 |
|
Ələt-Astara avtomobil yolunun Masallı şəhəri ərazisindən keçən hissəsində "ZİL" markalı mikroavtobusun "KamAZ"la toqquşması nəticəsində xəsarət alan 17 nəfərin son durumu açıqlanıb.
Masallı Rayon Mərkəzi Xəstəxanasından "Report"un Cənub bürosuna bildirilib ki, onlardan 12 nəfərin tibb müəssisəsində müalicəsi davam etdirilir.
Reanimasiyada olanlardan birinin bel-fəqərəsi sınıb və onun Bakıdakı xəstəxanalardan birinə göndərilməsi üçün hazırlıq işləri aparılır.
Qeyd edək ki, xəsarət alanlar əsasən, Lənkəran rayonunun İsti-su kənd sakinləridir.
Xatırladaq ki, Lənkəran rayon sakini Mailə Bayramova qəzada aldığı xəsarətlərdən ölüb.
***
Dekabrın 25-də saat səkkiz radələrində Lənkəran rayon sakini S.Xudiyevin idarə etdiyi ZİL markalı mikroavtobus Ələt-Astara avtomobil yolunun Masallı şəhəri ərazisindən keçən hissəsində hərəkətdə olarkən Lənkəran rayon sakini E.Mirzəyevin idarə etdiyi “KamAZ” markalı yük avtomobili ilə toqquşub.
DİN-in Mətbuat Xidmətinin Lənkəran regional qrupunun baş inspektoru, polis kapitanı Məhəmməd Rzayev Oxu.Az-ın sorğusuna cavab olaraq bildirib ki, nəticədə mikroavtobusda olan sərnişin, Lənkəran rayon sakini Mailə Bayramova aldığı xəsarətlərdən ölüb, həmin avtomobilin sürücüsü və 15 nəfər sərnişin müxtəlif bədən xəsarətləri ilə xəstəxanaya daxil olub:
“Faktla bağlı araşdırma aparılır”.
***
Fövqəladə Hallar Nazirliyinin (FHN) Böhran Vəziyyətlərində İdarəetmə Mərkəzinə Masallı rayonunda yol-nəqliyyat hadisəsinin baş verməsi ilə əlaqədar xilasedici köməyinə ehtiyac yaranması barədə məlumat daxil olub.
FHN-dən Ölkə.az-a verilən xəbərə görə, əməliyyat şəraiti qiymətləndirilərkən müəyyən olunub ki, “KamAz ” markalı yük avtomobili və “ЗИЛ” markalı mikroavtobus toqquşub, 6 nəfər mikroavtobusda sıxılmış vəziyyətdə qalıb.
Dövlət Yanğından Mühafizə Xidmətinin yanğınsöndürən-xilasedicilər tərəfindən həyata keçirilən xilasetmə tədbirləri nəticəsində 5 nəfər yaralı vəziyyətdə, 1 nəfərin meyiti nəqliyyat vasitəsindən çıxarılaraq aidiyyəti üzrə təhvil verilib.
İsmayıllı Rayon Mərkəzi Xəstəxanasında ana ölümü baş verib.
Oxu.az xəbər verir ki, hadisə ötən gün qeydə alınıb.
Belə ki, Şuşa sakini, 1992-ci il təvəllüdlü Ülviyyə Əhmədova doğum zamanı vəfat edib.
Qeyd edək ki, onun üç övladı var.
Yasamal Rayon Polis İdarəsinin 26-cı Polis Bölməsinin əməkdaşları tərəfindən partlayıcı, tezalışan maddələrin, pirotexniki vasitələrin satışının qarşısının alınması istiqamətində tədbir keçirilib.
Daxili İşlər Nazirliyinin Mətbuat Xidmətindən verilən məlumata görə, tədbir zamanı rayon ərazisində pirotexniki vasitələrin satışını həyata keçirən bir nəfər müəyyən olunaraq saxlanılıb. Ona məxsus anbardan yüksək səs effekləri ilə təchiz olunan müxtəlif növ pirotexniki vasitələr aşkar edilib.
Yeni Azərbaycan Partiyasının (YAP) Zaqatala rayon təşkilatının sədri vəfat edib.
