 |
|
Bu gün Azərbaycan Vətən müharibəsində əldə etdiyi tarixi Qələbədən sonra ötən ikinci ili başa vurmaq üzrədir. 2022-ci il xalqımız və dövlətimiz üçün bir sıra önəmli hadisələrlə əlamətdar olub. Həmçinin ölkəmizin əldə etdiyi uğur və nailiyyətlər Azərbaycanın növbəti ilə daha güclü dövlət olaraq qədəm qoymasını təmin edib. Ölkəmizin Avropanın enerji təhlükəsizliyi ilə bağlı məsələlərdə oynadığı rolun getdikcə artan əhəmiyyəti, Asiyanı Avropa ilə birləşdirən mühüm beynəlxalq nəqliyyat-logistik layihələrdə aparıcı mövqelərdə iştirakı, Türk Dövlətləri Təşkilatı, İslam Əməkdaşlıq Təşkilatı, Qoşulmama Hərəkatı və digər mötəbər beynəlxalq təsisatlarda yüksək nüfuz sahibi olması, dünya və xüsusilə də Avrasiya məkanı ölkələri ilə çoxtərəfli və ikitərəfli formatlarda dostluq və əməkdaşlıq əlaqələrinin getdikcə daha da genişlənməsi və möhkəmlənməsi bunu deməyə əsas verir ki, Prezident İlham Əliyev tərəfindən həyata keçirilən uğurlu, praqmatik xarici və daxili siyasət kursu sayəsində Azərbaycan müəyyən etdiyi bütün hədəflərə sabit ardıcıllıqla çatmaqda davam edir. Təbii ki, bu hədəflərin sırasında ölkənin iqtisadi gücünün artması və insanlarımızın rifah yüksəlişinin təmin olunması xüsusi yer tutur. Məhz bu baxımdan da bu gün Azərbaycanın azad edilmiş ərazilərdə həyata keçirdiyi irimiqyaslı bərpa və yenidənqurma işləri, eləcə də ölkədə davamlı olaraq həyata keçirilən və insanların maddi təminatlarının daha da möhkəmləndirilməsinə hesablanmış sosial islahatlar respublikamızın iqtisadi gücünün ən bariz göstəriciləri kimi çıxış edə bilər.
Bütün bunlarla yanaşı növbəti illərdə Azərbaycanın öz qarşısına daha yüksək və müəyyən aspektlərdə daha vacib hədəflər qoyduğu bu gün ölkənin ictimai-siyasi həyatında cərəyan edən hadisələrin mahiyyətində duran amillərdən və ilk növbədə Prezident İlham Əliyevin öz çıxışlarında verdiyi mesajlardan aydın görünür. Yeni il ərəfəsində dövlət başçısının Qərbi Azərbaycana Qayıdış Konsepsiyasının hazırlanması ideyasını irəli sürməsi də məhz Azərbaycanın qarşısında duran növbəti hədəfi müəyyənləşdirən çağırış oldu.
Bugünkü buraxılışımızda yeni Qayıdış Konsepsiyası və ölkə ictimaiyyətini maraqlandıran digər mövzular ətrafında AİA.az-ın suallarını Milli Məclisinin deputatı, Milli Məclisin Hesablayıcı Komissiyasının sədri, Qara Dəniz İqtisadi Əməkdaşlıq Təşkilatı Parlament Assambleyasının sədr müavini, Azərbaycan Ağsaqqallar Şurasının sədri, iqtisad elmləri doktoru, professor Eldar Quliyev cavablandırır.
- Eldar müəllim, artıq yola salmaqda olduğumuz 2022-ci ilin son günlərində Sizinlə bir daha görüşmək imkanı əldə etdiyimizə görə şox şadıq. Xoş gördük Sizi.
- Salam, xoş gününüz olsun. Mən də bu görüşümüzdən çox məmnunam.
- Eldar müəllim, yəqin Siz də razılaşarsınız ki, bu gün Azərbaycan cəmiyyətində ən çox müzakirə olunan mövzu sözsüz ki, Ölkə Prezidenti cənab İlham Əliyevin 24 dekabr tarixində Qərbi Azərbaycan İcmasının ziyalıları ilə görüşü zamanı söylədiyi nitqində səsləndirdiyi fikirlərlə bağlıdır. Bir qədər də dəqiq desək, dövlət başçısının verdiyi “Biz Qərbi Azərbaycana Qayıdacağıq” mesajı ölkə ictimaiyyəti tərəfindən xalqın artıq yüz ildən bəri davam edən və bu illər ərzində hədsiz dərəcədə böyümüş bir nisgilinə son qoyacaq qərar kimi qəbul edildi. Bu baxımdan Siz Qərbi Azərbaycandan olan soydaşlarımızın yaxın gələcəkdə öz dədə-baba yurdlarına qayıtma ehtimalını necə qiymətləndirirsiniz?
