 |
|
“Krokus Ekspo” sərgi mərkəzində baş tutacaq nüfuzlu sərgidə “ADY Express” MMC də iştirak edəcək
Bu il aprelin 13-15-də Moskva şəhərində “TransRussia 2020” 25-ci Beynəlxalq Nəqliyyat və Logistika sərgisi keçiriləcək.
Yol-xeber.az-ın məlumatına görə “Report” bu barədə “ADY Express” MMC-yə istinadən xəbər verir.
Məlumata görə, “Krokus Ekspo” sərgi mərkəzində baş tutacaq nüfuzlu sərgidə “ADY Express” MMC də iştirak edəcək.
"Stendimizin nömrəsi – D597. Sizi stendimizdə görməkdən və işgüzar əlaqələri müzakirə etməkdən məmnun olardıq", - məlumatda bildirilir.
“Tibbi Ərazi Bölmələrini İdarəetmə Birliyi” (TƏBİB) kliniki sağlam olan, lakin COVİD - 19 virus xəstəliyi yayılan ölkələrə səyahət edən şəxslər üçün tövsiyələr hazırlayıb.
Video-çarx şəklində hazırlanan tövsiyələrdə qızdırma, öskürək, ürəkbulanma, nəfəs darlığının respirator xəstəlik əlamətləri olduğu qeyd olunub.
Bundan başqa, tövsiyələrdə COVİD-19 xəstəliyi rəsmi olaraq qeydə alınan ölkələrə səyahət edən şəxslərin üzərində müşahidələrin aparılması son təmasdan sonrakı 14 gün ərzində nəzərdə tutulduğu yer alıb.
“Müşahidə müddətində (14 gün ) mümkün qədər evinizi tərk etməyin, insanların sıx toplandığı yerlərə getməyin, şəxsi gigiyena qaydalarına ciddi riayət edin. Tez-tez əllərinizi su və sabunla 20 saniyə ərzində yuyun. İstifadə etdiyiniz dəsmaldan ailə üzvlərinizin istifadə etməsinə yol verməyin. Özünüzdə respirator xəstəlik əlamətləri hiss etdiyiniz halda dərhal 104 (Bakı daxili) və ya 113 (Bakıdan kənar) Təcili yardım nömrələrinə zəng edin və həkim müayinəsindən keçin”, - TƏBİB-in tövsiyələrində vurğulanıb.
8 Mart - Beynəlxalq Qadınlar Günü ilə əlaqədar martın 9-u ölkədə iş günü deyil.
Bu il 8 Mart - Beynəlxalq Qadınlar Günü bazar gününə təsadüf edir.
Əmək Məcəlləsinə əsasən, 8 Mart - Beynəlxalq Qadınlar Günü bazar gününə təsadüf etdiyindən martın 9-u qeyri-iş günüdür.
Bu gün Azərbaycanın dövlət və ictimai xadimi, siyasətçi və publisist, Azərbaycan Xalq Cümhuriyyətinin (1918-1920) banilərindən və Azərbaycan siyasi mühacirətinin liderlərindən olmuş Məhəmməd Əmin Rəsulzadənin vəfatı günüdür.
Məhəmməd Əmin Rəsulzadənin dünyasını dəyişməsindən 65 il ötür.
Məhəmməd Əmin Rəsulzadə 1884-cü il 31 yanvarında Bakının Novxanı kəndində anadan olub. Atası oğlunu məşhur pedaqoq Sultan Məcid Qənizadənin müdir olduğu ikinci "Rus-müsəlman" məktəbinə qoyub, buranı bitirdikdən sonra M.Ə.Rəsulzadə öz təhsilini Bakı texniki məktəbində, rus dilində davam etdirib. Milli istiqlal hərəkatımızın və təkcə türk ellərində deyil, bütün Şərq, İslam aləmində ilk respublika üsul-idarəsi olan Azərbaycan Demokratik Respublikasının təməl daşını qoyan Məhəmməd Əmin Rəsulzadənin inqilabi fəaliyyətinin ilk illəri də məhz bu dövrə təsadüf edir. 1902-ci ildə on yeddi yaşında olan M.Ə.Rəsulzadə "Müsəlman gənclik təşkilatı"nı yaradıb. Bu, XX əsrdə Azərbaycanda rus müstəmləkə üsul-idarəsinə qarşı gizli mübarizə aparan ilk siyasi təşkilat idi.
