 |
|
Zəngəzur dəhlizinə görə, Rusiya-İran gərginliyi dərinləşir. Hazırda bütün tranzit xətləri İran ərazisindən keçir. Tehran bölgədə nüfuzunu və imkanlarını daha da genişləndirməyi düşünür. Ticarət, siyasi və mədəni təsir baxımından isə İran Qafqazda autsayderdir.
Bunu Teleqraf.com-a VI çağırış Milli Məclisin deputatı, siyasi şərhçi Rasim Musabəyov deyib.
O qeyd edib ki, Türkiyənin Azərbaycan kimi müttəfiqi var:
“Eyni zamanda o, iqtisadi cəhətdən bölgədə güclü dayaqlara malikdir. Rusiya da regionda sağlam dayaqlar qurub. Ermənistan demək olar Kremlin nəzarətindəndir. Ona görə də, İranın mövqeləri çox zəifdir”.
Siyasi şərhçi hesab edir ki, İran eyni zamanda Azərbaycan ərazisindən keçməklə Rusiya və Qərbə daxil olur:
“Bu baxımdan İran bölgə dövlətlərini nəqliyyat məsələsində asılı saxlamaq niyyətindədir. Zəngəzur dəhlizinə də rəsmi Tehran bu kontekstdən yanaşır. Çünki bu dəhliz İran ərazisindən keçən yollar üçün alternativ marşurutdur”.
Rasim Musabəyovun sözlərinə görə, İran Ermənistan ərazisində dəhlizin açılmasına mümkün qədər maneə olmağa çalışır:
“Bütün xətlərin öz ərazisindən keçməsini istəyir. Şimal-Cənub dəhlizi və Naxçıvanla kommunikasiyaların da İran ərazisinə keçməsinə razıdır. Digər bir məsələ İranın İsrail məsələsində Rusiyadan narazı qalmasıdır. Tehran İsrailə zərbə vurmaq istəyirdi. ABŞ xəbərdarlıq etdi ki, buna cavabı şiddətli olacaq. Bu halda İran ancaq Rusiyanın dəstəyi ilə İsrailə zərbə vura bilərdi. Moskva isə bu dəstəyi vermədi”.
Xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələrində dəyişiklik edilib.
Baş nazir Əli Əsədov bununla bağlı qərar imzalayıb.
Qərara əsasən, Azərbaycandan ixrac edilən tökmə çuqunun tullantıları və qırıntıları, qalay layı ilə örtülmüş qara metalların tullantıları və qırıntılarının 1 000 kq üçün tarif dərəcəsi 7 ABŞ dollarından 500 ABŞ dollarına artırılıb.
Torna yonqarları, kəsiklər, qırıntılar, frezer istehsalatı tullantıları, mişarağzı və təkrar əritmə üçün külçələrin (şixta külçələri) tarif dərəcəsi 1000 kq üçün 5 ABŞ dollarından 500 ABŞ dollarına artırılıb.
Saflaşdırılmış misin, mis və sink əsasında ərintilərin (latunun), hər 1000 kq-ı üçün ixrac rüsumu 15 ABŞ dolları, 31.12.2024-cü il tarixinədək -10 %, lakin 1000 kq-a 300 ABŞ dollarından az olmamaqla olub. Dəyişikliyə əsasən, saflaşdırılmış misin hər 1000 kq-ı üçün ixrac rüsumu 50%, lakin 1000 kq-a 4000 ABŞ dollarından az olmamaqla olacaq.
Eyni zamanda torna yonqarı, kəsiklər, qırıntılar, frezer istehsalı tullantıları, mişarağzı və kəsiklərin tullantıları; qalınlığı 0,2 mm-dən (altlıq hesaba almadan) çox olmayan, boyanmamış, müxtəlif örtüklü və ya birləşdirilmiş vərəqlərin və folqanın tullantılar, digərləri (brak edilmiş məmulatlar daxil olmaqla) və qırıntılar üçün ixrac rüsumu 1000 kq – 15 ABŞ dolları olub. Dəyişikliyə əsasən, ixrac rüsumu 50%, lakin 1000 kq-a 1000 ABŞ dollarından az olmamaqla olacaq.
Bu Qərar dərc edildiyi gündən 60 gün sonra qüvvəyə minir.
Azərbaycanda avtomobillərin qiymətini süni surətdə artırmaq üsullarından biri də onun yürüş məsafəsinə müdaxilədir.