- İlk növbədə mən bir məqamı qeyd etmək istəyirəm. Bu gün Qərbi azərbaycanlıların öz tarixi yurd yerlərinə qayıdış perspektivlərinin reallaşdırılmasını bir çox ifadələrlə adlandırmaq olar – məqsəd, qarşıya qoyulmuş vəzifə, yeni müəyyən edilmiş hədəf və sairə kimi. Yalnız tək bir kəlmədən başqa. Bu da ehtimal ifadəsidir. Dekabr ayının 24-ü tarixinədək hələ bu sözü işlətməyin bəlkə də yeri var idi. Lakin bu tarixdə möhtərəm dövlət başçımız cənab İlham Əliyev Qərbi Azərbaycana Qayıdış Konsepsiyasının hazırlanması ideyasını bir vəzifə kimi ortaya qoyduqdan sonra, artıq bu perspektivin bir ehtimal statusundan çıxdığı və Azərbaycan xalqının, Qərbi Azərbaycandan olan soydaşlarımızın tarixən yaşadıqları torpaqlara geri dönüşlərinin sadəcə bir zaman məsələsi olduğu heç kimdə şübhə doğura bilməz. Bu gün Azərbaycan Prezidentinin hər bir kəlməsinin ən yüksək səviyyələrdə imzalanmış istənilən bir saziş və müqavilədən daha etibarlı təminat olduğunu artıq sadəcə Azərbaycan xalqı deyil, həmçinin bütün dünya ictimaiyyəti də yaxşı bilir. Əgər dövlət başçımız bizim Qərbi Azərbaycana qayıdacağımızı deyibsə, deməli bunun baş verəcəyi artıq labüddür. Digər tərəfdən isə, cənab Prezident İlham Əliyevin irəli sürdüyü təşəbbüslərin, ifadə etdiyi fikirlərin bu qədər yüksək çəki və nüfuza malik olmasının başlıca səbəbi dövlət başçımızın hər kəlməsinin təkzibolunmaz dəlil və sübutlara, tarixi faktlara əsaslanmasıdır. O cümlədən möhtərəm Prezidentimiz dekabrın 24-də Qərbi Azərbaycandan olan bir qrup ziyalı ilə keçirdiyi görüşün gedişində Azərbaycan xalqının bütün beynəlxalq konvensiyalarda təsbit edilmiş hüquqlarının təmin edilməsi istiqamətində atılmalı olan zəruri addımlar barədə fikirlərini açıq və net şəkildə ifadə etmişdir. Əslində dövlət başçımızın çıxışının əsasında duran Qərbi Azərbaycana Qayıdış Konsepsiyasının hazırlanması ideyası mahiyyət etibarı ilə bütün Azərbaycan xalqının iradəsinin ifadəsidir və bu ideyanın tezliklə həyata keçirilməsi dövlət əhəmiyyətli məsələdir. Cənab Prezidentin qeyd etdiyi kimi, Qərbi Azərbaycan bizim tarixi torpağımızdır, bunu bir çox tarixi sənədlər və xəritələr, həmçinin tarixin özü təsdiqləyir. Öz işğalçı siyasətlərini nəyin bahasına olursa-olsun həyata keçirməyə çalışan ermənilər Qarabağda olduğu kimi, Qərbi Azərbaycanda da bizim bütün tarixi, dini abidələrimizi yerlə-yeksan ediblər, dağıdıblar, azərbaycanlıların tarixi irsini silmək istəyiblər, ancaq buna nail ola bilməyiblər. Mövcud olan tarixi sənədlər və xəritələr ermənilərin bütün cəhdlərini boşa çıxarır. Bütün tarixi mənbələr sübut edir ki, indiki Ermənistan ərazisində tarix boyu məhz Azərbaycan xalqı yaşayıb. Bu gün cənab Prezident İlham Əliyevin həyata keçirdiyi xarici siyasətin əsas prioritet istiqamətlərindən biri də məhz Qərbi Azərbaycanla bağlı həqiqətlərin dünya ictimaiyyətinə çatdırılmasıdır. Bu məqsədlə dövlət başçısı işlərin daha məqsədyönlü şəkildə və nəticəyə hesablanmış tərzdə aparılmasının vacib olduğunu qeyd etmişdir. Azərbaycanın tarixi torpaqlarında ermənilərin xarici havadarlarının köməyi ilə yaratdıqları Ermənistan bu gün Avrasiya məkanında mövcud olan yeganə monoetnik dövlətdir. Bu da tarixən həmin torpaqlarda yaşamış azərbaycanlıların öz dədə-baba yurdlarından zorla deportasiya olunmalarından sonra baş vermişdir. Lakin Azərbaycan iki il bundan öncə apardığı Vətən müharibəsində əldə etdiyi tarixi Qələbəsilə Cənubi Qafqazda yeni reallıqlar yaratdı. Bu gün isə artıq həmin reallıqların verdiyi imkanlardan yararlanmağın və tarixi ədalətin Qarabağ və Şərqi Zəngəzurda olduğu kimi, Qərbi Azərbaycan torpaqlarında da bərpa edilməsinə nail olmağın tam zamanıdır.
- Mövzunu davam etdirərək cənab Prezident İlham Əliyevin 24 dekabr tarixli çıxışında toxunduğu daha bir məsələ barədə fikirlərinizi öyrənmək istərdik. Bu gün dünyada mövcud olan antiazərbaycan qüvvələrin ölkəmizə qarşı saxta ittihamlar irəli sürmək üçün istinad etməyə çalışdıqları hadisələrdən biri də sentyabr ayında Azərbaycan Silahlı Qüvvələrinin Ermənistanla sərhəddə həyata keçirdikləri hərbi əməliyyatdır. Bu barədə nə deyə bilərsiz?
