 |
|
Dollara olan tələb 100%-dən çox artdı. Tələbin kəskin artma səbəbi kimi bir sıra məqamları qeyd etmək olar.
Bunu iqtisadçı ekspert Eldəniz Əmirov deyib. O bildirib ki, səbəblər arasında əsas amil yeni tədris mövsümü ilə əlaqədar dollara tələbin artmasıdır:
"Məktəb ləvazimatlarının, vəsaitlərinin, məktəbli formalarının və digər idxal məhsullarının ölkəyə gətirilməsi prosesinin başlaması dollara olan tələbi artırıb. Digər bir amil isə xaricdə təhsil alan tələbələrin növbəti tədris ilinə hazırlıqlara başlamasıdır".
Eksperti sözlərinə görə, bu proses hələ bir müddət davam edəcək və qarşıdakı müddətdə dollara tələbinin yüksək qalması mümkündür.
E. Əmirov manat üçün hansısa təzyiq və məzənnə dəyişikliyi üçün zərurət yaranması ilə bağlı ehtimallara da toxunub:
"Qeyd etdiyim amillər bir-iki aylıq dövrü əhatə edəcək, deməli dollara tələbin artım dinamikası davamlı olmayacaq. Ona görə də, hər hansı bir ciddi təzyiqdən söz gedə bilməz. Ölkənin mövcud valyuta ehtiyatları (hazırda 66 milyard dollar) və mövcud neft qiymətləri manata qorxu yaratmadan, onun "relax"ına imkan verəcək".
Ermənistanın TIR şousu davam edir. Bir sıra xarici təşkilatların təxribat məqsədli bu şouya dəstək olması təəssüf doğurmaqla yanaşı, bölgədə vəziyyətin stabilləşməsinə də xidmət etmir.
Bunu Milli Məclisin deputatı Vüqar Bayramov deyib. O bildirib ki, Ermənistan rəhbərliyi hələ də hər vəclə Ağdam-Xankəndi yolundan istifadə etməkdən boyun qaçırır:
26 km uzunluğu olan Ağdam-Xankəndi yolu müasir standartlara uyğun qurulmaqla yanaşı bölgədə Xankəndinə ən qısa məsafə hesab olunur. Laçın-Xankəndi yolu 60 km-dir və bu yol Şərqi Zəngəzurla Qarabağı birləşdirir.
Ağdam-Xankəndi yolu isə Qarabağ iqtisadi rayonunda daxili şəbəkədir və bu baxımdan da vacib nəqliyyat xəttidir. Bu yoldan istifadə bütövlükdə Qarabağ iqtisadi rayonun inkişafına töhvə baxımdan da vacibdir. Daxili nəqliyyat və logistik şəbəkə iqtisadi inkişaf üçün zəmin yaratdığından bu yolun intensiv istifadəsi əhəmiyyətlidir".
"Digər tərəfdən, əgər məqsəd Azərbaycanın Qarabağ bölgəsində yaşayan ermənilərə humanitar yardım göstərməkdirsə, niyə Ermənistan siyasi hakimiyyəti daha qısa və müasir standartlara uyğun qurulmuş yoldan istifadədən imtina edir?", - deyə millət vəkili əlavə edib.
“Azərbaycan Hava Yolları” ilə “Buta Airways”in vahid AZAL brendi altında birləşməsinə qərar verilib. Proses 2023-cü ilin oktyabr ayında baş tutacaq.
“Buta Airways”ə məxsus bütün reyslər birləşmədən sonra da hazırda mövcud olan eyni qiymətlərlə, lakin daha üstün xidmət səviyyəsi ilə vahid AZAL brendi altında təklif olunacaq. Rəsmi açıqlamada bildirilib ki, il ərzində müxtəlif güzəşt kampaniyaları davam etdiriləcək.
Məlumata görə, sərnişinlər üçün aviadaşımaları daha da əlçatan etmək üçün AZAL bütün reyslərində yeni “Buta Budget” baqajsız tarifi təklif edəcək. Bundan əlavə, tariflərə əl yükü daxil ediləcək və “Buta Budget” istisna olmaqla baqajın daşınması norması artırılacaq. Həmçinin sərnişinlərə yenilənmiş menyu təqdim olunacaq.
İstiqamətdən asılı olmayaraq bütün reyslərin biletlərini vahid www.azal.az internet saytı üzərindən və AZAL mobil tətbiqi vasitəsilə bron etmək və ödənişi həyata keçirmək mümkün olacaq.
Maraqlıdır, iki aviaşirkətin birləşməsinin faydası nə olacaq? Belə bir addımın atılması Azərbaycana nə qazandıracaq?
Mövzu ilə bağlı Modern.az-a açıqlama verən Milli Məclisin deputatı Rüfət Quliyev birləşmək qərarının biletlərin qiymətinin tənzimlənməsi üçün atıldığını bilidirib.
