 |
|
Azərbaycanda ölkə üzrə koronavirusa ən çox yoluxma Bakıda qeydə alınıb – 56,2%.
Bu barədə koronavirusinfo.az saytında məlumat verilib.
Abşeronda yoluxma 15,8 %, Aranda 10,2 %, Gəncə-Qazaxda 6,4%, Lənkənarda 4,3 %, Quba-Xaçmazda 1,9 %, Şəki-Zaqatalada 1,7%, Dağlıq Şirvanda 1,6 %, Yuxarı Qarabağda 1,0 %, Naxçıvanda isə 0,04 % təşkil edir.
Yoluxanların 0,8 %-i ölkə xaricindən gələnlərdir.
Xəbər verdiyimiz kimi, avqustun 31-də Azərbaycan Prezidenti İlham Əliyev Fövqəladə Hallar Nazirliyinin Tibb Mərkəzinin koronaviruslu xəstələrin müalicəsi üçün nəzərdə tutulan modul tipli növbəti hospitalının açılışında videoformatda iştirak edib.
AZƏRTAC dövlətimizin başçısının hospitalın açılışındakı çıxışından bəzi məqamları təqdim edir.
“Pandemiya həm ölkə iqtisadiyyatına, həm də insanların sosial vəziyyətinə mənfi təsir göstərmişdir. Bu təsirin fəsadlarını azaltmaq üçün praktiki addımlar atılır. Beş milyona yaxın insan geniş sosial paketlə əhatə olunub. Həm dövlət sektorunda, həm özəl sektorda işləyənlər, eyni zamanda, işsizlər, o cümlədən qeyri-formal formada işləyənlər, aztəminatlı təbəqəyə aid olan insanlar - bütün kateqoriyadan olan insanlar dövlət tərəfindən maddi dəstəklə təmin edilib. Bu, bir daha onu göstərir ki, insanların rifahı, onların sosial vəziyyəti və əlbəttə ki, sağlamlığı bizim üçün əsas məsələdir”.
“Pandemiyanın ilk günlərindən demişdim ki, bizim üçün insanların sağlamlığı prioritet məsələdir və biz bütün səylərimizi bu məsələnin həllinə istiqamətləndirdik. Təbii ki, belə olan halda iqtisadi sahədə çətinliklər də labüd idi. Ancaq hesab edirəm ki, başqa ölkələrlə müqayisədə Azərbaycanda iqtisadi sahədə də vəziyyət daha yaxşıdır. Biz yaxşı bilirik ki, bəzi inkişaf etmiş ölkələrdə pandemiya dövründə iqtisadi tənəzzül 10, 15, 20, 25 faiz səviyyəsindədir. O cümlədən Avropanın inkişaf etmiş ölkələrində yüksək səviyyədədir. Ölkəmizdə isə görülmüş tədbirlər nəticəsində 7 ayda iqtisadiyyat cəmi 2,8 faiz aşağı düşüb. Ümumi dünyada mövcud olan mənzərəni nəzərə alsaq, hesab edirəm ki, bu, yaxşı göstəricidir”.
Rayonlara gediş-gəlişin bərpa edilməsi ilə bağlı qərarı Nazirlər Kabineti yanında operativ qərargah verəcək.
Bu sözləri Oxu.Az-a açıqlamasında Baş Dövlət Yol Polisi İdarəsinin İctimaiyyətlə əlaqələr şöbəsinin rəisi Kamran Əliyev deyib.
K.Əliyev sentyabrın 15-dən etibarən təhsil və təlim prosesinin bərpa olunması ilə əlaqədar regionlardan paytaxta gediş-gəlişə icazə ilə bağlı məsələyə də toxunub:
“Ali təhsil müəssisələrində onlayn təhsil nəzərdə tutulub. İbtidai siniflərə əyani təhsilin isə regionlara gediş-gəlişin bərpası ilə əlaqəsinin olmadığını düşünürəm. Çünki, onlar yaşadıqları, qeydiyyatda olduqları mənzillərdədirlər. Ona görə onların məktəbə getməsində problem olmayacaq.
Əgər kimsə xüsusi karantin rejimi tətbiq olunmazdan öncə rayonlara gedibsə, yəqin ki, həmin şəxslərin artıq qayıdıb yaşadıqları yerdə uşaqlarının tədris müəssisələrinə getməsi ilə bağlı hər hansı əlavə tədbirlər barədə məlumat verilər. Biz icraedici orqanıq. Hazırda bu istiqamətdə proqnoz vermək, operativ qərargahın adından fikir səsləndirmək düzgün olmaz. Operativ qərargah bu istiqamətdə yekun qərar verəndə biz də icraçı orqan olaraq həmin qərardan irəli gələn tədbirləri yerinə yetirəcəyik”.
"Dünənki qərar 15 sentyabra qədərdir. Hər hansı başqa qərar olmasa, 15 sentyabrda metronun fəaliyyəti bərpa ediləcək. Qərar Operativ Qərargahdan asılıdır. İyul ayının 4-dən bu tərəfə gündəlik iş rejimi ilə fəaliyyət davam edir. Dediyiniz məsələ epidemioloji vəziyyətlə bağlıdır”.