Maşının nə qədər yol qət etdiyi ilə bağlı informasiya mexanizminə qeyri-qanuni təsir etmək halları artıq o qədər çoxalıb ki, köhnə maşın alanların əksəriyyəti bunun fəsadını yaşayır.
Avtomobil ustası bildirib ki, yeni nəsil avtomobillərdə bu proses elektrondur, həmin cihazı çıxararaq "kilometraj"a müdaxilə edib arxaya çəkirlər:
"Amma köhnə il maşınlarda tros sistemi olduğu üçün onu hər hansı cihazla geriyə çəkmək olur". Bəs bu üsuldan istifadə edənləri hansı cəza gözləyir?
Hüquqşünas Hikmət Əliyev bildirib ki, əgər istehlakçı avtomobilin istehlak xüsusiyyətlərinə dair az miqdarda, yəni 300 manatdan çox olmayan məbləğdə aldadılmışdırsa, belə olan halda İnzibati Xətalar Məcəlləsinin 447-ci maddəsinə əsasən, inzibati məsuliyyətə cəlb edilə və cərimə oluna bilər:
"İstehlakçı 300 manatdan yuxarı məbləğdə aldadılmışdırsa, bu hal cinayət məsuliyyətinə səbəb olur. Belə ki, Cinayət Məcəlləsinin 200-cü maddəsinə əsasən, istehlakçıları aldadan və pis keyfiyyətli məhsulları satan şəxslər barəsində fərdi sahibkar olmasından asılı olaraq 3000 manatdan 5000 manatadək məbləğdə cərimə və ya 360 saatdan 480 saatadək ictimai işlər növündə cəza nəzərdə tutulub".
Ətraflı Baku TV-nin süjetində:
“Ermənistan təyyarələri Türkiyə ərazisindən keçdiyi kimi, Türkiyənin hava yolları və təyyarələri də həmişə Ermənistan ərazisindən keçib. Bu, beynəlxalq hüquqdur”. Bunu Ermənistan Aviasiya sənayesinin meneceri Hakob Çağaryan deyib.
Onun sözlərinə görə, nə Türkiyənin, nə də Ermənistanın hava məkanını bir-birinə bağlamağa heç bir əsası olmayıb. “Türkiyə təyyarələri həmişə Ermənistan ərazisindən keçib”.
Çağaryan onu da deyib ki, Azərbaycan 2020-ci ilə qədər Ermənistanın hava məkanından istifadə etməyib. Onun sözlərinə görə, buna səbəb Azərbaycanın Ermənistandan mülki təyyarələri vura biləcəyindən ehtiyat etməsi olub. “Müharibədə qalib gəldikdən sonra Azərbaycan “əzələ” nümayişinə başladı. Uçuşlar həyata keçirirdi ki, mən beynəlxalq hüquqdan istifadə edirəm. Onlar açıq şəkildə deyirdilər ki, siz öz hava məkanınızı bağlamısınızsa, hüquqi əsaslandırın”.
O sonda bu uçuşlara görə, ölkələrin bir birinə nə qədər pul ödədiyi barədə də danışıb. “Azərbaycan Ermənistan ərazisindən uçur və ya Ermənistan Azərbaycan ərazisindən uçarsa, hava məkanından istifadəyə görə hər kilometr üçün təxminən 1 dollar ödəyir. Və o vəsaitlər Azərbaycandan Ermənistana gəlmir. Bütün bunları Eurocontrol təşkil edir. Eurocontrol pulu alır, sonra hər bir dövlətə öz pulunu verir”.
"Azərbaycan Dəmir Yolları" QSC (ADY) sərnişindaşımada ilk dəfə loyallıq proqramını həyata keçirməyi planlaşdırır.
Bunu “Report”a ADY-nin sədri Rövşən Rüstəmov bildirib.
Onun sözlərinə görə, layihənin reallaşdırılmasına yaxın zamanlarda başlanılacaq: “Aviadaşımalarda tətbiq olunan "Miles" proqramına uyğun olaraq qatarlarda gedişlərin sayına görə sərnişinlər bonuslar əldə edəcəklər”.
R.Rüstəmov vurğulayıb ki, loyallıq proqramı ADY-nin mobil tətbiqinə əlavə ediləcək: “Bununla yanaşı, mobil tətbiqə bir sıra yeni funksiyaların əlavə edilməsi gözlənilir”.
Xatırladaq ki, ADY hazırda Bakı-Pirşağı-Sumqayıt, Bakı-Xırdalan-Sumqayıt, Bakı-Ağstafa-Bakı, Bakı-Qəbələ-Bakı istiqamətlərində sərnişin daşıyır.
