 |
|
“Bu il BMT-nin Mərkəzi Asiya Ölkələrinin İqtisadiyyatları üçün Xüsusi Proqramının (SPECA) yaradılmasının 25-ci ildönümü qeyd olunur. Təşkilata sədrlik edən Azərbaycan bu münasibətlə SPECA-nın iştirakçı ölkələrinin dövlət və hökumət başçılarının Zirvə görüşünü keçirmək təşəbbüsü ilə çıxış etmişdir. Zirvə görüşünün keçirilməsi ilə əlaqədar Azərbaycanın təşəbbüsü Mərkəzi Asiya ölkələrinin rəhbərləri tərəfindən dəstəklənmiş və cari ilin noyabr ayının 24-də SPECA-nın ilk Sammiti Bakıda, Heydər Əliyev Mərkəzində keçirilmişdir. Məlum olduğu kimi Azərbaycan, Qazaxıstan, Qırğızıstan, Tacikistan, Türkmənistan və Özbəkistan artıq uzun müddətdir ki, bir-biriləri ilə bir sıra çoxtərəfli formatlarda uğurla əməkdaşlıq edirlər. Yeni tərkibdə keçirilən Zirvə görüşü də ölkələrimiz arasında iqtisadi əməkdaşlığın daha geniş formatda inkişafına yol açacaq.”Bu sözləri mətbuata açıqlamasında Milli Məclisin üzvü Kamaləddin Qafarov deyib.
Deputat qeyd edib ki, Azərbaycan, iştirakçısı olduğu bütün beynəlxalq təşkilatlarda olduğu kimi, SPECA-da da xüsusi fəallığı ilə seçilir: “BMT-nin Mərkəzi Asiya Ölkələrinin İqtisadiyyatları üçün Xüsusi Proqramı regional inkişafın sürətlənməsinə önəmli töhfələr verən təşkilatdır. Ölkə Prezidenti İlham Əliyevin dəvəti ilə Zirvə görüşündə Gürcüstanın və Macarıstanın Baş nazirlərinin, həmçinin Körfəz Əməkdaşlıq Şurasının Baş katibinin fəxri qonaq qismində iştirak etmələri SPECA-nın beynəlxalq nüfuzunun kifayət qədər yüksək olduğundan xəbər verən məqamdır. Eyni zamanda, fəxri qonaqların bu dəvəti qəbul etmələri ölkəmizin təşkilatda effektiv fəaliyyətinin nəticəsi kimi qiymətləndirilməlidir. Möhtərəm dövlət başçımız Sammitdəki çıxışında Azərbaycanın BMT Baş Assambleyasında SPECA-nın 25 illiyi ilə əlaqədar qəbul edilmiş qətnaməni alqışladığını və BMT-nin himayəsi altında təsis edilmiş SPECA Etimad Fonduna 3,5 milyon ABŞ dolları məbləğində vəsait ayıracağını bəyan etməklə ölkəmizin təşkilatda oynadığı rolun önəmini bir daha qeyd etmiş oldu.”
