 |
|
Vətəndaşa köməklik göstərilib
Bakıda avtomobil gölməçədə batıb.
Avtosfer.az Fövqəladə Hallar Nazirliyinin saytına istinadən verdiyi xəbərə görə, nazirliyinin "112" qaynar telefon xəttinə Bakı şəhərinin Xətai rayonunda “Mercedes” markalı minik avtomobilinin gölməçədə batması və içərisində olan sürücünün köməksiz vəziyyətdə qalması barədə məlumat daxil olub.
Hadisə yerinə cəlb olunan Xüsusi Riskli Xilasetmə Xidmətinin müvafiq xilasetmə qüvvələri tərəfindən vətəndaşa köməklik göstərilib.
Sosial şəbəkələrdə N.Əkbərovanın ögey övladlarına işgəncə verməsinə dair məlumatlar yayılıb
Daxili İşlər Nazirliyi Azərbaycanda iki azyaşlı uşağın valideynləri tərəfindən işgəncələrə məruz qalması ilə bağlı yayılan məlumata münasibət bildirib.
DİN-in Mətbuat Xidmətinin rəis müavini, polis polkovniki Orxan Mansurzadə bildirib ki, Ağcabədi sakini olan Tərgül İbrahimova DİN-in “102” zəng xidməti mərkəzinə müraciət edərək, mərhum bacısının paytaxtın Sabunçu rayonu Zabrat qəsəbəsində yaşayan azyaşlı övladları Hüseyn və Qulunun ataları Xəqani Əkbərov və ögey anaları Nuranə Əkbərova tərəfindən işgəncələrə məruz qaldığını bildirib:
“Daxil olan məlumat əsasında Sabunçu Rayon Polis İdarəsinin 15-ci Polis Bölməsi tərəfindən araşdırma aparılıb. Tərəflərin izahatları alınıb. Hər iki azyaşlının aldıqları bədən xəsarətlərinin ağırlıq dərəcələrinin müəyyən edilməsi məqsədilə məhkəmə-tibb ekspertizası təyin olunub.
Məhkəmə-tibb ekspertizasının rəylərində azyaşlıların müxtəlif vaxtlarda bədənlərinin bir sıra nahiyələrindən aldıqları xəsarətlərin sağlamlığa az ağır və yüngül zərər vurmaya aid olduğu müəyyən edilib”.
“Xəqani Əkbərov və Nuranə Əkbərovanın birlikdə himayələrində olan iki azyaşlıya mütəmadi olaraq əzab verməklə xəsarət yetirmələri faktı üzrə toplanmış material cinayət işinin başlanması məsələsinə baxılması üçün Sabunçu Rayon Prokurorluğuna göndərilib”, - deyə DİN rəsmisi qeyd edib.
Qeyd edək ki, sosial şəbəkələrdə N.Əkbərovanın ögey övladlarına işgəncə verməsinə dair məlumatlar yayılıb.
Sürücünün fikri sağda olan zaman əlində çörək, orta yaşlı bir qadın yolu keçir
Bakıda piyadavurma hadisəsi kameraya düşüb. Avtosfer.az xəbər verir ki, hadisə Yasamal rayonu ərazisində qeydə alınıb. “Hyndai” markalı avtomobilin sürücüsü yola çıxmaq istəyir. Bu zaman sağdan maşın gəlib-gəlməməsinə baxır. Sürücünün fikri sağda olan zaman əlində çörək, orta yaşlı bir qadın yolu keçir. Qəfildən hərəkətə gələn sürücü avtomobili düz qadının üstünə sürərək onu vurur. Hadisə nəticəsində qadın xəsarət alır. Sürücü isə avtomobili saxlamaq əvəzinə bir az da irəliyə gedir.
Hadisəyə baxanda ilk baxışdan qəsd kimi görünür. Amma diqqətlə araşdırdıqda sürücü diqqətsizliyi önə çıxır. Belə ki, fikri sağda qalan sürücü piyadanı görmür və onu vurur. Videonu təqdim edirik:
Buna görə də avtobus sürücüləri özlərini toxunulmaz hiss edir
Hər gün səhər saatlarında Bakı-Sumqayıt yolunun üzü şəhər istiqamətində (Beynəlxalq Avtovağzalın yanında) tıxac yaranır. Tıxacın başlıca səbəblərindən biri sürücülərin zolaqlar üzrə düzgün yerləşməməsidir. Avtosfer.az xəbər verir ki, dekabrın 7- də qeyd etdiyimiz yolda hərəkət edən marşrut avtobusunun sürücüsü, yol polislərinin gözü qarşısında 1.11 xəttinin tələbini pozaraq sol zolağa keçib. Eyni qaydanı pozan digər sürücülər saxlanılsa da avtobus sürücüsü məsuliyyətdən kənarda qalıb. Buna görə də, avtobus sürücüləri onlara qarşı olan nəzarətsizlikdən sui-istifadə edərək özlərini toxunulmaz hiss edirlər və yol hərəkəti qaydasını pozub qəza törədərək onlarla insanın həyatını məhv edirlər.
