 |
|
Təhlükəsizlik kəmərindən istifadə edin
Son günlər respublikanın avtomobil yollarında baş vermiş yol-nəqliyyat hadisələrinin təhlili göstərir ki, qəzalar nəticəsində ölən və xəsarət alanların əksəriyyəti istismar müddəti çox olan, müasir təhlükəsizlik elementləri ilə təchiz edilməmiş köhnə avtomobillərin sürücüləri və sərnişinləridir. Lakin təəssüflər olsun ki, belə avtomobillərin konstruksiyasında bütün oturacaqlar üçün yeganə təhlükəsizlik elementi olan təhlükəsizlik kəmərlərinin nəzərdə tutulmasına və istehsalçı zavod tərəfindən təchiz edilməsinə baxmayaraq, bəzi nəqliyyat vasitələrinin sürücüləri tərəfindən arxa oturacaqların kəmərləri bilərəkdən çıxarılır ki, bu da toqquşma və ya aşma zamanı salondakı insanların həlak olmalarına, yaxud ağır yaralanmalarına səbəb olur. Yol-xeber.az-ın məlumatına görə, belə halların qarşısının alınması məqsədilə Baş DYP İdarəsi bir daha sürücüləri xəbərdar edir ki, mart ayının 15-dən respublika üzrə keçiriləcək təhlükəsizlik tədbirləri zamanı konstruksiyasında təhlükəsizlik kəmərləri nəzərdə tutulmuş avtomobil saxlanılarkən təhlükəsizlik kəmərlərinin çıxarılması halları müəyyən edilərsə, həmin nəqliyyat vasitəsini idarə edən sürücü, kəmərlərin mövcud olduğu, lakin arxa və ya qabaq oturacaqdan asılı olmayaraq hərəkət zamanı sərnişin tərəfindən istifadə edilməməsinə görə isə sərnişinlər inzibati məsuliyyətə cəlb ediləcəklər.
"Ümid edirik ki, hər bir hərəkət iştirakçısı müraciətimizə düşünülmüş şəkildə yanaşacaq, yol hərəkəti qaydalarına ciddi əməl etməklə özünün və doğmalarının həyatını təhlükə ilə qarşı-qarşıya qoymayacaq".
Avtomat ötürücü qutusu olan avtomobillər istifadəçilərin işini asanlaşdırır
Avtomobillər gündəlik həyatımızın əvəzedilməz hissəsinə çevrilib. İlk dəfə avtomobil alanlar, hər şeydən əvvəl, sürət qutusunun mexanika və ya avtomat seçilməsi ilə maraqlanırlar. Avtomobillərin avtomatötürücü və mexanika növləri daim bir-biri ilə qarşıladırılaraq müqayisə edilir. Kimisi mexanikaötürücü qutulu avtomobillərin, bəziləri isə avtomat trasmissiyanın rahat olduğunu bildirir.
Dünyada ilk avtomatötürücü qutusu olan avtomobil 1958-ci ildə Variomatic firmasına aid olub. 1975-ci ildə isə Variomatic, avtomat trasmissiya istehsalını Volvo firmasına satıb.
Avtosfer.az xəbər verir ki, nəqliyyat eksperti Elməddin Muradlı TED.az-a ilk avtomat trasmissiyanın Azərbaycana 1980-ci ildə gətirildiyini bildirib: “Həmin vaxtlarda Qaz-31 markalı avtomobildə belə bir mexanika quraşdırılıb. 1990-cı illərdən isə Mercedes və BMW - nin də avtomatötürücü qutusu olan modelləri ölkəmizə gətirilməyə başlayıb. Ardınca Toyota, Volvo markalı avtomobillərin eyni növ modelləri də gətirilib. Hətta həmin vaxtlarda Bakıda sükanı sağda olan Volvo və Toyota avtomobillərinin belə modelləri də çox idi. Sonradan sükanı sağda olan avtomobillərin gətirilməsinə qadağa qoyulub. Bu gün belə maşınlar istismar olunur, amma ölkəyə gətirilməsi qadağandır”.