APA-nın Şimal-qərb bürosunun məlumatına görə, YAP-ın Zaqatala rayon təşkilatının sədri Habil Qurban oğlu Qurbanov bu gün səhər saatlarında Bakı şəhərində müalicə aldığı xəstəxanada dünyasını dəyişib.
Qeyd edək ki, H.Qurbanov 1970-ci ildə Zaqatalanın Qımır kəndində anadan olub.
Aqşinin sağlamlığı yerində deyil. Tez-tez özündən gedir. Saatlarla ayılmır. Həkimə apardıq. Orda da bayıldı. İynə vurdular. Deyirlər ki, qanı laxtalanır.
Bu sözləri Axar.az-a erməni əsirliyindən azad olunan Azərbaycan əsgəri Aqşin Bəbirovun anası Dürdanə Bəbirova deyib.
Onun sözlərinə görə, oğlu əsir düşdükdən sonra sağlamlığında ciddi problemlər yaranıb:
"Gördüyü işgəncələr səbəbindən belə vəziyyətə düşüb. Vurulan iynələr, bədəninə verilən cərəyan onun sağlamlığına zərər verib. Təcili şəkildə qanı yuyulmalıdır. Yolda getdiyi yerdə də ürəyi partlaya bilər. Həkimlər deyir ki, güclü qan laxtalanması var. Qanı yaxşı işləmir. Rəngini də görmüsünüz necədir. Psixoloji, nervoloji müalicə keçməlidir. Yanında söhbət edə bilmirik. Ancaq qıcıq yaratmayan söhbətlər edirik ki, ona pis təsir etməsin. Yəqin ki, DTX hospitala yatırdar. İmkanım yoxdur uşağı müalicə etməyə".
Sağlığı ilə bağlı yaşadığı problemdən danışan Aqşin isə bayılma hallarının Ermənistanda da olduğunu bildirib. Vətənə qayıtdıqdan sonra vəziyyətinin daha ciddi olduğu anlaşılıb:
"Bacardığım qədər ayaq üstə qalmağa çalışıram. Yaşadığım yadıma düşəndə ürəyim gedir. Bakıya gələndən sonra vəziyyətim daha da pisləşib. Ermənistanda da olurdu. Bu vəziyyətlə bütün günü yaşayırdım, düşünürdüm ki, səbir edim, tezliklə Vətənimə gedəcəm. Orada bu vəziyyətə düşəndə yardım olunmurdu. Gələndən sonra isə bu hala tez-tez düşürəm, ürəyim gedir".
Evdə müalicə olduğunu və onunla birlikdə əsir düşən Hüseyn Axundovla tez-tez danışdığını deyən Aqşin hərbi xidmətin davam etdirilməsi ilə bağlı məsələyə də münasibət bildirib:
"Məncə, hərbi xidmətim başa çatmış sayılır. Bu barədə DTX ilə yenə də dəqiqləşdirmə aparacam. Məncə, bitib. Lakin bu barədə dəqiq heç kim danışmayıb mənlə".
Qeyd edək ki, erməni əsirliyində olan əsgərlərin hərbi xidmətlərini davam etdirilməsi ilə bağlı məsələyə Səfərbərlik və Hərbi Xidmətə Çağırış üzrə Dövlət Xidməti də aydınlıq gətirib. Xidmətin İctimaiyyətlə İş və Beynəlxalq Əlaqələr şöbəsinin rəisi Pərviz Sədrəddinov saytımıza bildirib ki, hərbi qulluqçu əsir düşdükdə həmin müddət ərzində onun həqiqi hərbi xidməti dondurulmur. Müddətli həqiqi hərbi xidmətə onun əsirlikdə olduğu vaxt da daxildir.
"Tərtər işi” ilə bağlı ittiham olunan general-mayor Bəkir Orucov, İntiqam Məmmədov, Rahib Məmmədov, Ziya Kazımov və Ülvi Rəşidovun məhkəmə prosesi davam etdirilib.
Teleqraf.com xəbər verir ki, bu gün Bakı Hərbi Məhkəməsinin hakimi Zeynal Ağayevin sədrliyi ilə Sumqayıt Məhkəmə Kompleksində keçirilən prosesdə Bəkir Orucov son söz deyib.