- İlk növbədə birmənalı olaraq qeyd etmək lazımdır ki, Azərbaycan Ermənistanla sərhəd ərazilərində bu hərbi əməliyyatı keçirməyə məcbur idi. Hər şeydən öncə bu, ölkənin təhlükəsizliyi baxımından zəruri idi. Sentyabr toqquşmaları Azərbaycanı gələcəkdə yarana biləcək böyük problemlərdən sığortalayacaq. Öz nitqində cənab Prezident İlham Əliyev də qeyd etdi ki, bu gün Ermənistanda revanşist qüvvələr xarici havadarlarının təhriki və dəstəyi ilə yenidən baş qaldırırlar. Ermənistan cəmiyyətinin şüuru azərbaycanofobiya ilə o qədər zəhərlənib ki, bu ölkənin siyasi səhnəsində faktiki olaraq normal düşüncəyə malik olan insan tapmaq qeyri-mümkündür. İkinci bir tərəfdən də Azərbaycanın xarici düşmənləri erməni revanşizmini öz məqsədləri üçün qidalandırır və bu amildən ölkəmizə qarşı yeni təhdid vasitəsi kimi istifadə etməyə çalışırlar. Ermənilər isə, hər zaman olduğu kimi, yenə də revanş almaq fikri ilə yaşayır və ümid edirlər ki, hansısa üçüncü qüvvələri Azərbaycanla müharibəyə cəlb edə biləcək, özləri isə hansısa güclü himayədarın arxasında gizlənərək bizə qarşı məkrli planlarını həyata keçirəcəklər. Məhz bütün bunlardan sığortalanmaq üçün Azərbaycan mütləq Ermənistan sərhədi istiqamətində daha əlverişli mövqelərə sahib olmalı idi və buna da nail oldu. Bu gün Azərbaycanın mövqelərindən artıq Göyçə gölünü görmək olur. Həmçinin Azərbaycanın nəzarətində olan yüksəkliklərdən hətta Naxçıvan dağları da görsənir. Az öncə də qeyd etdiyimiz kimi, bizi bu doğma torpaqlarımızdan ayıran ərazilər də əslində tarixi Azərbaycan torpaqlarıdır. Bizim bu ərazilərə sərhəd hüdudlarından, nisgillə baxmağımız ölçüyəgəlməz haqsızlıqdır. Bu azmış kimi, erməni qəsbkarları xalqımızı otuz il ərzində Qarabağ həsrətini də yaşamağa məcbur etdilər. Bir daha sentyabr əməliyyatına qayıdaraq demək istəyirəm ki, cənab Prezident cənab İlham Əliyevin rəhbərliyi ilə bu il Azərbaycanın əldə etdiyi həm hərbi, həm də siyasi uğurlar həm Qərbi Azərbaycana gələcək qayıdışımız üçün, həm də ölkəmizin təhlükəsizliyi üçün möhkəm zəmin yaradan məqamlardır. Eyni zamanda da bu qələbələr, dövlət başçımızn dediyi kimi, Azərbaycanı güclü dövlət kimi qəbul etmək istəməyən qüvvələrə açıq-aydın bir xəbərdarlıq mesajıdır.
- Yeri gəlmişkən, ermənilərin və onların havadarlarının öz cinayətlərini ört-basdır etmək məqsədilə ətrafında hay-küy qaldırdıqları Laçın-Şuşa yolunda cərəyan edən hadisələr də artıq neçə müddətdir ki, dünya ictimaiyyətinin diqqətini cəlb etməkdədir. Necə bilirsiz, bu baş verənlər ölkəmizin beynəlxalq nüfuzuna təsir baxımından hansı nəticələrə səbəb ola bilər?
- Azərbaycan Ermənistanla bağlı bütün digər hallarda olduğu kimi, bu məsələdə də yalnız öz hüquqlarını müdafiə edir, öz haqqını tələb edir. Təbii ki, ermənilər hər zamankı kimi, bu dəfə də Azərbaycan Respublikasının suveren ərazisi olan və müvəqqəti olaraq Rusiya sülhməramlı qüvvələrinin yerləşdiyi Laçın yolu ətrafında cərəyan edən hadisələrin mahiyyəti barədə dünya ictimaiyyətinə təhrif olunmuş məlumatlar təqdim etməklə öz cinayətlərindən diqqəti yayındırmağa çalışırlar. Və yenə də bəzi dövlətlər özlərinin Xarici İşlər Nazirlikləri səviyyəsində əsassız və qərəzli bəyanatlar səsləndirməklə ölkəmizə təzyiq göstərməyə çalışırlar. Halbuki, məsələnin əsli bundan ibarətdir ki, Ermənistan 30 il davam edən işğal dövrü ərzində Azərbaycana qarşı həyata keçirdiyi hərbi və ekoloji cinayətlərini bu gün də Rusiya sülhməramlı qüvvələrinin müvəqqəti nəzarətində olan ərazilərimizdə davam etdirir və Azərbaycan ictimaiyyəti buna haqlı etirazlarını bildirir. Məlum olduğu kimi, bu ilin dekabr ayının 3-dən etibarən Azərbaycan Respublikası İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyətin Rusiya sülhməramlı kontingentinin müvəqqəti yerləşdiyi ərazilərimizdə, o cümlədən Qızılbulaq qızıl və Dəmirli mis-molibden yataqlarında faydalı qazıntı yataqlarının qanunsuz istismarı, bundan irəli gələn ekoloji və digər törəmə fəsadlar ilə bağlı monitorinq