 |
|
Bakının Yavər Əliyev və Səməd bəy Mehmandarov küçələrinin kəsişməsində yol hərəkət təhlükəsizliyi artırılıb.
Bu barədə Yol-xeber.az Bakı Nəqliyyat Agentliyinə istinadən xəbər verir.
Bildirilir ki, paytaxt ərazisində yol hərəkəti təhlükəsizliyinin təmin edilməsi istiqamətində daha öncədən aparılan araşdırmalar zamanı Sabunçu rayonu Yavər Əliyev və Səməd bəy Mehmandarov küçələrinin kəsişməsində qeyd olunan nəqliyyat problemləri aşkar edilib:
- kəsişmədə hərəkətin svetoforlar vasitəsilə tənzimlənməməsi nəticəsində axınlar arasında mübahisəli nöqtələrin mövcudluğu;
- kəsişmənin hərəkəti buraxma qabiliyyətinin aşağı, nəqliyyat intensivliyinin isə yüksək olması səbəbindən tıxac və sıxlıq hallarının yaranması;
- piyada infrastrukturunun olmaması.
Həyata keçirilmiş dəyişikliklər nəticəsində Yavər Əliyev və Səməd bəy Mehmandarov küçələrinin kəsişməsində svetofor obyektləri quraşdırılıb, eyni zamanda Nazim İsmayılov və Yavər Əliyev küçələrinin kəsişməsindəki svetofor obyektləri ləğv edilib.
Qeyd edilib ki, Yavər Əliyev və Səməd bəy Mehmandarov küçələrinin kəsişməsindəki mübahisəli nöqtələr aradan qaldırılıb, hərəkətin növbəliliyi təmin edilib və yol hərəkəti təhlükəsizlik səviyyəsi artırılıb, tıxac və sıxlıq hallarının baş vermə ehtimalı azaldılıb, təşkil edilmiş nizamlanan eyni səviyyəli piyada keçidləri sayəsində piyadaların, xüsusilə yaxınlıqdakı avtobus dayanacaq məntəqələrindən və Bakıxanov Dəmir Yol Stansiyasından istifadə edən piyadaların təhlükəsizliyi maksimum həddə çatdırılıb.
Xatırladaq ki, svetoforun fəaliyyətinin təkmilləşdirilməsi üzərində mütəxəssisər tərəfindən işlər aparılır və svetofor hazırda test rejimində fəaliyyət göstərir.
“Bakı Metropoliteni” Xocəsən qəsəbəsində Bənövşəyi xəttin elektrik deposunun inşası çərçivəsində yerüstü stansiyanın tikintisini davam etdirir.
Yol-xeber.az xəbər verir ki, bunu Trend-ə açıqlamasında “Bakı Metropoliteni” Qapalı Səhmdar Cəmiyyətinin Mətbuat xidmətinin rəhbəri Bəxtiyar Məmmədov deyib.
O bildirib ki, stansiyanın vestibül, platforma səviyyəsində tikinti plana uyğun aparılır:
“Tunelə qədər yol infrastrukturunun qurulması istiqamətində də əhəmiyyətli işlər icra olunmaqdadır. Ümumən gələn ilin sonuna qədər stansiyanın istifadəyə verilməsi planlaşdırılır. Hazırda işlərin axarı qeyd edilən müddətə işlərin yekunlaşdırılması ilə bağlı problemlərin müşahidə olunmayacağını göstərir”.
Pambıq istehsalı və emalı ilə məşğul olan şirkətlər məhsul yığımı ərəfəsində pambığın alış qiymətinin artırılması barədə qərar qəbul ediblər.
Bu barədə Yol-xeber.az-a Kənd Təsərrüfatı Nazirliyindən bildirilib.
