 |
|
Oktyabrın 26-dan 27-dək respublikanın daxili işlər orqanları tərəfindən 111 cinayət faktı qeydə alınıb.
Daxili İşlər Nazirliyindən Axar.az-a verilən məlumata görə, qeydə alınan cinayətlərin 18-si “isti izlər”lə açılıb.
Əvvəlki dövrlərdən bağlı qalmış 1 cinayətin açılması təmin olunub, axtarışda olduğuna görə ümumilikdə 37 nəfər, o cümlədən mülki-hüquqi öhdəliklərin icrasından yayındığına görə 1 nəfər, borclu şəxs qismində axtarışda olan 28 nəfər saxlanılaraq aidiyyəti üzrə təhvil verilib.
Məlumata görə, ötən gün respublikanın avtomobil yollarında 3 yol-nəqliyyat hadisəsi baş verib, nəticədə 1 nəfər ölüb, 7 nəfər xəsarət alıb.
Bundan başqa, daxili işlər orqanları əməkdaşlarının həyata keçirdikləri əməliyyat-axtarış tədbirləri nəticəsində narkotiklərlə əlaqəli 7 fakt müəyyən edilib.
Cinayət törətməkdə şübhəli bilinən 20 nəfər saxlanılıb.
Azərbaycanda təcrübə məqsədilə ilk dəfə yetişdirilən rəngli pambığın yığılmasına başlanılıb.
Tərtər Regional Aqrar Elm və İnformasiya Məsləhət Mərkəzinin direktoru Məhərrəm Əliyev Azərtac-a bildirib ki, Çindən gətirilən rəngli pambığın çiyidi bir qədər gec - iyun ayının əvvəlində əllə səpilib. Vegetasiya dövrü az olan bu pambıq yerli pambıqlarla eyni vaxtda bar verib. Mahlıcı zərif olan pambıq xına rəngi və bir qədər açıq rəngdədir. Məhsuldarlıq qənaətbəxşdir. Hər hektardan 45-50 sentner məhsul gözlənilir.
Yığılan məhsul Gəncə Aqrar Elm Mərkəzində təmizlənərək çiyid mahlıcdan ayrılacaq və respublikada bu pambıq sortunun çoxaldılması üçün toxumluq məqsədilə istifadə ediləcək. Növbəti ildə 5 hektarda rəngli pambığın becərilməsi nəzərdə tutulur.
Tərtər Regional Aqrar Elm və İnformasiya Məsləhət Mərkəzinin təcrübə sahələrində 3 hektarda becərilən qiymətli strateji bitki olan soyanın da yığımı həyata keçirilir.
Mərkəzin direktoru Məhərrəm Əliyev bildirib ki, soya tərkibindəki zülal və yağın zənginliyinə görə əvəzedilməz bitkidir. Həm ərzaq, həm də yem bitkisi kimi mühüm əhəmiyyət kəsb edən soya bitkisinin əkinlərinin çoxaldılması vacibdir. Soya qiymətli yaşıl gübrə və əla sələf bitkisidir. Bu bitki havada olan sərbəst azotu fiksasiya edərək, torpağın münbitliyinin yaxşılaşdırılmasında mühüm rol oynayır.
Bu ayın 8-də İstanbulda saxlanılmış, 18-də azad edilmiş, 22-də isə yenidən tutuqlanmış "Quli" ləqəbli kriminal avtoritet Nadir Səlifovun barəsində yeni məlumatlar var.
Axara.z Musavat.com-a istinadən xəbər verir ki, Quli İstanbula yerləşdikdən sonra rəsmi qaydada soyadını dəyişməklə yeni sənədlər əldə edib. Yeni sənədində o, soyadını İsmayılov kimi qeyd etdirib.
22,5 il Azərbaycanda həbsdə yatmış, barəsində minlərlə yazı yazılmış Qulinin bu addımı atmasının səbəbi, güman ki, beynəlxalq marşrutlarda hərəkət edərkən, bir ölkədən başqa ölkəyə keçərkən sərhədlərdə problem yaşamamasını istəməsi üzündən olub.
Nadir İsmayılovun sənədindəki bu yenilik onun oktyabrın 18-də İstanbul 2-ci sülh-cəza məhkəməsində aparılan mühakiməsi zamanı bəlli olub.