K. Qafarov Azərbaycanın iqtisadi uğurlarının ölkəmizin beynəlxalq mövqelərinin getdikcə möhkəmlənməsini şərtləndirən əsas amillərdən olduğunu vurğulayaraq deyib: “Ölkə Prezidenti İlham Əliyevin qeyd etdiyi kimi, SPECA-ya üzv dövlətlər son 25 ildə öz suverenliyini möhkəmləndirmiş, beynəlxalq aləmin dəyərli üzvü olmuş və iqtisadi cəhətdən sürətlə inkişaf edən ölkələrə çevrilmişlər. Bu ölkələrdə sülh, sabitlik, əmin-amanlıq hökm sürür, inkişaf, quruculuq prosesləri uğurla gedir. O cümlədən, Azərbaycanın güclü iqtisadiyyatı ölkəmizə müstəqil xarici siyasət kursu həyata keçirmək imkanı yaradır. Prezident İlham Əliyevin həyata keçirdiyi uğurlu xarici siyasət sayəsində ölkəmizdə əlverişli investisiya mühiti formalaşıb. Son 20 ildə Azərbaycan iqtisadiyyatına 310 milyard ABŞ dollarından çox sərmayə qoyulub ki, bunun da 200 milyard ABŞ dollarına yaxını qeyri-enerji sektorunun payına düşür. Son bir neçə ildə Azərbaycan özünün nəqliyyat infrastrukturuna milyardlarla ABŞ dolları həcmində sərmayə qoyub. Nəticədə ölkəmiz Avrasiyanın Şərq-Qərb və Şimal-Cənub nəqliyyat dəhlizləri üzərində yerləşən önəmli nəqliyyat və logistika mərkəzlərindən birinə çevrilib. Məlumdur ki, Azərbaycanın Mərkəzi Asiya ölkələri ilə iqtisadi münasibətlərində aparıcı yeri də məhz nəqliyyat və logistika sahəsi tutur. Bu gün həmin ölkələrdən Türkiyə və Avropa bazarları istiqamətində yüklərin ən etibarlı və sərfəli daşınma marşrutları Azərbaycandan keçir. Vətən müharibəsində əldə olunmuş tarixi Qələbədən sonra Azərbaycanın bu sahədə imkanlarının genişlənməsi, Zəngəzur dəhlizinin reallaşdırılması məsələsi ölkəmizi Şərqlə Qərb arasında mühüm nəqliyyat qovşağına çevirib. Buna paralel olaraq son illər Azərbaycanla Mərkəzi Asiya ölkələri arasında iqtisadi əlaqələrin şaxələndirilməsi istiqamətində də mühüm addımlar atılır. Sənaye əməkdaşlığı, maşınqayırma, avtomobil sənayesi, gəmiqayırma, kənd təsərrüfatı, xüsusən də pambıqçılıq, ipəkçilik, bağçılıq və heyvandarlıq sahələrində çoxsaylı layihələr həyata keçirilir. Mehmanxana işi və turizm sahəsində də önəmli sərmayə layihələri ilk icra mərhələsindədir. Bütün bunlar əlaqələrin daha da dərinləşməsinə və möhkələnməsinə xidmət edir” .
Bakının daha bir rayonunda binalar plana düşüb.
BAKU.WS-in əldə etdiyi məluumata görə, söhbət Qaradağ rayonu, Lökbatan qəsəbəsindəki Sovet dönəmində tikilən çoxmənzilli binalardan gedir.
28 May küçəsində yerləşən ikimərtəbəli binaların söküntüsünü icra edən şirkət həmin ərazidə hündürmətəbəli bina tikəcəyi üçün vətəndaşlara elə həmin binadan mənzillər təklif edib. Bundan əlavə binaların tikintisi başa çatanadək evləri sökülən vətəndaşlara 400 manat kirayə pulu da veriləcək.
Qeyd edək ki, sakinlərin bir çoxu şirkətin təklifini qəbul edərək evləri tərk ediblər.
Azərbaycan Prezidenti İlham Əliyevin tapşırığına uyğun olaraq, Füzuli şəhərinə növbəti köç karvanı yola salınıb.
Abşeron rayonunda, Bakı və Sumqayıt şəhərləri ərazisindəki yataqxana, sanatoriya, pioner düşərgəsi, yarımçıq tikililər və inzibati binalarda müvəqqəti məskunlaşmış ailələrdən ibarət növbəti köç karvanı noyabrın 27-də Bakı şəhərinin Qaradağ rayonundan yola salınıb. Bu mərhələdə Füzuli şəhərinə daha 25 ailə – 106 nəfər köçürülüb.