Ölkədə dəmir yolu nəqliyyatı ilə 2024-cü ilin yanvar-iyul aylarında 4 milyon 524,2 min sərnişin daşınıb, bu da 2023-cü ilin eyni dövrü ilə müqayisədə 20,5 % çoxdur.
ADY 2021-ci ildə 2,8 milyon, 2022-ci ildə 5,2 milyon, 2023-cü ildə isə 7 milyon sərnişin daşıyıb.
Elan saytlarında yataqxana tipli binalarda satışa çıxarılan mənzillərin sayı olduqca çoxdur.
Hətta məlumatlarda bəzilərinin çıxarışı olduğu da iddia edilir.
Bəs bu nə dərəcədə doğrudur?, əmlak alarkən bu məsələdə nəyə diqqət etmək lazımdır?
Əmlak eksperti Elnur Fərzəliyevin sözlərinə görə, belə mənzillərin satışı daha çox məcburi köçkünlərin yerləşdiyi yataqxanalarda baş verir. Bu mənzillərin alışı zamanı isə sənədlərə baxmaq lazımdır. Əgər həmin bina aid olduğu müəssisənin balansından çıxmayıbsa, həmin mənzil vətəndaşın özəl mülkiyyəti sayılmır.
Əgər həmin mənzilin yerləşdiyi yataqxana faktiki olaraq hansısa qurumun balansındadırsa onu almaqdan imtina etsinlər.
Qeyd edək ki, hansısa qurumun, zavod və ya fabrikin balasında olan, eləcə də tələbə yataqxanalarındakı evləri satışa çıxarmaq qanuna ziddir.
Xezerxeber.az mövzu ilə bağlı daha ətraflı videomaterialı təqdim edir.
Bakıda keçiriləcək "Formula 1" üzrə Azərbaycan Qran-prisi ilə əlaqədar logistik əməliyyatların həyata keçirilməsi məqsədilə sentyabrın 7-də, gecə saat 01:00-dan etibarən Puşkin küçəsinin Üzeyir Hacıbəyov küçəsi və Neftçilər prospekti ilə kəsişməsindən olan hissəsi nəqliyyatın hərəkəti üçün məhdudlaşacaq.
Bu barədə "Yol-xeber.az"a Bakı Şəhər Halqası Əməliyyat Şirkətindən məlumat verilib.
Məhdudiyyət tədbirin sonunadək davam edəcək.
Nəqliyyatın İdarəetmə Planına əsasən, Bakı Şəhər Halqasının keçdiyi küçələr və trekin əhatə etdiyi ərazilər sentyabrın 9-da, gecə saat 01:00-dən etibarən nəqliyyatın hərəkəti üçün bağlı olacaq. Hərəkət 17 sentyabr, səhər saat 8:00-dan etibarən bərpa olunacaq.
Nəqliyyatın hərəkət məhdudiyyəti 3 zonada tətbiq ediləcək. Birinci zona yarış halqasının əhatə etdiyi İçərişəhər ərazisi, ikinci Azadlıq meydanı və onun yaxınlığında yerləşən digər küçələr, üçüncü zona isə BMT-nin 50 illiyi küçəsinini keçdiyi ərazidir. Yarışın keçirildiyi müddətdə qeyd olunan ərazilərə nəqliyyatın giriş-çıxışı üçün “Yaşayış Yerinə Giriş İcazəsi” veriləcək. Qeyd olunan sənədi paylanma məntəqələrinə yaxınlaşaraq, həftənin bazar ertəsindən, cümə gününə kimi, saat 10:00-dan 17:00-dək əldə etmək mümkündür. Bunun üçün vətəndaşlar zonalar üzrə aşağıdakı müvafiq idarələrə müraciət etməlidirlər:
Zona 1 – İçərişəhər Dövlət Tarix-Memarlıq Qoruğu İdarəsi
Böyük Qala küçəsi 41, keçmiş ensiklopediya binası, 4-cü mərtəbə
Tel: (012) 497-35-89
Zona 2 – Mənzil-Kommunal və İstismar İdarəsi № 4
Xəqani küçəsi 26/32
Tel: (012) 498 88 06
Zona 3 – Mənzil-Kommunal və İstismar İdarəsi № 58
İstiqlaliyyət küçəsi 5
Qeyd edək ki, “Yaşayış Yerinə Giriş İcazəsi”nin paylanması 29 avqust tarixindən başlayıb 13 sentyabradək davam edəcək.