“Fikrimcə, böyük dəyişiklik olmadı. Bu sahədə islahatlar aparılmalıdır. Keyfiyyət barədə nöqsanların olub-olmamasını deyə bilmərik, amma biletlərin qiymətindən böyük narazılıqlar var. AZAL-in biletləri bahadır. Qonşu ölkələrlə müqayisə edək. Məsələn, Gürcüstandan uçuş bizdən bir neçə qat ucuzdur. Düşünürəm ki, birləşmə qərarı biletlərin qiymətinin tənzimlənməsi üçün atılıb. Həm də “Buta Airways” və AZAL hansı ölkələrə uçuşlar olacağına qərar verməlidir. Eyni zamanda biletlərin qiymətlərinə yenidən baxılsın. Dünya təcrübəsi nəzərə alınsın. Quru sərhədlərinin bağlı olduğu halda biletlərin qiymətləri ucuz olmalıdır. İnsanların narazılığı nəzərə alınmalı və buna uyğun addımlar atılmalıdır”, - deputat vurğulayıb.
İqtisadçı ekspert Natiq Cəfərli isə birləşmənin qiymət artımı ilə nəticələnəcəyini düşünür.
““Buta Airways” şirkəti AZAL tərəfindən idarə olunurdu. Birləşmənin əsl səbəbini rəsmilər izah etməsə də, indiki açıqlamalardan belə məlum olur ki, “Buta Airways” və AZAL-ın eyni istiqamətlə uçuşlarında artıq AZAL-ın qiymətləri tətbiq olunacaq. Məsələn, Türkiyə, Gürcüstan, Rusiya, Orta Asiya istiqamətlərində “Buta Airways”in ayrıca reysləri var idi. AZAL- a paralel olaraq uçuşlar həyata keçirilirdi. Amma AZAL-ın qiymətləri daha yüksək idi. AZAL oktyabrın 1-dən eyni uçuşları həyata keçirəcəksə, deməli, AZAL-ın qiymətləri tətbiq olacaq. Təbii ki, qiymətlər artacaq. Təəssüf ki, belə bir tendensiyanı görəcəyik”, - ekspert vurğulayıb.
Yol-xeber.az" xəbər verir ki, Azərbaycan Respublikası Prezidentinin Sərəncamına əsasən, vətəndaşların rahat gediş-gəlişinin təmin olunması məqsədilə Azərbaycan Avtomobil Yolları Dövlət Agentliyi tərəfindən Bakı-Quba-Rusiya Federasiyası ilə dövlət sərhədi avtomobil yolunun paytaxt Bakıdan Şabran rayonu istiqamətində təmir-bərpa işlərinə başlanılır.
Tənir-bərpa işləri magistral yolun 52-119.5 km-də müəyyən hissələrdə yerinə yetiriləcək.
Avtomobil yolunda hərəkət intensivliyi nəzərə alınaraq işlər hissə-hissə aparılacaq. İşlərin aparıldığı ərazidə avtonəqliyyat vasitələrinin hərəkəti tam olaraq məhdudlaşdırılacaq. Təmir-bərpa işləri aparılan müddət ərzində əks istiqamət üzrə avtonəqliyyat vasitələrinin 2 tərəfli hərəkəti təmin ediləcək.
Əks istiqamət üzrə 2 tərəfli hərəkətin təhlükəsiz və maneəsiz təmin olunması üçün ərazidə əlavə təhlükəsizlik tədbirlərinin görülməsi, müvafiq nişanlanma xətlərinin çəkilişi və müvəqqəti yol nişanlarının quraşdırılması işləri aparılacaq.
Sürücülərdən təmir-bərpa işlərinin aparılmasına anlayışla yanaşmaları, sözügedən ərazidə hərəkətdə olarkən diqqətli olmaları, müvəqqəti yol nişanlarının tələblərinə və yol hərəkəti qaydalarına riayət etmələri xahiş olunur.
Təmir-bərpa işləri ilə əlaqədar yarana biləcək müvəqqəti narahatlığa görə vətəndaşlardan üzr istəyirik.
YOLUNUZ AÇIQ OLSUN...
Azərbaycan Avtomobil Yolları Dövlət Agentliyi (AAYDA) Şərqi Zəngəzur iqtisadi rayonuna daxil olan Zəngilan rayonunun ərazisində mövcud Horadiz–Zəngilan avtomobil yolunun əsaslı təmirinə başlayıb.
Bu barədə Agentlikdən məlumat verilib.
Bildirilir ki, təmir-tikinti işləri M-6 Hacıqabul-Bəhrəmtəpə-Mincivan-Ermənistanla dövlət sərhədi avtomobil yolunun (km 173+600 - km 235+000) 61.4 km-lik Horadiz-Zəngilan hissəsində həyata keçirilir.
