 |
|
Bu gün səhər pik saatlarında paytaxtın Moskva prospektində Beynəlxalq Avtovağzalın qarşısından 20 Yanvar dairəsinə qədər əsas və kənar yolda nəqliyyat vasitələrinin hərəkətində sıxlıq müşahidə olunduğundan həmin ərazidən keçən 2, 7A, 13, 18, 14, 37, 65, 67, 83, 92, 119, 135 və 199 nömrəli müntəzəm marşrut xətləri üzrə avtobusların hərəkət intervallarında gecikmələr müşahidə olunur.
Bu barədə Bakı Nəqliyyat Agentliyindən bildirilib.
Vahid Dispetçer Xidmətinin məlumatına əsasən qeyd olunan marşrut xətləri üzrə ümumilikdə 15-20 avtobus 18-22 dəqiqə gecikmə ilə hərəkət edirlər.
A.Puşkin küçəsi Muğan bağının qarşısından, Üzeyir Hacıbəyov küçəsi ilə kəsişməyə qədər də müşahidə olunan nəqliyyat sıxlığı səbəbindən 1, 4, 5, 46, 125 və 175 nömrəli müntəzəm marşrut xəttləri üzrə avtobuslararası hərəkət intervallarında 15-16 dəqiqə gecikmə müşahidə olunur. 13-15 ədəd avtobus sıxlıqda qalıb.
İyunun 14-də F.Köçərli adına Respublika Uşaq Kitabxanasının təşkilatçılığı ilə Bakı Kitab Mərkəzində qəhrəman tank komandiri, şəhid leytenant, şair Murad Nağıyevə həsr olunmuş “Murad” adlı kitabın təqdimatı baş tutdu. Təqdimatdan öncə şəhidlərin əziz xatirəsi bir dəqiqəlik sükutla yad edildi.
Tədbirdə şəhidin ailə üzvləri, yaxınları, Mədəniyyət Nazirliyinin kitab sənayesi şöbəsinin əməkdaşı İslam Hüseynov, Qarabağa dönüş təşkilatının media və kommunikasiya şöbəsinin müdiri Əhməd Mahmudov, "Təhsil" nəşriyyatının baş direktoru Tural Axundov, tələbələr,KİV nümayəndələri və.s qonaqlar iştirak etdilər.
"Təhsil" nəşriyyatında nəşr olunan kitabın tərtibçisi Banu Hümbətli, Sərxan Nağıyev, redaktoru isə İbrahim İlyaslıdır.
Təqdimatın çıxışçıları İbrahim İlyaslı, şəhid Murad Nağıyevin təhsil aldığı 271 saylı orta məktəbinin direktor müavini Rüxsarə Əlizadə, döyüş yoldaşı, baş leytenant Namiq Səfərov, aktyor, dramaturq, Kamran Ağabalayev, Respublika Uşaq Kitabxanasının direktoru Şəhla Qəmbərova, BKM-nin direktoru Günel Anarqızı, şəhidin ailə üzvləri çıxış edərək, Murad Nağıyevin keçdiyi həyat və döyüş yolundan bəhs edən kitab haqqında məlumat verdilər.
Ağdam muğam məktəbinin şagirdlərinin ifasında “Qarabağ şikəstəsi”, “Xudayar təsnifi” səsləndi. Həmçinin F. Köçərli adına Respublika Uşaq Kitabxanasının əməkdaşlarının ifasında şəhid Murad Nağıyevin qələmə aldığı və “Murad” kitabına daxil olunmuş şeirləri dinlənildi.
Qeyd edək ki, kitabda 44 günlük Vətən müharibəsində misilsiz qəhrəmanlıq göstərən leytenant Murad Nağıyevin keçdiyi həyat və döyüş yolundan bəhs edilir.
Kitaba, həmçinin, Murad Nağıyevin şeirləri, xüsusilə də cəbhədə olarkən qələmə aldığı sətirləri daxil edilmişdir.
Şəhid leytenant Murad Nağıyev vəfatından sonra "Vətən uğrunda və "Cəbrayılın azad olunmasına görə" medalları ilə təltif olunmuşdur.
Daxili İşlər Nazirliyi Nəqliyyatı İntellektual İdarəetmə Mərkəzi paytaxt yollarındakı son vəziyyəti açıqlayıb.