Onun məhkəməyə verdiyi ərizədə ad-soyadı Nadir İsmayılov kimi qeyd olunub. Nadir İsmayılovun vəkili Emin Canacankatan müvəkkilinin dərhal azad edilməsi üçün ərizə verib və ayın 18-də N.İsmayılov sərbəst buraxılıb.
İndilikdə N.İsmayılovun oktyabrın 22-də yenidən saxlanılmasının səbəbi bilinmir.
Ancaq böyük ehtimalla bu, əvvəlki ittihamlarla bağlıdır.
Qeyd edək ki, həmin ittihamlar (Rusiyada çalışan iş adamlarından xərac tələb edilməsi) Rusiya tərəfindən irəli sürülüb.
Qulinin Rusiyaya və ya Azərbaycana ekstradisiya edilməsi məsələsi hələlik açıq qalır. O, Rusiya və Azərbaycan vətəndaşı deyil. Azərbaycan tərəfi belə bir tələb irəli sürməyib.
Səhhətimdə yaranmış problemlərlə əlaqədar müalicəmin bir hissəsini Bakıda, bir hissəsini də xarici ölkələrdə aldım. Daha çox Türkiyədə müalicə olundum. Azərbaycan səhiyyəsinin durumundan danışarkən deyə bilərəm ki, bu, bir az problemli məsələdir. Sovet dövründə həkimlərin aldığı təhsil, onlara tələb, münasibət fərqli idi. Həmin zaman kəsiyində Azərbaycan həkimləri kifayət qədər nüfuzlu, güclü idilər. O məktəb isə artıq bitib.
Axar.az xəbər verir ki, bu fikirləri Milli Məclisin Hüquq siyasəti və dövlət quruculuğu komitəsinin üzvü, deputat, Ana Vətən Partiyasının (AVP) sədri Fəzail Ağamalı Report-a geniş müsahibəsində Azərbaycan səhiyyəsinin durumundan danışarkən bildirib.
Deputat əlavə edib ki, Sovet dövründə həkimlərə təhsil verən o məktəb 30 ilə yaxındır ki, Azərbaycanda yoxdur:
“Azərbaycanda əvvəlki nəsil həkimlər savadlıdırlar, lakin müasir texnologiyadan anlayışları zəifdir. Hazırki nəsil həkimlərin texnologiyadan anlayışları güclüdür, amma əvvəlki nəsil həkimlərə nisbətən diaqnoz qoymaq, düzgün nəticə çıxarmaq imkanları zəifdir.
Köhnə həkimlər bir xəstəliyi iki-üç dərmanla müalicə edə bilirdilərsə, burada özlərinə əminlik də var idisə, hazırki həkimlər isə daha çox dərman yazmaqla məşğuldurlar.
Yəni “Bu dərman kömək etməzsə, digəri kömək edəcək. O da etməzsə, başqa birisi kömək edəcək” prinsipi ilə hərəkət edirlər. Bu da təbii ki, müəyyən çətinliklər yaradır”.
Deputat bildirib ki, buna baxmayaraq, hazırda Azərbaycanda peşəkar həkimlər yetişməkdədir. Azərbaycanda təhsil alaraq sonra Türkiyənin nüfuzlu universitetlərində təhsillərini təkmilləşdirən həkimlərimiz var.
O qeyd edib ki, 10-15 il sonra arzuladığımız həkimlər olacaq.
İctimai nəqliyyatın vəziyyətindən danışan deputat bildirib ki, Nəqliyyat Nazirliyi ləğv edildikdən sonra yaradılan Bakı Nəqliyyat Agentliyi də ictimai nəqliyyat sistemində müsbətə doğru heç bir dəyişiklik edə bilmədi:
“Avtobus nəqliyyatı sistemində vəziyyət olduğu kimi qalır. Metrostansiyalarda da problemlər mövcuddur. Olmazmı ki, pik saatlarda qatarların intervalı 1-2 dəqiqə olsun?
