 |
|
Ermənistanda əsirlikdə olan Azərbaycan hərbçiləri Aqşin Bəbirov və Hüseyn Axundovun bu gün Vətənə qayıdacaqları ehtimal edilir.
Hüseyn Axundovun anası Şəlalə Axundova Pravda.az-a deyib:
“Zəng edilib bildirildi ki, bu gün qonağımız gələ bilər. Vallah, bilmirik ki, hazırda Vətəndədirlər, yoxsa haradadırlar. Bu gün 6 gündür, niyə bizi hələ də övladlarımızla görüşdürmürlər? Oğlumun səsini niyə hələ də eşitməmişəm? İndi də bu həyəcanla yaşayıram. Allah cənab Prezidentimizə uzun ömür versin, bu qərarı çıxardı. Sadəcə, arxayınlaşsam ki, Vətəndədirlər, yaxşı olar...”
Masallıda nənə və nəvəsinin itkin düşmələri barədə Daxili İşlər Nazirliyi məlumat yayıb.
Məsələ ilə bağlı DİN-in Mətbuat Xidmətinin Lənkəran regional qrupundan bildirilib ki, Masallı rayon sakini Xanım Abuşovanın itkin düşməsi ilə bağlı informasiya həqiqəti əks etdirmir və qadın hazırda yaşadığı evdədir.
Dekabrın 11-də saat 19 radələrində evdən çıxaraq geri qayıtmayan azyaşlı nəvəsinin tapılması istiqamətində hazırda polis əməkdaşları tərəfindən axtarış tədbirləri həyata keçirilir.
***
Masallı rayonunda 15 yaşlı qız itkin düşüb.
İqtisadiyyat.az-ın əldə etdiyi məlumata görə, hadisə Mollahəsənli kəndində qeydə alınıb.
Belə ki, 2008-ci il təvəllüdlü Abuşova Jalə İntiqam qızı yaşadığı evdən çıxaraq bir daha geri qayıtmayıb.
Nənəsi 1952-ci il təvəllüdlü Abuşova Xanim Allahverdi qızı faktla bağlı Masallı Rayon Polis Şöbəsinə müraciət edib.
O, nəvəsinin onunla birlikdə yaşadığını və evdən çıxarkən öz geyim əşyalarını və şəxsiyyət vəsiqəsini götürdüyünü söyləyib.
Faktla bağlı araşdırma aparılır.
Gəncədə yol-nəqliyyat hadisəsi baş verib.
Bu barədə DİN-in Mətbuat xidmətinin Gəncə regional qrupunun baş inspektoru, polis kapitanı Eşqin Qasımov bildirib.
Onun sözlərinə görə, hadisə Bayraq meydanın yaxınlığında qeydə alınıb.
Belə ki, hərəkətdə olan "Mercedes" ilə yol polisinə məxsus "BMW" toqquşub.
Qəza zamanı xəsarət alan olmayıb.
Faktla bağlı araşdırma aparılır.
Baş prokurorun müavini – Hərbi prokuror, ədliyyə general-leytenantı Xanlar Vəliyev "Tərtər işi"nin Baş Prokurorluqda araşdırıldığını bildirib.
"Report" xəbər verir ki, o, jurnalistlərə açıqlamasında bununla bağlı istintaqın davam etdiyini söyləyib.
“İş Baş Prokurorluqda araşdırılır. Biz vaxtında istintaq apardıq, müəyyən işlər gördük, bir qismini də dayandırdıq. İndi Baş Prokurorluq "Tərtər işi"ni təzələyib və istintaq aparır”, - X.Vəliyev qeyd edib.
Ailə, Qadın və Uşaq Problemləri üzrə Dövlət Komitəsi Kürdəmir rayonunun Muradxan kəndində 8-ci sinif şagirdinin ərə verilməsi ilə bağlı yayılan məlumatlarla əlaqədar olaraq araşdırmalara başlayıb.