Bu fikirləri Qazet.az-a açıqlamasında "Bakı Metropoliteni”nin mətbuat xidmətinin rəhbəri Bəxtiyar Məmmədov deyib. Qurum rəsmisinin sözlərinə görə, 15 gün sonra Bakı metrosu fəaliyyətini bərpa edəcək.
Metronun bu zamana qədər bağlı olmasına aydınlıq gətirən Bəxtiyar Məmmədov bildirib ki, ventilyasiya sisteminin işləməsi koronavirus infeksiyasına yoluxmanı sürətləndirə bilər. Bu səbəbdən mütəxəssislər metronun bağlı olmasını məqsədəuyğun hesab ediblər.
"Ventilyasiya sistemi bütün dünyada olduğu kimidir. Cüzi avadanlıq fərqi ola bilər. Bunun əsas məqsədi sərnişinləri oksigenlə təmin etmək deyil, tuneli hava kütləsi ilə təmin etmək, içəridə olan hava kütləsini çölə vurmaqdır. Ventilyasiya sisteminin birinci vəzifəsi yanğın təhlükəsizliyi ilə bağlıdır. Ventilyasiya sistemi avadanlıqların qorunmasını, uzunömürlülüyünü təmin edir. Ən sonuncu vəzifə sərnişinlərin oksigenlə təmin edilməsidir”, – deyə Bəxtiyar Məmmədov əlavə edib.
Qeyd edək ki, Bakı metrosu Avropa ölkələrindəki metro sistemi ilə demək olar ki, eynilik təşkil edir. Lakin bir çox ölkələrdə koronavirus infeksiyasına yoluxmaların olmasına baxmayaraq metro nəqliyyatı işlək vəziyyətdədir.
Azərbaycanın 10 şəhər və rayonu sərt karantin rejimi zonasından çıxarılıb.
Nazirlər Kabineti yanında Operativ Qərargah COVID-19 virusun yoluxma dinamikasına və mövcud sanitar-epidemioloji vəziyyətə uyğun olaraq Cəlilabad, Gəncə, Masallı, Mingəçevir, Yevlax şəhərləri və Bərdə, Goranboy, Göygöl, Xaçmaz, Salyan rayonlarının 2020-ci il 31 avqust tarixdən etibarən sərt karantin rejimi zonasından çıxarılmasına qərar verib.
Yoluxma hallarının yüksək olduğu Bakı, Sumqayıt şəhərləri və Abşeron rayonunda isə bəzi əlavə məhdudiyyətlər davam edəcək. qazet.az
COVID-19 pandemiyası ilə əlaqədar olaraq Azərbaycan ərazisində tətbiq olunan xüsusi karantin rejimi bu gündən 2020-ci il 30 sentyabr saat 00:00-dək uzadılıb.
Bu barədə Nazirlər Kabineti yanında operativ qərargah qərar qəbul edib.
Qeyd edək ki, Azərbaycan ərazisində tətbiq olunan xüsusi karantin rejimi 31 avqust saat 06.00-da başa çatmalı idi.
Bununla belə, virusa yoluxma dinamikasına və mövcud sanitar-epidemioloji vəziyyətə uyğun olaraq Cəlilabad, Gəncə, Masallı, Mingəçevir, Yevlax şəhərləri və Bərdə, Goranboy, Göygöl, Xaçmaz, Salyan rayonları 2020-ci il 31 avqust tarixdən etibarən sərt karantin rejimi zonasından çıxarılıb.
Yoluxma hallarının yüksək olduğu Bakı, Sumqayıt şəhərləri və Abşeron rayonunda bəzi əlavə məhdudiyyətlər hələ davam edəcək.
Ölkə üzrə muzeylərin və sərgi zallarının fəaliyyəti ilə bağlı məhdudiyyətlər aradan qaldırılıb.
Xüsusi karantin rejiminin qaydalarına riayət etməklə və 10 nəfərədək qruplarda fərdi tədris və repetitor xidmətlərinə icazə verilib.
Sanitar-epidemioloji vəziyyət təhlil edilərək rayonlararası gediş-gəlişin tam açılması məsələsinə təkrar baxılacaq.
Sərt karantin rejimi mövcud olan şəhər və rayonlarda həftəsonları aşağıdakı tarixlərdə ictimai nəqliyyat fəaliyyət göstərməyəcək:
5 sentyabr saat 00:00-dan 7 sentyabr saat 06:00-dək;
12 sentyabr saat 00:00-dan 14 sentyabr saat 06:00-dək;
19 sentyabr saat 00:00-dan 21 sentyabr saat 06:00-dək;
26 sentyabr saat 00:00-dan 28 sentyabr saat 06:00-dək.
Bakı metrosu isə 15 sentyabr saat 06.00-dək işləməyəcək.
