 |
|
ASA Parkinq” 1 saat üçün 1 manat parkinq qiyməti “müəyyən” edib
Bakıda bir çox ərazilərdə qanunsuz olaraq parkinq xidməti göstərən “ASA Parkinq”dən şikayətlər səngimir. Yol-xeber.az-a müraciət edən vətəndaş deyir ki, “28 may” metrostansiyasının yanında 2 saat yarım avtomobili saxlayıb. Çıxışda isə ona 2 manat 50 qəpiklik qəbz verərək ödəniş tələb ediblər. Belə çıxır ki, “ASA Parkinq” 1 saat üçün 1 manat parkinq qiyməti “müəyyən” edib.
Qeyd edək ki, Bakı şəhərində parkinqlərin yaradılması Bakı Nəqliyyat Agentliyinin səlahiyyətinə daxildir. Eyni zamanda ölkə prezidenti də parkinqlər barədə xüsusi göstəriş verib. Qiymətlər isə hələlik müəyyən edilmədiyi üçün BNA tərəfindən yaradılan parkinqlər pulsuzdur. “ASA parkinq” isə qanunsuz olaraq vətəndaşlardan pul yığır. Bu pulların aqibəti isə müəmmalıdır.
“Heç bir müzakirə aparılmır”
Hazırda "Bakı Metropoliteni"nin qarşısında duran əsas tapşırıq paytaxtda yeni stansiya və xətlərin tikintisidir. Yol-xeber.az xəbər verir ki, bunu Trend-ə "Bakı Metropoliteni" QSC-nin mətbuat xidmətinin rəhbəri Bəxtiyar Məmmədov metropolitenin yaxın gələcək planları ilə bağlı sualı cavablandırarkən deyib.
Onun sözlərinə görə, 2020-ci il ərzində Bakıda yeni metro stansiyasının işə düşməsi gözlənilir: "Hazırda "B 3" stansiyasının əsas tikinti işləri başa çatıb. Stansiyanın qatar yolu hazırdır və mərmər döşənməsi işləri gedir. İşlər qaydasında gedərsə, "B 3" stansiyası il ərzində sərnişinlərin istifadəsinə veriləcək".
B.Məmmədov deyib ki, regionlarda metro stansiyalarının tikintisi barədə "Bakı Metropoliteni"ndə heç bir müzakirə aparılmır: "2011-ci ildə Azərbaycan Prezidenti tərəfindən "Bakı Metropoliteni xətlərinin konseptual inkişaf sxemi" təsdiqlənib. Bu sənədə əsasən ölkənin digər regionlarında metro stansiyalarının tikintisi planlaşdırılmır".
Yanvarın 24-də 4 nömrəli marşrut xəttinin də inteqrasiyası planlaşdırılır
Bakıda 29 marşrut xətti üzrə 598 avtobusda sərnişinlər gediş haqqını BakıKart vasitəsi ilə nağdsız formada ödəyirlər.
Bunu Trend-ə açıqlamasında Bakı Nəqliyyat Agentliyinin mətbuat xidmətinin rəhbəri Mais Ağayev deyib. Onun sözlərinə görə, qarşıdakı günlərdə bu göstəricilər dəyişəcək: "Çünki xətlərin inteqrasiyası davam etməkdədir. Yanvarın 24-də 4 nömrəli marşrut xəttinin də inteqrasiyası planlaşdırılır. Həmçinin, fevral ayından xətlərin BakıKarta keçidi daha sürətli aparılacaq. BakıKarta keçidlə əlaqədar son bir ayda şəhərin müxtəlif ərazilərində 50 yeni dayanacaq yeri müəyyən edilərək müvafiq nişanlar qoyulub. 13 yerdə isə yeni ödəmə məntəqələri təşkil olunub. Bir daha vurğulamaq istərdim ki, nağdsız ödənişə keçid sərnişindaşımada göstərilən xidmətin keyfiyyətinin artırılması üçün olduqca zəruridir".
M.Ağayev deyib ki, kart sisteminə keçid, eyni zamanda sərnişindaşımada qeyri-leqal əmək münasibətlərinin rəsmiləşdirilməsi və şəffaflığın artırılması baxımından da vacibdir. Son bir neçə həftədə kart sisteminə inteqrasiya olunan xətlərlə bağlı şikayət xarakterli müraciətlərin əhəmiyyətli dərəcədə azalması bunun bariz nümunəsidir.
Qazaxıstanın Almatı şəhərində “Beynəlxalq Transxəzər Nəqliyyat Marşrutu” Beynəlxalq Assosiasiyası Hüquqi Şəxslər Birliyinin ümumi yığıncağı keçirilib. Tədbirdə “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanovun rəhbərlik etdiyi nümayəndə heyəti iştirak edib.