Mərkəzdən verilən xəbərə görə, hazırda sıxlıq olan küçə və prospektlər aşağıdakılardır:
1. Bakı Sumqayıt şosesi - Masazır dairəsindən başlayaraq “20 Yanvar” dairəsinə qədər sıxlıq müşahidə edilir;
2. Ziya Bünyadov prospekti - “Çermet” körpüsünün üzərindən başlayaraq Atatürk prospekti ilə kəsişməyə qədər “20 Yanvar” dairəsi istiqamətdə sıxlıq müşahidə edilir;
3. Tbilisi prospekti - “20 Yanvar” dairəsindən başlayaraq Mərkəz istiqamətində sıxlıq müşahidə edilir.
Ölkəmizin ən müasir standartlara cavab verən tibb ocaqları sırasında layiqli yer tutan Akademik M.A.Topçubaşov adına Elmi Cərrahiyyə Mərkəzinin yaranmasının 60 illiyinə həsr olunan elmi-praktiki konfrans keçirilib.
AİA.Az xəbər verir ki, konfransda Səhiyyə Nazirliyinin müavini Nadir Zeynalov, TƏBİB-in Strateji inkişaf departamentinin rəhbəri Yaqut Qarayeva, Milli Məclisin deputatları Musa Quliyev, İlham Məmmədov, Ə.Əliyev adına Azərbaycan Dövlət Həkimləri Təkmilləşdirmə İnstitutunun rektoru Nazim Qasımov, M.A.Topçubaşov adına Elmi Cərrahiyyə Mərkəzinin direktoru Rauf Ağayev, İcbari Tibbi Sığorta üzrə Dövlət Agentliyinin Tibbi planlama departamentinin rəhbəri Hikmət İbrahimli, Strateji təhlil departamentinin rəhbəri Araz Nəsirov, eləcə də Mərkəzdə fəaliyyət göstərən və xaricdən dəvət edilən həkim-mütəxəssislər iştirak ediblər.
Tədbir dövlət himninin səslənməsi ilə başladı.
Sonra şəhidlərin xatirəsi bir dəqiqəlik sükutla yad olundu.
Tədbirdə açılış nitqi ilə çıxış edən M.A.Topçubaşov adına Elmi Cərrahiyyə Mərkəzinin direktoru, respublikanın əməkdar həkimi Rauf Ağayev bildirdi ki, hazırda Mərkəz Respublikanın böyük elmi-tədqiqat müəssisələrindən biri hesab edilir və burada ölkədə analoqu olmayan ixtisaslaşdırılmış cərrahi xidmət növləri cəmləşib. R.Ağayev vurğuladı ki, uşaq ürək cərrahlığı, xüsusiləşdirilmiş angioloji mərkəzlər, kardiocərrahiyyə, endokrin cərrahlığı, damar cərrahlığı və s. şöbələr ölkədə yeganə ixtisaslaşdırılmış şöbələrdir. 2011 - ci ildə ECM-nin 50 illiyi ilə əlaqədar tam təmir olunduğunu, müasir avadanlıqlarla təchiz edildiyini, açılışa dövlət başçısının şəxsən özünün gəldiyini minnətdarlıq hissi ilə xatırladı. Natiq belə qayğılı münasibətin bu müəssisənin kollektivini öz üzərinə düşən işləri daha həvəslə yerinə yetirməyə sövq etdiyini vurğulayaraq, göstərilən diqqətə görə Azərbaycan Respublikasının Prezidenti İlham Əliyevə, Birinci Vitse-prezident Mehriban xanım Əliyevaya təşəkkürünü bildirdi. Mərkəzin bir elm ocağı kimi gənc həkimlərin, cərrahların yetişməsində müstəsna rolu olduğunu deyən R. Ağayev hal - hazırda müəssisədə 119 elmi işçinin, o cümlədən, 26 professorun, 70 tibb üzrə fəlsəfə doktorunun çalışdığını, Vətən müharibəsi dönəmində ECM-nin 35 həkiminin ön cəbhədə qospitallarda fəaliyyəti göstərdiyini, Mərkəzdə 120 qazinin cərrahi əməliyyata və müalicə olunduğunu diqqətə çatdırdı. Qeyd etdi ki, Mərkəzin həkimləri mütəmadi olaraq regionlara ezam olunaraq həm xəstələrə yardım edirlər, həm də bölgələrdəki həkimlərə öz bilik və bacarıqlarını öyrədirlər.