III texniki dərəcəyə uyğun olaraq əsaslı şəkildə yenidən qurulan yolun torpaq yatağının eni 12 metr təşkil edir.
Layihə üzrə əsaslı təmir işləri 173.6-189, 189-205, 205-220 və 220-235-ci km-lər daxil olmaqla 4 hissədə aparılır.
Hazırda yolboyu mövcud asfalt-beton örtüyün kənarlaşdırılması, qazma, tökmə işləri, yol yatağının və yol əsasının tikintisi, suların ötürülməsini təmin etmək məqsədilə müxtəlif ölçülü suötürücü boruların inşası, körpülərin təmiri, həmçinin kommunikasiya xətlərinin köçürülməsi işləri aparılır.
Horadiz–Zəngilan avtomobil yolu Qarabağ və Şərqi Zəngəzur iqtisadi rayonları ərazisində icra olunan və işğaldan azad edilmiş ərazilərimizin sosial-iqtisadi inkişafında mühüm rol oynayacaq yol infrastrukturu layihələrindən biri sayılır.
Tonlarla pomidor sahələrdə qalıb çürüyür.
Xezerxeber.az xəbər verir ki, söhbət Masalı rayonunun Sərçuvar və Viləş kəndlərindən gedir.
Bu kəndlərdə fermerlər sahələrdən yaxşı, bol məhsul əldə etdiklərini, məhsulun satışının isə zəif olduğunu bildiriblər:
“Hazırda pomidorun 30 kiloqramlıq yeşiyi üç manata satılır. Kiloqramını 10 qəpiyə satsaq da alan yoxdur”.
Onlar bildiriblər ki, havaların qeyri-sabit keçdiyi vaxtlarda yağıntının çox olması da pomidora xeyli ziyan vurub.
Masallı Dövlət Aqrar İnkişaf Mərkəzindən məsələ ilə bağlı bildirilib ki, problemin yaranmasına əsas səbəb rayon ərazisində saxlama kameralarının, eləcə də kombinatın olmamasıdır.
Qeyd edilib ki, rayonda 2023-cü ildə 535 hektar ərazidə pomidor əkilib. Bu da keçən ilə nisbətən 10,5 hektar çoxdur.
Daha ətraflı süjetdə:
Nazirlər Kabinetinin "Nəqliyyat vasitələrinin parklanmasına görə ödənişin məbləği” barədə qərarı bu gündən qüvvəyə minib.
Bununla bağlı Baş nazir Əli Əsədov iyunun 25-də qərar imzalayıb.
"Nəqliyyat vasitələrinin parklanmasına görə ödənişin məbləği” yalnız dövlətə məxsus parkinqlərdə qüvvədə olacaq. Avtomobillərin parklanmasına görə maliyyə dövriyyəsinin şəffaflaşdırılması, rəqəmsallaşmanın və istifadə rahatlığının təmin edilməsi məqsədilə ödənişlərin yalnız nağdsız qaydada həyata keçirilməsi nəzərdə tutulur.
Azərbaycanda taksi xidmətlərinin qiymətinin artdığı bildirilir.
“Bolt”, “Uber” və “Yango” taksiləri üçün minimum gediş haqqı bu gündən 2,50 manata yüksəlib.
Bu barədə məlumat verən sərnişinlər bildirirlər ki, əvvəllər bu qiymət 1-1,5 manata bərabər idi.
Məlumat üçün bildirək ki, taksi şirkətləri əsasən, “yüksək təlabat” zamanı qiymət əmsalını yüksəldir. Bununla gediş haqqında bahalaşma olur.
Taksi xidmətləri ilə bağlı parlament və nazirlik səviyyəsində müzakirələrin aparıldığı zaman, həmçinin yeni qərarların qəbul edildiyi ərəfədə oxşar xəbərlər yayılmışdı. Lakin sərnişinlərin hamısı bu məlumatları təsdiqləməmişdi.
Sözügedən şirkətlər ictimaiyyətə qiymət artımı ilə bağlı informasiya verməyib.
“Hazırda dünyanın maliyyə bazarlarda aparıcı valyuta məzənnələrində baş verən dəyişikliklərin Azərbaycanda manat-dollar münasibətlərinə heç bir təsiri yoxdur. Ona görə ki, ölkəmizin valyuta bazarı Mərkəzi Bank tərəfindən inzibati yolla tənzimlənir”.
Bu sözləri Bizim.Media-ya açıqlamasında iqtisadçı-ekspert Pərviz Heydərov deyib.
O, əlavə edib ki, nə vaxt ölkəmizdə sərbəst üzən məzənnəyə keçid olarsa, o zaman bu dəyişikliklər milli vayutamıza təsir edəcək:
“Ancaq hazırda və yaxın gələcəkdə belə bir şeyin olacağı gözlənilmir. Ona görə ki, Azərbaycanın əsas ixrac etdiyi məhsul neft və neft məhsullarıdır”.