Hər il olduğu kimi, bu il də yarış müddətində piyadaların hərəkətinə heç bir məhdudiyyət qoyulmayacaq.
Qeyd edək ki, Azərbaycan Qran-prisi sentyabrın 13-15-i aralığında baş tutacaq.
Xəbər verdiyimiz kimi, 29 avqust saat 04:00-da Qızılburun-Gilgilçay istiqamətində hərəkət edən yük avtomobili idarəetməni itirərək körpüdən aşıb və dəmir yolu xəttinin üzərinə düşüb.
“Azərbaycan Dəmir Yolları” QSC-dən Yol-xeber.az-a verilən məlumata görə, hadisə nəticəsində ciddi zədələnmiş kontakt şəbəkə sistemi qısa müddətdə bərpa edilib.
Bildirilib ki, bu istiqamətdə qatarların hərəkəti qrafik üzrə təmin olunub.
Qeyd edək ki, hadisə nəticəsində həmin sahədə yanğın baş verib, Fövqəladə Hallar Nazirliyinin yanğından mühafizə briqadası dərhal hadisə yerinə cəlb edilmiş və yanğın qısa müddət ərzində söndürülüb.
Hazırda dəmir yolu infrastrukturuna dəymiş ziyan müəyyənləşdirilir.
Amerika şirkəti "U.S. Armor Group" zirehli lüks konsepsiyasında inqilab edəcək "Dünyanın ən sürətli zirehli avtomobili"ni təqdim edib.
Bu barədə "Carscoops" məlumat yayıb.
Layihənin əsası kimi Amerikanın "Lucid Motors" şirkəti tərəfindən hazırlanmış "Lucid Air Sapphire" elektromobilindən istifadə edilib. O, ümumi gücü 1234 at gücünə malik üç mühərrikə malikdir.
"Lucid Air Sapphire" yüksək güclü "44 Magnum" revolver döyüş sursatlarına tab gətirə bilən kompozit zireh və gülləkeçirməyən pəncərələrlə təkmilləşdirilib.
Zirehli "Lucid Air Sapphire"in çəkisi cəmi 175 kq artıb, ona görə də elektromobil 320 km/saatdan çox sürətə çata bilir (standart modelin sürəti 330 km/saatdır).
Avtomobilin qiyməti 475 min dollardan başlayır ki, bu da "Air Sapphire"in qiymətindən təxminən iki dəfə bahadır. Eyni zamanda, müştərilər qumbaraatanlardan, partlayıcı qurğulardan və güclü tüfənglərdən qorunmaq üçün daha güclü zirehlər əlavə edə bilərlər.
"Lucid Motors" 2007-ci ildə Kaliforniyada qurulmuş elektrik avtomobillərinin Amerika istehsalçısıdır. Ən məşhur model "Lucid Air" premium sedandır. Onun serial versiyası 2020-ci ildə təqdim edilib.
2021-ci ildə dəbdəbəli elektrik avtomobillərinin istehsalçısı IPO olmadan birjaya çıxmaq qərarına gəlib. "Lucid Motors"un model çeşidini genişləndirmək və "Tesla"nın ən çox satılanları ilə rəqabət aparmaq istədiyi də bildirilib.
Dünya bazarında "Azeri Light" markalı Azərbaycan neftinin 1 barelinin qiyməti 2,89 ABŞ dolları, yaxud 3,58 % artaraq 83,76 ABŞ dolları təşkil edib.
Bu barədə “Report"a neft bazarındakı mənbə məlumat verib.
Hərracların nəticələrinə görə, “Brent” markalı neftin oktyabr fyuçerslərinin qiyməti 79,56 ABŞ dolları təşkil edib.
Azərbaycanın builki dövlət büdcəsində bir barel neftin orta qiyməti 75 ABŞ dollarından hesablanıb.
Xatırladaq ki, "Azeri Light" neftinin ən aşağı qiyməti 2020-ci il aprelin 21-də (15,81 ABŞ dolları), maksimal qiyməti isə 2008-ci ilin iyulunda (149,66 ABŞ dolları) qeydə alınıb. Azərbaycanda neft əsasən "Azəri-Çıraq-Günəşli” (AÇG) yataqlar blokunun işlənməsi haqqında müqavilə çərçivəsində hasil edilir. Müqavilədə Azərbaycan Dövlət Neft Şirkətinin (SOCAR) payı 25 %-dir.