Yığıncaqda qeyd olunub ki, 2019-cu ildə konteyner daşımalarının 71% (10,7 min TEU) artması Xəzər dənizinin limanları üzərindən həyata keçirilən daşımalarda tarixi rekorddur. Görüş iştirakçıları 2019-cu ilin aprel ayında Aktau və Bakı limanları arasında yeni fider xidmətinin istifadəyə verilməsinin artımı şərtləndirən əsas amillərdən biri olduğunu vurğulayıblar. Xəzər dənizində bu xidmətin göstərilməsi dəmir yolu nəqliyyatının istifadəsinin səmərəliliyini artıraraq, konteyner qatarlarının çatdırılmasını xeyli sürətləndirib.
Yığıncaqda Birliyin 2019-cu il üzrə fəaliyyətinin nəticələri müzakirə olunub, İdarə Heyətinin tərkibi təsdiq edilib. “Qazaxıstan Dəmir Yolu” SC-nin sədri Sauat Mınbayev yenidən Birliyin sədri seçilib.
İclasda “Anaklia Development Consortium” MMC-nin “Beynəlxalq Transxəzər Nəqliyyat Marşrutu” Beynəlxalq Assosiasiyası Hüquqi Şəxslər Birliyinin assosiativ üzvlüyündən kənarlaşdırılması məsələsinə baxılıb. Çinin “Xi’an Continental Bridge International Logistics Co. Ltd.” və Qazaxıstanın “Aktau Dəniz Şimal Terminalı” şirkətləri isə üzvlüyə qəbul edilib.
Tədbirin sonunda müvafiq protokol imzalanıb.
Qanlı 20 Yanvar faciəsinin otuzuncu ildönümü ilə bağlı respublikamızın bütün şəhər və rayonlarında olduğu kimi, bu gün Şəmkir rayonunda da silsilə tədbirlər keçirildi. Rayon İcra Hakimiyyəti başçısının müvafiq sərəncamı ilə təsdiq olunmuş plana uyğun olaraq, ilk əvvəl rayonun mərkəzində faciə qurbanlarının xatirəsinə ucaldılmış abidənin önünə gül dəstələri qoyuldu. Tədbirdə rayonun bir çox idarə, müəssisə və təşkilatların rəhbərləri, ictimaiyyətin nümayəndələri, məktəblilər, ziyalılar, Qarabağ müharibəsi veteranları və s. ilə bərabər, 99 saylı Şəmkir kənd seçki dairəsindən deputatlığa namizədliyi qeydə alınmış bir şəxs olaraq, mən də iştirak etdim. Faciə qurbanlarının 30-cu ildönmü ilə bağlı keçirilən bu tədbirdə Şəhidlər Xiyabanına yürüş təşkil olundu və xalqımızın müstəqilliyi, suverenliyi, torpaqlarımız bütövlüyü uğrunda canlarını qurban vermiş şəhidlərin məzarlarını ziyarət edib, onların qəbrləri üzərinə tər-çiçəklər düzüldü. Onu bildirim ki, 20 Yanvar faciəsi xalqımızın qürur mənbəyidir və baş verən olaydan bu gün bizi 30 illik dövr ayırsa da, biz heç zaman onların xatirəsini unutmayacağıq. Əslində 20 Yanvar günü Ümumxalq Hüzn Günü kimi deyil, milli müstəqilliyimizin əldə olunması yöndə mübarizə meydanına atılmış xalqımızın mübarizliyini, məğrurluğunu, imperiya buxovundan xilas olmaq istəyinin ortaya qoyulduğu gündür. Hər kəsə bəllidir ki, xalqımız faciə zamanı həyatdan köçmüş övladlarına 40 gün matəm saxladı və qürurlu iradəsi ilə başlarını dik tutdular. Çünki, hər kəs dərk edirdi ki, faciə qurbanları öz ölümləri ilə şəhidlik zirvəsinə ucalmışdılar. Bəli, ana Vətən, torpaq uğrunda ölən hər kəs şəhidliyin ən uca zirvəsində durur. 