Ekspert qeyd edib ki, avtomatötürücü qutusu olan avtomobillər bir növ istifadəçilərin işini asanlaşdırır: “Bu, xüsusən də qadın sürücülər üçün daha asan və əlverişli üsuldur. Bu vasitə ilə onlar həm tez-tez ötürücü qutuları dəyişmirlər, həm də ayaqları yorulmur. Mexanikaötürücü qutusu olan avtomobillərdə pillələri dəyişmək üçün ayaqlardan daha çox istifadə edirik. Mexanikaötürücülərdə qaz və əyləclə birlikdə, 3-cü pedala da ayaq basmaq lazımdır ki, pillələri dəyişə bilək. Xüsusilə, xanımlar belə şeyləri sevmirlər. Düzdür, xanım sürücülərimiz arasında mexanikaötürücü qutusu olan nəqliyyat vasitələrindən istifadə edənlər də var. Özüm də şəhərdə VAZ 2107, Niva, Tofaş markalı avtomobilləri idarə edən xanımların şahidi olmuşam. Mexanikaötürücü qutusu olan nəqliyyat vasitələrinin təmir xərcləri nisbətən çox olur. Buna görə də avtomatötürücü qutusu olan maşınlar şəxsi nəqliyyat nəqliyyat vasitələrini idarə edənlər üçün daha sərfəlidir. Düzdür, qarlı-buzlu yollarda çətinlik törətsə də, avtomatötürücü qutusu olan maşınların üstünlükləri danılmazdır. Bunu nəzərə alaraq, Bakı Şəhər Dövlət Yol Polisi İdarəsinin təklifi ilə yol hərəkəti haqqında qanuna da dəyişiklik edildi”.
“Keçmiş millət vəkili, indiki Dövlət Miqrasiya Xidmətinin rəisi Vüsal Hüseynov bu layihəni irəli sürmüşdü. Daha sonra Milli Məclisdə bu məsələ qaldırıldı. Yeni sürücülük vəsiqələri alınarkən, hansı nəqliyyat vasitəsi üzrə imtahan verməklə bağlı qayda irəli sürüldü. İmtahanda iştirak edənlər, istəsələr, Avtomat transmissiyanı, ya da Mexanikanı seçə bilirlər. Əgər imtahan verən şəxs Mexanika transmissiya üzrə imtahandan uğurla keçibsə, deməli Avtomat transmissiyanı da idarə edə bilər. Lakin əksidirsə, Avtomat transmissiya üzrə imtahan vermisinizsə, mexanikadan istifadə edə bilməzsiniz. Qeyd edim ki, bunun cəriməsi 100 manatdır” - deyə, ekspert, əlavə edib.
Koronavirus təhlükəsi iyunda bitəcək və dünya ölkələri arasında iqtisadi əlaqələr aktivləşəcək.
Bunu Milli Məclisin iqtisadi siyasət, sənaye və sahibkarlıq komitəsinin sədri Tahir Mirkişili bildirib.
Onun sözlərinə görə, son günlərdə neftin qiymətinin enməsi ilə bağlı iqtisadiyyatda və əhalidə müəyyən bir ajiotaj yaranıb: “Amma təlaşa ehtiyac yoxdur.
Çünki Azərbaycan hökumətinin apardığı tədbirlər nəticəsində iqtisadiyyatımızın dayanıqlılığı artıb. Həyata keçirilən islahatlar nəticəsində qeyri-neft sekktorunun payı ölkə iq tisadiyyatında payı 60 faiz təşkil edir. Tədiiiyyə balansı 5,q milyard dollar təşkçil edir. Nağd pul kütləsi 5 dəfə artıqdır. Bu gün banklarda əhalinin xarici valyutaya olan ehtiyacını ödəmək üçün yetərincə valyuta ehtiyatı var. Odur ki,iqtisadiyyatın xarici şoklardan qorunması üçün immunitet yaranıb. Neftin qiymətinin 30-35 dollar olması büdcə gəlirlərinin 270-340 milyon dollar azalda bilər ki, bu da büdcənin gəlirlərində çox cüzi faizdir. Son iki ayda büdcəyə proqnozlaşdırılandan 250 milyon manatəlavə vəsait daxil olub. Bu da göstərir ki, neftin qiymətinin düşməsi büdcə gəlirlərinə elə ciddi təsir göstərməyəcək”.