1917-ci ilin payızında M.Ə.Rəsulzadə Rusiya parlamentinə Azərbaycan və Türküstandan millət vəkili seçilib. 1918-ci il mayın 26-da Zaqafqaziya seymi daxili fraksiyaların çəkişmələri nəticəsində ləğv olunub. Həmin ayın 27-də seymin müsəlman fraksiyasına daxil olan müxtəlif partiyaların üzvlərindən ibarət olan Azərbaycan Milli Şürası yaranıb. Səs çoxluğu ilə M.Ə.Rəsulzadə Milli Şüranın sədri seçilib.
1918-ci il mayın 28-də bütün ölkələrin radio stansiyaları və qəzetləri Azərbaycan istiqlaliyyətinin elan olunmasını dünyaya yaydılar. Bu o demək idi ki, Azərbaycan xalqı öz varlığını, bir xalq kimi mövcudluğunu bütün bəşəriyyətə çatdırır və milli dövlətinin qurduğunu tam şəkildə bəyan edirdi. Fətəli Xan Xoyskinin başçılığı ilə Azərbaycan Demokratik Respublikası hökuməti təşkil olunub. Beləliklə, Azərbaycan xalqı nəinki türk xalqları arasında, həmçinin bütün Şərqdə ilk dəfə olaraq respublika qurub.
Lakin Azərbaycan Xalq Cümhuriyyətinin ömrü cəmi 23 ay çəkdi. 1920-ci ilin 28 aprelində Azərbaycanın sovet Rusiyası tərəfindən işğalından sonra M.Ə.Rəsulzadə vətəni tərk etmək məcburiyyəti ilə üzləşib. Uzun illər xaricdə Azərbaycanın azadlığı uğrunda mübarizə aparmış M.Ə. Rəsulzadə 1955-ci il martın 6-da Ankarada şəkər xəstəliyindən vəfat edib.
1992-ci ilin 24 dekabrında Azərbaycan Prezidenti Əbülfəz Elçibəy Məhəmməd Əmin Rəsulzadənin anadan olması münasibətilə "Görkəmli ictimai-siyasi xadim M.Ə.Rəsulzadənin totalitar sovet rejimi dövründə repressiyaya məruz qalmış ailə üzvlərinin Azərbaycana qaytarılması və onların sosial-məişət məsələlərinin həlli haqqında" sərəncam imzalayıb.
1993-cü ilin 29 dekabrında Azərbaycan Prezidenti Heydər Əliyev "Azərbaycanın görkəmli ictimai-siyasi xadimi M.Ə.Rəsulzadənin anadan olmasının 110 illik yubileyinin keçirilməsi haqqında" fərman imzalayıb.
Həmçinin Azərbaycan Respublikasının Prezidenti İlham Əliyev 2013-cü ilin 22 noyabrında "Məhəmməd Əmin Rəsulzadənin 130 illik yubileyinin keçirilməsi haqqında" sərəncam imzalayıb.
Ağstafa Regional Mədəniyyət İdarəsinin kollektivi Prezident cənab İlham Əliyevin Tovuz rayonuna səfəri çərçivəsində martın 4-də açılışında iştirak etdiyi Azərbaycan Aşıq Sənəti Dövlət Muzeyində ilk tədbirini keçirdi. Muzeyin konfrans zalında baş tutan tədbiri giriş sözü ilə açan Ağstafa Regional Mədəniyyət İdarəsinin rəisi Vüqar Qədirov ölkə başçısı möhtərəm Prezidentimiz cənab İlham Əliyevin sərəncamı ilə bölgəmizdə inşa olunan Azərbaycan Aşıq Sənəti Dövlət Muzeyinin dövlətin aşıq sənətinə, milli mədəniyyətimizə diqqət və qayğısının bariz nümunəsi olduğunu, bu muzeyin dünyada analoqu olmadığını qeyd etdi. Mədəniyyət işçilərinin iştirakı ilə keçirilən tədbirdə idarə rəisi muzeyin gələcək fəaliyyəti, kadr məsələləri və digər məsələlərlə bağlı tövsiyyə və tapşırıqlarını verdi.
