 |
|
Türkiyənin Kocaeli şəhərində avtobusların elektron tablolarında Azərbaycan və Türkiyə bayraqları, eləcə də “Tək millət, iki dövlət” şüarı əks olunub.
“Qafqazinfo” xəbər verir ki, bu barədə Bakı Nəqliyyat Agentliyi (BNA) məlumat yayıb. Bildirilib ki, Azərbaycan Ordusuna dəstək məqsədilə belə bir addım atılıb:
“Birlik və bərabərlik nümayiş etdirdiklərinə görə Kocaelidən olan əziz həmkarlarımıza sonsuz təşəkkürlərimizi bildiririk”.
Ermənipərəst rus aparıcı Vladimir Solovyov Youtube kanalı ilə efirə canlı verilən “Соловьев Live” verilişində gözlənilməz hadisə ilə üzləşib.
“Qafqazinfo” xəbər verir ki, proqramda bir neçə gündür Dağlıq Qarabağda gedən hərbi əməliyyatlara toxunan aparıcı işğalçı Ermənistanın tərəfində olduğunu açıq-aşkar büruzə verib. Belə ki, o, ermənilərin hərbi komissarlığın önündə toplaşaraq, guya böyük ruh yüksəkliyi və alqışlarla cəbhəyə yollandıqlarını əks etdirən süjet göstərmək istəyib. Lakin efirə Azərbaycanda hərbi komissarlıqlardan birinin önündə çəkilən görüntülər gedib.
Azərbaycan bayrağını görən Solovyov hiddətlənərək, işçilərə “Sizin başınız işləyir? Bu səhv deyil, səhvdən də ağır bir şeydir. Nə etdiyinizi başa düşürsüz?! Sizə sözüm yoxdur” deyə bildirib.
Beynəlxalq Münasibətlərin Təhlili Mərkəzinin şöbə müdiri Fuad Çıraqovun “London Post” qəzetində “Cənubi Qafqazda yeni müharibənin necə başlanması haqqında qısa məlumat” başlıqlı məqaləsi dərc edilib.
Azertac xəbər verir ki, təmas xəttində baş vermiş son hadisələrə həsr olunmuş məqalədə müəllif Azərbaycan Respublikasının işğal edilmiş ərazilərində qeyri-qanuni olaraq yerləşən Ermənistan Silahlı Qüvvələri tərəfindən atəşkəs rejiminin pozduğunu və yalnız Azərbaycan Respublikasının Silahlı Qüvvələrinin mövqelərinin deyil, həmçinin dinc əhali və mülki infrastrukturların da hədəf alındığını yazır. Bildirilir ki, BMT tərəfindən təsbit olunmuş özünümüdafiə hüquqlarından istifadə edərək Azərbaycan Silahlı Qüvvələri hadisəyə reaksiya verərək özünümüdafiə və əks hücum əməliyyatlarına başlayıb və 1993-cü ildən işğal altında olan Füzuli və Cəbrayıl rayonlarının bir neçə kəndini azad edərək strateji Murovdağ zirvəsində nəzarəti ələ alıblar.
Müəllif qeyd edir ki, 2018-ci ildə Ermənistanda sosial-iqtisadi vəziyyət, korrupsiya nəticəsində əvvəlki rejim devrilib və xalq ümidlərini yeni hakimiyyətə gələn Nikol Paşinyana bağlayıb. “Lakin 2 ilin sonunda o, ümidləri doğrultmadı və gözlənildiyi kimi böyük islahatçıya çevrilmədi. Əvəzində xalqını 1990-cı illərdən bu yana baş vermiş ən qanlı döyüşlərə sürüklədi”, - deyə yazar qeyd edir.