Bu qurum zərərlə işləmir axı. Əgər pula ehtiyac varsa, ölkə Prezidentinə, Nazirlər Kabinetinə müraciət etmək lazımdır. Əminəm ki, məsələ müzakirə edilib, həll olunar. Necə olur ki, Cavid Qurbanov “Azərbaycan Dəmir Yolları”nın rəisi təyin edildikdən sonra problemlərə son qoyuldu? Niyə Bakı Metropolitenində problem olmalıdır? Baxın, Cavid Qurbanov “Azərbaycan Dəmir Yolları”nın sədri təyin edildikdən sonra Bakı-Sumqayıt qatarı işə düşdü, burada xidmət yüksək səviyyədədir. Hazırda Bakı-Gəncə surət qatarı işə düşməlidir. Bu addımlar Cavid Qurbanov təyin edilməzdən öncə, əvvəlki rəhbərlik tərəfindən niyə atılmırdı?”
Amerikanın “Haumaç”(Howmuch) reytinq agentliyi “Ötən il dünyanın müxtəlif ölkələrini ziyarət edən turistlər nə qədər pul xərcləyib" mövzusunda araşdırma aparıb. Tədqiqat məlumatlarında təkcə turistlərin xərclədiyi vəsaitin miqdarı deyil, həm də onların sayı öz əksini tapıb. Məlum olub ki, hər hansı bir ölkəyə olan turist axını hələ bu ölkənin böyük qazanc götürdüyündən xəbər vermir.
Axar.az Dalma.nyus-a istinadla xəbər verir ki, Cənubi Qafqazdakı turizmin gözlənilən liderləri olan Azərbaycan və Gürcüstan nümunəsi bunu açıq şəkildə göstərir.
“Houmaç”ın göstəricilərinə görə, ötən il Azərbaycana 2 milyon 454 min turist ziyarət edib və nəticədə ölkə 3 milyard dollar qazanıb.
Gürcüstanda turistlərin sayı çox olsa da, gətirdiyi gəlir 2 milyard 751 milyon dollar (Media.az) olub.
Ermənistan ötən il 1 milyon 495 min turistdən 1 milyard 150 milyon dollar gəlir əldə edib.
Köhnə SSRİ ölkələrinə üz tutan turistlər ən çox Rusiya Federasiyasında pul xərcləyib – 8 milyard 945 milyon dollar. Rusiyadan sonra siyahıya Azərbaycan və Gürcüstan liderlik edir.
Estoniya təxminən 2 milyard dollar gəlirlə dördüncüdür. Daha sonra isə Ermənistan, Ukrayna və Litva (təxminən 1 milyard dollar) siyahıda öz yerini alıb.
Dünyada isə Türkiyə Respublikası 22 milyard 478 milyonla Misiri qabaqlayıb.
Dünya üzrə ilk onluq belədir: 211 milyard dollarla ABŞ, 68 milyard dollarla İspaniya, 61 milyard dollarla Fransa, 57 milyard dollarla Tayland, 51 milyard dollarla Böyük Britaniya, 44 milyard dollarla İtaliya, 42 milyardla Avstraliya, 40 milyardla Almaniya, 36 milyardla Makao, 34 milyard dollarla Yaponiya.
Azərbaycan Turizm Assosiasiyasının rəhbəri Nahid Bağırov “Dalma Nyus”a müsahibəsində bildirib ki, 2017-ci ildə Azərbaycana üz tutan turistlər kəmiyyətcə deyil, keyfiyyətcə önəm daşıyıb:
“Azərbaycana, belə deyək, “keyfiyyətli” turistlər gəlir. Orta səviyyədən yuxarı olan ərəb ölkələrindən turistlərin gəlməsi nəticə verdi və büdcə gəlirləri artdı”.
“Bəli, turistlərin sayını artırmaq məqsədini prioritet kimi qəbul etmək olar. Lakin bu mübarizədə bizə lazım olan nədir? Biz təkcə turist seqmenti, səyahət şirkətləri, otelçilər, eləcə də iqtisadiyyatın digər sahələrinin qazanmasını istəyirik. Bu cəhətdən ərəb turistlər digərlərindən fərqlənir. Ona görə də biz onların diqqətini çəkmək istəyirdik.
