 |
|
Sentyabrın 27-si səhər saatlarından sentyabrın 30-u saat 21:30-dək düşmən canlı qüvvədə, hərbi və döyüş texnikasında xeyli itki verib və bütün cəbhə boyunca tutduqları mövqelərdən və ərazinin vacib sahələrindən geri çəkilməyə məcbur edilib.
Müdafiə Nazirliyindən "Ölkə.Az"a bildirilib ki, bu müddət ərzində düşmənin ümumi itkiləri aşağıdakı kimidir:
– 200-dək tank və digər zirehli texnika;
– 228 ədəd artilleriya, yaylım atəşli raket sistemləri, minaatan;
– 30 ədəd hava hücumundan müdafiə vasitələri;
– 6 komanda-idarəetmə və komanda-müşahidə məntəqəsi;
– 5 silah-sursat anbarı;
– 110-dan artıq avtomobil texnikası;
– 1 ədəd “S-300” zenit-raket kompleksi
Qazet.az-ın hərbi ekspertlərlə birlikdə təqdim etdiyi araşdırmaya görə, “S-300” zenit-raket kompleksinin qiyməti 117 milyon dollar, 1 ədəd tankın məbləği minimum 5 milyon dollar, zirehli texnikaların birinin məbləği isə 2 milyon dollardır.
Məhv edilən yaylım atəşli raket sistemlərinin birinin minimum qiyməti 1 milyon dollar, hava hücumundan müdafiə vasitələrinin birinin qiyməti 1 milyon dollardır.
Ümumilikdə 110 avtomobil texnikasına 20 milyon dollardan çox ziyan dəyib. Ekspertlər hesab edir ki, məhv edilən 5 silah sursat anbarı nəzərə alınmazsa, Ermənistana 1 milyarda qədər ziyan dəyib. Sözügedən itkilər də nəzərə alındığı təqdirdə, bu rəqəmlər 2 milyarddan dəfələrlə çox ola bilər ki, bu da kiçik ölkənin iqtisadiyyatının iflic duruma düşməsi deməkdir.
İqtisadi cəhətdən 3 dəfə Azərbaycandan kiçik olan Ermənistanın hərbi büdcəsi cəmi 658 milyon dollardır. Azərbaycan ordusunun hərbi büdcəsi isə 2.3 mlrd dollardır, yəni 4 dəfəyə yaxın böyükdür. Digər tərəfdən Azərbaycan iqtisadiyyatının ehtiyatları kifayət qədər böyükdür, strateji ethiyatlarımız 52 milyard dollara yaxındır ki, Ermənistanda bu rəqəm 2.6 milyard dollar təşkil edir.
Qeyd edək ki, göstərilən qiymətlər təqribi hesablamalara əsaslanır.
Azərbaycan Ordusunun həyata keçirdiyi əks-hücum əməliyyatlarından sonra məhv edilən, yaralanan erməni silahlılarının sayı durmadan artır. Azərbaycan əsgəri cəbhə xəttində davam edən döyüşlərdə açdığı sərrast atəşlə düşmən hərbçilərini sıradan çıxarır. Ermənistan hökuməti hazırda itkilərinin sayını gizlətsə də, bir neçə gün əvvəl yaralı hərbçi çoxluğundan ölkənin xəstəxanalarında xəstə qəbulu dayandırılıb. Çünki Ermənistanın səhiyyə ocaqları eyni anda yaralı hərbçilərlə, mülki vətəndaşları qəbul etmək iqtidarında deyil. Elə təkcə bu fakt Ermənistan səhiyyəsinin əsl mahiyyətini üzə çıxarır.
Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının tibb elmləri doktoru Nuran Abdullayev "Report"a açıqlamasında deyib ki, Ermənistanda hazırda səhiyyənin süqutunun yaşandığı hər kəsə məlumdur:
"Bunu bir çox rəsmi statistikalar da sübut edir. Bu məqamda rəsmi statistikalara əsaslanaraq bugünkü Vətən müharibəsində diqqəti vacib olan digər məsələlərə yönəltmək istəyirəm".