20 Yanvar faciəsi Azərbaycan xalqını qorxutmaq, onun milli oyanışını, müstəqil yaşamaq hüququnu məhv etmək məqsədi daşıyırdı və xalqımıza qarşı düzülüb-qoşulmuş mərkli planın tərkib hissəsi idi. Bir halın varlığını da unutmayaq ki, bu faciə xalqımızın tarixində təkcə ağrılı-acılı gün kimi deyil, eyni zamanda xalqımızın şərəf günü də hesab olunmalıdır. Bir kimsə unutmamalıdır ki, həmin gün küçələri boyamış şəhid qanları bir anlamda milli məfkurəmizin oyanan günəşinin qırmızı şəfəqini göstərdi. Bu məsələ xeyli müddət müzakirə olunsa da, nəhayət ulu öndər Heydər Əliyev ikinci dəfə hakimiyyətə qayıtdıqdan sonra, bir daha gündəmə gəldi və faciənin başvermə səbəblərinə hüquqi qiymət vermək yolunda ciddi addımlar atıldı. Bundan əlavə, mərhum Heydər Əliyev hakimiyyətdə olarkən 20 Yanvar faciəsi zamanı həlak olanların xatirəsinin əbədiləşdirilməsi istiqamətində də, lazımi addımlar atıldı. Yəni, çox keçmədi ki, bütün şəhid məzarlarının üstü götürüldü və onların xatirəsinin əbədləşdirilməsi məqsədilə, Şəhidlər Xiyabanında memorial abidə kompleks ucaldıldı. Ən əsası, ulu öndərin imzaladığı müvafiq Sərəncam əsasında bu gün illərdir ki, respublikamızda Ümumxalq hüzn günü kimi qeyd olunur.Onu da bildirim ki, 20 Yanvar faciəsi xalqımızın milli birlik və vətənpərvərliyinin göstəricisi oldu və tarixdə xalqımızın öz suverenliyi uğrunda apardığı mübarizənin şərəfli bir tarixinə çevrildi. Faciənin baş verdiyi gecə sovet qoşunları Bakıda və digər rayonlarda 146 nəfəri qətlə yetirmişdi, 744 nəfəri yaralamışdı, 841 nəfər şəxs isə, qanunsuz olaraq həbs olunmuşdular. Rus-erməni işğalçı qüvvələri tərəfindən 200-dən çox mənzil, 80 avtomaşın, o cümlədən təcili-tibbi yardım maşınları, yandırıcı güllələrin törətdiyi yanğın nəticəsində dövlət əmlakı və şəxsi əmlaklar sıradan çıxarılmışdı. Nə qədər ağrılı-acılı olsa da, bu gün həmin tarixi günləri yaşayanlar, yeni nəslin nümayəndələri xalqımızın mübarizə tarixinin şanlı səhifəsinə çevrilmiş 20 Yanvar gününü unutmur və hər il Şəhidlər Xiyabanını ziyarət etməklə, bir daha onların ruhuna dualar oxuyub, xatirələrini ehtiramla yad edirlər. Allah bütün şəhidlərimizə rəhmət eləsin...
Vəsilə Abulova
99 saylı Şəmkir kənd seçki dairəsindən qeydə alınmış namizəd
Gələcəkdə belə xarakterli məlumatların yayılmasının davam etdiriləcəyi təqdirdə, portal barədə daha ciddi tədbirlər görüləcək
Baş Prokurorluqda aparılmış araşdırmalarla “jamaz.info” xəbər portalında “Kütləvi informasiya vasitələri haqqında” Azərbaycan Respublikası Qanununun tələblərinin kobud şəkildə pozulmaqla Tovuz rayonunun Dondar Quşçu kənd sakini, 10 yaşlı Nərmin Quliyevanın qəsdən öldürülməsi faktı üzrə həyata keçirilmiş istintaq hərəkətləri və əməliyyat-axtarış tədbirləri barədə Daxili İşlər Nazirliyi və Baş Prokurorluğun mətbuat xidmətləri tərəfindən ictimaiyyətə ətraflı məlumatlar verilməsinə, eləcə də sensasiya naminə reallığı əks etdirməyən məlumatların yayılmaması məqsədilə aidiyyəti qurumların mətbuat xidmətləri ilə dəqiqləşdirmələrin aparılması tələb edilməsinə baxmayaraq, ayrı-ayrı vaxtlarda müxtəlif başlıqlı məqalələrdə, qəsdən və qərəzli şəkildə həqiqətə uyğun olmayan, istintaq araşdırmalarının maraqlarına zidd olmaqla cəmiyyətdə yanlış fikrin formalaşdırılmasına xidmət edən yalan məlumatların, həmçinin yayılması qanunla qadağan edilməklə ictimai fikirdə çaşqınlıq yaranmasına səbəb olan informasiyaların məqsədli şəkildə yayılması müəyyən edilib.
Bu barədə Avtosfer.az-a Baş Prokurorluğun Mətbuat Xidmətindən məlumat verilib.