Ərəb turist gəlib təkcə oteldə qalmır. O, ticarət mərkəzlərini, restoranları gəzir. Bundan əlavə, ərəblər ailələr ilə gəlir. Bu, onların xərclərini çox artırır.
Avropalı qonaqlar nə edirlər? Bir otel, bir stəkan şərab, qısa bir yürüyüş və sonra hava limanı”, – deyir Nahid Bağırov.
Bəs nəyə görə ərəblər Gürcüstana bu cür axın etmir?
“Bakı və Tiflisi müqayisə edərək kiminsə xətrinə dəymək istəmirəm, amma demək istəyirəm ki, Gürcüstan kütləvi turizmi, Azərbaycan isə VIP-turizmi seçdi.
Gürcüstan bir çox görməli yerləri olan gözəl bir ölkədir. Ancaq Azərbaycanda olanlar orda yoxdur. Məsələn, lüks otellər. Düzdür, orda da lüks otellər var, amma Azərbaycanda olduğu qədər deyil. Yenə də təkrar edirəm ki, Gürcüstan kütləvi turizmini seçib. Bu pis bir şey deyil. Lakin orta statistik qazancdan çox qazanan VİP-turist seçim qarşısında qaldığı zaman Gürcüstanı deyil, Azərbaycanı seçəcək”.
Burda din faktoru da rol oynaya bilərmi? Məsələn, xristianların üstünlük təşkil etdiyi Gürcüstan və Ermənistana deyil, Azərbaycana gəlməyin daha məqsədəuyğun olması...
Müsahibimiz deyir ki, bu mümkündür, lakin şərtidir.
Eyni zamanda, Azərbaycan sakinləri tərəfindən ərəb turistlərə qarşı mənfi rəftar mövcuddur. KİV-lər vasitəsilə xəbərdarlıq edilir ki, qeyri-qanuni davranışlara, incikliklərə və s. yol verilməsin. Bu, Azərbaycanda turizm sektorunun inkişafına təsir göstərə bilər.
“Bu yaxında bir iraqlı bloger Azərbaycandakı klublardan birində olduğunu yazdı və video görüntüləri yaydı. Bir çox istifadəçi isə paylaşımın altına Azərbaycanda QİÇS-ə yoluxduqlarını qeyd etdi. Araşdırdıqdan sonra bizə məlum oldu ki, bu şərhlər sifarişlə yazılıb”, – deyə ekspert bildirir.
“Bəzən kiçik problemlər yaşanır, lakin onlar şişirdilib ictimaiyyətə çatdırılır. Bir şeyi dərk etmək lazımdır ki, turistin milliyyəti olmur. O turistdir. Ölkənin qonağıdır”, - müsahibimiz deyib.
“Ərəb turistlərin də sosial hesabları var. Onlar öz dostları ilə başlarına gələn neqativ halı paylaşsalar, bu, ərəb axınına mənfi təsir göstərəcək və get-gedə ərəblər ölkəmizə gəlməyəcək.
Odur ki, bu söhbət və müzakirələri dayandırmaq lazımdır. Ticarət mərkəzlərində çalışan tanışlarınızdan soruşun: Lazımdırmı bizə ərəb turist? Cavab birmənalı olacaq: Lazımdır!
Ərəb turistlər bütün dünya ölkələrinə lazımdır. Çünki onlar çox pul xərcləyir”.
Bu gün Bakı Ağır Cinayətlər Məhkəməsində Bakıda məhbusların qaçmasına kömək göstərməkdə təqsirləndirilən müğənni Fədayə Laçın və daha 12 nəfərin cinayət işi üzrə növbəti məhkəmə iclası keçirilib.
Axar.az xəbər verir ki, hakim Azad Məcidovun sədrliyi ilə keçirilən prosesdə sənədlərin tədqiqi mərhələsi davam etdirilib.
Daha sonra ötən məhkəmə proseslərində müdafiəçilərin qaldırdıqları vəsatətlər müzakirə olunub.
Məhkəmə vəsatətləri təmin etməyib.
Təqsirləndirilən F.Hacıyevin vəkili Elçin Əliyev növbəti dəfə vəsatət qaldırıb və deyib ki, məhkəmə istintaqı dövründə ifadə verən bir neçə şahid istintaqa verdiyi ifadəsini təkzib edib:
"Həmin şəxslər ifadələrindəki imzaların onlara aid olmadıqlarını bildirdilər".
