 |
|
Bakı vaxtı ilə saat 07:00-dan başlayaraq Ermənistan qoşunlarının Dağlıq Qarabağdan çıxarılmasına başlanır.
“Qafqazinfo” “TASS”a istinadən xəbər verir ki, bu barədə Rusiya Müdafiə Nazirliyindən bildiriblər.
Məlumatda deyilir ki, Rusiya Dağlıq Qarabağ zonasında sülhməramlı kontingentini yerləşdirir.
“Bayraktar TB2” pilotsuz uçuş aparatının yaradıcısı, Türkiyə Prezidenti Rəcəb Tayyib Ərdoğanın kürəkəni Səlcuq Bayraktar Azərbaycan Ordusunun Qarabağda qələbə qazanması münasibəti ilə fikirlərini bölüşüb.
Bu barədə S.Bayraktar “Twitter” hesabında yazıb.
“Zəfəri nəsib edəndə, mütləq zəfər sahibi də Allahdır. Şəhidlərimizin ruhları şad olsun, Rəbbin türkün şanını ucaltsın. Eşq olsun Azərbaycan Ordusuna! Qarabağ Azərbaycandır!”, - o bildirib.
“Küçədəki ixtişaşlara qarışmayanlar, evinizə gedin”.
Bu sözləri çıxılmaz vəziyyətdə qalaraq, ağlını itirən Ermənistanın baş naziri Nikol Paşinyan “Facebook” hesabında yazıb.
“Mənə inanan bütün insanları mübarizəyə səsləyirəm. Biz vicdansızlığa imza atmamışıq, sövdələşməyə getməmişik, xalqımın qarşısında təmizəm. Çirkli suda balıq tutmağa çalışanlarla görüşəcəyik”, - o bildirib.
“Qələbə! Qələbə! Qələbə! İşğalçı Ermənistan Dağlıq Qarabağda təslim oldu!”
Türkiyə Müdafiə Naziri Hulusi Akar sosial şəbəkə üzərindən yaydığı paylaşımda belə yazıb.
Nazir qeyd edib ki, Azərbaycan Ordusu qarşısında ağır itkilər verən, son olaraq Şuşanı itirən Ermənistan Kəlbəcər, Ağdam, Laçından və nəticədə Dağlıq Qarabağdan tamamilə çəkiləcək!
Ermənistanın Baş naziri Nikol Paşinyan bəyanatı imzalamaqdan başqa çıxış yolunun olmadığını açıqlayıb.
Bu barədə Ermənistan mətbuatı yazıb.
“Mən bu vəziyyətlə bağlı sizə çox şeyi demək istəyirəm, ancaq hələ ki deyə bilmərəm. Çünki mənim sözlərim mövqelərdə dayanan əsgərləri təhlükəyə atacaq. Yaxın günlərdə mütləq hər şey barədə danışacağam. Mən bilirəm ki, informasiya verməyə borcluyam, ancaq indi bunu edə bilmərəm. Hələ ki bir şeyi deyə bilərəm. Bu qərar hərbi vəziyyətin təhlili və vəziyyəti hər kəsdən yaxşı bilən insanların məsləhəti əsasında qəbul edilib”, - deyə N.Paşinyan bildirib.
Azərbaycan Prezidenti İlham Əliyevin Şuşanın Ermənistan işğalından azad edilməsi açıqlamasından sonra Türkiyədən gələn təbrik mesajları davam edir.
İqtidar, müxalifət, bələdiyyə sədrləri, idman klubları, sənətçilər Azərbaycan xalqını zəfər münasibəti ilə təbrik edib.
Türkiyənin Ədalət naziri Əbdülhəmit Gül: “Şuşanın azadlığı müqəddəsləşib. Üç rəngli bayraqla xoşbəxt yaşa. Ana vətən, Azərbaycan!”
Prezident Administrasiyanın İctimaiyyətlə Əlaqələr şöbəsinin rəhbəri Fəxrəddin Altun: “Bayraqlarımız səmalarda daim dalğalansın, birlik və bərabərliyimiz daim olsun”.