keçirmələri ilə bağlı sülhməramlı kontingentin komandanlığı ilə danışıqlar aparılıb. Monitorinqin aparılmasına dair razılıq əldə olunsa da dekabrın 10-da Azərbaycan nümayəndələrinin sözügedən ərazilərə səfərinə maneçilik törədilib. Məhz bu səbəbdən də Azərbaycan vətəndaş cəmiyyətinin nümayəndələri və ekologiya fəalları Şuşa-Laçın yolunda etiraz aksiyasına başlayıblar. Bu aksiya bütün Azərbaycan xalqının haqlı narazılığının göstəricisidir və hər kəs buna hörmətlə yanaşmalıdır. Ayrı-ayrı ölkələrin məsələyə qərəzli yanaşmaları isə ermənilərin Azərbaycan ərazisində qeyri-qanuni iqtisadi fəaliyyətini və təbii sərvətlərin qanunsuz istismarına yönəlmiş hərəkətlərini, eləcə də davam edən hərbi cinayətlərini təqdir etmək anlamına gəlir. Təbii ki, bu ölkələrin Ermənistanın artıq post-müharibə dövründə də Azərbaycan ərazilərinə davamlı olaraq Laçın dəhlizi vasitəsilə silah-sursatın və son iki ildə artıq yüzlərlə insanın ölümünə səbəb olmuş minaların hələ də daşınması, ölkəmizin təbii sərvətlərinin talan edilməsi, qiymətli metal və digər yataqların qanunsuz istismarı nəticəsində Azərbaycan təbiətinin məhv edilməsi kimi cinayət əməllərini dəstəkləmələrinin həm siyasi, həm də iqtisadi motivləri var. Məsələ bundadır ki, Azərbaycanın təbii sərvətlərinin talanmasında iştirak edən xarici şirkət və korporasiyalar arasında məhz bu gün bizə təzyiq etməyə çalışan ölkələrin təmsilçiləri də yer alıblar. Təbii ki, bu məqamda iqtisadi qazanc əldə edən korporasiyalarla Cənubi Qafqazı daimi hərbi münaqişə regionu olaraq görmək istəyən güclərin maraqları üst-üstə düşür. Rəsmi İrəvan isə silahlı qüvvələrini hələ də Azərbaycan ərazilərindən çıxarmamaqla, Laçın yolundan həm hərbi təxribatlar, həm də qeyri-qanuni iqtisadi fəaliyyət üçün istifadə etməklə, bölgədə bütün nəqliyyat kommunikasiya yollarının açılmasına maneçilik törətməklə 2020-ci ildə imzalanmış 10 noyabr tarixli Üçtərəfli Bəyanatın ən vacib bəndlərini kobud şəkildə pozur. Əminəm ki, Azərbaycan yalnız bu kimi hallara göz yummaqla öz beynəlxalq nüfuzuna xələl gətirə bilər. Əksinə, öz prinsipial mövqeyini ortaya qoymaqla həm Azərbaycan xalqı, həm də Azərbaycan dövləti dünyada sahib olduğu mövqelərini daha da möhkəmlətmiş olur. Yeri gəlmişkən ölkəmizin xüsusilə son vaxtlar bir sıra Mərkəzi və Cənub-Şərqi Avropa dövlətləri ilə münasibətlərində müşahidə olunan yüksək dinamika da bunu bir daha təsdiq edir.
- Tamamilə Sizinlə razıyam və əslində mənim növbəti sualım da məhz elə bu məqamlarla bağlıdır. Məlumdur ki, son bir neçə ayda cənab Prezident İlham Əliyevin bir sıra Avropa ölkələrinə etdiyi işgüzar səfərlər, eləcə də bu ölkələrin dövlət başçılarının Azərbaycana rəsmi səfərləri ölkələrimiz arasında əməkdaşlıq əlaqələrinin yeni səviyyəyə yüksəlməsini şərtləndirib. Bu münasibətlərin perspektivləri barədə nə deyə bilərsiz?
- Bilirsiz ki, son vaxtlar Azərbaycan cəmiyyətində ən çox danışılan mövzulardan biri ölkəmizin Avropa ölkələrinin enerji təhlükəsizliyində getdikcə artan aparıcı rolu barədədir. Lakin bu barədə danışarkən biz bəzən bir vacib məqama lazım olduğundan daha az diqqət yetiririk. Bu da ondan ibarətdir ki, qarşılıqlı əlaqələrin genişlənməsində Avropa ölkələri ən azı Azərbaycan qədər, bəzi hallarda isə daha artıq maraqlıdırlar. Çünki bu əməkdaşlıq formatlarında Azərbaycan enerji ixrac edən, Avropa ölkələri isə idxal edən tərəflərdir. Bu gün Avropa ölkələri üçün yeni enerji mənbələrinin müəyyən edilməsi dövlət siyasətinin strateji əhəmiyyət kəsb edən prioritet istiqamətidir. Bu, təhlükəsizlik məsələsidir və hər bir müdrik dövlət başçısı bu kimi məsələlərdə ilk növbədə hansısa böyük qonşusunun şübhəli maraqlarını deyil, məhz öz ölkəsinin və xalqının mənafelərini düşünməlidir. Rumıniya, Macarıstan, Serbiya və bir çox digər Avropa ölkələrinin timsalında da biz bu gün məhz bunu müşahidə edirik. Buna görə də Avropanın lider dövlətlərindən olan Fransanın qərəzli çıxışları əksər ölkələrin etibarlı tərəfdaş