General bildirib ki, 2022-ci ilin sentyabrında həbs olunanda Müdafiə Nazirliyinin Şəxsi Heyət Baş İdarəsinin İdeoloji İş və Mənəvi-Psixoloji Təminat İdarəsinin rəisi vəzifəsini icra edib, Beyləqanda bu hadisələr yaşananda isə korpusun qərargah rəisi olub.
Bəkir Orucov deyib ki, işgəncələrə göstəriş verənlər, nəzarət edənlər kənarda qalıb, onlar isə "zəif bənd” kimi, qurbanlıq seçiliblər. Bəkir Orucov qeyd edib ki, Müdafiə nazirinin, Baş Qərargah rəisinin, korpus komandirinin səhvlərinə görə onları cəzalandırırlar.
Onun sözlərinə görə, proseslər Müdafiə Nazirliyinin rəhbərliyinin nəzarəti altında, korpus komandiri Mais Bərxudarovun göstərişiylə baş verib: "Xainlər siyahısını kim tərtib eləyib nazirliyə göndərmişdi? O adamları ora yığdırıb işgəncə verdirən kim olmuşdu? Bərxudarov belə zəif idi ki, mən onu idarə edirdim? Korpus komandirinin xəbəri və icazəsi olmasaydı, təhqiqatçı gəlib nəinki kiməsə işgəncə vermək, heç içəri girə bilməzdi. Heç Rauf Kişiyev (Müdafiə Nazirliyinin Hüquq İdarəsinin o vaxtkı rəisi-red.) gəlib orada kimisə həbs elətdirə bilməzdi. İndi kimin adamı, pulu var, hamısı vəzifədə, bizi qurban seçiblər”.
Bəkir Orucov bildirib ki, o ərəfədə həqiqətən xəyanət olub, sadəcə, konkret kimlərin xain olduğu düzgün müəyyənləşdirilməyib: "Nəticədə Tərtər və Beyləqanda yüzlərlə hərbçiyə işgəncələr verilib, 10 nəfərdən çox adam öldürülüb”.
Təqsirləndirilən şəxslərdən Müdafiə Nazirliyinin Hüquq İdarəsinin təhqiqatçısı olmuş, Beyləqan hadisələri ərəfəsində ora ezam olunan İntiqam Məmmədov son söz deyib. O bildirib ki, korpus komandiri nazirliyə siyahı göndərib və orada adları çəkilən şəxslərin düşmənlə əməkdaşlıqda şübhəli bilindiyi iddia olunub: "Mənə ittiham veriblər ki, guya ora düşmənlə əməkdaşlıqda şübhəli bilinənləri müəyyənləşdirməyə getmişəm. Yaxud yazıblar ki, guya mən kimlərisə vəzifədən əsassız və qanunsuz həbs eləmişəm. Əmri verən Baş Qərargah rəisi, korpus komandiri idi. Mən Nəcməddin Sadıxova, Mais Bərxudarova göstəriş verə bilərdim ki, filankəsi işdən çıxar? Bu qədər yalan olar?”
İntiqam Məmmədov deyib ki, o vaxtkı Baş Qərargah rəisi Nəciməddin Sadıxovla münasibətləri yaxşı olmayıb: "Qərəzli münasibətə görə də məni əsassız cəzalandırıb, iclasdan qovub. Nəcməddin Sadıxovun ən zəhləsi gedən adamlardan biri mən olmuşam. Çarəsi olsaydı, başımı kəsərdi. Mən nazirlikdən əvvəl Beyləqanda təhqiqatçı işləmişəm. O dövrdə ön xətdə mina partlamışdı. Buna görə təhqiqatçı neyləsin? Məni iclasdan qovdu”.
Ətraflı
Rahib Məmmədov da son sözündə bəraət istəyib. O bildirib ki, Beyləqanda sorğu-sualda cəmi 15 dəqiqə iştirak edib: "Bu prosesdə fəal iştirak edən, hətta zorakılığa yol verən təhqiqatçılar kənarda saxlanılıb. Mən Yazıçılar Birliyinin üzvüyəm. 3 roman, 9 şeir kitabım var. Həm qələmimlə, həm də zabit kimi bu xalqa xidmət etmişəm. Mən şərəfimi satmadığıma görə cəzalandırılmışam”.