Sonra tədbir iştirakçıları muzeyə ekskursiya edərək aşıq sənətini təcəssüm etdirən otaqlar və eksponatlarla tanış oldular.
Sonda xatirə şəkli çəkdirildi.
Son vaxtlar bütün dünyanı narahat edən koronavirusla (COVID-19) bağlı müxtəlif məlumatlar yayılır. Hər kəs bu virusdan qorunmaq üçün yollar axtarır.
Azərbaycanda koronavirusun yayılmasına qarşı ciddi profilaktik işlər aparılır. Son zamanlar universitetlərdə, məktəblərdə, bağçalarda, nəqliyyat vasitələrində, avtobuslarda və insanların kütləvi toplaşdığı istənilən digər yerlərdə dezinfeksiya işləri aparılıb. Bu proses hazırda davam etdirilir.
Bəsit gigiyenaya əməl etməklə koronavirusdan qorunmaq olar.
Koronavirus epidemiyası əsasən hava və damcı yolu ilə keçir. Təbii ki, bu da insanların daha az məsafədə ünsiyyətdə olmasından asılıdır. İctimai yerlərdə, xüsusilə də avtobus və metrodan istifadə edən vətəndaşlar mütləq əllərini tez-tez sabunla yumalıdırlar.
Əgər yumaq imkanı yoxdursa, yanınızda spirt götürün, bununla əllərinizi yusanız kifayət edər. İnsanların çox toplaşdığı yerlərdə az olmağa çalışın.
Bir metrdən artıq təmas olarsa, o zaman yoluxma ehtimalı xeyli aşağı düşür.
Tez-tez əllərinizi su və sabunla yuyun. Öskürdükdən və asqırdıqdan sonra, xəstələrə qulluq edərkən, yemək yemədən əvvəl və sonra, heyvanlar və heyvan tullantıları ilə işlədikdən sonra əllərinizi mütləq yuyun.
Əllər vizual olaraq çirkli göründükdə onları axar su və sabun ilə yuyun. Əlləriniz çirkli görünməsə belə, onları spirt tərkibli təmizləyici ilə silin.
İş yerində oturduğunuz masanın üstünü, üzərindəki telefon, kompüter, klaviatura və digər əşyaları da mütəmadi olaraq dezinfeksiya edici maddələrlə silin.
İş yerində əməkdaşlar, eyni zamanda, oraya ziyarətə gələn şəxslər mütəmadi olaraq əllərini sabunla yumalıdırlar. Nəticədə əllərinizi yumaqla üzərində olan koronavirusu məhv edirsiniz.
Dezinfeksiya maddələri masa ətrafında saxlanılmalıdır.
Yemək bişirdikdən əvvəl və sonra da əllərinizi yuyun. Çiy ət və bişmiş qidalar üçün müxtəlif doğrama lövhələrindən və bıçaqlardan istifadə edin, xəstə və ölü heyvanlar yeyilməməlidir.
Heyvanlara və heyvan məhsullarına toxunduqdan sonra əlləri sabun və su ilə yuyun. Heyvanlar və heyvan məhsulları ilə işləyərkən qoruyucu xalat, əlcək və qoruyucu maska geyinin, işdən sonra qoruyucu geyimləri çıxarın, yuyun və iş yerində saxlayın, canlı vəhşi və ferma heyvanları ilə birbaşa təmasdan çəkinin.
Koronavirusun əşyalar vasitəsi ilə də keçmək ehtimalı var. Virus əşyalar vasitəsilə də keçir. Məsələn, bir əşyanı xəstə istifadə edir və biz də həmin əşyadan istifadə edib əlimizi gözümüzə, burnumuza vursaq, o zaman yoluxa bilərik.