Qeyd edilənlərlə əlaqədar saytın təsisçisi və baş redaktoru İbişbəyli Fikrət Fəraməz oğlu Baş Prokurorluğa dəvət edilərək “Prokurorluq haqqında” Azərbaycan Respublikası Qanununun tələblərinə müvafiq olaraq “Kütləvi informasiya vasitələri haqqında” Qanunun 10-cu maddəsinə əsasən, yalan və qərəzli yazıları yaymaq məqsədilə kütləvi informasiya vasitələrindən istifadə olunmasına yol verilməməzliyi diqqətinə çatdırılmaqla, gələcəkdə belə xarakterli, qərəzli və qanunvericiliyin tələblərinə zidd məlumatların yayılmasının davam etdiriləcəyi təqdirdə barəsində cinayət məsuliyyəti də daxil olmaqla, qanunvericilikdə nəzərdə tutulmuş daha ciddi tədbirlər görüləcəyi barədə rəsmi xəbərdarlıq edilib.
Cinayətə meylli şəxslər tək özlərinin yox, həm də ailə üzvlərinin – qohumlarının, övladlarının “tərcümeyi-hal”ını ləkələyir. Bu ləkə, bir ömür boyu onları təqib edir.
Bunu Bakı şəhər Baş Polis İdarəsinin mətbuat xidmətinin rəisi, polis mayoru Elşad Hacıyev mətbuatın sorğusuna cavab olaraq bildirib.
Onun sözlərinə görə, tutulan şəxslər barədə gündəlik məlumatlandırmanı həyata keçirməkdə məqsəd ona yönəlib ki, cinayətə meylli şəxslərə ibrət olsun, bu əməllərdən çəkinsinlər.
E.Hacıyev vurğulayıb ki, ötən il paytaxtda qeydə alınan cinayətlərin statistikası açıqlanıb:
“Qeydə alınan hər bir cinayət faktı üzrə nə qədər insan əziyyət çəkib və bir ömür boyu birinin qeyri-insanı düşüncəsi ucbatından zərərçəkmişə çevrilib. İndi baxaq, məsuliyyətə cəlb olunanlar, özü ilə bərabər nə qədər cinayətlə əlaqəsi olmayan doğmalarına ziyan vurub, onları sarsıdıb.
Bunu həmin şəxslər nəzərə alırmı? Mübahisəlidir. Anlaqlı şəxs ictimai təhlükəli əməlinin nəticəsini görməli olduğu halda görmürsə, bu, onun mənəvi-əxlaqi keyfiyyətləri ilə bağlıdır.
Məsələn, mülkiyyət əleyhinə olan cinayətlərdə əgər cinayətə meylli şəxslər başqasının alın təri ilə qazandıqlarını talamağı qarşısına məqsəd qoyub özünü və yaxın ətrafını xoşbəxt edəcəcəyini düşünürsə, yanılırlar.
Onlar heç bir halda cəza təhdidindən xilas ola bilməyəcəklər. Əmin olsunlar ki, geci-tezi var!”.
Qeyd edək ki, bir neçə gün əvvəl Bakı Şəhər Baş Polis İdarəsinin rəisi, polis general-mayoru Mirqafar Seyidova 2019-cu ilin hesabat tədbirində bildirib ki, ötən il paytaxtda ümumilikdə 11min 176 cinаyət qеydə аlınıb ki, оnlаrın dа 88,6 faizi аz аğır, 11,4 faizi isə аğır və хüsusilə аğır növlər оlub.
2018-ci illə müqayisədə hesabat dövründə ümumi cinayətlər 5,4, аğır və хüsusilə аğır cinayətlər 2,3, az ağır cinayətlər 5,4, böyük ictimai təhlükə törətməyən cinayətlər 6,6, adam öldürməyə cəhdlər 18,8, dələduzluq 33,9, soyğunçuluq 3,7, quldurluq 3,9, hədə-qorxu ilə tələb etmə 28,9 faiz azalıb. /dialoq.info/
Azərbaycanda sürücülərə yazılan protokolların sayı 3 milyon 300 min olub
Yaradılan imkanlardan istifadə etməklə əməkdaşlar ötən il ərzində 3,3 milyona yaxın yol hərəkəti qayda pozuntusu aşkarlayıblar ki, onların da 64 faizi xüsusi texniki vasitələrin köməyi ilə qeydə alınıb”. Yol-xeber.az xəbər verir ki, bu barədə Baş Dövlət Yol Polisi İdarəsinin rəisi, polis general-mayoru Ramiz Zeynalov məlumat verib. General bildirib ki, qayda pozuntularına görə 7 min 316 nəfərin sürücülük hüququ məhdudlaşdırılıb.