Bu barədə İqtisadiyyat.az-ın sorğusuna cavab olaraq Dövlət Komitəsinin mətbuat katibi Teymur Mərdanoğlu məlumat verib.
Onun sözlərinə görə, evliliyə cəlb olunduğu iddia edilən hər iki şəxsin valideynləri Kürdəmir Rayon Polis Şöbəsinə dəvət olunub.
Araşdırmalar zamanı məktəbli qızın ərə verilməsi faktı təsdiqini tapmayıb: "Sadəcə olaraq ailələrin övladları üçün kiçik nişan mərasimi təşkil etdikləri məlum olub və valideynlər qanunla nəzərdə tutulmuş yaş həddinə çatdıqdan sonra onların toy mərasiminin keçiriləcəyini bildiriblər".
T.Mərdanoğlu bununla yanaşı bildirib ki, yetkinlik yaşına çatmayan şəxsin ailə qurmasına cəlb edilməsinin yolverilməzliyi və qanunla qadağan olunduğunu hər iki şəxsin valideynlərinin diqqətinə çatdırıldığını söyləyib.
Dövlət Komitəsinin sözçüsü məktəbli qızın hazırda dərslərinə davam etdiyini vurğulayıb.
O həmçinin əlavə edib ki, məsələ ilə bağlı Kürdəmir Rayon İcra Hakimiyyəti yanında Yetkinlik Yaşına çatmayanların işləri və hüquqlarının müdafiəsi üzrə komissiyanın iclası nəzərdə tutulub.
Bakıda ana övladını taksidə qoyaraq qaçıb.
Bu barədə “Təmiz Dünya” Qadınlara Yardım İctimai Birliyinin sədri Mehriban Zeynalova sosial şəbəkə hesabında paylaşım edib.
"Ağır infeksion xəstəlik olan qızılcanın fəsadları da xeyli ağır olur".
Bunu Səhiyyə Nazirliyinin mütəxəssis-eksperti, infeksionist Təyyar Eyvazov deyib.
İnfeksionistin sözlərinə görə, qızılcaya yoluxan şəxsin səhhətində paralel şəkildə digər bəzi xəstəliklər də ortaya çıxa bilər. Bu xəstəliyin fəsadlarından ən çox rast gəlinəni isə pnevmaniyalardır.
Təyyar Eyvazov bildirib ki, qızılcaya qarşı spesifik müalicə yoxdur. Bu səbəbdən də ən yaxşı üsul peyvənd vurulmasıdır.
Ölkə ərazisinə qaçaqmalçılıq yolu ilə gətirilmiş narkotik tərkibli həbləri Bakı şəhərinə daşıyaraq, burada satışını təşkil etmək istəyən narkoşəbəkənin üzvləri Yardımlı rayonu ərazisində saxlanılıblar. Onlardan 10 000 ədəd metadon həbi aşkarlanıb.
Daxili İşlər Nazirliyinin Mətbuat Xidmətinin Lənkəran regional qrupundan verilən məlumata görə,Yardımlı Rayon Polis Şöbəsinin əməkdaşlarının keçirdikləri əməliyyat tədbirləri nəticəsində narkotik vasitələrin qanunsuz dövriyyəsində şübhəli bilinən, hər ikisi əvvəllər məhkum olunmuş Bakı şəhər sakinləri Vasif Kazımov və Vurğun Abıyev sonuncunun idarə etdiyi "Kia Rio" markalı avtomobildə Yardımlı-Masallı avtomobil yolunun 35-ci kilometrliyində saxlanılıblar.
Həmin şəxslərdən 10 000 ədədə yaxın narkotik tərkibli metadon həbi aşkarlanaraq götürülüb. Əməliyyat tədbirlərinin davamı nəticəsində onların sözügedən narkotik vasitəni əldə etdikləri şəxslər də müəyyən edilib və cinayətkar qrupun digər üzvləri, Yardımlı rayon sakinləri, hər ikisi əvvəllər məhkum olunmuş Rafət Məcidli və Muxtar Bayıyev polis əməkdaşları tərəfindən saxlanılıblar.