Fuad Çıraqovun sözlərinə görə, münaqişənin həlli üzrə vasitəçilik missiyasını yerinə yetirən yeganə beynəlxalq qurum olan ATƏT-in Minsk Qrupu və beynəlxalq ictimaiyyət sülh və danışıqlar prosesinə qarşı qəsdlə edilən pozucu hərəkətlərə lazımi diqqət ayırmayıb: “Onlar nəinki vəziyyətin daha da gərginləşməsinin qarşısını almaq üçün heç nə etməyiblər, həm də 30 il ərzində işğal faktını və bir milyondan çox qaçqın və məcburi köçkünün hüquqlarının tapdalanmasını görməzdən gəliblər. Buna görə də ATƏT-in Minsk qrupu Azərbaycan torpaqlarının işğalının davam etdirilməsi, qaçqın və məcburi köçkünlərin hüquqlarının pozulması və ermənilərin Azərbaycan əraziləri və dinc əhalisinə qarşı hərbi təcavüzünə görə məsuliyyət daşıyır. Təəssüf ki, son gərginləşmə onu sübut edir ki, XXI əsrdə beynəlxalq ictimaiyyət və institutlar danışıqlar, sülh yaratma prosesi və davamlı və ədalətli sülhə nail olma missiyalarını yerinə yetirə bilmirlər”.
"BMT Təhlükəsizlik Şurası Dağlıq Qarabağ münaqişənin həlli ilə bağlı 4 qətnamə qəbul edib. Beynəlxalq hüquq normalarına əsasən, digər dövlətlər kimi Azərbaycanın da ərazi bütövlüyü toxunulmazdır".
"Ölkə.Az" xəbər verir ki, bunu “Report”un Avropa bürosuna açıqlamasında Latviya Seyminin (parlament) deputatı Artuss Kayminş (Artuss Kaiminš) bildirib.
“Latviya daim Azərbaycanın ərazi bütövlüyünü dəstəkləyib və onun ərazisində hər hansı bir qurumu ikinci dövlət kimi tanımayıb”, - deputat deyib.
A.Kayminş qeyd edib ki, Sovet İttifaqının dağılmasından 30 ilə qədər vaxt keçməsinə baxmayaraq hələ də, ondan miras qalan münaqişələr yaşanmaqdadır: “Dağlıq Qarabağ münaqişəsi də bu acı miraslardandır”.
O bilridib ki, bu kimi münaqişələrin həllində uzun illərdir status-kvonun saxlanılması region üçün münaqişə təhdidi yaradır və arzuolunmaz haldır:
“Təəssüf ki, bu məsələ 30 ildən sonra sülh yolu ilə deyil, silah gücünə həll olur. Biz tezliklə bütün dünyada, o cümlədən də regionda sülhün bərqərar olunmasını istəyirik. XXI əsrdə mülki insanların münaqişələrdə həlak olması çox arzuolunmaz haldır”, - latviyalı deputat vurğulayıb.
Türkiyənin İstanbul şəhərini güclü dolu vurub.
“Mash” “Telegram” kanalı bununla bağlı görüntüləri paylaşıb.
Hadisə zamanı avtomobillərə ciddi ziyan dəyib.
Həmin görüntüləri təqdim edirik:
"Ümid edirəm Azərbaycanın müsəlman xalqının müqavimətilə Qarabağ tezliklə azad olunacaq".
APA xəbər verir ki o, bunu İran parlamentində Ərdəbil əyalətindən olan deputatların assambleyasının sədri Seyid Kazim Musəvi deyib.
O özünün "Twitter" səhifəsində Azərbaycan və Ermənistan arasında baş vermiş son gərginliyə münasibət bildirərək deyib ki, işğalçı ermənilərlə qarşıdurmada azərbaycanlı əsgərlərdən bir neçəsinin şəhid olması ilə bağlı aldığı məlumatdan çox narahat və kədərlidir: "Bu vasitə ilə Azərbaycanın müsəlman xalqına başsağlığı verirəm. Ümid edirəm Azərbaycanın müsəlman xalqının müqaviməti sayəsində Qarabağ tezliklə azad olunacaq".
Ermənistan televiziyasında Azərbaycan Silahlı Qüvvələri tərəfindən məhv edilmiş hərbçilərin siyahısı səsləndirilib.
Oxu.az verdiyi9 məlumata görə, siyahını oxuyan televiziya aparıcısı efirdə təlaş və qorxu içində ağlayıb.
Qeyd edək ki, bir müddət əvvəl Azərbaycanda işğaldan azad olunmuş ərazilərin adlarını açıqlayan televiziya aparıcısı isə sevindiyindən efirdə göz yaşlarına hakim ola bilməmişdi.