Məlumata görə, şirkətlər arasında əldə olunan razılaşmaya əsasən, pambığın növlər üzrə mövcud alış qiymətləri hər tona 50 manat olmaqla, 2021-ci ilin məhsulu üçün 1-ci növün qiyməti 650 manatdan 700 manata, 2-ci növün qiyməti 630 manatdan 680 manata, 3-cü növün qiyməti 590 manatdan 640 manata, 4-cü növün qiyməti 550 manatdan 600 manata qaldırılıb. Bu qərar fermerlərin məhsul istehsalına həvəsləndirilməsi üçün qəbul olunub.
Pambığın hər tonunun alış qiymətinin 50 manat artırılması nəticəsində pambıq istehsalı ilə məşğul olan fermerlər xeyli əlavə qazanc əldə edəcəklər. Bu, Prezident İlham Əliyevin fermerlərə göstərdiyi qayğı və diqqətin növbəti təzahürüdür.
Qeyd edək ki, təhvil verilən pambığın hər tonuna görə fermerlərə 100 manat subsidiya ödənilir. Bundan başqa, fermerlər pambq əkdikləri sahənin hər hektarına görə 260 manat əkin subsidiyası alırlar.
2020-ci ildə Azərbaycanda 336 min tondan artıq pambıq istehsal olunub, pambıq üzrə orta məhsuldarlıq 33,6 sent/ha təşkil edib. Bu, son illər pambıqçılıqda qeydə alınan ən yüksək məhsuldarlıqdır.
2021-ci ilin yanvar-iyul aylarında Azərbaycana 474,615 mln ABŞ dolları dəyərində 47 374 ədəd avomobil idxal olunub. Gətirilən avtomobillərin sayı ötən ilin eyni dövrü ilə müqayisədə 70,5% çoxdur.
Ölkəyə gətirilən avtomobillərrin sayında kəskin artım maraq doğuran məsələlərdən biridir.
Mövzu ilə bağlı Yol-xeber.az-a açıqlama verən nəqliyyat sahəsi üzrə ekspert Eldəniz Cəfərli bildirdi ki, Azərbaycana idxal olunan avtomobillərin sayında artım olsa da, bu, 8-9 il əvvəl ilə müqayisədə azdır:
“2012-2015-ci illərdə Azərbaycana təqribən 100 min avtomobil idxal olunurdu. Bu da böyük rəqəm idi. Getdikcə bu rəqəm azaldı, devalivasiya, Azərbaycana idxal olunan avtomobillərə müəyyən avro standartlarının tətbiqi bu azalmaya təsir göstərdi. Pandemiya özü də avtomobil idxalının azalmasına səbəb oldu.
Artıq 2021-ci ildə idxalda artımı müşahidə edirik və bu, sevindirici haldır. Çünki bu göstərir ki, Azərbaycanda iqtisadiyyat dayanıqlıdır, manat stabil qalıb və bu iki amil avtomobil idxalını artırıb”.
Onu da qeyd edək ki, ölkəyə gətirilən daxili yanma mühərriklə yanaşı elektrik mühərriklə də hərəkətə gətirilən nəqliyyat vasitələrinin (hibrid) sayı illik müqayisədə 2,4 dəfə artaraq 5 879 ədəd (36,389 mln ABŞ dolları) olub.
Yalnız elektrik mühərriklə hərəkətə gətirilən nəqliyyat vasitələrinin idxal sayı isə 44 ədəd (1,533 mln ABŞ dolları) olub. Elektromobillərin ölkəyə idxalı illik müqayisədə 2,4 dəfə azalıb.
Ekspertin sözlərinə görə, ölkəmizə idxal olunan hibrid avtomobillərin sayının artması da obyektiv səbəblərlə əlaqədardır: “Əsas səbəb hibrid navtomobillərin qənaətcil olması və daha az xərc tələb etməsidir. Azərbaycana həm yeni, həm köhnə hibrid avtomobillər idxal olunur. Eyni zamanda vətəndaşların ekoloji təmiz hibrid avtomobillərə maraq göstərməsi sevindirici haldır. Onlar həm ətraf mühitə zərər vurmamaq, həm öz sağlamlıqlarını qorumaq, həm də resurslara qənaət etmək haqqında düşünürlər”.