Korpusda təlimatçı olmuş Ülvi Rəşidov da son sözündə bəraət istəyib.
Təqsirləndirilən şəxslərdən yalnız snayper bölüyünün komandiri Ziya Kazımovun son sözü qalıb. Məhkəmə iclasında onun durumu pisləşib. Məhkəməyə Təcili Tibbi Yardım çağırılıb.
Həkimlərin rəyi əsasında məhkəmə prosesi davam etdirilməyib.
Bu səbəbdən növbəti iclas dekabrın 28-nə təyin edilib.
Qeyd edək ki, prokuror Bəkir Orucovun və Ziya Kazımovun 12 il 6 ay, İntiqam Məmmədovla Ülvi Rəşidovun 10 il 6 ay, Rahib Məmmədovun isə 8 il 6 ay azadlıqdan məhrum edilməsini istəyib.
Xatırladaq ki, 2021-ci ilin dekabr ayında Baş Prokurorluqda "Tərtər işi" ilə bağlı cinayət işlərinin icraatının təzələnməsi ilə bağlı qərarlar qəbul edilib. İstintaq zamanı iş üzrə şübhəli bilinən şəxslər cinayət məsuliyyətinə cəlb olunub.
Təqsirləndirilən şəxslər Cinayət Məcəlləsinin 126.3 (ehtiyatsızlıqdan zərərçəkmiş şəxsin ölümünə səbəb olan qəsdən sağlamlığa ağır zərər vurma), 145.3 (qanunsuz azadlıqdan məhrum etmə), 293.3 (işgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 341.2.2 (vəzifə səlahiyyətlərini aşma) və 341.2.3-cü və digər maddələri ilə ittiham olunurlar.
Bakıda bulvar ərazisində gəzinti qayığının batması ilə bağlı daxil olan məlumat üzrə DİN-in Su Nəqliyyatında Polis İdarəsinin əməkdaşları xilasetmə tədbirlərinə cəlb ediliblər.
DİN-in mətbuat xidmətindən bildirilib ki, polis əməkdaşları batma təhlükəsinə məruz qalan şəxsləri müvafiq dövlət qurumunun əməkdaşları ilə birgə xilas ediblər.
11:58
***
Xəzər dənizində gəzinti qayığı batıb.
Hadisə Bakı sahilində qeydə alınıb.
Fövqəladə Hallar Nazirliyindən (FHN) Ölkə.az-ın sorğusuna cavab olaraq bildirilib ki, Bakıda gəzinti qayığının batması ilə bağlı 112 qaynar xəttinə məlumat daxil olub.
Qeyd edilib ki, dərhal nazirliyin dalğıc-axtarış qrupu əraziyə cəlb olunub və batma təhlükəsində olan vətəndaşlar xilas edilib.
Bu gün sosial şəbəkələr reklam baxımından ən əlverişli vasitədir. İnsanlar da bundan istifadə edərək əl işlərini və bacarıqlarını nümayiş etdirib, satışa çıxarırlar. Sosial şəbəkələrdə hətta narkotik satışı ilə məşğul olanlara da rast gəlinir.
Daha bir qaranlıq məsələ isə insanların daxili orqanlarının satışı ilə bağlıdır. Xüsusilə, “İnstagram”da orqanların satışı ilə bağlı tez-tez rast gəlinən elanlara qiymətlər də əlavə edilir. Qan satışından ürəyə qədər, bütün orqanların satışı təklif olunur.
Bununla yanaşı, qadınların və həkimlərin folekullarla bağlı paylaşdıqları elanlar da çoxluq təşkil edir. Yəni qadınlar öz folekullarını müəyyən pul qarşılığında satır, eyni zamanda, həkimlər müəyyən şərtlərlə, müəyyən məbləğ qarşılığında folekul donoru axtardıqlarını elan edirlər. Belə məlum olur ki, folekulları alan ginekoloqlar süni mayalanma əməliyyatları edərkən həmin folekulları övlad sahibi olmaq istəyən qadınlara daha baha qiymətə satırlar.
Halbuki orqanların reklamı, satışı qanunla qadağandır.