N.Abdullayev rəsmi statistikalara əsasən Ermənistanda 1000 nəfərə düşən həkim sayının Azərbaycandakı həkim sayından dəfələrlə az olduğunu vurğulayıb:
"Ermənistanda ümumi tibbi xidmətin səviyyəsinin də aşağı olduğunu nəzərə alsaq, orada həkim sayının daha az olması müharibə şəraitində onlara çox ciddi problem yaradır. Bundan əlavə, rəsmi statistikalar 1000 nəfərə düşən tibbi personalın və çarpayının da Azərbaycana nisbətən Ermənistanda dəfələrlə aşağı olduğunu sübut edir. Bu da onlarda hər hansı tibbi xidmətləri, məsələn cərrahi əməliyyatları həyata keçirmək üçün imkanlarının, şəraitlərinin də olmamasını üzə çıxarır. Beləliklə, bu, onun göstəricisidir ki, Ermənistanın tibbi xidmət səviyyəsi 0-a yaxınlaşır".
"Rəsmi statistik göstəricilərə əsasən, düzgün qənaətə gəlmək olur ki, Ermənistan bu müharibəni təkcə hüquqi müstəvidə deyil, eləcə də hərbçilərinə düzgün tibbi xidmət göstərə bilməyərək ağır və çox saylı itkilərlə uduzur", - N.Abdullayev əlavə edib.
Cəbhədə gedən şiddətli döyüşlərdə Ermənistan silahlı qüvvələri böyük itkilərə məruz qalır.
"Ölkə.Az" Baku.ws-ə istinadən xəbər verir ki, hər gün yüzlərlə canlı qüvvəsi məhv olunan Ermənistan ordusu artıq çıxılmaz vəziyyətdədir.
Belə ki, orduya hərbçi tapa bilməyən düşmən artıq xidmətə yararsız, yaşlı və əlil insanları döyüşlərə cəlb edir. Ölkə üzrə kişilərin sərhədləri tərk etməsini də qadağan edən Ermənistan hökuməti cəbhəyə getmək istəməyən şəxsləri axtarışa verib.
Qeyd edək ki, sentyabrın 27-dən bu gün səhər saatlarınadək düşmənin minlərlə canlı qüvvəsi məhv edilib və yaralanıb, çox sayda zirehli texnikası, artilleriya, yaylım atəşli raket sistemləri, minaatan, hava hücumundan müdafiə vasitələri məhv edilib.
Hazırda bütün cəbhə boyu hərbi əməliyyatlar davam edir.
Gürcüstanın keçmiş Prezidenti Mixail Saakaşvilinin Azərbaycana dəstək olması işğalçı Ermənistan tərəfini narahat edib.
Düşmən ölkənin Təhsil, Mədəniyyət və İdman naziri Arayik Harutyunyan sosial mediada paylaşım edərək Saakaşvilini tənqid edib.
O, gürcü siyasətçinin İrəvan Dövlət Universitetindəki fəxri doktor ünvanının geri alınması barədə tələbin irəli sürüldüyünü bildirib.
Harutyunyan, həmçinin Ermənistanda Saakaşvilinin “Şərəf” ordeninə layiq görüldüyünü xatırladıb.
Xatırladaq ki, M. Saakaşvili bir neçə gün öncə verdiyi açıqlamada Dağlıq Qarabağın Azərbaycanın suveren ərazisi olduğunu bəyan etmişdi.
Azərbaycanın Dağlıq Qarabağı işğaldan azad etmək üçün keçirilən əməliyyatlarda xüsusi dəstəyə ehtiyacı yoxdur.
Bunu Türkiyə Böyük Millət Məclisinin sədri Mustafa Şentop "Twitter"də yazıb.
Onun sözlərinə görə, Azərbaycan həm iqtisadi, həm də hərbi baxımdan güclü ölkədir:
“Ermənistanın qarşısında 90-cı illərin Azərbaycanı yoxdur",- deyə o, qeyd edib.