Çinin Uhan şəhərində koronavirus xəstələri üçün nəzərdə tutulan tibb müəssisəsinin sonuncusu da bağlandı
“Ölkə.Az” xarici mətbuata istinadən xəbər verir ki, xəstəxanadan verilən məlumata görə, bütün müalicə olunanlar sağaldığına görə evlərinə buraxılıblar. “Artıq koronavirus təhlükəsi yoxdur”,- deyə onlar son məlumatlarında açıqlayıblar.
Xəstəxananın həkimləri isə sevinclərini binanın qarşısında maskalarını çıxararaq qeyd ediblər.
Ölkədə bütün ictimai yerlərdə dezinfeksiya işləri aparılır. Məktəblər bağçalar, avtovaqzallar,idman kompleksləri və s. İnsanların daha çox toplaşdığı çay evlərində isə nədənsə dezinfeksiya işləri hələki gözə dəymir. Bununla bağlı sahibkarların bəzilərindən müsahibə almaq istəsək də razılq verən olmadı. Şəhər sakinləri isə vəziyyəti belə izah etdi.
ARB TV–nin efirində yayımlanan “Günə doğru” verilişində məsələ ilə bağlı sujet yayımlanıb.
Xaçmaz sakini: “Stəkanlarda çay dənləri qalır. Çalışırıq ki, natəmiz yerlərə getməyək”.
Çay evlərinin bəziləri səliqli təmiz olsa da sınıq, köhnə üzəri çirkab olan, hisli paslı çayniklərdə müştərilərə xidmət edənlər də az deyil. Bir masada hər gün onlarla müştərinin oturduğunu stəkanlardan müxtəlif insanlarn istifadə etdiyini nəzərə alsaq virusun yayılma riskini anlamaq mümkündür. Girdiyimiz bəzi çay evlərində isə siqaret tüstüsündən nəfəs almaq belə mümkün deyildi.
Xaçmaz sakini: “Siqaret iyindən getmirik çayçılara”.
Tibbi mütəxəsssilər bildirir ki, qablar və masalar gün ərsində ən azı iki dəfə xüsusi məhlullarla silinməlidir. Belə durumlarda isə hər dəfə stəkanlar züsusi məhlulla və qaynar suda yuyulmalıdır. Lakin əksər çay evlərində stəkanların üzərindən sadəcə su axıdılmaqla proses bitir.
Əlniyaz Ramazanlı – Həkim: “90 % əməl olunmur. Xüsusi ximikatlar olmalıdı, qablar yuyulmalıdı”.
Aidiyyətı qurumlar vaxtaşırı çayxanalarda və iaşə obyektlərində monitorinqlər keçirir. Belə sahibkarlar fakt aşkarlandıqda cəzalandırılır. Lakin vətəndaşlar da diqqətli olmalı məsələyə ciddi yanaşmlı, sanitar gigiyenik vəziyyətə nəzarət üçün ictimai qınağı gücləndirməlidir.
İctimai nəqliyyatdan istifadə hansı hallarda təhlükəlidir?
Yeni koronavirus sərhəd tanımadan az qala dünyanın hər nöqtəsinə yayılır. Virusun yayılma coğrafiyası genişləndikcə hökumətlər qabaqlayıcı tədbirlərin sayını artırırlar. Ən çox da hərəkəti məhdudlaşdıran tədbirlərə əl atılır. Əslində insanlar özləri də həm ölkədaxili, həm də xarici səfərlərdən ehtiyat edirlər. Amma istənilən halda ictimai nəqliyyatdan istifadə davam etməkdədir.
"MediaPost" xəbər verir ki, Ümumdünya Səhiyyə Təşkilatı başda olmaqla, bir çox qurumlar əhaliyə insanların sıx toplaşdığı yerlərdən uzaq durmağı tövsiyə edir. Belə olan halda təyyarələr və qatarlardan istifadə etmək, gəmi ilə səyahətə çıxmaq, metro və avtobuslarla getmək nə dərəcədə təhlükəlidir?
QATARLAR VƏ AVTOBUSLAR...
Mütəxəssislər deyir ki, hələlik yeni koronavirusun necə yayıldığına dair birbaşa göstəriş yoxdur. Sadəcə o məlumdur ki, oxşar viruslar xəstələr asqıranda və ya öskürəndə hava-damcı yolu ilə ötürülür. Yaxud virus yoluxmuş səthdən də keçə bilir.