Avropa Şurası Parlament Assambleyası (AŞ PA) Ermənistanı və Azərbaycanı vəziyyəti daha da gərginləşdirməməyə və danışıqlar masasına qayıtmağa çağırır.
"Ölkə.Az"ın Report-a istinadən xəbər verir ki, bu barədə Avropa Şurası Parlament Assambleyası (AŞ PA) Monitorinq Komitəsinin Ermənistan üzrə həmməruzəçiləri Andrey Şircel və Kimmo Kilyuner, Azərbaycan üzrə həmməruzəçiləri Stefan Şenak və Rocer Geyl yaydıqları birgə bəyanatlarda bildiriblər.
“Regional sabitlik üçün böyük risk olan Ermənistan və Azərbaycan arasında hərbi əməliyyatların başlanması və böyüməsindən son dərəcə narahatıq. Hər iki tərəfdə mülki vətəndaşların və hərbçilərin həlak olmalarından dərin təəssüf hissi keçiririk” - həmməruzəçilər vurğulayıblar.
“Hər iki tərəfi döyüş əməliyyatlarını dərhal dayandırmağa, vəziyyəti gərginləşdirməməyə və Minsk Qrupu formatında danışıqlar masasına qayıtmağa çağırırıq. Bundan əlavə, bütün digər Avropa Şurasına üzv dövlətləri bu bölgədəki gərginliyə və qeyri-sabitliyə səbəb ola biləcək hər hansı bir hərəkət və ya danışıqdan çəkinməyə çağırırıq. Bir daha təkrar edirik ki, Dağlıq Qarabağ münaqişəsinin sülh yolu ilə həllinə alternativ yoxdur” - bəyanatda bildirilir.
“2020-ci ilin iyul ayında Ermənistan-Azərbaycan sərhəddindəki baş verən hərbi toqquşmalar zamanı verdiyimiz ortaq açıqlamamızda bildirdiyimiz kimi, Avropa Şurasına üzv dövlətlər aralarındakı münaqişələri yalnız sülh yolu ilə həll etməlidirlər", - müşahidəçilir qeyd ediblər.
“Parlament Assambleyası Minsk Qrupu formatında sülh danışıqları üçün əlverişli bir mühitin yaradılmasına töhfə verməyə hazırdır”, - bəyanatda bildirilir.
“Türkiyə bu gün də, dünən də Azərbaycandakı savaşı, demək olar ki, yaşadı. Rəsmilərimiz, millət vəkillərimiz, siyasi partiyalarımız, televiziyalarımız, mətbuatımız, qeyri-hökumət təşkilatlarımız və bütövlükdə cəmiyyətimizin fikri, düşüncəsi bu an Azərbaycandadır”.
Türkiyənin Azərbaycandakı keçmiş səfiri Hulusi Kılıç APA-ya açıqlamasında belə bildirib.
H.Kılıc deyib ki, iki qardaş ölkə arasında əlaqələr bu il iyunun 12-də Azərbaycanın sərhəd rayonu olan Tovuza Ermənistan tərəfindən edilən haqsız hücumlardan sonra daha da intensivləşib.
Diplomat bildirib ki, Türkiyə ilə Azərbaycanın sarsılmaz əlaqələrinin tarixi keçmişi var: “Birinci dünya müharibəsindən zəifləyən Osmanlı dövləti 1915-ci il Çanaqqala savaşında Azərbaycan Türklərindən xüsusi dəstək alıb. Çanaqqala uğrunda minlərlə azərbaycanlı şəhid olub, Çanaqqalada onların şərəfinə abidə də qoyulub.
1918-ci ildə Azərbaycan müstəqil dövləti qurduqdan sonra Ermənistan “Böyük Ermənsitan” xəyalı ilə Azərbaycana torpaq iddiasına qalxır. Azərbaycanın bir çox bölgələri, o cümlədən Bakı Erməni Daşnaksütyun Partiyası tərəfindən ələ keçirilir və qətliamlar törədilir. Azərbaycan Osmanlıdan dəstək istəyir. Osmanlı yaxın keçmişində olan dəstəyi dəyərləndirir və 7 min qoşunla Qafqaz İslam Ordusu yaradılır və bu ordunun komandanı Nuri Paşanın rəhbərliyi altında Bakı ermənilər və bolşeviklərdən təmizlənir.