Prezident, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan ordusunun qazandığı Zəfər nəticəsində məcburi köçkünlərin 30 ildən sonra könüllü, təhlükəsiz və ləyaqətlə doğma yurdlarına qayıtmasına imkan yaranıb. Doğma yurda qayıdan füzulililər hərtərəfli dövlət qayğısı ilə əhatə olunduqlarına görə Prezident İlham Əliyevə və Birinci vitse-prezident Mehriban Əliyevaya təşəkkür ediblər. Onlar, həmçinin torpaqlarımızı işğaldan qurtaran rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını bildirib, bu yolda canlarından keçmiş şəhidlərimizə rəhmət, ailələrinə səbir diləyiblər.
Xatırladaq ki, indiyədək Füzuli şəhərinə 308 ailənin, yəni 1 106 nəfərin daimi məskunlaşması təmin edilib.
"Səhər tezdən şəhid Niyaminin anası Zəminə Məhərrəmova ağlaya-ağlaya zəng edib ki, bəs o üstü yazılı "1 manatı paylaşıb yanına da Niyaminin şəklini yapışdırırlar ki, guya pul bunun olub. Məqsədləri nədir, niyə bizi belə diri-diri öldürürlər?"
Bunu "Vətən Bağı" Sosial Təşəbbüslər İctimai Birliyinin sədri Emin Tarverdiyev bildirib.
"Bu nəyin ləzzətidir ki, yaşayırsınız? Ay xəstələr, əvvəla pulun üstündə Niyam yazılıb ki, Vətən müharibəsində Niyam adlı şəhidimiz yoxdur. Niyamin (1 nəfər) və Niyaməddinlər (4-5 nəfər) olub. İndi bu hansı şərəfsizlikdir ki, bu valideynləri belə narahat edirsiniz?", - deyə o bildirib.
Paytaxtınn Sabunçu rayonunda 90 saylı tam orta məktəb şagirdinin göz nahiyyəsindən xəsarət alması ilə bağlı polisə daxil olan məlumat araşdırılıb.
DİN-in mətbuat xidmətindən bildirilib ki, araşdırmalarla şagirdin göz nahiyyəsində xəsarət faktında qəsd müəyyən olunmayıb. Müəyyən edilib ki, hadisə məktəbin akt zalında digər şagirdin ona dəyməsi nəticəsində baş verib.
Bütün sorğular və aparılan araşdırmalarla məktəblinin hansısa formada qəsdə məruz qalması ilə bağlı iddialar təsdiqini tapmayıb.
Respublika Baş Prokurorluğu tikintisi davam etdirilən və ya istismarına icazə verilməmiş çoxmənzilli binalardan mənzil alan şəxslərə tövsiyə ilə müraciət edib.
Qurumun mətbuat xidmətindən daxil olan müraciətdə bildirilir ki, prokurorluq orqanları tərəfindən tikintisi davam etdirilən, istismarına icazə verilməmiş çoxmənzilli binalarda mülkiyyət hüquqlarının qabaqcadan qeydiyyatı mexanizminin təkmilləşdirilməsi təşəbbüsü istiqamətində aidiyyəti dövlət orqanları ilə birgə intensiv tədbirlər görülməkdədir.
Baş prokuror yanında Korrupsiyaya qarşı Mübarizə Baş İdarəsi tərəfindən yaşayış binalarının tikintisi ilə məşğul olan şirkətlərin 100-dən artıq vəzifəli şəxsi eyni mənzilin birdən çox şəxsə satılması, habelə tikinti layihələrinin tamamlanmaması halları ilə əlaqədar cinayət məsuliyyətinə cəlb edilmişdir. Belə hallarla qarşılaşmış çoxsaylı vətəndaşların vurulmuş maddi ziyanın ödənilməsi istiqamətində də qanunvericiliyə uyğun olaraq mümkün həddə tədbirlər görülmüşdür.
Bununla belə, tikintisi davam etdirilən, istismarına icazə verilməmiş çoxmənzilli binalardan mənzil almaq niyyətində olan vətəndaşlarımız da ayıq-sayıq olmalı, mənzil alqı-satqısı ilə bağlı öz hüquq və öhdəliklərinə yaxından bələd olmalıdırlar.