Ekspert vurğulayıb ki, xam neftin qiyməti dünya bazarında ciddi şəkildə aşağı düşərsə və Azərbaycanın dövlət büdcəsində nəzərdə tutulan qiymətdən aşağı olarsa, o zaman ölkənin tədiyyə balansında və xarici ticarətində defisid yarana bilər:
“Bu da dərhal valyuta bazarına öz təsirini göstərəcək. Yəni, manat dollara qarşı münasibətdə ucuzlaşacaq. Bu isə hələlik gözlənilmir. Ona görə ki, neftin qiyməti 50 dollardan da aşağı düşməlidir.
Əgər nə vaxtsa, ixrac potensialmız çox çeşidli olarsa və ölkədə dollar təklifi yalnız Dövlət Neft Fondu tərəfindən deyil, digər subyektlər tərəfindən də həyata keçirilərsə, o zaman beynəlxalq aləmdə ayrı-ayrı valyutaların kurslarında baş verəcək dəyişikliklərin ölkəmizə təsiri barəsində danışmaq mümkün olacaq”.
Məlumdur ki, Azərbaycana idxala olunan məhsullar xarici valyutalarla, əsasən də dollarla hesablanır.
Bu baxımdan da dolların ucuzlaşması idxalın dəyərinin də aşağı düşməsinə səbəb olarmı?
Müsahibimizin sözlərinə görə, bu xarici valyutaların dəyərdən düşməsi uzun müddətli, davamlı və dayanıqlı olarsa, həmin məhsilların ölkəyə daha ucuz qiymətə daxil olmasına səbəb olacaq:
“Ancaq bunun da mənfi cəhətləri var. Belə ki, ucuzlaşma idxalı stimullaşdırır, yəni daha çox idxal etmək imkanı əldə edilir. Bu isə dolayı yolla yerli istehsalın inkişafını məhdudlaşdırır. Bir sözlə, bunun mənfi tərəfi daha çoxdur”.
Şuşanın Daşaltı kəndində sakinlərin yaşayışı üçün ümumilikdə 228 ev inşa ediləcək.
Yol-xeber.az-ın xəbərinə görə, Şuşa şəhəri üçün strateji əhəmiyyət daşıyan Daşaltı kəndinin bərpası qarşıya qoyulan əsas məqsədlərdəndir.
Kəndin inkişafı, burada məskunlaşacaq əhali üçün rahat və sağlam yaşayış mühitinin yaradılması, sakinlərin məşğulluq sahələri və istirahət əraziləri ilə təmin edilməsi prioritetlər arasındadır. Bunun nəzərə alaraq yenidənqurma üzrə təqdim olunan konsepsiya ərazinin təbii landşaftını qorumaqla Daşaltı kəndinin müasir tələblərə cavab verən yenilənəcək simasını nümayiş etdirir. Kənddə ictimai və yaşayış mərkəzlərinin, mədəniyyət və təhsil ocaqlarının qurulması, sosial və ictimai obyektlərin inşası, turizm sahələrinin yaradılması, nəqliyyat və kommunikasiya xətlərinin çəkilməsi, ərazinin yaşıllaşdırılması, kəndin ekoloji təmiz enerji ilə qidalandırılması üçün infrastrukturun təmin olunması nəzərdə tutulur.
Qeyd olunub ki, görüləcək işlər 65 hektara yaxın ərazini əhatə edir. Buraya 220 ailənin köçürülməsi planlaşdırılır. Məskunlaşdırılması nəzərdə tutulan əhalinin ümumi sayı isə 1100 nəfər olacaq. Sakinlərin yaşayışı üçün ümumilikdə 228 ev inşa ediləcək. Bundan başqa, ikimərtəbəli çoxmənzilli 9 bina, ikimərtəbəli bloklaşdırılmış (“townhouse” tipli) 66 ev və 153 ikimərtəbəli fərdi ev tikiləcək. Kənddə, həmçinin məscid, Bayraq meydanı, informasiya mərkəzi, qonaq evi, xalq sənətkarlığı emalatxanaları, qida məhsullarının satış köşkləri, ictimai-iaşə və ticarət obyektləri, sərgi salonu, uşaq bağçası, inzibati bina, tibb məntəqəsi, poçt şöbəsi, klub-icma mərkəzi, otel və istirahət mərkəzi, aktiv turizm və istirahət zonalarının yaradılması planlaşdırılır.
Qeyd edək ki, Prezident İlham Əliyev iyulun 21-də Şuşa rayonunun Daşaltı kəndinin yenidən qurulması ilə bağlı görüləcək işlərlə tanış olub, burada özəl investisiya hesabına inşa ediləcək yeni yaşayış kompleksinin və turizm obyektlərinin təməlini qoyub.