 |
|
“ÜST-ün məlumatına görə, orta hesabla dünya əhalisinin 29 faizi siqaret çəkir. Onlardan 10 faizi qadınlar, 47 faizi isə kişilərdir. Bu tendensiya artır”.
Bu sözləri Elmi Tədqiqat Ağciyər Xəstəlikləri İnstitutunun Pulmonologiya şöbəsinin müdiri Vasif Abdullayev AzTV-nin efirində yayımlanan “Çıxışa doğru” proqramında qonaq olarkən deyib.
“Bu tendensiya belə davam edərsə, 2030-cu ildə ölüm sayı 8 milyona çata bilər. Siqaret çəkmək bir vərdiş, asılılıq olsa da ondan qurtulmaq mümkündür. Xəstələrlə işləyirik. Görürük ki, 50-60 yaşında şəxslər cavanlıqda bunun zərərləri barədə məlumatsız olduqlarından bu pis vərdişə yiyələniblər. Müşahidələr göstərir ki, gənc yaşlarda maariflənmə olmalıdır. Ürək, qan-damar xəstəlikləri, onkoloji xəstəliklər və s. bundan yaranır. Elmi Tədqiqat Ağciyər Xəstəlikləri İnstitutunun Pulmonologiya şöbəsində yatan xəstələrin 70 faizi siqaret çəkdikləri üçün orqanizmdə yaşadığı fəsadlardan müalicə alanlardır. Xüsusilə də ağciyərlərin xroniki abstruktiv xəstəliyi üstünlük təşkil edir. Bu xəstəliyin ölümlə nəticələnmə riski həddən çoxdur”.
Bir neçə gün əvvəl rejissor, yazıçı və şair, Azərbaycanın xalq artisti Əflatun Nemətzadə Bakıda ona qarşı mənzillə bağlı dələduzluq edildiyindən şikayət edib.
Ankarada Qazi universitetinin professoru olan Əflatun Nemətzadənin şikayətini “Haqqın.az” saytı işıqlandırıb. Məlumata görə, Yazıçılar Birliyinin üzvü Ə.Nemətzadə 2017-ci ildə Ankarada olarkən Azərbaycan səfirliyindən ona zəng edilib və “Fədək” mənzil-tikinti kooperativinin nümayəndəsi görüşmək istədiyini bildirib. Nümayəndənin professorla görüşmək istəməsinə səbəb isə onun Bakıda sahib olduğu mənzil olub.
Şikayətçinin sözlərinə görə, Nemətzadə həmin şəxslə görüşdükdə şirkət nümayəndəsi professora müqavilə təqdim edib. Sözügedən müqaviləyə əsasən, professor Bakının Nəsimi rayonunda sahib olduğu mənzilinin yerləşdiyi evin sökülməsinə icazə verir və bunun müqabilində həmin ərazidə inşa olunacaq çoxmərtəbəli binada geniş əraziyə sahib mənzil əldə edəcək.
Sayt yazır ki, müqaviləyə əsasən, Nemətzadəyə yeni inşa olunan binada 20 kvadrat metr əlavə tikili ilə 118 kvadrat metr sahəsi olan yeni mənzil verilməli idi. Lakin daha sonradan şirkətin rəhbəri dəyişdiyindən əvvəlki layihə də ləğv olunub və yenisi hazırlanıb. Yeni layihəyə əsasən isə sakinlərə əlavə ödəniş qarşılığında 140-150 kvadrat metr sahəli mənzillər təklif olunub. Nəticədə isə Nemətzadə mənzilsiz qalıb.
Bunun ardınca, Ə. Nemətzadə Prezident İlham Əliyevlə şəxsən tanış olduğunu bildirərək ondan kömək istəyib. Professorun üzləşdiyi problem işıqlandırıldıqdan sonra onun məsələsinə tez bir zamanda reaksiya verilib.
Prezidentin göstərişi əsasında, bu məsələ dövlət orqanlarının nəzarəti altına götürülüb və öz həllini tapıb. Belə ki, Əflatun Nemətzadə ilə ona böyük əraziyə sahib mənzilin verilməsi ilə bağlı yeni müqavilə imzalanıb.
Bununla yanaşı, ev inşa olunana qədər Ə.Nemətzadə üçün mənzil icarəyə götürüləcək. Həmçinin professorun əvvəlcədən “Fədək” şirkətinə ödədiyi 10 min manat vəsaiti də geri qaytarılıb.