Bu sahədə vətəndaş məlumatlılığının artırılması və qeyd edilən qanunsuz əməllərə məruz qalma risklərinin minimallaşdırılması məqsədi ilə aşağıdakıları tövsiyə edirik:
1. Media və sosial şəbəkələrdə araşdırma aparmaqla tikinti şirkəti haqqında formalaşmış ictimai rəyi, reputasiyanı öyrənmək;
2. Alqı-satqı prosesi zamanı peşəkar hüquqşünas xidmətindən istifadə etmək;
3. Mənzil almazdan əvvəl müvafiq sorğularla yaşayış binasının tikintisinə müvafiq icra hakimiyyəti, yəni əsasnamələrinə uyğun olaraq Azərbaycan Respublikasının Fövqəladə Hallar Nazirliyi, Azərbaycan Respublikasının Dövlət Şəhərsalma və Arxitektura Komitəsi və yerli icra hakimiyyəti orqanları tərəfindən icazə verilib-verilmədiyini, tikinti aparmasına icazə verilən şirkətlə faktiki tikintini icra edən şirkətin eyni olub-olmamasını dəqiqləşdirmək (təcrübədə tikintini icra edən podratçı şirkətin icazəsi olmadan qanunsuz mənzil satışını həyata keçirməsi hallarına rast gəlinib);
4. Dövlət Şəhərsalma və Arxitektura Komitəsinin rəsmi internet səhifəsində yerləşən Tikintilərin Dövlət Reyestri bölməsində yaşayış binasının tikintisinə icazə verilib-verilmədiyini yoxlamaq - https://tdr.e-tikinti.gov.az/;
5. Mənzil alınmadan öncə Əmlak Məsələləri Dövlət Komitəsinin Elektron Xidmətlər Portalında (e-emdk.gov.az) “Çoxmərtəbəli yaşayış binasında mülkiyyət hüququnun dövlət qeydiyyatı haqqında müvafiq reyestrdən çıxarış sənədi olan mənzillərin mövcudluğu barədə məlumatların verilməsi” bölməsinə daxil olmaqla, çoxmərtəbəli yaşayış binasının yerləşdiyi küçəni və aid olduğu tikinti şirkətinin (MTK) adını qeyd edərək həmin bina üzrə mənzillərin dövlət reyestrindən çıxarışının mövcudluğu barədə məlumatı əldə etmək;
Türkiyənin İstanbul şəhərində həftəsonu havanın temperaturu 9 dərəcə enəcək.
Bunu ölkənin Meteorologiya Baş İdarəsi açıqlayıb.
İstanbul valisi Davud Gül isə bildirib ki, noyabrın 26-da bazar günü şəhərə qar yağacaq və bu səbəbdən lazımi tədbirlər görülüb.
İstanbul Təhlükəsizlik İdarəsi isə açıqlayıb ki, şəhər üzrə 427 yol elementi, 260 asayiş qrupu, 8 jandarma qrupu olmaqla, 1504 personal xidmət aparacaq. Noyabrın 26-da isə Bakıda və Abşeron yarımadasında 20 dərəcə isti olacaq. Bir qədər külək əsəcək.
Laçın şəhərində əmək yarmarkası keçirilir.
"Report"un hazırda Laçında olan əməkdaşının verdiyi xəbərə görə, yarmarka Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi və Şərqi Zəngəzur iqtisadi rayonuna daxil olan Laçın rayonunda Azərbaycan Prezidentinin xüsusi nümayəndəliyi tərəfindən təşkil edilib.
Məşğulluq tədbirində işsiz və işaxtaran şəxslərə 16 müəssisə tərəfindən müxtəlif istiqamətlər üzrə 200-dən artıq vakansiya təqdim olunub.
Tədbirin keçirilməsində əsas məqsəd Böyük Qayıdış proqramı üzrə Laçın rayonuna köçürülən sakinlərin məşğulluğuna dəstək tədbirləri davam etdirilməsidir.