Yol-nəqliyyat hadisəsində xəsarət alan A.Əzimovun nitq qüsurlu olduğu bildirilir
Bakıda sürücü vurduğu lal piyadanı naməlum istiqamətə aparıb. Hadisə Sabunçu rayonunda qeydə alınıb. Zabrat qəsəbəsində “VAZ-2107” markalı avtomobil 45 yaşlı Akif Əzimovu vuraraq xəsarət yetirib. Yaralının yaxınlarının dediyinə görə, hadisəni törədən sürücü yaralı A.Əzimovu avtomobilinə mindirərək naməlum istiqamətə aparıb. Zərərçəkənin qohumları bildiriblər ki, paytaxtın xəstəxanalarına, morqlara və polis idarələrinə müraciət etsələr də, heç bir yerdən A.Əzimovla bağlı məlumat ala bilməyiblər.
Hazırda yaxınları A.Əzimovun axtarışına başlayıblar.
Yol-nəqliyyat hadisəsində xəsarət alan A.Əzimovun nitq qüsurlu olduğu bildirilir.
Faktla bağlı araşdırma aparılır
Cəlilabad rayonunda ağır yol qəzası baş verib. "Report"un məlumatına görə, hadisə Cəlilabad-Bayxanlı yolunda qeydə alınıb.
Rayonun Adnalı kənd sakini Şirəliyev Məmmədbağır Məhəmmədhüseyn oğlunun idarə etdiyi "Niva" markalı avtomobil idarəetmədən çıxaraq yolun kənarına aşıb.
Qəza nəticəsində sürücü və onun həyat yoldaşı, 1975-ci il təvəllüdlü Xuraman Şirəliyeva müxtəlif bədən xəsarətləri alıb. Yaralılar xəstəxanaya çatdırılıb. X.Şirəliyeva aldığı xəsarətlərdən xəstəxanada dünyasını dəyişib.
Məlumata görə, sürücü M.Şirəliyev Cəlilabad rayonu Adnalı kəndinin icra nümayəndəsi vəzifəsində çalışır.
Faktla bağlı araşdırma aparılır.
Zəncirvari qəzadan son anda arxadan yüksək sürətlə gələn avtomobil xilas ola bilir
Yağışlı havada yol qızaları tez-tez baş verir. Xüsusilə də magistral yollarda. Əsas səbəb isə yağışlı havada yerin sürüşkən olması və sürücülərin yüksək sürət və ara məsafəsini düzgün saxlamamasıdır. Avtosfer.az-ın təqdim etdiyi iki videoda baş verən qəzalar da yağışlı havanın vaxtına düşür. Birinci video gündüz vaxtə çəkilib. İlk baxışdan hər şey normaldır. Amma hərəkətdə olan “Mercedes 190” markalı avtomobilin sürücüsü qəfil idarəetməni itirir. Yeriş sürüşkən olması avtomobilin ən sol zolaqdan sağa doğru getməsinə səbəb olur. Nəticədə öz yolu ilə gedən “Chevrolet” markalı maşına dəyir. Qəza zamanı xəsarət olmasa da avtomobillərə ciddi ziyan dəyir.
İkinci qəza isə günün qaranlıq vaxtında baş verib. Belə ki, hərəkətdə olan avtomobillərdən biri ara məsafəsini düzgün seçmir. Nəticədə sürüşərək öndəki maşına dəyir. Qəzadan sonra üçüncü avtomobil də onların biri ilə toqquşur. Zəncirvari qəzadan son anda arxadan yüksək sürətlə gələn avtomobil xilas ola bilir. Videonu təqdim edirik:
Bakı Nəqliyyat Agentliyi və daşıyıcı şirkət müvafiq tədbirlər görməlidirlər
Bu gün səhər saat 09:14 radələrində Yasamal rayonu. Mətbuat prospektində (Nəşriyyatın yanı) “Kral Transport” MMC şirkətinə məxsus, 39 nömrəli müntəzəm marşurut xətti ilə hərəkət edən, 90 JZ 706 dövlət nömrə nişanlı, “İsuzu” markalı avtobusun sürücüsü qoşa xəttin tələblərini pozaraq yolun əks istiqamətinə çıxıb.
Bununla da İnzibati Xətalar Məcəlləsinin 327.4-cü maddəsinin tələblərini pozub. Maddənin tələblərinə görə, sürücü barəsində 100 manat və 4 bal cərimə tətbiq olunmalıdır. Eyni zamanda Bakı Nəqliyyat Agentliyi və daşıyıcı şirkət müvafiq tədbirlər görməlidirlər.