Göründüyü kimi, koronavirus sıradan qrip virusu kimi havada üzmür. Bu səbəbdən də yoluxma yaxın təmas tələb edir. Məsələn, Britaniya səhiyyə sisteminə görə, yoluxmuş insandan 2 metrdən az məsafədə (ən azı 15 dəqiqə) olmaq sıx təmas deməkdir.
Ona görə də hər hansı qatarda və ya avtobusda potensial yoluxma riski bu nəqliyyat vasitələrinin sərnişinlərlə nə dərəcədə dolu olmasından asılıdır. Sıxlığı yaradan amillər isə səfərin vaxtı, marşrutudur.
Son illər aparılan araşdırmalar göstərir ki, adətən, insanlarla dolu olan London metrosunda respirator xəstəliklərə tutulma şansı xeyli yüksəkdir. Lakin pik saatlarda səyahət etmirsinizsə və olduğunuz vaqonda və ya avtobusda az sayda sərnişin varsa, müvafiq olaraq risk də azalmış olur.
İçərinin nə qədər yaxşı havalandırıldığı və təmizləndiyi, həmçinin yolunuzun nə dərəcədə uzun olduğu da əhəmiyyət daşıyır.
Qlobal Sağlamlıq İnstitutunun əməkdaşı Lara Qosenin sözlərinə görə, koronavirusdan qorunmaq üçün potensial yoluxmuş sərnişinlər və səthlərlə təması minimuma endirmək vacibdir: "Ona görə də pik saatlarda nəqliyyatdan istifadədən çəkinin".
Məsələn, Britaniya hökuməti hələ ki əhaliyə ictimai nəqliyyatdan imtinanı tövsiyə etməyib. Lakin Rusiyada əhaliyə pik saatlarda ictimai nəqliyyatdan istifadə etməməklə bağlı çağırış edilib.
Ümumdünya Səhiyyə Təşkilatının koronavirus üzrə xüsusi məsləhətçisi Devid Nabarro BBC-yə bildirib ki, ictimai nəqliyyatda təhlükəsizlik məsələsi hələ yaxşı öyrənilməyib. Lakin əldə olunan məlumatlar onu göstərir ki, ani təmaslar (məsələn, nəqliyyatda sərnişinlər arasında) virusun "ən vacib ötürmə mənbəyi" deyil.
TƏYYARƏ DAHA RİSKLİDİR?
Təyyarədə virusa yoluxma riskinin daha böyük olduğu deyilir. Səbəb kimi də o göstərilir ki, sərnişinlər "köhnə" hava ilə nəfəs alırlar. Mütəxəssislər isə deyir ki, əslində, təyyarədəki hava ofislərdəki havadan daha təmizdir. Göyərtədəki havanın qatarda və ya avtobusda olduğundan daha təmiz olduğu isə dəqiqdir. Təyyarədə sərnişin sıxlığı daha yüksək olsa da, oradakı hava daha tez-tez yenilənir.
ABŞ-ın Perdyu Universitetinin müxtəlif nəqliyyat vasitələrində havanın keyfiyyətini araşdıran professoru Tsinyan Çenin sözlərinə görə, təyyarədəki hava hər 2-3 dəqiqədən bir tamamən dəyişir. Müqayisə üçün deyək ki, kondisionerli binalarda bu proses hər 10-12 dəqiqədən bir baş verir.
Bunun səbəbi təyyarələrin yüksək səmərəli toz-hava filtrləri (Hepa) ilə təchiz olunmasıdır. Kondisioner sisteminə, o cümlədən adi filtrlərə nisbətən onlar daha kiçik hissəcikləri də çəkə bilirlər.
Bu filtrlər göyərtə xaricindəki havanı çəkir və onu içəridəki hava ilə qarışdırır. Deməli, istənilən vaxt göyərtədəki hava yarıtəzə olur. Yeri gəlmişkən, adi kondisioner sistemi yalnız köhnə havanı (iqtisadi maraqlara görə) təkrar istifadə edir.
Asqırma və öskürək zamanı havaya girmiş viruslu mikrodamcılara həm nəfəs almaqla, həm də yoluxmuş bir səthə (istər insan əli, istərsə də qapının qulpu və s.) toxunaraq yoluxa bilərsiniz.