Türkiyənin İğdır şəhərində Ermənistanın son hərbi təxribatına etiraz və Azərbaycan dövlətinə dəstək aksiyası keçirilib.
Bu barədə Diasporla İş üzrə Dövlət Komitəsi məlumat yayıb.
Bildirilib ki, İğdır-Azərbaycan Dil, Tarix və Kültür Birliyini Yaşatma ve Dəstəkləmə Dərnəyi və İğdır Azərbaycan Evi Dərnəyinin təşkil etdiyi birgə tədbir Ermənilər tərəfindən Qətlə Yetirilən Şəhid Türklər Abidəsi və Muzeyi önündə gerçəkləşdirilib.
“Azərbaycan yalnız deyil” şüarı ilə baş tutan tədbirdə vətəndaş cəmiyyətinin təmsilçiləri iştirak ediblər. Tədbirdə İğdır-Azərbaycan Dil, Tarix və Kültür Birliyini Yaşatma ve Dəstəkləmə Dərnəyinin sədri Ziya Zakir Acar, İğdır Azərbaycan Evi Dərnəyinin sədri Sərdar Ünsal çıxış ediblər.
Ermənistanın terrorçu dövlət olduğunu xatırladan natiqlər bildiriblər ki, Türkiyə dövləti və xalqı Azərbaycanın yanındadır, İğdırın vətəndaş cəmiyyəti də Azərbaycanın, yalnız olmadığı ismarıcını vermək üçün bir araya gəlib.
“Ermənistan qanunlara məhəl qoymayaraq mülki əhaliyə hücum edir və tez-tez atəşkəs rejimini pozur. ATƏT-in Minsk qrupu problemi həll edə bilmir. Qarabağ Azərbaycan torpağıdır və belə də qalacaq. Azərbaycanın yanındayiq və yanında olmağa da davam edəcəyik. Azərbaycan erməni təxribatlarına lazımi cavabı verir. Təcavüzkar Ermənistanı qınayırıq”.
Tədbir iştirakçıları bu bəyanatı dəstəklədiklərini bildiriblər və Azərbaycanı yalnız buraxmayan Türkiyə Prezidenti Rəcəb Tayyib Ərdoğana təşəkkür ediblər.
Rusiya Prezidenti Vladimir Putinlə Fransa Prezidenti Emmanuel Makron arasında telefon danışığı olub.
Report xəbər verir ki, dövlət başçıları telefon danışığının gedişatında Dağlıq Qarabağda, həmçinin Belarus Respublikasında yaranan vəziyyəti müzakirə ediblər.
Azərbaycan ordusunun erməni ordusuna vurduğu zərbələrin yeni görüntüləri yayılıb.
Sosial şəbəkələrdə paylaşılan görüntülərin İran ərazisindən çəkildiyi qeyd edilir.
Çəkiliş aparanlar ordumuzun uğurlu zərbələri dəstəkləyir.
Rusiya Azərbaycanla Ermənistanı atəşkəsə çağırıb.
Report xəbər verir ki, bu barədə Kreml bəyanat yayıb.
“Anadolu” agentliyinin “Editör masası” verilişinə qonaq olan Türkiyənin Xarici İşlər naziri Mövlud Çavuşoğlu bildirib ki, Qarabağ məsələsi 30 ildir həll edilmədiyi üçün Ermənistanın cəsarəti artıb:
“Ermənistan beynəlxalq hüququ heçə sayaraq, problemin diplomatiya və müzakirə ilə həllini istəmir. Azərbaycanın 20 faiz torpaqlarını işğal etdikdən sonra digər ərazilərinə də iddia edib. O, bunu iyun ayında Tovuza etdiyi hücumlarla göstərdi.
Biz o zaman da Ermənistana xəbərdarlıq etmişdik. Onlara bildirmişdik ki, hər zaman Azərbaycanın yanındayıq, Ermənistan bu elədiklərinə görə cavab verəcək.
Bəs bu qədər xəbərdarlığa rəğmən Ermənistanda cəsarət haradandır?”(oxu.az)