Azərbaycan və Rusiya Müdafiə nazirlikləri arasında birgə hərbi fəaliyyətlər planına uyğun olaraq Azərbaycan Hərbi Dəniz Qüvvələrinin (HDQ) "G-121" və “G-129” gözətçi gəmiləri Rusiyada səfərdədir.
Bu barədə Müdafiə Nazirliyindən məlumat verilib.
Qeyd edək ki, Azərbaycan HDQ-nin gəmi və şəxsi heyəti bir sıra tədbirlərdə iştirak edəcək.
“Azərbaycan 2020-ci ilin sentyabr-noyabr ayları ərzində apardığı və tarixi Qələbə ilə başa vurduğu II Qarabağ müharibəsinin əsas nəticələrindən biri olaraq özünün ərazi bütövlüyünü bərpa etdi. Artıq iki ilə yaxındır ki, işğaldan azad edilmiş ərazilərdə möhtəşəm yenidənqurma işləri aparılır. Regionların sosial-iqtisadi inkişafı Dövlət Proqramının uğurlu icrası nəticəsində rayonlarımızda böyük infrastruktur layihələri həyata keçirilib, əhalinin su, qaz, elektrik enerjisi ilə təchizatı, yol infrastrukturunun yenilənməsi, səhiyyə, təhsil, idman və mədəni-məişət müəssisələri üçün nəzərdə tutulan yeni binaların inşası və bir çox digər istiqamətlərdə böyük işlər görülüb və bu işlər indi də davam etdirilir.”
Bu sözləri mətbuata açıqlamasında Milli Məclisin deputatı Kamaləddin Qafarov deyib.
Regionların inkişaf göstəricilərindən birinin də əhalinin məşğulluğu ilə bağlı olduğunu vurğulayan deputat bildirib ki, rayonlarda həyata keçirilən infrastruktur layihələri yeni iş yerlərinin də açılmasını təmin edir: “Ölkə Prezidenti cənab İlham Əliyev Masallı, Lerik və Göygöl rayonlarına təyin olunmuş yeni İcra Hakimiyyəti başçlarını qəbul edərkən etdiyi çıxışında bütün bu məsələlərə xüsusi olaraq toxundu və qeyd etdi ki, yeni iş yerlərinin açılması son dərəcə əhəmiyyətli məsələdir. Həqiqətən də müstəqillik illərində ölkə əhalisinin sayının 3 milyon nəfər artdığını nəzərə alsaq, insanların rifah halının yüksəlməsi üçün əmək məşğulluğunun zəruri amil olduğunu görərik. Bu baxımdan təbii ki, ölkədə sahibkarlığın inkişafı böyük önəm kəsb edir. Bu gün Azərbaycanda özəl sektorun inkişafına göstərilən dövlət qayğısı, xüsusilə istehsal müəssisələrinin yaradılması yönümündə sahibkarlara dəstək öz nəticələrini verməkdədir. Dövlətin ödənişli sosial iş yerlərinin açılması istiqamətində atdığı addımlar da böyük önəm kəsb edir”, - deyə K.Qafarov bildirib.
Millət vəkili insanların həyat şəraitinin yaxşılaşdırılması məqsədilə həyata keçirilən dövlət proqramlarının effektiv icrası yönümündə icra strukturlarının aparıcı rolunu qeyd edərək deyib: “Aydındır ki, rayon və bölgələrdə həyata keçirilən dövlət proqramlarının effektiv icrasının təmin olunmasında rayon icra hakimiyyəti strukturlarının xüsusi rolu var. O rayonlardakı bu strukturlara rəhbərlik edən şəxslər öz işlərinə peşkarlıq və məsuliyyətlə yanaşırlar, fəaliyyətlərində xalqın və dövlətin mənafelərini əsas götürürlər, həmin rayonlarda inkişaf gedir. Təəssüflər olsun ki, bəzi hallarda bunun əksi də olur. Lakin bu gün bütün neqativ hallara qarşı dövlətimiz tərəfindən ciddi və qəti tədbirlər görülməkdədir. Öz çıxışında dövlət başçımızın da qeyd etdiyi kimi, işində yol verdiyi qanun pozuntuları səbəbilə artıq bir neçə keçmiş icra başçısı cinayət məsuliyyətinə cəlb edilmişdir. Bu, bir daha Azərbaycanda qanunun aliliyi prinsipinə ciddi əməl olunduğunu göstərir. Ölkə Prezidenti yeni təyinat alan məmurlara hər zaman konkret tapşırıq və tövsiyələrini verir. Bu tövsiyələrdə ən vacib məsələ kimi, vətəndaşlara qayğı, insanların mövcud problemlərinin həlli, rifah halının daim yüksəlməsi istiqamətində zəruri addımların atılması kimi məsələlər hər zaman önə çəkilir, xüsusi vurğulanır”.