olan Azərbaycanla münasibətlərinə qətiyyən təsir etmir. Buna nümunələr kifayət qədər çoxdur. Ölkə Prezidenti cənab İlham Əliyevin dekabrın 17-də Rumıniyanın Prezidenti Klaus Yohannisin dəvəti ilə Buxarestə işgüzar səfəri də Azərbaycan, Gürcüstan, Rumıniya və Macarıstan arasında bir sıra mühüm sahələrdə uzunmüddətli əməkdaşlıq üçün təməl yaradacaq sənədin imzalanması ilə əlamətdar oldu. Həmin gün Buxarestdə “Azərbaycan Respublikası, Gürcüstan, Rumıniya və Macarıstan Hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş”in imzalanması mərasimi ilə bağlı plenar iclas keçirildi. Tədbirdə çıxış edən Avropa liderləri birmənalı olaraq Azərbaycanla iqtisadi əməkdaşlıq müstəvisində yaxınlaşmadan məmnun olduqlarını qeyd etdilər. Bu baxımdan Macarıstanın Baş naziri Viktor Orbanın səsləndirdiyi fikirlər xüsusilə diqqətəlayiqdir: “Avropa Komissiyasının müdrikliyinə görə biz Azərbaycana çox diqqət yetirdik, onunla əməkdaşlığımızı inkişaf etdirdik. Azərbaycanın və Prezident Əliyevin Avropa İttifaqı ilə əməkdaşlığa həmişə açıq olması təqdirəlayiqdir. Mən özüm də bir il ərzində Avropa İttifaqının həmişə Azərbaycana etibarlı tərəfdaş kimi etibar edə biləcəyinin şahidi olmuşam. Bu gün enerji sahəsində Macarıstan adından bu sazişi imzalaya bildiyimiz üçün biz Azərbaycandakı, Gürcüstandakı və Rumıniyadakı dostlarımıza, həmçinin Avropa Komissiyasının Prezidentinə minnətdarıq.” Həmçinin tədbirdə çıxış edən Rumıniyanın Baş naziri Nikolae Çuke dünyada baş verən hazırkı böhran şəraitində həmrəylik nümayiş etdirməyin və ehtiyatları bir araya gətirməyin vacibliyini qeyd edərək, 2023-cü ilin əvvəlindən Azərbaycan qazının Rumıniyaya çatdırılması ilə bağlı razılığa gəlinməsi istiqamətində irəliləyişi alqışladığını bildirdi. Bütün bunlar Azərbaycanın beynəlxalq mövqelərinin getdikcə daha da möhkəmləndiyini və ölkəmizin Avropanın enerji təhlükəsizliyi məsələlərində rolunun önəminin bundan sonra daha da artaçağını söyləməyə əsas verir. Həmçinin Azərbaycanın Avropa ölkələri ilə münasibətlərinin inkişaf perspektivləri barədə sualınıza cavab olaraq mən Serbiya Respublikasının Prezidenti Aleksandar Vuçiçin dekabrın 21-də ölkəmizə etdiyi işgüzar səfəri çərçivəsində mətbuata verdiyi bəyanatından bəzi fikirlərini sitat gətirə bilərəm: “Prezident Əliyev, mən Sizə dostluğa, Serbiyaya səmimi münasibətinizə görə olduqca minnətdaram. Arzu edirəm və ümidvaram ki, Siz tezliklə yenidən Serbiya Respublikasına səfər edəcəksiniz və hər hansı Avropa ölkəsinə səfəriniz zamanı daim Serbiyada dayanacaqsınız və o, Sizin həmişə məmnunluqla baş çəkəcəyiniz ikinci eviniz olacaq. Mən həmişə Bakıya gələndə həqiqətən də çox xoşbəxt oluram. Ümidvaram ki, Sizin baxışınız, bizim və xalqınızın səyləri sayəsində əməkdaşlığımız üçün yeni pəncərə açacağıq.” Düşünürəm ki, bu sözlər heç bir əlavə şərh tələb etmir.
Ardı var...
Söhbətləşdi: Azər Məmmədov
Bu sözləri Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin İdarə Heyətinin sədri Vüqar Behbudov 2022-ci ilin yekunlarına həsr olunan mətbuat konfransında çıxışı zamanı deyib. O bildirib ki, 2022-ci ildə 2863 şəhid ailəsi üzvü və müharibə əlillərinə sanatoriyalarda yollayış vərəqəsi verilib. Onlardan 502 nəfəri şəhid ailəsi üzvüdür.
2018-ci ildən İraq və Suriyadan ölkəmizə deportasiya edilən Azərbaycan vətəndaşlarının sayı 412 nəfər təşkil edib.
Bu sözləri Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin İdarə Heyətinin sədri Vüqar Behbudov 2022-ci ilin yekunlarına həsr olunan mətbuat konfransında çıxışı zamanı deyib. O bildirib ki, onlardan 380 nəfəri uşaq, 32 nəfəri anadır.
Agentlik sədrinin sözlərinə görə, 2022-ci ildə isə sözügedən ölkələrdən Azərbaycana 66 nəfər deportasiya edilib, onlardan 64-ü sosial xidmət müəssisələrində yerləşdirilib.
Keçmiş məcburi köçkünlər üçün Bakının Ramana, Ümid, Kürdəxanı qəsəbələrində, Abşeron və Samux rayonlarında inşa edilmiş çoxmənzilli binalarda istifadəsiz qalan mənzillərin satışı həyata keçiriləcək.