Daha sonra çıxış edən Səhiyyə nazirinin müavini Nadir Zeynalov M.A.Topçubaşov adına Elmi Cərrahiyyə Mərkəzinin əvvəllər Milli Elmlər Akademiyasının, sonradan Səhiyyə Nazirliyinin tabeliyində fəaliyyət göstərdiyi bütün bu 60 il ərzində çox şərəfli yol keçdiyini qeyd etdi. Mərkəzin sovet dönəmində də Elmi-Tədqiqat Kliniki və Eksperimental Cərrahiyyə İnstitutu kimi tanınan bir elm ocağı olduğunu bildirdi. Peşəkar tibbi və qeyri-tibbi personalın xidməti sayəsində hər gün onlarla insanın şəfa tapdığını söylədi. Mərkəzdə çalışan təcrübəli həkimlər tərəfindən müasir səhiyyə standartlarına uyğun əməliyyatların icra edildiyini deyən nazir müavini sonra Səhiyyə naziri Teymur Musayevin təbrikini və salamlarını çatdırdı.
Sonra çıxış edən TƏBİB-in Strateji inkişaf departamentinin rəhbəri Yaqut Qarayeva bildirdi ki, 60 illik müddət ərzində A.Topçubaşov adına Elmi Cərrahiyyə Mərkəzi fəaliyyəti ilə həmişə seçilən və öndə olan müəssisələrdən biri olub. Y.Qarayeva Mərkəzin əməkdaşları tərəfindən hazırlanan 300-dən çox elmi işin ölkədə və xaricdə nəşr edildiyini diqqətə çatdırıb.
Əziz Əliyev adına Azərbaycan Dövlət Həkimləri Təkmilləşdirmə İnstitutunun rektoru Nazim Qasımov Azərbaycan səhiyyəsinin özünün yeni inkişaf mərhələsini yaşadığını və son illərdə tibbi xidmətlərin müasir standartlar səviyyəsinə yüksəldiyini, vətəndaşların sağlamlığının etibarlı təminatı məsələlərinin dövlətin üzərinə götürdüyü sosial öhdəliklər sırasında mühüm yer tutduğunu bildirdi. O, ölkə səhiyyəsinin inkişafında Mərkəzin xüsusi yerinin olduğunu vurğuladı.
Azərbaycan Tibb Universitetinin rektoru Gəray Gəraybəylinin adından, universitetin müəllim və tələbələri adından tədbir iştirakçılarını salamlayaraq yubiley münasibətilə təbrik edən ATU-nun prorektoru Sabir Əliyev ECM-nin yaxşı tanıdığı həkimləri haqqında öz xatirələrini danışdı.
Konfransda Milli Məclisin deputatları Musa Quliyev və İlham Məmmədov ölkə başçısı İlham Əliyev tərəfindən səhiyyə sisteminə göstərilən diqqət və qayğıdan danışıb, həyata keçirilən islahatların gələcək illərdə səhiyyənin inkişafı üçün əvəzsiz rol oynayacağını qeyd etdilər.
Milli Onkologiya Mərkəzinin direktor müavini Fuad Quliyev Mərkəzin direktoru Cəmil Əliyevin təbrik məktubunu oxudu.
Gürcüstan və Qazaxıstan nümayəndə heyətinin də iştirak etdiyi və çıxışlarının dinlənildiyi tədbirdə Türkiyədən, Tacikistandan, Dağıstan və Özbəkistandan göndərilən təbrik məktubları oxundu.
Tədbirdə Elmi Cərrahiyyə Mərkəzinin fəaliyyəti haqqında qısametrajlı film nümayiş olundu.
Həqiqətən də bir həkim üçün onun vasitəsilə şəfa tapmış, hansısa xəstəlikdən xilas olmuş pasiyentinin təbəssümündən və təşəkküründən daha böyük mükafat ola bilməz. Hər bir həkimin bütün fəaliyyət illəri ərzində əldə edə biləcəyi ən dəyərli mükafatı, onun müalicə edib sağlam həyata qaytara bildiyi insanların minnətdarlıqlarıdır. Əslində elə bu yazının ərsəyə gəlməsinin də səbəbkarı məhz qardaş İran İslam Respublikasında neyrocərrah Əhməd doktorun müalicə etmiş olduğu pasiyaentlərindən biri, Nuranə Tağıyevanın bizə müraciəti olub. Nuranə xanım redaksiyamıza müraciət edərək Əhməd doktora öz minnətdarlığını məhz bu cür bildirməsində ona köməklik etməyimizi xahiş etmişdi.
