunmuş iki əsas prinsip indi bir-biri ilə ziddiyyət təşkil edir. Bu, ərazi bütövlüyü və öz müqəddəratını təyinetmə hüququdur. BMT-nin qurucu ataları bu anı nəzərə almadı, ola bilsin, bu, qəsdən kompromis kimi təqdim edilib”, - dövlət başçısı vurğulayıb.
Onun sözlərinə görə, BMT Nizamnaməsinin xalqların öz müqəddəratını təyinetmə hüququ ilə bağlı prinsiplərini rəhbər tutulsa, onda dünyada BMT-yə üzv olan 193 dövlət əvəzinə 500-600-dən çox ölkə peyda olacaq.
"Əlbəttə, bu, xaos olacaq. Bu səbəbdən biz nə Tayvanı, nə Kosovonu, nə Cənubi Osetiyanı, nə də Abxaziyanı tanıyırıq. Və görünür, bu prinsip kvazi-dövlət ərazilərinə şamil olunacaq, fikrimizcə, bu prinsiplər Luqansk və Donetskdir”, - Tokayev əlavə edib.
Lakin o, millətlərin müqəddəratını təyinetmə hüququ ilə bağlı fikirlərini dəqiqləşdirməyib.
Kiyevdə səfərdə olan Fransa Prezidenti Emmanuel Makron, Almaniya kansleri Olaf Şolts, İtaliyanın baş naziri Mario Draqi və ukraynalı həmkarı Vladimir Zelenski ilə birlikdə kütləvi qırğınların törədildiyi hərbi əməliyyatlar yerinə baş çəkəcəklər.
“Bu barədə “France 24” yazır.
Kiyev vağzalında açıqlama verən Makron deyib ki, o, Ukraynaya həm indiki, həm də gələcək haqqında danışmaq üçün gəlib.
“Bildiyimiz kimi, qarşıdakı həftələr çox çətin olacaq”, - Makron qeyd edib.
O əlavə edib ki, bu səfər ukraynalılara və ukraynalı qadınlara ünvanlanmış Avropa birliyi, dəstək haqqında mesajdır.
Fransanın 12 departamentində istilər səbəbindən yüksək təbii təhlükə səviyyəsi elan olunub.
Bu barədə Fransanın Baş naziri Elizabet Börn özünün tviter səhifəsində yazıb.
“On iki departamentdə yüksək temperatura görə qırmızı təhlükə səviyyəsi elan edilib. Ayıq-sayıq olun, su için, sərin binalarda qalın, yaxınlarınızla əlaqə saxlayın”, - deyə Baş nazir tövsiyə edib.
BFM telekanalı öz növbəsində dəqiqləşdirib ki, qırmızı zonaya ölkənin qərb və cənub-qərb departamentləri düşüb. Fransada yayın əvvəli üçün görünməmiş istilər hökm sürür. Bir sıra rayonlarda havanın temperaturu 40 dərəcəni ötüb.
Ukrayna Prezidenti Volodimir Zelenski paytaxt Kiyevdə Fransa Prezidenti Emmanuel Makron, Rumıniya Prezidenti Klaus Yohannis, Almaniya Kansleri Olaf Şolts və İtaliyanın Baş naziri Mario Draqi ilə görüşdən sonra birgə mətbuat konfransı keçirib.
Bu barədə “Anadolu” agentliyinə istinadən xəbər verir.
Zelenski bildirib ki, Rusiyanın Ukraynaya və mülki şəxslərə qarşı atdığı müxtəlif raketlərin ümumi sayı bu ay 3000-ə yaxınlaşa bilər:
“Rusiyanın Ukraynaya aqressiyası bütün Avropaya, hər birimizə, dəyərlərimizə qarşı aqressiyadır. Buna birlikdə cavab verməliyik”.
“Nə qədər çox silah alsaq, xalqımızı, torpaqlarımızı bir o qədər tez xilas edə bilərik. Bir çox ukraynalı torpaqlarımızın azad olunmasını gözləyir”, - deyə Zelenski ölkəsinin döyüşmək üçün silaha ehtiyacı olduğuna işarə edib.
Qlobal ərzaq böhranına da toxunan Ukrayna lideri bunu Rusiyanın təhrik etdiyini qeyd edib:
“Biz Rusiyanın Ukraynada ərzaq təhlükəsizliyinin təmin edilə bilməyəcəyi Afrika və Asiyada olan ölkələrdə aclıq və siyasi xaos yaratmaq planının qarşısını almaq üçün əlimizdən gələni etməliyik”.
Ukrayna və Rusiya arasında danışıqların gedişindən danışan Zelenski vurğulayıb ki, Rusiya bu danışıqlara hazır deyil və sülh istəmir.
Rusiyanın xarici işlər naziri Sergey Lavrov bildirib ki, ölkəsi Ukraynada heç kimə hücum etməyib.
Bu barədə Rusiyanın baş diplomatı BBC-ə müsahibəsində bildirib.
O bildirib ki, Ukrayna rejimi mülki əhaliyə və şəhərlərə hücum edir.
“Biz heç kimə hücum etməmişik. Ukraynalılar ruslara hücum etdilər. Başqa seçimimiz yox idi. Hakimiyyət bütün bunları dəfələrlə izah edib”,-deyə Lavrov vurğulayıb.
Lavrov onu da bildirib ki, Ukrayna Rusiya ilə danışıqlar aparmaq istəmir.
1 iyun 2022-ci il tarixindən etibarən Türkiyədə bütün sərhəd məntəqələrindən ölkəyə daxil olmaq üçün peyvənd sertifikatı, PCR və ya ekspress testi təqdim etmək tələbləri ləğv edilib.
Bu barədə Türkiyə Daxili İşlər Nazirliyi 81 vilayətin səlahiyyətli orqanlarına “Ölkəyə giriş tədbirləri haqqında” sənəd göndərib.
Sənədə əsasən, iyunun 1-dən ölkəyə daxil olmaq üçün bütün sərhəd məntəqələrində girişə maksimum 72 saat qalmış təqdim edilməsi tələb olunan PCR testi və ya girişdən sonra 48 saat ərzində edilməli olan mənfi nəticəli sürətli anticisim testi tələb olunmayacaq.
Daha öncə Türkiyədə neqativ koronavirus testi və ya COVID-19-a qarşı peyvənd olunmanı təsdiqləyən sənədlərlə ölkəyə daxil olmasına icazə vermişdi. Testlər 12 və daha yuxarı yaşlı uşaqlar üçün də vacib idi.
Türkiyədə son zamanlarda COVID-19-a yoluxma sayının və pandemiyadan əhalinin sağlamlığına təhlükənin azalması ölkəyə giriş şərtlərini asanlaşdırıb. Məhdudiyyətlərin əksəriyyəti mart ayında ləğv edilib. Mayın 29-dan etibarən Türkiyədə maska taxmaq məcburi deyil, lakin bu qayda hələ də yalnız xəstəxanalarda qüvvədədir.