Hələ 2018-ci ildə Atlantadakı Emori Universitetindən Viki Herzberq qitələrarası uçuşlar edən təyyarələrin göyərtəsindəki səthlərdən nümunələr götürmüş və bildirmişdi ki, mənzərə demək olar ki, insanların qonaq otaqlarındakı mənzərə ilə eynidir.
Başqa sözlə, təyyarələrlə və nəqliyyatın digər növləri və obyektlər arasında praktiki olaraq heç bir fərq yoxdur.
Deməli, nəqliyyatın yaratdığı riskləri ümumiləşdirməyə dəyməz. Çünki bu riskləri azaldan və ya artıran bir çox amil var. Məsələn, uzun məsafəli reyslərdə sərnişinlər göyərtədə daha çox hərəkət edirlər və içəridə xəstə olduqda yoluxma riski ciddi şəkildə artır.
Ümumdünya Səhiyyə Təşkilatı bildirir ki, xəstə sərnişinin qarşısındakı, arxasındakı və yanındakı oturacaqlar yoluxma baxımından ən riskli yerlər hesab olunur. Lakin bir faktı da nəzərə almaq lazımdır ki, 2003-cü ildə Şiddətli Kəskin Tənəffüs Sindromu (SARS) epidemiyası zamanı xəstə sərnişinin uçduğu təyyarədə yoluxanların 45 faizi "təhlükə zonasından" kənarda oturmuşdular.
Belə olan halda standart tövsiyələrə müraciət etmək lazım gəlir - əllərinizi daha tez-tez yuyun, səthləri dezinfeksiya edin, birdəfəlik əl dəsmalına asqırın və ya öskürün.
Hava səyahətinin ən təhlükəli tərəfi odur ki, təyyarələr potensial yoluxucu insanları dünyanın istənilən nöqtəsinə tez bir zamanda çatdıra bilir. Bu da öz növbəsində virusun yayılma coğrafiyasını genişləndirir.
KRUİZ GƏMİLƏRİ
Turistlərin daşınmasında dəniz nəqliyyatının da böyük rolu var. Fevral ayında Yaponiyada "Diamond Princess"in bütün sərnişinləri karantin altına alındıqdan sonra kruiz gəmilərinin yaratdığı təhdid gündəmə gəldi.
Gəmi Yaponiyanın Yokoqama limanında iki həftə karantində saxlanıldı. Gəmidəki 3700 nəfərdən 705-ində koronavirus aşkarlandı. Nəticədə Yaponiya hökuməti həm sərnişinləri, həm də heyət üzvlərini karantin altına aldı. Yeri gəlmişkən, karantin sonrası gəmini tərk edənləri tibbi heyət qarşıladı və onların üzərinə dezinfeksiyaedici maddələr püskürdüldü.
3500 sərnişinli digər kruiz gəmisi "Grand Princess" Kaliforniya sahillərində saxlanıldı. Və onlarla sərnişin koronavirus testindən keçdi. Təyyarələrdən fərqli olaraq bu cür gəmilərdə insanlar çox məhdud bir məkanda uzun müddət təmasda olurlar. Bu da yoluxma riskini artırır.
Professor Çenin fikrincə, kruiz gəmilərində kondisioner sistemi daxildəki və göyərtə xaricindəki havanı qarışdırır. Bu sistem enerjiyə qənaət baxımından tətbiq olunur: "Problem ondadır ki, bu cür sistemlər 5 min nanometrdən kiçik hissəcikləri filtrdən keçirə bilmir. 2003-cü ildə SARS yayılanda virusların diametri 120 nanometrdən çox olmurdu və kondinsioner sistemi sayəsində onlar bütün gəmi boyunca sərbəst gəzə bilirdilər. Kruiz gəmiləri qənaət etmək (havadan təkrar istifadə ilə) əvəzinə, xarici havadan istifadə etsələr, yoluxma riski də azalar".
SON DURUM
Son məlumatlara görə, hazırda dünyada 113 mindən çox (Çində 81 min) yoluxma qeydə alınıb. Çindən kənarda da koronavirusa yoluxanların sayı artıb - son gün ərzində 4125 nəfər.