Neyrocərrah, tibb elmləri doktoru, professor Əhməd Cabbari İran İslam Respublikasında onurğa beyni cərrahiyəsi, kəllə bazası cərrahiyəsi və neyroendoskopiya kimi sahələrdə uğurla fəaliyyət göstərən yüksək ixtisaslı peşəkar həkimlərdən biridir.
Nuranə Tağıyeva isə, professor Əhməd Cabbarinin yenidən öz sağlamlığına qovuşdurduğu çoxsaylı insanlardan biridir. Nuranə xanım öz həkiminə minnətdarlığını bildirərək bunları deyib: “Neyrocərrah, professor Əhməd Cabbariyə yüksək peşəkarlığına və sonsuz insansevərliyinə görə ən dərin təşəkkürümü və ən səmimi hörmətimi bldirmək istəyirəm.
Əminəm ki, hörmətli professor indiyədək yüzlərlə xəstəyə dəqiq müayinəsi və müalicəsi ilə yeni həyat verib, mənim kimi, onları da ölümün pəncəsindən alıb. Ola bilsin, Əhməd doktor bəlkə də fərqinə varmır ki, hər gün həm İranın, həm də Azərbaycanın neçə-neçə kəndində, şəhərində yüzlərlə ailədə onun adına xeyir-dua səsləndirilir, minnətdarlıq edilir. Çünki o, nə qədər ümidsiz, əlacsız xəstəyə, demək olar ki, onların həyatlarının son anında nicat, şəfa vermiş, keçirdiyi uğurlu əməliyyatla onları yenidən həyata qaytara bilmişdir.Bu arada məni bilavasitə professor Əhməd Cabbari ilə tanış etmiş Turac ağaya da mənə etdiyi bu yaxşılığına görə xüsusi minnətdarlığımı bildirirəm. Allah sizlərdən razı olsun!”
Sonda bir maraqlı məlumatı da oxucularımızın diqqətinə çatdırmaq istəyirik. Məsələ bundadır ki, professor Əhməd Cabbari ailədə beş qardaşdan biridir, amma yeganə həkim deyil. İnsansevərlikləri, yüksək ziyalı həyat tərzləri ilə seçilən Cabbarilər ailəsinin daha üç üzvü, yəni Əhməd doktorla birlikdə beş qardaşdan dördü həkimdirlər. Professor Əhməd Cabbarinin digər üç qardaşı da öz sahələrində yüksək ixtisaslı peşəkarlardırlar.
"Yol-xeber.az" xəbər verir ki, Biləsuvar inzibati rayon kimi 1930-cu ildə təşkil olunsa da, Azərbaycanın ən zəngin tarixi keçmişi olan ərazilərdən biridir. Bəydili, Təzəkənd, Amankənd ərazisində tünc dövrünə aid kurqanlar, Dərvişli və Yuxarı Ağalıda erkən dəmir dövrünə aid "Torpağay təpə", "Seyid altı təpə", "Ceyran təpə" abidələri, orta əsrlərə aid Şəhriyar və Ağdam qalaları rayonun zəngin maddi-mədəni tarixi irsə malik olduğunu, bu irsin qorunmasının zəruriliyini sübut edir. Biləsuvar Tarix-Diyarşunaslıq muzeyinin kollektivi hazırda məhdud imkanlar çərçivəsində müəssisəyə təqdim olunmuş eksponatları diqqət və qayğı ilə qorumaqla məhz bu irsin gələcək nəsillərə çatdırılması üçün səylərini səfərbər ediblər. Rayona səfərim çərçivəsində muzeyə baş çəkib bölgənin tarixini ehtiva edən eksponatlara baxış keçirdim, Regional Mədəniyyət İdarəsinin rəisi Əlisultan Sadıxovla birlikdə müəssisənin kollektivi ilə görüşüb fədakar əməklərinə görə təşəkkür etdim. Eyni zamanda, qeyd etdik ki, hazırda təmirsiz köhnə tikilidə yerləşsə də, növbəti dövr ərzində muzey üçün yeni binanın inşası investisiya planına salınıb, aidiyyəti strukturlardan verilən məlumata görə tezliklə problem köklü olaraq həllini tapacaq.