Elektromobillərin idxalında azalmaya diqqət çəkən E. Cəfərov bildirdi ki, elektromobil istehsalı və bu avtomobillərin maya dəyəri bir qədər baha başa gəlir. Buna görə də, inkişaf etmiş ölkələrdə elektromobili istehsal edən, satan şirkətlər, eləcə də bu avtomobilləri alan şəxslər üçün müxtəlif həvəsləndirici, stimullaşdırıcı addımlar atılır, güzəştlər tətbiq edilir ki, vətəndaşlar bu ekoloji nəqliyyat vasitəsini alsınlar: “Lakin Azərbaycanda ekoloji təmiz avtomobillərə hər hansı stimullaşdırıcı addımlar atılmır, həvəsləndirici işlər görülmür. Bu səbəbdən vətəndaşlarımız baha başa gələn elektromobilləri almaq haqqında düşünmürlər. Fikrimcə, yaxın illərdə Azərbaycanda ekoloji təmiz sayılan elektromobillər üçün də müəyyən güzəştlər tətbiq edilsə və həmin avtomobillərin qiyməti ensə, bu zaman vətəndaşlar böyük həvəslə elektromobil alar”.
Prezident İlham Əliyev Kəlbəcərdə uzunluğu 51 kilometr olan İstisu-Minkənd yolunun çəkilməsi işlərinə baxıb.
Dövlət başçısı yol haqqında məlumat verib:
“Bu, İstisu-Minkənd yoludur. Bu yol olmayıb, yenidən çəkilir, uzunluğu 51 kilometrdir. Kəlbəcərin İstisu qəsəbəsini Laçının Minkənd kəndi ilə birləşdirən yoldur. Bu, Kəlbəcər və Laçın rayonları arasında ikinci bağlantı olacaq. Hazırda bu yol boyunca işlər gedir, torpaq işləri başa çatıb. Bundan sonra asfalt qatı da vurulacaq. Beləliklə, biz növbəti yol infrastrukturunu yaradacağıq. Həm İstisuya Laçın Beynəlxalq Hava Limanından istifadə edərək gəlmək üçün rahat imkan olacaq, eyni zamanda, Kəlbəcərlə Laçın arasında ikinci yol bağlantısı olacaq. Bunun həm strateji, həm də hərbi əhəmiyyəti var. Eyni zamanda, vətəndaşların rahatlığı, İstisu kurortunu yenidən bərpa etmək, müasir səviyyəyə gətirmək üçün bu yolun böyük əhəmiyyəti var. Bu yol layihəsi də uğurla icra edilir. Xəritədə də artıq yaşayış məntəqələrindən keçən yol göstərilir”.
Prezident İlham Əliyev Kəlbəcərdə uzunluğu 51 kilometr olan İstisu-Minkənd yolunun çəkilməsi işlərinə baxıb.
Dövlət başçısı yol haqqında məlumat verib:
“Bu, İstisu-Minkənd yoludur. Bu yol olmayıb, yenidən çəkilir, uzunluğu 51 kilometrdir. Kəlbəcərin İstisu qəsəbəsini Laçının Minkənd kəndi ilə birləşdirən yoldur. Bu, Kəlbəcər və Laçın rayonları arasında ikinci bağlantı olacaq. Hazırda bu yol boyunca işlər gedir, torpaq işləri başa çatıb. Bundan sonra asfalt qatı da vurulacaq. Beləliklə, biz növbəti yol infrastrukturunu yaradacağıq. Həm İstisuya Laçın Beynəlxalq Hava Limanından istifadə edərək gəlmək üçün rahat imkan olacaq, eyni zamanda, Kəlbəcərlə Laçın arasında ikinci yol bağlantısı olacaq. Bunun həm strateji, həm də hərbi əhəmiyyəti var. Eyni zamanda, vətəndaşların rahatlığı, İstisu kurortunu yenidən bərpa etmək, müasir səviyyəyə gətirmək üçün bu yolun böyük əhəmiyyəti var. Bu yol layihəsi də uğurla icra edilir. Xəritədə də artıq yaşayış məntəqələrindən keçən yol göstərilir”.