Fotoları təqdim edirik:
Fakt araşdırılır
Bakının Sabunçu rayonunda yaşlı kişi avtomobil zərbəsi nəticəsində xəsarət alıb. Yol-xeber.az APA-ya istinadən xəbər verir ki, Maştağa qəsəbəsi ərazisində təxminən 50-55 yaşlı kişini minik avtomobili vurub. Sürücü yaralını 3 saylı Şəhər Klinik Xəstəxanasına çatdırıb. O, cərrahi əməliyyat edilib. Vəziyyəti isə ağırdır.
Fakt araşdırılır.
Vətəndaş yol polislərinin onu müayinəyə apardığı zaman avtomobildə pulun olduğu barəsində heç bir məlumat verməyib
Vətəndaş Vasif Adil oğlu Dünyamalıyev sosial səbəkələr və bəzi kütləvi informasiya vasitələrində yol polislərinin onu saxladığı zaman maşınından 27 min manat pulunun itdiyini idda edir. Bildirir ki, onun avtomobili duracağa aparılan zaman pulu oğurlanıb. O, bu məsələdə yol polislərini ittiham edir.
Məsələ ilə bağlı Avtosfer.az-ın sorğusuna cavab olaraq Bakı şəhər Yol Polisi İdarəsinin bölmə rəisi, polis polkovniki Vaqif Əsədov bildirib ki, qeyd olunanlarla bağlı məlumatlıdır. “Həqiqətən də Vasif Adil oğlu Dünyamalıyev bu barədə müxtəlif instansiyalara, o cümlədən Bakı şəhər Baş Polisi İdarəsinə müraciət edib. Araşdırma zamanı məlum olub ki, şikayətçi 02.10.2019-cu il tarixdə özünə məxsus 99 SU 819 dövlət nömrə nişanlı, “Hyundai” markalı avtomobil ilə hərəkətdə olarkən Nəsimi rayonu, Şamil Əzizbəyov küçəsində avtomobili səkiyə vuraraq zədələmişdir. Sərxoş vəziyyətdə olduğu üçün yaxınlıqda taksi fəaliyyəti ilə məşğul olan Bəxtiyar Cabbarovdan 10 manat pul müqabilində onu evə aparmasını istəyib. Hərəkət edərkən Nərimanov rayonu, Təbriz küçəsində taksi sürücüsü ilə şikayətçi arasında mübahisə yaranıb. Yəni Vasif Dünyamalıyev taksi sürücüsünə avtomobilindən telefonunun və pulunu oğurladığını bildirib. Aralarında yaranan mübahisə zəminində Dünyamalıyev Cabbarovu vurub. Nəticədə Cabbarov avtomobildən düşərək uzaqlaşıb. Bu barədə isə DİN 102 telefon xidmətinə şikayət edib. Daha sonra Dünyamalıyev sərxoş vəziyyətdə öz avtomobilinə əyləşərək hərəkətini davam etdirib. Bir qədər hərəkət etdikdən sonra 99 YP 459 dövlət nömrə nişanlı patrul avtomobilində xidmət aparan yol polisi əməkdaşları tərəfindən saxlanılıb. Əvvəlcə polisə tabesizlik göstərsə də, YPX əməkdaşları onu tibbi müayinə üçün aidiyyəti üzrə apara biliblər. Dünyamalıyevin orta dərəcədə sərxoş olduğu həkim müayinəsi ilə təsdiqlənib.
Daha sonra aidiyyəti üzrə iş Nərimanov rayon 18-ci polis bölməsinə təhvil verilib, avtomobil isə müvəqqəti duracağa aparılıb. Vətəndaş Dünyamalıyev Vasif yalnız oktyabr ayının 5-də 102 xidmətinə müraciət edərək avtomobilindən 27 min manat məbləğində pulun oğurlanması barəsində məlumat verib.”
Vaqif Əsədov bildirib ki, aparılan araşdırma zamanı vətəndaş Dünyamalıyev özünü qeyri-səmimi aparıb. “Əvvəlcə oğurlanan pulun ev almaq üçün olduğunu və maşınında saxladığını bildirmişdi. Lakin araşdırmalar zamanı həqiqətlərin üzə çıxdığını görərək pulun məhz taksi sürücüsü Bəxtiyar Cabbarov tərəfindən oğurlandığını və yol polisinin bu məsələdə heç bir günahının olmadığını etiraf etdi. Onu da əlavə edim ki, vətəndaş yol polislərinin onu müayinəyə apardığı zaman avtomobildə pulun olduğu barəsində heç bir məlumat verməyib.”
Vaqif Əsədov onu da əlavə edib ki, YPX avtomobilində olan kamera görüntülərinə baxılıb. “Görüntülərdə Dünyamalıyevin yol polislərinə qarşı təhqiramiz ifadələr işlətdiyi və cəmi 5 manatının olmasını deyərək onu buraxmağını istəməsi də əks olunub.”
Qeyd edək ki, hazırda iş aidiyyəti üzrə Xətai rayonu 37-ci polis bölməsi tərəfindən aparılır.