Təəsüratlarımı sizinlə paylaşarkən, fürsətdən istifadə edərək qonaqpərvərliyə görə əməkdaşlara və muzeyin direktoru Nailə xanım Mehdiyevaya, dönməz dövlətçilik mövqeyinə və deputat fəaliyyətimizi çevik və səmərəli həyata keçirməkdə daimi köməyinə görə Regional Mədəniyyət İdarəsinin rəisi Əlisultan Sadıxova bir daha təşəkkür edir, hər birinə uğurlar arzulayıram.
.
.
“ Ölkə Prezidenti cənab İlham Əliyev Cənubi Qafqazda dayanıqlı sülhün və sabitliyin bərqərar olunmasında son dərəcə maraqlıdır və bu istiqamətdə davamlı olaraq çalışmalar həyata keçirir. İyunun 16-da işə başlamış “Qlobal dünya nizamına təhdidlər” mövzusunda IX Qlobal Bakı Forumunun açılış mərasimində çıxış edən Prezidentimiz bir çox digər vacib mövzularla yanaşı bu məsələyə də ətraflı münasibət bildirərək, Qafqazda regional təhlükəsizliklə bağlı ölkəmizin yanaşmalarını çox aydın şəkildə təqdim etdi. Tarixin səhifələrində müharibədə işğalçı dövlətə qalib gəlmiş, təcavüzkarı məğlub edərək öz ərazilərini azad etmiş qalib ölkənin sülh təklifi etməsinə çox nadir hallarda rast gəlinir. Lakin Azərbaycan bu addımı atır. Səbəb isə budur ki, dövlətimiz təkcə öz ölkəsinin ərazisində deyil, bütün Cənubi Qafqaz regionunda sülh, əmin-amanlıq və inkişaf görmək istəyir. Prezident İlham Əliyevin dediyi kimi, bu gün artıq sülh və əməkdaşlıq yaratmaq vaxtıdır. Əgər Ermənistan hökuməti bu tarixi fürsəti əldən qaçırsa, ən çox uduzan erməni xalqı olacaq.” Bu sözləri mətbuata açıqlamasında Azərbaycan Respublikası Milli Məclisinin deputatı Kamaləddin Qafarov deyib.
Millət vəkili qeyd edib ki, Azərbaycan bu gün də Ermənistanla münasibətlərin normallaşdırılması istiqamətində üzərinə düşən vəzifələri yerinə yetirməkdə davam edir. “Bu prosesdə cüzi irəliləyişlər müşahidə edilsə də, gözlənilən nəticələrin əldə olunması üçün qətiyyən kafi deyil. Məlum olduğu kimi, Azərbaycan 2020-ci ilin noyabr ayında Vətən müharibəsini tarixi Qələbə ilə başa vurduqdan az sonra sülh razılaşması üzərində çalışmağa başlamağı təklif etdi. Lakin Ermənistan bu sülhsevər təklifə cavab vermədi. Daha sonra Azərbaycan yenə də regional sülh və təhlükəsizlik prinsiplərini əsas tutaraq bu istiqamətdə növbəti addım atdı. Prezident İlham Əliyevin qeyd etdiyi kimi, Azərbaycan hər iki ölkənin sərhədlərinə və ərazi bütövlüyünə qarşılıqlı hörmət etmək və tanımaq, indi və gələcəkdə hər hansı bir ərazı iddialarından qarşılıqlı şəkildə çəkinmək prinsipi də daxil olmaqla, beynəlxalq hüququn beş əsas prinsipini və eynilə bütün region ölkələrinin mənafeylərinə uyğun olan digər prinsipləri də özündə ehtiva edən təklif irəli sürdü.Ermənistan hökuməti bu beş prinsipi qəbul etdi.