AKP-nin sözcüsü Ömer Çelik: “Azərbaycan Ordusu Dağlaq Qarabağda önəmli yerə sahib olan Şuşa şəhərini işğaldan xilas etdi. Qardaş Azərbaycanın zəfəri mübarək olsun. Şuşa zəfəri xeyirli olsun. Çox sevincliyik”.
İYİ partiyasının lideri Meral Akşener: “Qurtuluş sevdası ilə yanan Qarabağımızın qəlbi Şuşa Azərbaycanımıza qovuşdu. Qara buludların ardından günəş doğdu. Şükürlər olsun”.
İstanbul Bələdiyyə sədri Ekrem İmamoğlu: "Şuşa 28 il sonra ana vətəninə qovuşdu. Yaşa Azərbaycan!"
Ankara Bələdiyyə sədri Mənsur Yaşar 28 il əvvəl qış soyuğunda evlərini tərk etməyə məcbur olan azərbaycanlıların fotosunu paylaşaraq o günlərdə yaşanan kədəri yad edib, “Şuşa Azərbaycandır” şərhini yazıb.
Türkiyənin Dəyanət İşləri naziri Ali Erbaş: “28 il sonra Qarabağın qəlbi olan qədim Şuşada azanlar oxunacaq, beş dəfə azadlığının elanı olacaq. Allah Şuşanı qiyamətə qədər azan səslərindən məhrum etməsin. Bütün azərbaycanlı qardaşlarımız, mübarək olsun”.
Keçmiş Baş nazir, Gələcək Partiyasının sədri Əhməd Davudoğlu: "Gözün Aydın Azərbaycan! Qəhrəman Azərbaycan Ordusu Ermənistan işğalına son verərək Şuşa şəhərini azad etdi. Qarabağ Azərbaycandır!"
Azərbaycanın mədəniyyət paytaxtı, Qarabağın incisi, qədim Şuşa şəhərinin işğaldan azad edilməsi uğrunda döyüşlərdə Azərbaycan əsgərinin göstərdiyi qəhrəmanlıq və şücaət xarici mətbuatda da gündəm olub.
Bir çox xarici hərbi ekspertlər mühüm hərbi stratejik önəmə sahib Şuşa şəhərinin Azərbaycan ordusunun xüsusi təyinatlıları tərəfindən hərbi texnikasız və demək olar ki əlbəyaxa döyüşlə alınması haqqında fikirləri bu döyüşün hərb tarixində müstəsna yer tutacağını göstərir.
Şuşa praktik olaraq əlbəyaxa döyüşlərdə, heç bir pilotsuz uçuş aparatı və ya müasir texnologiya olmadan ələ keçirilib.
Fransız Le Monde qəzetinin Xankəndidəki müxbirlərini verdiyi məlumata görə, şəhərə gətirilən yaralılar əsasən tapança gülləsi və bıçaq xəsarətləri alıb. Bu o deməkdir ki, şəhər demək olar ki, əlbəyaxa döyüşlərlə azad olunub. Yəni döyüşlərdə dağ xüsusi təyinatlıları iştirak edib. Üstəlik, azərbaycanlılar yaralıları və ölənləri döyüş meydanında qoymadan, hücum zamanı dağa qalxarkən onları da qalaya daşıyıb.
Dağlıq Qarabağdakı döyüş əməliyyatlarını izləyən tanınmış ukraynalı hərbi ekspert Aleksey Arestoviç özünün Facebook səhifəsində Azərbaycanın Şuşa şəhərinin erməni işğalından azad olunması ilə əlaqədar yazıb
"Azərbaycan Qarabağın qədim paytaxtı, böyük simvolik əhəmiyyətə malik Şuşa şəhərini geri qaytardı. İsraillilər kimi, azərbaycanlılar üçün də bu hadisə 1967-ci ildə Qərbi Divarına çıxmaq, vətənə qayıtmaq, tarixə qayıtmaqdır.
Piyada döyüşü ilə, daşına bilən sursatla, duman içində, əlverişsiz hava şəraitində dağlardan keçərək. Bu da hər şey pilotsuz təyyarələrlə edildi deyənlər üçün".