K.Qafarov açıqlamasının sonunda deyib: “Ölkə Prezidenti cənab İlham Əliyev öz çıxışında bir daha şəhid ailələrinə və qazilərə daha çox diqqət və qayğı göstərilməsinin vacibliyini qeyd etdi. Bir həqiqətdir ki, hazırda dövlətimiz tərəfindən bu istiqamətdə əhatəli və effektiv iş aparılır, böyük layihələr həyata keçirilir. Şəhid ailələri və müharibə əlillərinin məişət problemləri dövlət xətti ilə həll olunur. İndiyədək 12500-dən çox şəhid ailəsinə dövlət tərəfindən mənzillər, fərdi evlər, minlərlə minik maşınları verilmişdir. Dövlət öz üzərinə düşən vəzifəni səmərəli şəkildə və yüksək səviyyədə icra edir. Bu gün rayonlarda fəaliyyət göstərən icra orqanları da dövlətin bu siyasətini yerlərdə məsuliyyətlə həyata keçirməlidirlər. Möhtərəm Prezidentimizin dediyi kimi Azərbaycan dövlətinin siyasəti Azərbaycan xalqının rifah halının yaxşılaşmasına istiqamətləndirilib”.
"Yol-xeber.az" xəbər verir ki, Bir qrup Mədrəsə qəsəbə sakinlərinin müraciətini nəzərə alaraq, Şamaxı RİH yanında fəaliyyət göstərən İctimai Şuranın, İcra hakimiyyəti rəhbərliyinin işə qarışması nəticəsində Şamaxı-Mədrəsə yolunun dağılmış hissələrinin bərpasına başlanmışdır. İlin sonuna kimi isə yolun əsaslı çəkilişi gözlənilir.
Yol idarəsinin rəhbəri N.Eynalova məsələyə müsbət yanaşmasına görə təşəkkür edirik.
Alternativ enerji mənbələrindən istifadə edilməklə, ən müasir innovativ texnologiyalar tətbiq edilib. Ağalı kəndi yeni texnologiyalarla inşa edilən ilk yaşayış evləridir.
Bunu "Xəzər Xəbər"ə açıqlamasında Qaçqınların və məcburi köçkünlərin işləri üzrə dövlət komitəsinin sədr müavini Fuad Hüseynov deyib.
Fuad Hüseynov əlavə edib ki, işğaldan azad olunan ərazilərdə yaşayanlara bağlı yeni qanun layihəsi hazırlanır.
İşğaldan azad olmuş ərazilərimizə böyük qayıdış mərhələli şəkildə davam etdirilir.Yaxın gələcəkdə növbəti köçün Füzuli rayonunun Dövlətyarlı kəndində baş tutması gözlənilir.
Dövlət komitəsinin sədr müavini onu da bildirdi ki, Ağalıda məskunlaşan şəxslərin doğmaları portaldan qeydiyyatdan keçdikdən sonra öz yaxınlarını görməyə gedə bilərlər.
"Yol-xeber.az" xəbər verir ki, QOBUSTAN SÜNDİ KƏNDİ QARABAĞIN AZAD OLUNMASINDA 24 ŞƏHİD VERİB! DÖVLƏT BAŞÇIMIZIN TÖFSİYƏSİNƏ UYĞUN OLARAQ, KƏNDİN ŞƏHİDLƏR XİYABANININ ƏRAZİSİ AAYDA TƏRƏFİNDƏN ASFALTLANIB.
"Hamının bizə nümunə göstərdiyi Sinqapur modelində təhsil həftələrində sayı 44 həftədir. Bizdə isə bu rəqəm 36 həftədir. Bu həftələrin sayının çoxaldılması yaxşı olardı".
Bu sözləri təhsil naziri Emin Əmrullayev deyib. O, dərslərin sentyabrın 1-dın başlaması ilə bağlı təkliflərə münasibət bildirib:
"Təhsil almaqla bağlı saatların sayının artırılmasının insan sağlamlığına zərər vuracağı ilə bağlı cəmiyyətdə miflər mövcuddur. Kompüter qarşısında açox oturanda xəstəlik tutursan və s. Belə valideynlər həmişə olub. İstəyir ki, uşaq dincəlsin. Bu gün çox dincələn uşaqların gələcəkdə problemləri olacağını düşünürəm.