Xatırladaq ki, ötən il “İnsan orqan və toxumalarının donorluğu və transplantasiyası haqqında” yeni qanun qəbul olunub. Bu qanun imkan verir ki, qohum olmayan şəxslərdən, eyni zamanda meyitdən də orqan donorluğu götürülməsi tətbiq olunsun.
Bəs, daxili orqanlarını satışa çıxaranlarla necə mübarizə aparılır? Bu cür şəxsləri hansı cəza gözləyir?
Mövzu ilə bağlı Bizim.Media-ya danışan hüquqşünas Ruslan Vəliyev həmin insanları 3-5 ilədək həbs cəzasının gözlədiyini deyib:
“İnsan orqan və toxumalarının donorluğu və transplantasiyası haqqında Azərbaycan Respublikasının Qanunun 32 maddəsinə əsasən, Azərbaycan Respublikasında donor orqanların alqı-satqısı və reklamı qadağandır. Azərbaycan Respublikasının Cinayət Məcəlləsinin 137-ci maddəsinə əsasən, insan orqanlarının və toxumalarının, həmçinin donor orqanların alqı-satqısı ilə məşğul olanlar 3 ilədək müddətə, ağırlaşdlrıcı hallarda isə 3 ildən 5 ilədək azadlıqdan məhrum etmə ilə cəzalandırılır”.
Vəkil bu cür qanunsuz elanlarla aidiyyəti qurumların mütəmadi məşğul olduqlarını bildirib:
“Bu cür elanlar üzrə satıcılar və alıcılar DİN monitorinq qrupları tərəfindən izlənilir və cinayət məsuliyyətinə cəlb olunurlar”.
Daxili işlər orqanlarının əməkdaşları ölkənin maliyyə sisteminə ciddi təhlükə yaradan saxta pulların hazırlanması və dövriyyəyə buraxılmasının qarşısının alınması istiqamətində əməliyyat tədbiri həyata keçirib.
Naxçıvan Muxtar Respublikası Daxili İşlər Nazirliyinin mətbuat xidmətindən verilən məlumata görə, keçirilmiş kompleks əməliyyat tədbirləri nəticəsində ölkə ərazisinə saxta dollar əsginaslarını gizli yollarla gətirən dəstə zərərsizləşdirilib.
Dəstənin digər üzvlərinin ifşası istiqamətində əməliyyat tədbirləri davam etdirilir.
Səfərbərlik və Hərbi Xidmətə Çağırış üzrə Dövlət Xidmətinin Xəzər rayon idarəsinin çağırışçıları xidmətdən yayındırmaqda ittiham olunan əməkdaşlarının cinayət işi üzrə məhkəmə araşdırması başa çatıb.
“Qafqazinfo”nun məlumatına görə, Bakı Hərbi Məhkəməsində hakim Zeynal Ağayevin sədrliyi ilə keçirilən sonuncu iclasda hökm oxunub.
Hökmə əsasən, müttəhimlər - Savalan Rəsulov 3 il 6 ay, Fərid İsmayılov 3 il müddətinə azadlıqdan məhrum edilib.
Məhkəmə istintaqı dövründə müttəhimlər özlərini təqsirli bilməyib, bəraət hökmü çıxarılmasını xahiş ediblər.
Qeyd edək ki, Səfərbərlik və Hərbi Xidmətə Çağırış üzrə Dövlət Xidmətinin Xəzər Rayon İdarəsinin baş zabiti S.Rəsulov və idarənin zabiti F.İsmayılov nüfuz alverində təqsirli biliniblər. İttihama görə, onlar hərbi-həkim komissiyasının üzvlərinin qərar qəbul etmələrinə qanunsuz təsir edib, çağırışçıların xidmətdən yayınmaları müqabilində ümumilikdə 67 min manat pul alıblar.
Hər iki zabit Baş Prokuror yanında Korrupsiyaya qarşı Mübarizə Baş İdarəsi tərəfindən həbs edilib. Onlara qarşı Cinayət Məcəlləsinin 312-1.1-ci (vəzifəli şəxsin qərarına qanunsuz təsir göstərmə-nüfuz alveri) maddəsi ilə ittiham elan edilib.