Əlbəttə ki, bu olduqca yaxşı bir haldır və artıq müsbət dinamikanın təzahürüdür. İndi artıq əməli addımlar atmaq vaxtıdır. Azərbaycan yenə də xoşməramlı niyyətini nümayiş etdirərək öz tərəfindən sülh razılaşması üzrə komissiya yaratdı. İndi müvafiq addımın Ermənistan tərəfindən atılması lazımdır ki, artıq bilavasitə sülh danışıqları başlasın. Lakin Ermənistan hələ də nəyisə gözləyirmiş kimi, qərarsızlıq nümayiş etdirir. Bu isə qətiyyən yaxşı əlamət deyil”.
K.Qafarov Azərbaycana qarşı istənilən növbəti ərazi iddialarının Ermənistana çox baha başa gələ biləcəyini vurğulayaraq deyib: “Prezident İlham Əliyev Vətən müharibəsindən sonra keçən müddət ərzində Azərbaycanın Ermənistanla birgə yaşayış və normal qonşuluq münasibətlərinin qurulması üçün hər iki ölkə tərəfindən atılması zəruri olan addımlar barədə dəfələrlə bəyanatlar verib. Bakı Forumunun açılış mərasimin etdiyi çıxışında da dövlət başçısı bu məsələyə toxundu və Azərbaycanın mövqeyini növbəti dəfə birmənalı olaraq ortaya qoydu. İlk növbədə, Ermənistan 2020-ci il 10 noyabr tarixli üçtərəfli Moskva Bəyanatının bütün müddəalarına və xüsusilə kommunikasiyaların açılması ilə bağlı öhdəliklərinə əməl etməlidir. Necə ola bilər ki, Azərbaycan Ermənistandan ölkəmizin erməni əhalisinin yaşadığı Qarabağ bölgəsinə maneəsiz çıxışı təmin etsin, Ermənistan isə Zəngəzur dəhlizinin açılmasını, yəni Azərbaycanın Naxçıvan Muxtar Respublikası ilə əlaqəsini bloklasın ? Əlbəttə ki, bu, yolverilməzdir və Azərbaycan bu vəziyyətin uzun müddət davam etməsinə dözə bilməz. Ermənilər bilməlidirlər ki, vaxt uzatmaq məqsədilə məsələlərin həllini gecikdirmək taktikası heç də yaxşı sonluqla nəticələnmir. Azərbaycanın bu məsələdə mövqeyi qəti və birmənalıdır. Zəngəzur dəhlizinin açılması gələcək regional sülhün əsas baza elementlərindən biridir. Prezident İlham Əliyev məxsusi olaraq bu məsələni vurğulamaqla alternativ variantın olmadığını bir daha qeyd etdi: “Əgər bizə bu əlaqə yolu təqdim edilməyəcəksə, sülh haqqında danışmaq çətin olacaq və Azərbaycanın Ermənistanla normal qonşuluq münasibətlərinin qurulmasına yönəlmiş bütün səyləri uğursuz olacaq. Bir daha qeyd etmək istəyirəm ki, bu, vacib məsələdir, Azərbaycanın bunu tələb etməyə haqqı var. Birincisi, Ermənistan hökuməti müvafiq Bəyanatı imzalayıb. İkincisi, Azərbaycan müharibədə qalib gəlib və işğaldan əziyyət çəkmiş ölkə olaraq bizim bunu tələb etməyə mənəvi haqqımız var.”
Millət vəkilinin fikrincə, Zəngəzur dəhlizinin açılmaması müzakirə mövzusu ola bilməz, çünki bu məsələ Üçtərəfli Bəyanatda öz əksini birmənalı şəkildə tapıb. Digər tərəfdən, Ermənistan tərəfindən hələ də dırnaqarası “Dağlıq Qarabağ”ın statusu ilə bağlı fikirlər səsləndirilməkdədir. Bu, ilk növbədə, Ermənistanın özü üçün çox təhlükəli mövqedir:” Azərbaycan ərazisində Dağlıq Qarabağ adında inzibati ərazi mövcud deyil. Buna görə də statusla bağlı istənilən iddialar faktiki olaraq Azərbaycanın ərazi bütövlüyünü sual altına qoymaq cəhdi kimi qiymətləndirilə bilər. Belə olan halda isə Azərbaycan da Ermənistana qarşı Qərbi Zəngəzurla bağlı eyni iddialar irəli sürə bilər. Həm də nəzərə almaq lazımdır ki, Azərbaycanın buna həm tarixi nöqteyi-nəzərdən hüququ, həm də mənəvi haqqı var. Mifik ərazi iddiaları Ermənistanı böyük problemlərlə üz-üzə qoya bilər”.