Ətraflı
İstərdik ki, təhsilin müddətini artırmağa cəmiyyət dəstək olsun. Bu, arzuolunandır.
Məsələn, dərslər sentyabrın 1-i başlasın və iyunun 30-da bitsin. İnanmıram ki, biz ayın əvvəli başlasaq, təhsilimizin keyfiyyətində əhəmiyyətli dəyişikliklər olacaq.
Cəmiyyət deyir ki, uşaq az oxusun, amma yaxşı nəticə olsun. Belə formul yoxdur. Məsələn, olimpiada qalibi olmaq üçün uşaqlar gündə 12-14 saat oxuyur. Uşaq təhsilə nə qədər çox zaman sərf edirsə, bu təbii, ki daha yaxşıdır",-deyə nazir əlavə edib.
ABŞ ilə Azərbaycan arasında ikitərəfli hərbi əməkdaşlığa və "Ştatla Tərəfdaşlıq Proqramı"na dəstək çərçivəsində ölkəmizdə səfərdə olan ABŞ Quru Qoşunlarının Avropa və Afrika Komandanlığının Quru Qoşunları Milli Qvardiyası komandanının müavini general-mayor Maykl Vikmanın rəhbərlik etdiyi nümayəndə heyəti hərbi hissə və Müdafiə Nazirliyinin Tibb İdarəsini ziyarət edib.
Bu barədə Müdafiə Nazirliyindən məlumat verilib.
Tərəflər arasında keçirilən görüşlərdə Azərbaycan ilə ABŞ arasında hərbi əməkdaşlıq, eləcə də Oklohoma ştatı ilə "Ştatla Tərəfdaşlıq Proqramı"nı əhatə edən fəaliyyətlər çərçivəsində qarşılıqlı maraq doğuran məsələlər haqqında fikir mübadiləsi aparılıb.
Sonda qarşılıqlı hədiyyələr təqdim olunub, xatirə şəkli çəkdirilib.
Binəqədi rayonu, Rəsulzadə qəsəbəsi, Azadlıq prospekti 195 ünvanında dayanma-durma tələbi ilə bağlı sürücülərdə çaşqınlıq yaranıb.
Vətəndaşlar tərəfindən daxil olan şikayətdə deyilir ki, dayanma-durmanı qadağan edən nişanın quraşdırıldığı yer onun rahat görünməsinə mane olur. Bunun səbəblərindən biri kimi nişandan öncə yerləşən obyekt göstərilir.
Eləcə də, həmin nişanın sağa doğru əyilməsinin də onun görünməsinə mane olan daha bir amil olduğu bildirilir. Bütün bunlar sürücülərin həmin nişanı görməyərək burada avtomobilini park etməsinə və cərimə olunmasına yol açır.
Bakı Şəhər İcra Hakimiyyəti başçısının tabeliyindəki Bakı Nəqliyyat Agentliyinin mətbuat xidmətinin rəhbəri Mais Ağayev “Ölkə.Az”a açıqlamasında bildirdi ki, qurum əməkdaşları həmin əraziyə baxış keçirəcək və yol nişanın əyilən hissəsi düzəldiləcək:
“Lakin burada nişan normal vəziyyətdə görünür və onun qarşısını kəsən ağac da yoxdur. Nişan burada mümkün olan yerdə - səkidə yerləşdirilib”.
Obyektin nişanın görünməsinə mane olması məsələsinə gəlincə isə, qurum rəsmisi bildirib ki, bu, başqa problemdir: “Mən burada obyektin olmasına haqq qazandırmıram. Məsələnin bu hissəsi isə bizə aid deyil”.
Daha bir məqam ondan ibarətdir ki, yol hərəkət nişanından əvvəl obyektin olması və zibil qablarının yolun kənarında yerləşdirilməsinə baxmayaraq ərazidə avtomobillər park edir. Bu vəziyyətlə bağlı isə heç bir addım atılmır. Mövcud vəziyyət həm piyadaların, həm də nəqliyyatın hərəkətini çətinləşdirir. Lakin yolun enli hissəsində isə dayanma-durma qadağan olunub. Onu da qeyd edək ki, sözügedən hissədə dayanan avtomobillərin sürücüləri əsasən xəstəxanaya gəldiyindən nəqliyyat vasitələrini burada park edir. Xəstəxanaya isə zəruri səbəbdən üz tutan vətəndaşlar maşınlarını saxlamaq üçün ən uyğun ərazinin məhz qadağan olunan hissə olduğunu deyir.