Bundan başqa, 1921-ci ildə Sakarya qələbəsində Azərbaycan Türklərinin xidməti var.
Çox yaxşı olardı ki, Azərbaycan və Türkiyə gəncliyi bu tarixi faktları yaxşı öyrənsin.
1991-ci ildə Azərbaycan müstəqillik qazandıqda bunu ilk tanıyan ölkə Türkiyə olur. 1999-cu ildə mərhum Heydər Əliyev Azərbaycan neftinin Xəzər dənizindən Türkiyənin Ceyhan limanına gətirən Bakı-Tbilisi-Ceyhan neft kəmərinin çəkilməsi üçün çox böyük qüvvələrlə üz-üzə dursa da, bu layihəyə imza atır. 2003-cü ildə İlham Əliyev hakimiyyətə gələndə mərhum atasının bu uzaqgörən siyasətini və layihələrini davam etdirir. Bakı-Tbilisi-Qars dəmir yolu xəttinin çəkilməsi buna misaldır. Azərbaycan Türkiyəyə 20 milyard dollara yaxın yatırım edib. 2009-cu ildə Türk Şurası yaradılanda Türkiyə bu yola Azərbaycanla çıxdı, sonra digər türk dövlətləri bu birliyə qatıldı. Təbii ki, Azərbaycanla Türkiyəni qüdrətləndirən layihələr də bölgədə yalnız öz mənfəətini güdən ölkələri narahat edir”.
H.Kılıc bildirib ki, Azərbaycanla Türkiyənin həmrəyliyinin, birliyinin daha da güclənməsi regiondakı ölkələrlə yanaşı, imperialist gücləri də əndişləndirir ki, onlar da səfalət içində olan təxribatçı Ermənistandan bu məsələdə alət kimi istifadə edirlər: “Ermənistan hər zaman yaratdığı təxribatları ilə mövcud olub və onun provakasiyalarından hər zaman imperialist qüvvələr yararlanıb. Amma hazırda Türkiyənin də xüsusilə hərbi təlim dəstəyi sayəsində Azərbaycanın qüdrətli bir ordusu var. Azərbaycan 30 il dialoq yolu ilə bu problemin həllinə çalışdı. Amma ATƏT-in Minsk qrupunun üzvü ABŞ, Rusiya, Fransa erməni diasporunun ən güçlü olduğu ölkələrdir ki, bu 3 ölkə indiyədək Qarabağ problemini həll etmədi. Hadisələrin gedişi də onu göstərir ki, Azərbaycan Ermənistanın haqsız hücumlarına cavab verib, işğaldakı tarixi torpaqlarını geri alacaq. Türkiyə ilə Azərbaycan ən çətin anında bir-birinin yanında olur. Yəni qarşılıqlı olaraq bir-birimizə can borcumuz var. Ona görə də bu haqq işində Türkiyə tam qəlbi və canı ilə Azərbaycanın yanındadır. Bu ədalətli mübarizəsində Azərbaycanın qalib olacağına əminəm. Bu tək Azərbaycanın deyil, region dövlətlərinin qələbəsi olacaq, Ermənistan xalqı da səfalətdən qurtulacaq. Azərbaycanın qələbəsi regionda intibah yaradacaq”.
"Dağlıq Qarabağda şimaldan cənuba doğru hərbi əməliyyatlar davam edir”.
Bunu Ermənistan Xarici işlər naziri Zohrab Mnatsakanyan Fransanın "France 24” telekanalına müsahibəsində deyib.
"Bu, genişmiqyaslı əməliyyatlar bizi çox narahat edir”, - nazir bildirib.
Mnatsakanyan rəsmi İrəvanın kompromisə hazır olduğunu bildirib:
"Əlbəttə, münaqişənin Fransa, ABŞ və Rusiyanın daxil olduğu ATƏT-in Minsk qrupunun vasitəçiliyi ilə həllini istəyirik, buna sadiqik. Münaqişənin sülh yolu ilə həll edilməsi, kompromisə əsaslanan həll variantının tapılması maraqlarımıza uyğundur”.(teleqraf.com)