Vəkil Məhkəmə Xəttşünaslıq Ekspertizasının keçirilməsini istəyib. Vəsatət təmin edilməyib.
Vəsatəti təmin edilməyən vəkil həmin şahidlərin məhkəmədə yenidən dindirilməsini istəyib. Məhkəmə həmin vəsatəti də təmin etməyib.
Müğənni F.Laçının vəkili Türkel Süleymanlı da vəsatət qaldırıb. O qeyd edib ki, Qoca qatarda qaçarkən istifadə etdiyi açar maddi sübut kimi istintaq orqanından tələb olunsun:
"İstintaq dövründə həmin açar barədə ekapertiza rəy verməyib. Hətta istəyirəm ki, məhkəmə hadisə yerinə baxış keçirsin".
F.Laçın vəsatətə münasibət bildirərkən söyləyib ki, E.Məmmədov açarı ondan istəyən zaman qatardan qaçacağını deməyib:
"O, məndən açarı istəyəndə həbsxanada qəfəsin qapısını açacağını demişdi".
Məhkəmənın növbəti prosesi oktyabrın 29-na təyin edilib.
Qeyd edək ki, ötən il oktyabrın 23-də Bakıda məhbusların qaçması faktı ilə bağlı Baş Prokurorluğun Ağır Cinayətlərə Dair İşlər üzrə İstintaq İdarəsində başlanan cinayət işi üzrə Fədayə Məmmədova (Fədayə Laçın) təqsirləndirilən şəxs qismində cəlb olunaraq Nəsimi Rayon Məhkəməsinin qərarı ilə barəsində həbs qətimkan tədbiri seçilib.
İttiham aktına əsasən, 7 nəfər - Müzəffər Məmmədov, Emil Səfərov, Ramil Səlimov, Hətəm Əliyev, Vüsal Abbasov, Rövşən Camalov və Rəşad Məmmədov zərərçəkmiş şəxs qismində tanınır.
Biləsuvar rayonu ərazisində icazəsiz ov edən şəxslər saxlanılıb.
Ekologiya və Təbii Sərvətlər Nazirliyindən Axar.az-a verilən məlumata görə, araşdırma zamanı brakonyerlərin Biləsuvar rayon sakinləri Vaqif Əliyev və Rauf Əliyev olduğu müəyyən edilib. Onlardan 2 ov tüfəngi və ovlanmış cürə quşu götürülüb.
Faktla bağlı təqsirkarlar barəsində protokollar tərtib edilib və onlara İnzibati Xətalar Məcəlləsinə əsasən ümumilikdə 2005 manat məbləğində cərimə və ziyan tətbiq olunub.
Ukrayna vətəndaşları ölmüş şəxsi turist kimi Rusiyadan çıxarmağa çalışıblar.
Bu barədə Ukrayna Dövlət Sərhəd Xidmətinin regional idarəsi feysbuk səhifəsində məlumat yayıb. Xəbərdə qeyd edilir ki, adı açıqlanmayan iki kişi dünyasını dəyişmiş qohumlarının meyitini avtomobillə turist kimi Xarkov şəhərindən Ukraynaya aparmağa cəhd ediblər. Onlar qadını Ukraynanın Zaporeje vilayətində dəfn etməyi planlaşdırıblar. Bildirilir ki, hazırda hər iki şəxs qəsdən adam öldürməkdə şübhəli bilinir.
BMW şirkəti 2010-2017-ci illər aralığında istehsal etdiyi avtomobillərdə qazçıxma sistemindəki qazın dövriyyəsini təmin soyuducuda texniki nasazlıq olduğunu açıqlayıb.
şirkət sızan mayenin yanğınlara səbəb olma ehtimalının olduğunu bildirib.
Texniki nasazlığın aradan qaldırılması üçün 1,6 milyon avtomobil geri çağırılıb.
Şirkətin fəaliyyət göstərdiyi ölkələrdəki rəsmi nümayəndəliklərinə müraciət ediləcəyi təqdirdə heç bir ödəniş tələb edilməyəcəyi elan edilib.