Prezident İlham Əliyevin sərəncamına əsasən tikilən Kəlbəcər-Laçın avtomobil yolunun uzunluğu 72,8 kilometrdir. Birinci və ikinci texniki dərəcəyə uyğun tikiləcək yolun hərəkət hissəsinin eni 9-16 metr olacaq. İki və dörd hərəkət zolaqlı olacaq yol üzərində alt keçidlər və körpü inşa olunacaq. Yol üzərində üç tunelin tikintisi aparılacaq. Tunellərin ümumi uzunluğu 9450 metr olacaq. Prezident İlham Əliyev Kəlbəcər-Laçın avtomobil yolu üzərində tikiləcək 3,4 kilometr uzunluğundakı tunelin təməlini qoyub.
“Bu gün ikinci tunelin təməli qoyuldu. Kəlbəcər-Laçın avtomobil yolunda tunel tikiləcək. İkinci tunelin bir müddətdən sonra istifadəyə verilməsi ilə gediş-gəliş daha da rahat olacaq. Çünki Şərqi Zəngəzurun hərtərəfli inkişafı üçün avtomobil yolları xüsusi əhəmiyyət daşıyır. Və mənim göstərişimlə azad edilmiş torpaqların investisiya proqramı tutulanda tunellər də bu layihələrə salındı. O cümlədən Şuşaya gedən yolda tunellər çəkilməkdədir.
Tunelin tikintisi həm çətindir, xüsusilə belə ağır dağlıq relyefdə, eyni zamanda çox böyük xərclər tələb edir. Ancaq biz bunu edirik, edəcəyik, çünki bu, Şərqi Zəngəzurun inkişafına lazımdır. İnsanlar bura qayıdandan sonra çox rahat Azərbaycanın digər bölgələri ilə əlaqələr qura biləcəklər. Həm Kəlbəcər və Laçın rayonları arasında əlaqələr möhkəmlənəcək. Eyni zamanda Laçın rayonunda aeroportun tikintisi nəzərdə tutulur. Eyni zamanda Kəlbəcərə Gölgöl-Gəncə istiqamətində də gediş-gəliş daha da rahat olacaq.
Cəmi 8-9 ay ərzində görülmüş işlər onu bir daha göstərir ki, bizim çox güclü iradəmiz var. Siyasi qərarlar verildi və bütün güclər səfərbər olundu, texniki imkanlar səfərbər olundu, maliyyə vəsaiti təmin edildi, Azərbaycanda kadr potensialı, o cümlədən inşaat sahəsində formalaşdı və hərtərəfli işlər gedir, elektrik xətləri, su elektrik stansiyaları, yarımstansiyalar, tunellər, körpülər, hava limanları, sosial obyektlər və bütün digər məsələlər... Bu tunelin şəkli də burada göstərilir, çox rahat, təhlükəsiz yol olacaq”, - deyə dövlət başçısı təməlqoyma mərasimindən sonra bildirib.
“Artıq həm heyvandarlıqla, həm də arıçılıqla məşğul olan şəxslər Kəlbəcər yaylaqlarına qayıdıblar”
Bu sözləri prezident İlham Əliyev Kəlbəcər və Laçına səfəri zamanı deyib.
Bununla bağlı görüntüləri Birinci vitse-prezident Mehriban Əliyeva öz “Instagram” profilində paylaşıb.
Prezident heyvandarlıqla məşğul olan şəxsləri salamlayaraq, öz yurdlarına gəlmələyi münasibəti ilə təbrik edib.