Trampın qərargahı, ABŞ-da prezident seçkilərində yenidən səslərin hesablanması üçün mitinqlər təşkil etməyi haqqında yayılan xəbərləri təkzib edib.
Ağ Evin hazırkı başçısı Donald Trampın seçki kampaniyasının müşaviri Jason Miller ABŞ mediasının bu fərziyyələrini yalan adlandırıb.
“Bu, yalan xəbərdir. Heç bir əsası yoxdur”,- deyə, o, bildirib.
Xatırladaq ki, CNN telekanalının müxbiri “Twitter”də Millerin özü, prezidentin kürəkəni, eləcə də baş məsləhətçisi Cared Kushner və prezidentin şəxsi vəkili Rudolph Giulianinin ABŞ əhalisi arasında səslərin yenidən sayılmasına dəstək olaraq mitinqlər təşkil etmək fikrində olduqlarını bildirib.
ABŞ-ın Nyu-York şəhərində Şuşanın işğaldan azad edilməsi münasibətilə avtomobil yürüşü təşkil edilib.
Report xəbər verir ki, yüzlərlə həmvətənimiz Azərbaycan və Türkiyənin bayraqları ilə bəzədilmiş avtomobillərlə Bruklindən yola düşüblər. Onlar ermənilərin sıx məskunlaşdığı ərazilərdə dayanıblar.
Nyu-Yorkun mərkəzi küçə və meydanlarında dövrə vuran həmvətənlərimiz ABŞ ictimaiyyətinin diqqətini çəkib. Onlar bayraqlarla və Azərbaycan musiqiləri ilə hərəkət edən avtomobillərin foto və videolarını çəkməklə yanaşı, aksiya iştirakçılarına yaxınlaşaraq məlumatlar alıblar.
Üzərində “Qarşıla bizi, Şuşa!”, “28 ilin həsrət adamları gəlir”, “Şuşa şəhəri işğaldan azad edildi - Prezident İlham Əliyev”, eyni zamanda Şuşa şəhəri haqqında ingilis dilində məlumatların əks olunduğu rəqəmsal plakatların olduğu xüsusi maşın yürüş ərzində avtomobil karvanını önündə hərəkət edib.
ABŞ polisi yürüş ərzində avtomobil karvanını müşayiət edib. Yürüşün sonunda həmvətənlərimiz mərkəzi meydanlardan birində dayanıblar. Ali Baş Komandan İlham Əliyevə, şanlı Azərbaycan Ordusuna təşəkkürlərini dilə gətirən Azərbaycan icmasının aktivləri sonda musiqi sədaları ilə rəqs ediblər.
Ermənistanın Baş naziri Nikol Paşinyan ABŞ-da prezident seçkilərində Demokratlar Partiyasından namizəd olmuş Co Baydenə təbrik məktubu göndərib.
“Report” xəbər verir ki, Paşinyan qələbəsi hələ rəsmən təsdiqlənməmiş Baydeni təbrik edərək, onun uzun illərdə təcrübə qazandığını vurğulayıb və biliyinin ABŞ-ı tərəqqiyə aparacağını qeyd edib. Ermənistanın Baş naziri Baydeni hələ seçki dönəmində namizəd kimi verdiyi vədləri də xüsusi vurğulayaraq, demokratların namizədinin Qarabağda müharibənin dayandırılması üçün addımlar atacağına ümid etdiyini deyib. Paşinyan əslində bununla Baydenin ermənilərə verdiyi vədlərə əməl etməsinə eyham vurub.
Qeyd edək ki, Paşinyan əvvəllər də bir neçə dəfə Rusiya, Fransa prezidentlərinə, habelə ABŞ-ın hazırkı dövlət başçısına müraciət edərək Dağlıq Qarabağ münaqişəsində Ermənistana kömək etmələrini istəyib. Lakin rədd cavabı alıb.
Xatırladaq ki, ABŞ-ın Demokratlar Partiyasının namizədi Co Baydenin prezident seçkilərində qələbə qazanması hələ rəsmi olaraq təsdiqlənməyib. Yalnız Birləşmiş Ştatların bir sıra mətbu orqanları Baydenin səs çoxluğu ilə Trampı üstələdiyini bildiriblər.