İyunun 18-nə gözlənilən hava şəraiti açqılanıb.
Milli Hidrometeorologiya Xidmətindən verilən məlumata görə, Bakıda və Abşeron yarımadasında hava şəraitinin əsasən yağmursuz keçəcəyi gözlənilir. Lakin gündüz bəzi yerlərdə qısamüddətli yağış yağacağı ehtimalı var. Mülayim şimal-qərb küləyi gecə və səhər arabir güclənəcək.
Havanın temperaturu gecə 20-23° isti, gündüz 27-32° isti olacaq. Bakıda gecə 21-23° isti, gündüz 29-31° isti olacaq. Atmosfer təzyiqi 760 mm civə sütunu təşkil edəcək. Nisbi rütubət 50-60 % olacaq.
Azərbaycanın rayonlarında əksər rayonlarda əsasən yağmursuz. Lakin gündüz bəzi şimal və qərb rayonlarında şimşək çaxacağı, arabir yağış yağacağı gözlənilir. Qərb küləyi gecə və səhər arabir güclənəcək.
Havanın temperaturu gecə 18-23° isti, gündüz 31-36° isti, dağlarda gecə 8-13° isti, gündüz 19-24° isti olacaq.
"Yol-xeber.az" xəbər verir ki, “Azərbaycan Dəmir Yolları” QSC (ADY) və Təhsil Nazirliyinin birgə təşkilatçılığı ilə Bakının Binəqədi rayonundakı Vüqar Əvəzov adına 300 nömrəli tam orta məktəbdə dəmiryol nəqliyyatında davranış qaydaları və təhlükəsizliyə dair maarifləndirmə tədbiri keçirilib. Dəmiryol əməkdaşları, məktəbin müəllim və şagird heyətinin iştirak etdiyi tədbirdə şagirdlərə dəmiryol xətlərində təhlükəsiz hərəkətə dair geniş məlumat verilib, videoçarx təqdim olunub.
Bildirilib ki, ADY dəmir yolu ərazisindən keçən şəxşlər üçün təhlükəsiz şərait təmin etmək məqsədilə mütəmadi olaraq tədbirlər həyata keçirir. Bunun üçün yolötürücüləri, keçid körpüləri, tunellər, xəbərdaredici siqnalizasiya sistemi quraşdırılır və təhlükəli ərazilər çəpərlənir. Lakin bəzi hallarda vətəndaşlar qadağan olunmuş ərazilərdən dəmiryol xətlərini keçərək həyatlarını riskə atırlar. Bu kimi hadisələrin qarşısını almaq məqsədilə ADY maarifləndirmə tədbirlərini gücləndirib. Belə ki, qatarlarda cibliklərə təhlükəsizlik qaydalarına dair broşurlar yerləşdirilib, təhlükəsizlik qaydalarına dair illüstrasiyalı yeni kitabça çap olunub.
İnteraktiv formatda təşkil olunan tədbirdə iştirakçılarla qarşılıqlı fikir mübadiləsi aparılıb, onları maraqlandıran suallar cavablandırılıb. Sonda məktəb kitabxanasına dəmiryol nəqliyyatında davranış qaydaları və Azərbaycan Dəmir Yollarının tarixini özündə əks etdirən kitablar təqdim olunub.
Maarifləndirmə tədbirlərinin dəmiryol xətlərinə yaxın ərazilərdə yerləşən digər məktəblərdə də təşkil edilməsi planlaşdırılır.
“Azərbaycana meymunçiçəyi ilə bağlı testlər və dərmanlar gətiriləcək”
Bunu “Report”a açıqlamasında səhiyyə naziri Teymur Musayev bildirib.
Onun sözlərinə görə, Azərbaycan səhiyyəsi istənilən epidemik və pandemik çağırışlara cavab verməyə hazırdır:
“Meymunçiçəyi ilə əlaqədar bütün lazımi qabaqlayıcı tədbirlər görülüb.
Ümumdünya Səhiyyə Təşkilatı tərəfindən ölkəmizə bu günlərdə testlər gətiriləcək. Eyni zamanda meymunçiçəyinin müalicəsi üçün lazım olan və qeydiyyatdan keçmiş bütün dərman preparatları çox qısa müddətdə ölkəmizə gətiriləcək”.