Paylaşımı təqdim edirik:
Bu ilin yanvar-iyul aylarında Azərbaycana 474,6 milyon ABŞ dolları dəyərində 47 374 ədəd müxtəlif təyinatlı avtomobil idxal olunub.
Yol-xeber.az Dövlət Gömrük Komitəsinə istinadən xəbər verir ki, bu, ötən ilin eyni dövrü ilə müqayisədə müvafiq olaraq 39,2 % və 70,5 % çoxdur.
Son 1 ildə sürücü daxil olmaqla 10 nəfər və yaxud daha çox adam daşımaq üçün nəzərdə tutulmuş motorlu nəqliyyat vasitələrinin idxalı 36,6 % azalaraq 64 ədəd (5,1 milyon ABŞ dolları dəyərində), əsasən adamların daşınması üçün nəzərdə tutulmuş minik avtomobilləri və digər motorlu nəqliyyat vasitələrinin idxalı isə 69,4 % artaraq 44 048 ədəd (413,7 milyon ABŞ dolları dəyərində) təşkil edib.
Bu avtomobillərin 5 879-u (36 milyon ABŞ dolları dəyərində) daxili yanma mühərriklə yanaşı, elektrik mühərriklə də hərəkətə gətirilən nəqliyyat vasitələri, 44-ü (1,5 milyon ABŞ dolları dəyərində) isə yalnız elektrik mühərriklə hərəkətə gətirilən nəqliyyat vasitələridir.
Bu isə birincinin 2,4 dəfə artması, ikincinin isə 2,4 dəfə azalması deməkdir.
Bundan əlavə, yük daşımaq üçün mühərrikli nəqliyyat vasitələrinin idxalı 98 % artaraq 3 198 ədəd (47,9 milyon ABŞ dolları dəyərində), xüsusi təyinatlı motorlu nəqliyyat vasitələrinin idxalı isə 16,9 % azalaraq 64 ədəd (7,9 milyon ABŞ dolları dəyərində) olub.
İngiltərə və ABŞ mərkəzli 2 şirkət Azərbaycandakı filiallarını ləğv edir.
Bunlar “Buro Happold Consulting Engineers Limited” və “Magseis FF LLC” şirkətləridir.
“Buro Happold Consulting Engineers Limited” və “Magseis FF LLC” şirkətinin Azərbaycan filiallarının ləğvi ilə bağlı kreditorlar iki ay ərzində tələblərini Bakı şəhəri, Nəsimi rayonu, Neftçilər prospekti, ev 153, Port Baku, Cənub qülləsi, 9-cu mərtəbə ünvanına bildirə bilərlər.
Qeyd edək ki, “Buro Happold Consulting Engineers Limited” şirkətinin Azərbaycandakı filialı 2014-cü ildə yaradılıb və qanuni təmsilçisi Gareth William Freeman Kirkwood-dur. “Magseis FF LLC” şirkətinin Azərbaycan filialı isə 2020-ci ildə dövlət qeydiyyatına alınıb və qanuni təmsilçisi Thomas Elias Scouliios-dur. Hər iki şirkət Bakı şəhəri Yasamal rayonu, Zahid Xəlilov, ev 1, məhəllə 523, m. 23 ünvanında qeydiyyatdadır.
“Buro Happold Consulting Engineers Limited” İngiltərə mərkəzli memarlıq və mühəndislik şirkəti, “Magseis FF LLC” isə ABŞ mərkəzli mədənçilik və neft-qaz çıxarma şirkətidir.
Azərbaycan Mərkəzi Bankının bu günə olan rəsmi valyuta məzənnələri açıqlanıb.
Avronun məzənnəsi 0,05% azalaraq 1,9957 manat, Rusiya rublunun məzənnəsi 0,43% geriləyərək 0,0231 manat, türk lirəsi 0,61% bahalaşaraq 0,1982 manat təşkil edib.
ABŞ dollarının məzənnəsi dəyişməyərək 1,7000 manat olub.