Yarmarkaya qatılan sakinlərə vakansiyalar, iş öhdəlikləri haqqında məlumat verilib, müraciət edən şəxslərin CV-ləri qəbul edilərək nəzərdən keçirilir, uyğun namizədlərin qeydiyyatı aparılır. Həmçinin, iştirakçılara Agentliyin aktiv məşğulluq tədbirləri ilə bağlı məlumat verilir.
“Cari il noyabrın 20-də İraq Respublikasının Prezidenti Əbdüllətif Camal Rəşid ölkələrimiz arasında mövcud olan diplomatik əlaqələr tarixi ərzində Azərbaycana ilk dəfə rəsmi səfərə gəlmişdir. Bu səfər ölkələrimiz arasında dostluq münasibətlərinin güclənməsinə töhfə verəcək və qarşılıqlı faydalı əməkdaşlığın yeni, daha yüksək mərhələyə keçid almasına səbəb olacaq. İraq Prezidentinin ölkəmizə səfəri çərçivəsində imzalanmış önəmli sənədlər də bunu deməyə əsas verir”Bu sözləri İraq Prezidentinin Azərbaycana ilk rəsmi səfəri ilə bağlı mətbuata verdiyi açıqlamasında Milli Məclisin deputatı Kamaləddin Qafarov deyib.
Deputat bildirib ki, İraq Azərbaycan Respublikasının müstəqilliyini 2 yanvar 1992-ci il tarixində tanımış, həmin ilin 30 mart tarixində isə ölkələrimiz arasında diplomatik münasibətlər qurulmuşdur.” Bu gün İraq və Azərbaycan müxtəlif beynəlxalq təsisatlarda, o cümlədən BMT-də, Qoşulmama Hərəkatında, İslam Əməkdaşlıq Təşkilatında hər zaman bir-birini dəstəkləyən ölkələr kimi çıxış edirlər.”
Prezident İlham Əliyevin mətbuata bəyanatla etdiyi çıxışında vacib tarixi faktların əks olunduğunu vurğulayan deputat deyib: “Bu gün Ermənistan və onun dünyada olan havadarları bir çox tarixi faktları təhrif etmək üçün ciddi səylər göstərirlər. Lakin bu cəhdlər artıq tamamilə əhəmiyyətsiz manipulyasiyalardan başqa bir şey deyil. Tarixi həqiqətlər isə bundan ibarətdir ki, Ermənistan 1990-cı illərin əvvəlində Azərbaycana qarşı təcavüzə başlayıb, ölkəmizin beynəlxalq səviyyədə tanınmış ərazilərinin təqribən 20 faizini işğal edib və həyata keçirdiyi etnik təmizləmə siyasəti nəticəsində bir milyondan çox azərbaycanlının keçmiş Dağlıq Qarabağ Muxtar Vilayətinin və ətraf rayonların ərazisindən fiziki qovulmasına səbəb olub. Bütün bu faktlar Ölkə Prezidenti cənab İlham Əliyevin noyabrın 20-də mətbuata bəyanatla etdiyi çıxışında öz əksini tapıb. Azərbaycan 30 il ərzində münaqişənin sülh yolu ilə həllinə nail olmaq üçün danışıqlarda iştirak edib, lakin bütün bunlar heç bir nəticə verməyib. Çünki beynəlxalq təşkilatlar Ermənistana heç bir təsir göstərməyiblər. Nəhayət, ATƏT-in keçmiş Minsk qrupunun yaradılmasından 28 il sonra Azərbaycan beynəlxalq səviyyədə tanınmış ərazilərini özü döyüş meydanında, hərbi gücdən və BMT Nizamnaməsinin özünümüdafiə hüququna dair 51-ci maddəsi ilə təsbit olunmuş qanuni imkandan istifadə edərək işğaldan azad etdi.”