Saxlanılan şəxslərin hamısı barəsində məhkəmənin qərarı ilə həbs qətimkan tədbiri seçilib.
Faktla bağlı Yardımlı RPŞ-də araşdırma aparılır.
"Sədərək" Ticarət Mərkəzi bağlana və ya başqa adla digər ticarət mərkəzlərindən nəzdində fəaliyyət göstərə bilər.
Bu barədə etibarlı mənbələrdən məlumat verilib.
Ötən gün Fövqəladə Hallar Nazirliyinin yanğın nəzarəti və yanğından mühafizə xidməti qurumlarının “Sədərək”də keçirdiyi yanğın təhlükəsizliyi təlimi zamanı ciddi nöqsanların aşkarlanması bu ehtimalı gücləndirib.
Bundan əlavə, azərbaycanlı alıcıların "Trendyol" vasitəsilə onlayn alış-verişə üstünlük verməsi nəticəsində bazarda satışların azalması ilə bağlı məlumatlar da sadalanan səbəblər arasındadır.
Yayılmış iddialarla bağlı Ölkə.Az-a danışan "Sədərək" TM-in sözçüsü Kəmaləddin Qədim məlumatların həqiqətə uyğun olmadığını deyib:
"FHN-in burada xüsusi bölməsi də fəaliyyət göstərir. Sadəcə olaraq təlim keçirilib. Bu da həmişə olan bir məsələdir. Ticarət mərkəzi böyük bir ərazini əhatə edir, onminlərlə mağaza, 30-40 mindən artıq sahibkar, işçi var. Bu boyda yeri kim bağlayacaq?! Yayılmış məlumatların heç bir məntiqi və əsası yoxdur.
"Sədərəy"in bağlanacağı ilə bağlı əvvəllər də dəfələrlə məlumatlar yayılıb. Heç bir əsası olmayan məlumatlardır".
Ticarət mərkəzinin sözçüsü vətəndaşların xarici ölkələrdən onlayn alış-verişə üstünlük verməsinə görə satışların azalması barədə deyilənlərə də münasibət bildirib:
"Belə bir məsələ yoxdur. O kiçik bir detaldır. Onlayn yolla Türkiyədən, başqa ölkələrdən mal alanlar az bir qisimdir. "Sədərək" TM o qədər böyük bir ərazidir ki, təkcə Bakını əhatə etmir. Azərbaycanın bütün rayonlarından bura gəlib mal alırlar, rayonlarda, kəndlərdə satışı təşkil olunur. "Tredyol"dan mal alanların bura cüzi bir təsiri ola bilər. Dediyim kimi, kiçik bir şeydir, "Sədərəy"ə güclü təsir göstərmək imkanında deyil".
Dekabrın 7-si saat 1 radələrində paytaxtın Binəqədi rayonu ərazisində 1965-ci il təvəllüdlü Vasif Fətəliyevin öldürülməsi barədə rayon prokurorluğuna məlumat daxil olub.
Bu barədə Baş Prokurorluqdan məlumat verilib.
Aparılan araşdırmalarla 1977-ci il təvəllüdlü Bayram Fətəliyevin Binəqədi rayonu, Xocasən qəsəbəsi ərazisində yerləşən evlərdən birində aralarında yaranmış mübahisə zamanı qardaşı Vasif Fətəliyevə bıçaqla xəsarətlər yetirərək qəsdən öldürməsinə əsaslı şübhələr müəyyən edilib.
Faktla bağlı Binəqədi rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsilə cinayət işi başlanıb, Bayram Fətəliyev iş üzrə şübhəli şəxs qismində tutulub.
Hazırda ibtidai istintaq davam edir.