Tövsiyə olunur ki, xəstə insanlarla təmasda olunmasın. Su içərkən də diqqətli olun. Mənşəyi bəlli olmayan sulardan istifadə etməyin.
Tibbi maskalardan istifadə edilsə, daha yaxşı olar. Ancaq ondan istifadənin də müəyyən bir müddəti var. İki saatdan artıq istifadə edilməməlidir. İki saatdan artıq istifadə edilmiş maskalar öz keyfiyyətini itirir.
Sosial şəbəkədə Bakı metrosunda bir şəxsin sərnişinlərə tibbi maska satması ilə bağlı görüntülər yayılıb.
Axar.az xəbər verir ki, sərnişinlər həmin şəxsin maskanı iki manata satdığını bildiriblər.
Məlumat üçün bildirək ki, Prezident İlham Əliyevin xəbərdarlığından sonra ölkədəki apteklər tibbi maskalarla təmin olunub. Həmin maskalar apteklərdə 20 qəpiyə satılır.
Bakı metrosunda çəkilmiş videonu təqdim edirik:
Bakıda və Abşeron yarımadasında martın 5-də havanın dəyişkən buludlu olacağı, yağmursuz keçəcəyi gözlənilir.
Ekologiya və Təbii Sərvətlər Nazirliyinin Milli Hidrometeorologiya Departamentindən verilən məlumata görə, bəzi yerlərdə duman olacaq.
Cənub-qərb küləyi gündüz arabir güclənəcək. Havanın temperaturu Abşeron yarımadasında gecə 5-8, gündüz 11-15, Bakıda gecə 6-8, gündüz 13-15 dərəcə isti olacaq.
Atmosfer təzyiqi normadan yüksək 768 mm civə sütunundan 764 mm civə sütununa enəcək, nisbi rütubət gecə 70-80, gündüz 50-60 faiz olacaq.
Azərbaycanın rayonlarında sabah hava əsasən yağmursuz keçəcək. Səhər saatlarında duman olacaq. Qərb küləyi əsəcək, bəzi yerlərdə arabir güclənəcək.
Havanın temperaturu gecə 2-7, gündüz 15-20, dağlarda gecə 0-5, gündüz 8-13 dərəcə isti olacaq.
Tibbi-meteoroloji proqnoza gəlincə, martın 5-də Abşeron yarımadasında gündüz saatlarında gilavar küləyinin arabir güclənəcəyi gözlənilir ki, bu da bəzi meteohəssas insanlarda narahatlıq yarada bilər.
Pozuntuların qarşısının alınması üçün BNA-nın əlində çox ciddi rıçaqlar var
"Sürücü məsuliyyətsizliyi ilə bağlı halların aradan qaldırılması istiqamətində görülən işlər öz müsbət nəticəsini verir". Bunu yol-nəqliyyat eksperti Azər Allahverənov deyib. O, avtobus sürücülərin ən çox yol verdiyi nöqsanlardan bəhs edib: “Əvvəlki qədər olmasa da, sürücülərin sərnişinlərlə davranışı zamanı və ya hərəkət anında yol verdiyi nöqsanlar təəssüf ki, hələ də müşahidə edilir. Belə halların aradan qaldırılması üçün Bakı Nəqliyyat Agentliyi sərnişinlərə müraciət edərək bildirib ki, qanunazidd davranışlara yol verən sürücülərlə qarşılaşdıqda dərhal qurumun qaynar xəttinə məlumat versinlər. Burada sürücü məsuliyyətsizliyi deyəndə təkcə inzibati xətalar yox, eyni zamanda sürücülərin sərnişinlərlə və ya digər avtobusların sürücüləri ilə mübahisə etməsi, kobud davranması, siqaret çəkməsi nəzərdə tutulur. Bəzən sürücülərin avtobusu dayanacaqda saxlayıb 10-15 dəqiqəlik getməsi, dayanacaqdan kənarda saxlaması kimi qayda pozuntularına da rast gəlirik. Amma hazırda bu qəbildən olan pozuntuların qarşısının alınması üçün BNA-nın əlində çox ciddi rıçaqlar var”.