Xəstəlikdən ölənlərin sayı 4000-dən (Çində 3000-dən) bir qədər çoxdur. Beləliklə, ölüm nisbəti təxminən 3,5 faizdir. Yoluxanların yarıdan çoxu isə (63 mindən çox insan) artıq sağalıb.
Tərcümə "MediaPost"a məxsusdur
İsraildə COVİD-19-un müalicəsi üçün vaksin hazırlanıb.
Bu barədə ''Haaretz'' xəbər verib. Məlumata görə, “Ness Ziona” Bioloji Tədqiqatlar İnstitutunun elm adamları yaxın günlərdə bu barədə açıqlama verəcəklər.
Qeyd edək ki, Ümumdünya Səhiyyə Təşkilatı koronavirusu pandemiya elan edib.
Lateks əlcəklər koronavirus infeksiyasından qorunmaq üçün ən təsirli üsullardan biridir.
Bunu Borovski Birinci Moskva Dövlət Tibb Universitetinin (MGMU) direktoru Seçenova İrina Makayeva deyib. Bildiyimiz kimi infeksiya yoluxmuş bir cisimə toxunduqdan sonra baş verir, insan əlləri ilə üzünə toxunur – burnunu cızır və ya gözlərini ovuşdurur, bununla da virus yoluxması baş verir. Lateks əlcəklər isə virusa yoluxmuş şəxsin çılpaq əllərlə toxuna biləcəyi cisimlərə (məsələn, qapı tutacaqlarına) toxunmamaq üçün küçədə və ictimai yerlərdə geyilmək üçün ən gözəl vasitədir.
Qeyd edək ki, koronavirus 4,5 m məsafədə yoluxa bilər, eyni zamanda ən az yarım saat əvvəl xəstə bir insanın olduğu otaqda da virusa yoluxma riski yüksəkdir. Alimlər, həmçinin koronavirusdan ölüm üçün əsas risk faktorlarının yaş və xroniki xəstəliklər olduğunu müəyyən etmişdilər. Statistikaya görə, koronavirusdan ölənlərin orta yaş həddi 69-dur və xəstələrin yarısında xroniki xəstəliklər olmuşdur. Virusa yoluxanların əksəriyyəti yüksək təzyiq və diabetdən əziyyət çəkib. Tədqiqatçılar qeyd edib ki, virus zəifləmiş orqanizmdə daha sürətlə yayıla bilir.
Əməkdar artist Adil Zeynalov vəfat edib.
Bu barədə APA-ya aktyorun yaxınları məlumat veriblər.
A.Zeynalov dünən gecə Bakıda Topçubaşov adına xəstəxanada dünyasını dəyişib.
O, Lənkəranda dəfn ediləcək.
Qeyd edək ki, A.Zeynalov Lənkəran Dövlət Teatrının aktyoru idi.
Azərbaycanda bu günə gözlənilən hava şəraiti açıqlanıb.
Ekologiya və Təbii Sərvətlər Nazirliyinin Milli Hidrometeorologiya Departamentindən Bakıda və Abşeron yarımadasında martın 12-də havanın dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Gecə və səhər bəzi yerlərdə duman olacaq. Şimal-qərb küləyi əsəcək. Havanın temperaturu Abşeron yarımadasında gecə 6-9, gündüz 13-18, Bakıda gecə 7-9, gündüz 15-17 dərəcə isti olacaq.
Atmosfer təzyiqi 761 mm civə sütunundan 764 mm civə sütununa yüksələcək, nisbi rütubət gecə 70-80, gündüz 55-60 faiz təşkil edəcək.
Azərbaycanın rayonlarında sabah hava əsasən yağmursuz keçəcək. Ayrı-ayrı yerlərdə duman olacaq. Qərb küləyi əsəcək, ayrı-ayrı yerlərdə arabir güclənəcək.
Havanın temperaturu gecə 3-8, gündüz 20-25, dağlarda gecə 3-8, gündüz 12-17 dərəcə isti olacaq.
Tibbi-meteoroloji proqnoza gəlincə, martın 12-də Abşeron yarımadasında meteoroloji amillərin zəif və mülayim tərəddüdü meteohəssas insanlar üçün əsasən əlverişlidir.