Bu faciəyə dövlət səviyyəsində hüquqi-siyasi qiymət verilib
Beyləqanda 20 Yanvar şəhidlərinin xatirəsi ehtiramla yad edilib
DİN Mətbuat Xidmətinin Bərdə regional qrupundan Yol-xeber.az-a verilən məlumata görə, Beyləqan Rayon Polis Şöbəsinin təşkilatçılığı ilə 20 Yanvar faciəsinin 30-cu ildönümü ilə əlaqədar anım tədbiri keçirilib. Tədbirdə əvvəlcə ölkəmizin müstəqilliyi və ərazi bütövlüyü uğrunda canlarından keçmiş Vətən övladlarının xatirəsi bir dəqiqəlik sükutla yad edilib.
Çıxış edən RPŞ-nin rəisi, polis polkovniki Rüstəm Cəfərov bildirib ki, 20 Yanvar hadisələri Azərbaycanda demokratik proseslərə qəsd, respublikanın suveren hüquqlarını, ümumiyyətlə, insan hüquqlarını pozan hərəkət idi. 1990-cı il yanvarın 20-də əsasən ermənilərdən ibarət sovet ordusunun xüsusi təyinatlı dəstələri dinc əhaliyə qarşı görünməmiş vəhşiliklər törətdi, günahsız insanlar qətlə yetirildi. Şöbə rəisi qeyd edib ki, Ulu Öndərin siyasi hakimiyyətə yenidən qayıdışından sonra 1993-cü ildə 20 Yanvar faciəsinin səbəblərinin araşdırılması və onu törədənlərin məsuliyyətə cəlb olunması istiqamətində mühüm addımlar atılıb. Bu faciəyə dövlət səviyyəsində hüquqi-siyasi qiymət verilib.
Daha sonra çıxış edənlər vurğulayıb ki, müstəqillik, azadlıq yolu qədər çətin yol yoxdur. 1990-cı il yanvarın 20-də baş verən hadisələr bir daha bu gerçəkliyi ortaya qoydu. O qanlı-qadalı günlərdə Azərbaycan xalqı göstərdiyi qətiyyətlə bir daha nümayiş etdirdi ki, heç bir qüvvə onun milli azadlıq uğrunda mübarizə əzmini qıra bilməz. Xalqımız o gecə baş verənləri daim xatırlayır, bu faciəni törədənlərə öz dərin nifrətini bildirir.
Sürücü protokolun ləğv edilməsini istəyir
Lənkəran şəhər sakini ona qanunsuz protokol yazan yol patrul xidməti əməkdaşından Avtosfer.az-a şikayət ünvanlayıb. Belə ki, sürücü yanvarın 14-ü Lənkəran şəhər Fizuli küçəsində yerləşən dairəyə daxil olan zaman qaydalar çərçivəsində dairə boyunca hərəkət edən zaman həmin ərazidə xidmət aparan 10-YP-572 qeydiyyat nişanlı YPX avtomobilində xidmət aparan polis əməkdaşı tərəfindən saxlanılaraq 3 bal 60 manat məbləğində cərimə olunub. Sürücü qayda pozmadığını bildirsə də, polis əməkdaşı ona protokol tərtib edib.
Sürücü bildirir ki, onun hərəkət etdiyi yolda 4.3 dairəvi hərəkət nişanı quraşdırıldığı üçün, dairə boyunca hərəkət edən zaman digər istiqamətdən (sağ tərəfdən) gələn nəqliyyat vasitəsi ona yol verməli idi. Lakin polis əməkdaşı qayda pozan sürücüyə yox, əksinə qayda pozmayan sürücüyə cərimə yazıb.
Sürücü etdiyi şikayətlə bağlı Lənkəran şəhər Dövlət Yol Polisi şöbəsinə çağrılıb. Lakin protokol yenə də qüvvədə saxlanılıb.
Yol Hərəkəti Haqqında Qanunun 42-ci maddəsinin XV hissəsində qeyd olunub ki, "Yol nişanları ilə hərəkət üstünlüyü müəyyən edilməmişdirsə, dairəvi hərəkət təşkil olunmuş yolayrıcına daxil olan sürücü dairədə hərəkət edən nəqliyyat vasitələrinə yol verməlidir".
Protokolun qanunsuz yazıldığını iddia edən sürücü Baş Dövlət Yol Polisi İdarəsinin rəhbərliyindən protokolun ləğv edilməsini xahiş edir.