Ekspert sürücü özbaşınalıqlarının aradan qaldırılması istiqamətində görülən işlərin öz bəhrəsini verdiyini söyləyib:
“Avtobus sürücülərinin məsuliyyətsiz davranışlarının hələlik tamamilə aradan qaldırılmasa da, belə hallar say etibarilə əvvəlkilərdən çox azdır. Yəni sürücülərlə bağlı şikayətlərə baxılması və müvafiq tədbirlərin görülməsi mexanizmi çox işlək vəziyyətdədir. Sərnişindaşıma xidmətini həyata keçirən şirkətlər qarşısında bu məsələ çox ciddi şəkildə qoyulub.
Sürücülərin maarifləndirilməsi, onların kurslara göndərilməsi yenə də davam etdirilməlidir. Məlum məsələdir ki, sürücülər inzibati xətaya yol verdikdə müvafiq qaydada cəzalandırılır. Amma bu kifayət deyil. Sərnişindaşıma ilə məşğul olan şirkətlər də öz məsuliyyətini dərk etməli, hər hansı bir sürücünün hərəkətində bu kimi hallara yol vermək ehtimallarını minimuma endirəcək bir mexanizm qurmalıdır”.
“MediaPost”
Səyyah Tieran Freedman ölkəmizdən xoş duyğularla ayrılıb
Velosipedlə dünya səyahətinə çıxan gənc səyyah Tieran Freedman ölkəmizdən xoş duyğularla ayrılıb. Yol-xeber.az-ın “qafqazinfo”ya istinadən məlumatına görə, bu barədə səyyah sosial şəbəkədə məlumat paylaşıb. Azərbaycanda xoş qarşılandığını, ona qarşı xüsusi diqqət olduğunu söyləyən Tieran buradan xatirələrini heç vaxt unutmayacağını bildirib: “Azərbaycanda gördüyüm qonaqpərvərilik möhtəşəm idi. Hətta polis belə mənə çay və şirniyyat verdi”.
Təxminən ötən ilin iyun aylarından dünya turuna çıxan səyyahın gəzdiyi 12-ci ölkə Azərbaycandır. Norveç, Polşa, Danimarka, Almaniya, Türkiyə, Gürcüstan yolu ilə səyahət edən gənc yol boyu Azərbaycanın bir çox bölgəsində olub. İlk qonaq olduğu rayon Tovuz olub: “Tovuzda yerli bir ailədə qonaq oldum və onlar məni toya apardı. Həqiqətən bu, mənim üçün maraqlı bir hal idi və mən yeni insanlarla tanış olub, fərqli adət-ənənələr gürdüm. Daha sonra Gəncə şəhərində oldum və orada bloqum üçün maraqlı müsahibələr aldım”.
Gəzdiyi ölkələrdə insanlarla sıx ünsiyyət quran Tieran “The Place The Person The Plate” bloqu üçün maraqlı yazılar hazırlayır. Səyyah Gəncədən Bakıya səyahətində Kürdəmirdə də qonaq olub və qaldığı ailənin onu mehriban qarşıladığını deyir: “Daha sonra, məni Kürdəmirə dəvət etdilər. Oraya çatdığım zaman gec olsa da, ailə məni çox mehriban qarşıladı və mənim üçün süfrə açılmışdı. Dolma, lobya şorbası yedim, şirniyyatlardan daddım”.
Bloqqer ilk başda səyahətini Azərbaycanda sonlandırmaq istəsə də, artıq yeni ölkələr kəşf etmək və bu macəranı davam etdirmək istəyir: “300 km-lik çöl mənzərəli yol ilə velosiped sürdükdən, bir gün boyu Xəzərin sahilini izlədikdən sonra paytaxt Bakıya çatdım. Düzü, Xəzərin sahilindəki magistral yoldan dənizə baxanda Türkmənistan və Qazaxıstana sadəcə gəmi ilə getməyin mümkün olduğunu bilmək bir qədər kədərləndirir. 2019 mənim üçün unudulmaz oldu. Bu yolda mənə dəstək olan hər kəsə minnətdaram”.