K.Qafarov bu gün bəzi Qərb ölkələrinin Cənubi Qafqazda öz iradələrini diktə etmək niyyətlərinin yolverilməz və mümkünsüz olduğunu qeyd edib: “Vətən müharibəsində əldə olunmuş tarixi Qələbə nəticəsində işğal olunmuş ərazilərimizin böyük hissəsi azad edildi. Lakin, möhtərəm dövlət başçımızın qeyd etdiyi kimi, Azərbaycan özünün hətta ən kiçik bir hissəsində belə qanunsuz separatçı rejimin olmasına imkan verə bilməzdi. Ermənistan imzaladığı 10 noyabr Bəyanatı ilə üzərinə götürdüyü öhdəliklərinə əməl edərək hərbi kontingentinin qalan hissəsini də Azərbaycan ərazisindən çıxarmalı idi. Lakin 3 il ərzində bu baş vermədi. Ermənistan hökuməti Azərbaycanın sülhə çağırışlarına deyil, Qərbin, xüsusən də marionetinə çevrildiyi Fransanın təhriklərinə qulaq asmağa üstünlük verdi. Nəticədə, bu ilin sentyabr ayında Azərbaycan beynəlxalq hüquqa tam riayət edərək öz suveren ərazisində antiterror əməliyyatı apardı. Bu əməliyyat 24 saatdan az davam etdi və Qarabağdakı qeyri-qanunu rejim süquta uğradı. Artıq Azərbaycan bütün ərazisində özünün suverenliyini tam bərpa edib. Ölkəmiz qarşısına qoyduğu bütün hədəflərinə çatıb və bizə yeni müharibə lazım deyil. Lakin Ermənistan hələ də Cənubi Qafqazda destabillik yaratmaq istəyən xarici qüvvələrin təhrikinə uyaraq hansısa qisas haqqında düşünərsə, bu heç bir yaxşı nəticəyə gətirib çıxarmaz. Buna görə də Ermənistan öz gələcəyini regionumuzdan uzaqda yerləşən ölkələrin ambisiyaları üzərində deyil, öz milli maraqlarına əsasən planlaşdırmalıdır. Bu gün Azərbaycan ədalətli, hər iki ölkənin ərazi bütövlüyünün və suverenliyinin tanınması əsasında bağlanacaq sülhə hazır olduğunu bəyan edirsə, Ermənistan bu tarixi fürsəti əldən qaçırmamalıdır” .
“2020-ci il noyabr ayının 10-da üçtərəfli Bəyanat imzalandı və 44 günlük Vətən müharibəsi Azərbaycanın qəti qələbəsilə başa çatdı. Ermənistanın hərbi kapitulyasiyasını təsdiqləyən bu Bəyanat uzun illər davam edən işğala son qoydu, münaqişənin hərbi mərhələsi başa çatdı. Üçtərəfli Bəyanatın imzalanmasının ən önəmli cəhətlərindən biri də Ağdam, Laçın, Kəlbəcər rayonlarının qan tökülmədən Azərbaycana qaytarılması oldu.”Bu sözləri mətbuata açıqlamasında Milli Məclisin deputatı Kamaləddin Qafarov deyib.
Deputat bildirib ki, Ölkə Prezidenti, Silahlı Qüvvələrin Ali Baş Komandanı İlham Əliyevin israrlı mövqeyi nəticəsində məğlub və çıxılmaz vəziyyətə düşən Ermənistan rəhbərliyi işğal edilmiş bütün torpaqlarımızdan qeyd-şərtsiz çıxmaq və bunun üçün çıxış qrafikini təqdim etmək məcburiyyətində qaldı. “Bu qrafikə əsasən 2020-ci il noyabr ayının 25-də Kəlbəcər rayonu işğaldan azad edildi. Ölkə Prezidenti cənab İlham Əliyevin 31 iyul 2023-cü il tarixli Sərəncamına əsasən 25 noyabr Kəlbəcər şəhəri günü kimi müəyyən olunub.”