Bu sözləri Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin İdarə Heyətinin sədri Vüqar Behbudov 2022-ci ilin yekunlarına həsr olunan mətbuat konfransında çıxışı zamanı deyib. O bildirib ki, ƏƏSMN tərəfindən 23 yanvar 2023-ci il 10:00-da həmin mənzillərin onlayn satışına başlanacaq:
"Satışdan əldə olunan vəsait ölkəmizin digər bölgələrində şəhid ailələri və müharibə ilə əlaqədar əlilliyi olan şəxslərin mənzil və fərdi evlə təminatına yönəldiləcək".
Əmək pensiyalarının orta aylıq məbləği 12 faiz artıb.
BAKU.WS xəbər verir ki, bunu Dövlət Sosial Müdafiə Fondunun İdarə Heyətinin sədri Himalay Məmişov 2022-ci ilin yekunlarına dair mətbuat konfrasında bildirib.
O əlavə edib ki, cari ildə əmək pensiyalarının orta aylıq məbləği 372 manat təşkil edib. 2023-cü il üzrə bu məbləğ 423 manat proqnozlaşdırılıb.
"Əgər biz bu göstəricini ötən ilin rəqəmləri ilə müqayisə etsək, bu zaman 12 faizlik artımı görə bilərik. Həmin rəqəmi 2018-ci illə müqayisə etsək isə 68 faizdən artıq artımın olduğunu müşahidə edərik.
Həm müavinətlər və təqaüdlərin, həm də əmək pensiyalarının artırılması istiqamətində də müvafiq tədbirlər görüləcək", - deyə Himalay Məmişov vurğulayıb.
"Naxçıvan” Əlahiddə Sərhəd Diviziyasının komandiri haqda xəbər yayılıb.
Globalinfo.az xəbər verir ki, “Naxçıvan” Əlahiddə Sərhəd Diviziyasının komandiri general-leytenant Niyaməddin Tağıyev tutduğu vəzifəsindən çıxarılıb.
N.Tağıyev paralel olaraq Dövlət Sərhəd Xidməti rəisinin müavinidir. Onun Bakıya çağırıldığı deyilir.
Başqa məlumata görə, Niyaməddin Tağıyevin yerinə artıq təyinat olub. Bakıdan göndərilən polkovnik Bəhmən Babayevin “Naxçıvan” Əlahiddə Sərhəd Diviziyasının komandiri vəzifəsinə təsdiqləndiyi bildirilir.
“Bu gün Azərbaycanın səmimi dostluq və strateji tərəfdaşlıq əlaqələrini sürətlə inkişaf etdirdiyi ölkələrdən biri də Serbiya Respublikasıdır. Ötən ay Azərbaycan Prezidenti İlham Əliyevin bu ölkəyə rəsmi səfəri, eləcə də dekabrın 21-də Serbiya Respublikasının Prezidenti Aleksandar Vuçiçin Azərbaycana işgüzar səfəri bunu deməyə əsas verir ki, ölkələrimiz arasında əlaqələr məhz dövlət başçıları arasında mövcud olan səmimi dostluq münasibətləri əsasında formalaşır və inkişaf edir. Azərbaycan və Serbiya Prezidentlərinin təkbətək görüşündən sonra dövlət başçıları bəyanatlarla çıxış ediblər. Prezident İlham Əliyev öz çıxışında qeyd edib ki, Serbiya və Azərbaycan öz resurslarına arxalanan və müstəqil siyasət aparan ölkələrdir. Əlaqələrin daha da möhkəmlənməsi və konkret əməli nəticələr verməsi məqsədilə ötən ay Belqradda qəbul edilmiş qərarların tezliklə yerinə yetirilməsi istiqamətində iş aparılır. Hər iki ölkənin dövlət başçıları qəbul edilmiş qərarların vaxt itirilmədən icra olunması üçün müvafiq göstərişlərini veriblər.”Bu sözləri mətbuata açıqlamasında Milli Məclisin deputatı Kamaləddin Qafarov deyib.
Deputat bildirib ki, Azərbaycan və Serbiya arasında bir çox sahələr üzrə əməkdaşlığın kifayət qədər böyük tarixinin olması bugünkü əlaqələrin genişləndirilməsi prosesinə öz töhfələrini verməkdədir: “Bu gün Serbiya və Azərbaycan arasında strateji tərəfdaşlığa dair artıq bir neçə sənəd imzalanmışdır. Ölkələrimiz arasında münasibətlərin daha da möhkəmləndiyini göstərən amillərdən biri də budur ki, Azərbaycan və Serbiya hər zaman bir-birinin ərazi bütövlüyünü və suverenliyini dəstəkləyib. Hər iki dövlətin xarici siyasətinin əsas prioritetlərindən biri bundan ibarətdir ki, beynəlxalq hüququn norma və prinsipləri bütün ölkələr üçün əsas olmalıdır və bu sahədə dünyada müşahidə olunan ikili standartlar siyasətinin təzahürləri hər iki ölkəni çox narahat edir. Bu fikir və yanaşma eynilikləri, təbii ki, ölkələrimiz arasında qarşılıqlı anlaşma mühitini daha dayanıqlı edir və bir çox sahələrdə əməkdaşlıq əlaqələrinə yüksək dinamika vermiş olur. Cənab Prezident İlham Əliyevin öz çıxışında qeyd etdiyi kimi, ticarət sahəsində aparılan əməkdaşlığın müsbət nəticələri tezliklə öz nəticəsini verəcəkdir. Həmçinin nəqliyyat-logistika sahəsində əməkdaşlıq üçün böyük potensial mövcuddur. Azərbaycan və Serbiyanın ərazilərindən beynəlxalq nəqliyyat dəhlizlərinin keçdiyi nəzərə alınmaqla, müvafiq qurumlar bu sahədə uzlaşma və bağlantıların yaradılması istiqamətində fəal işləməlidirlər.”