Operativ Qərargah virusa yeni yoluxma hallarına yol verməmək üçün bir daha bütün vətəndaşları tətbiq olunmuş karantin rejiminin tələblərinə və tibbi-profilaktik qaydalara riayət etməyə, sosial məsafə saxlamağa, tibbi maskalardan istifadə etməyə çağırır.
"Bakı, Sumqayıt şəhərləri və Abşeron rayonunda bəzi əlavə məhdudiyyətlər hələ davam edəcək”. Bunu Qaynarinfo-ya Baş Dövlət Yol Polisi İdarəsinin şöbə rəisi Kamran Əliyev xüsusi karantin rejiminin uzadılması ilə bağlı qaydaları şərh edərkən deyib. Onun sözlərinə görə, əvvəlki qaydalara uyğun olaraq, rayonlardan Bakıya gediş-gəlişə icazə verilməyib:
"Qərarda göstərilir ki, virusa yoluxma dinamikasına və mövcud sanitar-epidemioloji vəziyyətə uyğun olaraq Cəlilabad, Gəncə, Masallı, Mingəçevir, Yevlax şəhərləri və Bərdə, Goranboy, Göygöl, Xaçmaz, Salyan rayonları 2020-ci il 31 avqust tarixdən etibarən sərt karantin rejimi zonasından çıxarılır. Bu o deməkdir ki, adı çəkilən rayonların vətəndaşları digər inzibati ərazilərə gediş-gəlişdə azaddır. Amma Bakı, Sumqayıt, Abşerondan rayonlara getməyə icazə yoxdur, müəyyən məhdudiyyətlər hələ qüvvədə qalır. Bu inzibati ərazilərdə tətbiq olunan məhdudiyyətlər hələ bir ay da qüvvədə olacaq. Rayon camaatı elə başa düşməsin ki, sərbəst şəkildə Bakıya gələ biləcək. Əhali nə Bakı, Sumqayıt və Abşerondan digər rayonlara buraxılacaq, nə də digər inzibati ərazilərdə yaşayanlar Bakı, Sumqayıt və Abşerona buraxılacaqlar”.
Kamran Əliyev qeyd edib ki, yalnız istisna hallarda vətəndaşlar inzibati əraziyə buraxılacaq: "Məsələn, xidmət sahələri ilə bağlı ezamiyyətə gedib-gələnlər sərbəst şəkildə hərəkət edə bilər”.
Qeyd edək ki, Azərbaycanda xüsusi karantin rejimi oktyabrın 1-nə kimi uzadılıb.
İri ticarət mərkəzlərinin açılması ilə bağlı qərar yoxdur.
Oxu.az Nazirlər Kabineti yanında operativ qərargahın keçirdiyi brifinqdən xəbər verir ki, bunu Azərbaycan Prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyev deyib. O bildirib ki, insanların alış-verişlə bağlı məsələlərini ənənəvi üsullarla həll etməsi tövsiyə edilir:
“Bunun üçün yarmarkalar, digər mağazalar var. Hazırda iri ticarət mərkəzlərinin fəaliyyətinin bərpası ilə bağlı məsələlər müzakirə edilir. Yeni qərar olarsa, bu barədə məlumat veriləcək”.
Azərbaycanla müxtəlif ölkələr arasında hava reyslərinin bərpa edilməsi ilə bağlı danışıqlar aparılır.
Oxu.az Nazirlər Kabineti yanında operativ qərargahın keçirdiyi brifinqdən xəbər verir ki, bunu Azərbaycan Prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyev deyib. Onun sözlərinə görə, Azərbaycanla müxtəlif ölkələr arasında hava reyslərinin bərpa edilməsi ilə bağlı danışıqlar davam etdirilir:
“Almaniyanın “Lufthansa” şirkətinə Frankfurt-Bakı reysinin bərpa olunması ilə bağlı müraciət edilib. Eyni zamanda, digər aviaşirkətlərdən də müraciətlər daxil olub. Ümumilikdə, aviareyslərin bərpa olunması istiqamətində danışıqlar aparılır”.
Karantin rejimi elan olunduqdan bu günə qədər polis orqanları tərəfindən mütəmadi işlər görülür. Bunu dana bilmərik.
Oxu.az Nazirlər Kabineti yanında operativ qərargahın keçirdiyi brifinqdən xəbər verir ki, bunu Azərbaycan Prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyev deyib.
O bildirib ki, polisin fəaliyyəti ilə bağlı bəzi neqativ hallar yaşanır:
“Ələt postu və digər postlarda yaşandığı iddia edilən, sosial mediada işıqlandırılan məsələlər barədə DİN məlumatlıdır. İnanın ki, bu kimi hallar araşdırılır və lazımi tədbirlər görülür. Lakin vətəndaşlar da mövcud qaydalara riayət etmir, bir çox alternativ yollar axtararaq (torpaq yollarla) regionlara getməyə cəhd göstərirlər.
Bu məqamlarla bağlı statistikalar da ictimaiyyətə elan edilir. Bütün hallarda aidiyyəti qurumlar media nümayəndələrinin burada səsləndirdiyi məsələlər barədə də lazımi araşdırmaları aparacaq deyə düşünürəm”.