K.Qafarov erməni işğalı dövründə Kəlbəcərin talan edilməsi faktından bəhs edərək deyib: “1993-cü il aprelin 2-də Ermənistanın işğalçı ordusu tərəfindən Kəlbəcər rayonu işğal edildi. İşğal nəticəsində 511 dinc sakin öldürülüb, 321 nəfər əsir götürülüb və itkin düşüb. Kəlbəcərin 60 min nəfər əhalisi respublikanın 56 rayonunun 770 yaşayış məntəqəsində müvəqqəti məskunlaşmağa məcbur olub. İşğal etdikləri bütün digər ərazilərimizdə olduğu kimi erməni vandalları Kəlbəcərdə də talançılıqla məşğul olublar. İşğal nəticəsində rayonun bütün infrastrukturu talan edilmiş, dağıdılmış və rayonun milyardlarla manatlıq sərvəti Ermənistana daşınmışdır. BMT-nin və ATƏT-in prinsiplərinə zidd olaraq 1999-cu ildən Kəlbəcər rayonu ərazisində ermənilərin qanunsuz məskunlaşdırılmasına başlanmışdır. Kəlbəcərin işğalından sonra BMT Təhlükəsizlik Şurası bütün işğalçı qüvvələrin Kəlbəcər və Azərbaycanın digər işğal olunmuş rayonlarından dərhal çıxarılması tələbi ifadə olunan 822 saylı Qətnamə qəbul etsə də, rəsmi İrəvan həmin Qətnaməni icra etmədi və beynəlxalq təşkilatlar da onun icrasını tələb etmədilər. Belə yanaşmadan daha da azğınlaşan Ermənistan 2020-ci il sentyabrın 27-də Azərbaycanın yaşayış məntəqələrini və döyüş mövqelərini şiddətli artilleriya atəşinə tutmaqla hərbi qulluqçularla yanaşı, dinc sakinlərin də ölümünə səbəb oldu. Bundan sonra düşmənin hərbi təxribatını dəf etmək və təcavüzünə son qoymaq məqsədilə Silahlı Qüvvələrin Ali Baş Komandanı İlham Əliyev dərhal bütün cəbhə boyu əks-hücuma keçmək əmrini verdi. 44 gün davam edən Vətən müharibəsinin nəticəsi olaraq Azərbaycan Ordusu Müzəffər Ali Baş Komandanın rəhbərliyi ilə torpaqlarımızın işğalına son qoydu və beynəlxalq hüququ bərpa etdi.”
K.Qafarov bildirib ki, Vətən müharibəsində əldə etdiyimiz tarixi Qələbədən sonra bu rayonda aparılan bərpa-quruculuq işləri, bütün digər ərazilərimizdə olduğu kimi, Prezident İlham Əliyevin şəxsi nəzarətindədir: “Vətən müharibəsində əldə edilmiş tarixi Qələbədən sonra, azad olunmuş Kəlbəcər rayonunda da möhtəşəm bərpa-quruculuq işlərinə start verildi. İşğaldan sonra ilk dəfə 2021-ci il avqustun 16-da Kəlbəcərə səfər edən Ali Baş Komandan bu şəhərdə də Azərbaycan bayrağını şəxsən özü qaldırdı. Həmin tarixi gündən sonra keçən müddət ərzində Prezident İlham Əliyev Kəlbəcərə çoxsaylı səfərlər etmişdir ki, bu səfərlərin də hər biri önəmli hadisələrlə əlamətdar olmuşdur. Kəlbəcər doğma sakinlərini gözləyir. Son üç ildə gedən proseslər bir daha göstərir ki, Azərbaycan dövləti işğaldan azad edilmiş ərazilərin ən qısa zamanda tamamilə yenidən qurularaq dirçəldilməsinə və erməni işğalı səbəbilə bu torpaqlardan didərgin düşmüş insanların öz dədə-baba yurdlarına geri dönmələrinə çox böyük önəm verir və bu istiqamətdə gedən bütün işlərə Ölkə Prezidenti cənab İlham Əliyev tərəfindən ciddi nəzarət olunur”.