Kamaləddin Qafarov Azərbaycan və Serbiya arasında müdafiə sənayesi sahəsində əməkdaşlıq perspektivlərinin əhəmiyyətini də qeyd edib: “Təbii ki, bu gün Azərbaycanın Avropa ölkələrinin enerji təhlükəsizliyi sahəsində getdikcə artan rolu həm çoxtərəfli, həm də ikitərəfli əməkdaşlıq formatlarında əsas amil kimi çıxış edir. Serbiya ilə əməkdaşlığın mühüm bir hissəsi də məhz energetika sektorudur. Öz çıxışında cənab Prezident İlham Əliyev də qeyd etdi ki, xüsusilə son vaxtlar bu sahə daha böyük əhəmiyyət kəsb etməkdədir. Bu gün Azərbaycan öz təbii resurslarını ən müxtəlif istiqamətlərə, Avropa qitəsinə və o cümlədən Serbiyaya və onunla qonşu olan ölkələrə ixrac edir. Bu reallıqlar Azərbaycan və Serbiya arasında həm təbii qaz, həm də elektrik enerjisi ilə əlaqədar əməkdaşlıq üçün geniş imkanlar açır və bu imkanların həyata keçirilməsi istiqamətində artıq müvafiq danışıqlar aparılmışdır. Gələn ildən Azərbaycanın elektrik enerjisinin Serbiyaya ixrac edilməsi üçün əməli addımlar atılacaqdır. Bununla yanaşı qeyd olunmalıdır ki, ölkələrimiz arasında perspektiv əməkdaşlıq istiqamətlərindən biri də müdafiə sənayesi sahəsidir və bu, olduqca önəmli bir məqamdır. Bu sahədə hər iki ölkədə potensial var və bu potensialın birləşdirilməsi üçün praktiki addımların atılacağı gözlənilir”.
“2003-cü il oktyabrın 15-də Azərbaycan xalqı tarixi seçimini edərək öz səsini ölkəmizdə Heydər Əliyev siyasətinin davam etdirilməsinə, sabitliyin qorunmasına və dinamik inkişafın təmin olunmasına verdi. Ulu Öndər Heydər Əliyev Azərbaycan xalqına 2003-cü il yanvarın 10-da etdiyi müraciətində demişdir: “Üzümü sizə - həmvətənlərimə tutaraq, qarşıdan gələn Prezident seçkilərində Prezidentliyə namizəd, mənim siyasi varisim, Yeni Azərbaycan Partiyası sədrinin birinci müavini İlham Əliyevi dəstəkləməyə çağırıram. O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm.” Bu tarixi müraciət, əslində, Azərbaycan dövlətinin və xalqının gələcək müqəddəratını həll edəcək bir çağırış idi. Xalqımız bu çağırışı layiqincə dəyərləndirdi və öz gələcək taleyini Ulu Öndərin ən layiqli davamçısı olan cənab İlham Əliyevə etibar etdi.”
Bu sözləri ölkə mətbuatlna açıqlamasında Milli Məclisin deputatı Kamaləddin Qafarov deyib.
Deputat qeyd edib ki, Prezident İlham Əliyev ölkənin siyasi sisteminin yeni, müasir çağırış və tələblərə cavab verə bilən unikal modelini qurmağa müvəffəq olub: “Azərbaycan Prezidenti İlham Əliyev Azərbaycan siyasi sisteminə rasional siyasi davranış modeli, məntiqi mühakimələrə və analitik təhlilə əsaslanan, mütərəqqi, pozitiv, milli məqsədlərə xidmət edən, realizmə söykənən siyasi fəaliyyət nümunəsi gətirdi. Dövlətimizin başçısı öz fəaliyyəti və davranışı ilə ölkənin ictimai həyatına və siyasi sisteminə siyasi mədəniyyət, milli mənəviyyatımıza uyğun siyasi əxlaq standartları, milli siyasi etika nümunələri təqdim etdi. Milli qürur və ləyaqət məfhumları Azərbaycanın son illər ərzində əldə etdiyi möhtəşəm uğurların, parlaq qələbələrin əsasında durdu. Prezident İlham Əliyev xalqımızın qələbə əzmini özünə qaytardı. Prezident İlham Əliyevin yürütdüyü siyasət müasir Azərbaycanın güclənməsinə, milli-mənəvi dəyərlərimizin ən yüksək səviyyədə qorunmasına xidmət edərək, ölkəmizi qısa zamanda dünyada tolerantlıq məkanı, mədəniyyətlərarası və sivilizasiyalararası dialoq məkanı kimi tanıtdı.”
Prezident İlham Əliyevin həyata keçirdiyi siyasət xəttinin özündə demokratik dəyərlərə sadiqlik, sağlam əməkdaşlıq və siyasi dialoq kimi amilləri birləşdirdiyini vurğulayan K.Qafarov deyib: “Ölkə Prezidenti cənab İlham Əliyevin həyata keçirdiyi islahatlar Azərbaycanın dayanaqlı inkişafını təmin etmişdir. Müasir dünyada, o cümlədən ölkəmizdə sürətlə dəyişən reallıqlar və ardıcıl yenilənən obyektiv amillər islahatların davamlı aparılması tələbini ortaya çıxarır. Sonuncu prezident və parlament seçkilərindən sonra ölkəmizdə dövlət başçısının təşəbbüsü ilə başlanan islahatlar yeni mərhələyə qədəm qoydu. Bu mütərəqqi proses indi də cənab Prezident İlham Əliyevin rəhbərliyi altında əzmlə davam etdirilir. Etibarlı ictimai münasibətlərin formalaşmasına xidmət edən islahatlar yeni yaranan siyasi konfiqurasiyanın əsas tərkib hissəsi kimi çıxış edir. O cümlədən, ölkədə iqtidar-müxalifət münasibətlərinin sağlam təməllər üzərində inkişaf etdirilməsi də Prezident İlham Əliyevin rəhbərliyi ilə həyata keçirilən dövlət siyasətinin əsas göstəricilərindən biridir. Dövlətimizin başçısının birbaşa tapşırığı əsasında üzvlərinin sayından, ölkə ərazisi üzrə əhatə dairəsinin miqyasından, siyasi çəkisindən və hər hansı digər amildən asılı olmayaraq respublikamızda fəaliyyət göstərən bütün siyasi partiya rəhbərləri ilə keçirilmiş davamlı görüşlər demokratik ənənələrin şaxələnməsinə xidmət edən müsbət təcrübə olmuşdur.”
Deputat Prezident İlham Əliyevin dünyada mövcud olan bir ovuc antiazərbaycançı qüvvələrin ölkəmizə qarşı hazırladıqları məkrli planları məharətlə pozduğunu qeyd edərək deyib: “Cənab İlham Əliyevin beynəlxalq münasibətlər sahəsində malik olduğu fundamental biliklər dünyada mövcud olan islamofob dairələrin və antiazərbaycançı mərkəzlərin ölkəmizə qarşı hazırladıqları və həyata keçirmək istədikləri dağıdıcı planların qarşısında əsl sipər olmuşdur. Dövlətimizin başçısı öz əzmkarlığı, diplomatik məharəti, siyasi iradəsi sayəsində, ilk növbədə, düşmənlərimizin Azərbaycanda yaratmaq istədikləri “idarə olunan xaos” planını pozdu. Xalqımızın parçalanmasına hesablanmış etnik, siyasi və ideoloji qarşıdurmalar bəlasını ölkənin başı üzərindən sovuşdurdu. Möhtərəm Prezidentimizin ən böyük xidmətlərindən biri də bu oldu ki, o, düşmən qüvvələrin Şərqin bir çox müsəlman ölkələrində uğurla həyata keçirdikləri “lidersizləşdirmə, ideologiyasızlaşdırma və dövlətsizləşdirmə” siyasətinin Azərbaycanda reallaşdırılmasının qarşısını ustalıqla aldı. Bu hücuma Azərbaycan Prezidenti bütün təfərrüatlarına qədər zərgər dəqiqliyi ilə düşünülmüş milli vətənpərvərlik, milli mənəviyyat və milli qürur amillərini qarşı qoydu. Ölkə Prezidenti, Silahlı Qüvvələrin Ali Baş Komandanı cənab İlham Əliyevin həyata keçirdiyi siyasət xəttinin ən böyük təntənəsi isə, əlbəttə, Azərbaycanın 2020-ci ilin sentyabr-noyabr aylarında apardığı və tarixi Qələbə ilə başa vurduğu II Qarabağ müharibəsinin nəticəsi olaraq özünün ərazi bütövlüyünü bərpa etməsində təzahürünü tapdı. Dövlətimizin başçısı xalqın 30 illik həsrətinə, dədə-baba torpaqları nisgilinə son qoymaqla Ulu Öndər Heydər Əliyevin ən böyük vəsiyyətini yerinə yetirmiş oldu”.
Qarşıdan gələn 2023-cü Dovşan ilidir və bu il Qara su dovşanı üzərində təhvil olur.
Qara Su Dovşanı şanslı bir simvoldur, lakin diqqəti sevir, buna görə də gələn ildə uğurlar cəlb etməyə kömək edəcək əlamətlərə laqeyd yanaşmayın.
Gümüş və ya qızıldan bir dovşan heykəlcikləri alın və onları Yeni il ərəfəsində gözə çarpan bir yerə qoymağı unutmayın. Bununla şans və firavanlıq evinizdən yan keçməyəcək;
Gələn il üçün qara və ya mavi pul qabı seçin - maliyyə dolğunluğu sizi belə gözləyəcək;
Qonaqlardan tərəvəz olan bir qab ilə evə gəlmələrini xahiş edin, dovşan bu jesti qiymətləndirəcək və sizin üçün əlverişli olacaq.
Yeni il masasına yerkökü qoymağı unutmayın - evdə mübahisələr və münaqişələr olmayan bir atmosfer hökm sürəcək;
Həm də unutmayın ki, dovşan təlaşı, yüksək tonda danışmağı və lazımsız davaları sevmir, ona görə də hədiyyələrin alınmasını əvvəlcədən planlaşdırın və dekabrın 31-də bütün ev işlərini sakit və yavaş-yavaş həll edin. Ruhunuzda harmoniya və yenisinə açılmaq istəyi hökm sürəcək. Bu ilin bütün simvolları sizin üçün çoxlu şans və uğurlar gətirəcək./sfera
Naxçıvana gedən jurnalist gözləmədiyi halla qarşılaşıb.
Bu barədə Baku TV-nin jurnalisti Tural Müseyibov məlumat verib.
O, bu hadisəni təəccüb içində qarşılayıb.
Daha ətraflı Baku TV-nin süjetində: